Vukei Ira na Gone Mera Vakavakarau ki na Papitaiso

Mai vei Lucy Stevenson

Mekasini ni Lotu

E rawa ni da dau masumasu, vakainaki, ka dauvosota ni da vukei ira na luveda me ra taura na ikalawa oqo ena salatu ni veiyalayalati.

iVakaraitaki mai vei Bryan Beach

Na papitaiso kei na vakadeitaki sa dua na ivakatakilakila taleitaki vei ira na gone ena Lotu. Me vaka e vuqa era dau vakanamata ki na cakacaka vakalotu oqo, sa dau matau talega vei ira na gone me ra lomaleqa se rere.

Me vaka e dua na dauvolavola ni iTokani, na mekasini ni Lotu me baleti ira na gone, au sa rogoca e vuqa na italanoa ni gone era rere ni ra sega ni tu vakarau me ra cakava na veiyalayalati oqo. Eso era lomaleqataka ni sega ni dua na nodra ivakadinadina kaukauwa sara. Eso era rerevaka na wai. Ka so era vakila e dua na veivakasaurarataki vakasakiti me ra vinaka sara.

Oqo e vica na sala me vukei kina na luvemu me yalo vakavakarau ka yalonuidei me taura na nona ikalawa tarava ena salatu ni veiyalayalati.

Veivakavulici Vakainaki

E rawa ni rawarawa me da vakasamataka na papitaiso me dua na sokalou ni na malanivosa se dua ga na ka e yaco ni sa yabaki walu o luvemu. Ia e dina sara, na papitaiso e dua na digidigi Tabu, ka kena ibalebale ni dodonu me ra kila na vuna e bibi kina. Na vakavulici ira vakainaki e rawa ni ra vukea me vakaibalebale vakalevu cake na papitaiso (ka lailai sobu na kena rerevaki). Vakavulici ira ena sala vata ga o na vakavulica e dua na tamata sa vulica tiko me kila baleta na Lotu ni se bera ni papitaiso.

Sa ka bibi kina vei keda meda vakavulici ira na gonelalai me baleta na veiyalayalati era na vakayacora ena papitaiso. Ka sai koya oqo na itukutuku vinaka, oqo e sega ni dua na ka me da tovolea me cakava (se dodonu me da cakava) me bogi taucoko se ena dua na macawa. Na vulici tudei ni kosipeli ena nomu itikotiko sa sala vinaka duadua me vukea na luvemu me vakavakarau ki na papitaiso. Ia, e vica na ka ena veivuke sara vakalevu mo vakanamata ki na ni roro voleka mai na papitaiso ni luvemu:

• Ena kena ivakarau rawarawa, me veivosakitaki na kena ibalebale me da papitaiso o ya me da yalataka me da muri Jisu Karisito.

• Wilika me baleta na papitaiso ena ivolanikalou, me vaka na Mosaia 18:8–10. Vakamacalataka na veitikina me kilamatata kina na luvemu ka na rawa ni vakavulica lesu tale vei iko na kena vakasama eso. Me kena ivakaraitaki, e dua na goneyalewa a se qai papitaiso walega e Awai, e Amerika, a vakamacalataka na “colata vata na nomudou icolacola” me vaka noda vukei ira na tamata kecega ena veigauna kece era gadreva kina na veivuke. ”

• Raica mo veivosaki vata kei ira me baleta na isolisoli ni Yalo Tabu, ka wasea na veika o sa sotava ena gauna sa vakalougatataka kina na nomu bula na Yalo Tabu.

Eso na gone era na leqataka beka na papitaiso baleta ni ra sega ni nanuma ni tiko vei ira e dua na ivakadinadina kaukauwa sara. Vukea na luvemu me nanuma tiko na veika vinaka era sa sotava mai ena nodra cakava e dua na ka ena yalololoma, lagasere ena Lalai, se veivosakitaka na kosipeli. Vakayaloqaqataki ira me ra vakasamataka na sala eso era kila kina ni lomani ira na Tamada Vakalomalagi. Vakamacalataka ni veika kece oqo sa itekitekivu ni dua na ivakadinadina ka na tubu cake na nodra ivakadinadina ni toso tiko na gauna ena nodra cakava tikoga na digidigi vinaka.

Vakaraitaka na Veika mo Namaka

Kevaka e lomaleqa o luvemu me baleta na papitaiso — se kevaka sara mada ga e sega ni vakakina— ena rawa ni veivuke me veivosakitaki na veika me namaki. E dua na vanua vinaka me tekivu kina o ya na nodra vakarautaki ki na veivakatarogi era na sotava kei na nodra bisopi se peresitedi ni tabana. Na vukei ni luvemu me sauma na taro vakaoqo, “Na cava e bibi kina na papitaiso?” kei “Na cava na kena ibalebale mo taura vei iko na yaca i Karisito?” ena rawa ni vukei ira me ra vakavakarau ki na veivosaki oqo. Vukea na luvemu me nanuma tiko ni o bisopi e tiko e kea me vukei ira me ra vakarau vinaka, ka sega ni veivakatarogi ni kila ka se me biuti ira ena dua na vanua dredre. Ka mo nanuma tiko, o na rawa ni tomani luvemu ena veivakatarogi oqori, kevaka e gadrevi.

E dua tale na ka me vakarautaki kina na luvemu sai koya na veika vakayago mo namaka ena siga ni papitaiso. Vakaraitaka vei ira na ivakarau me ra tucake tu kina ena tobu. E rawa saraga ni o sureta na lewe ni matabete ka na papitaisotaka na luvemu me vakatovotovotaka na ivukivuki vakayago ni papitaiso ni rau setu e vanua mamaca, me kila kina na luvemu na veika vakilai ni tonia sobu ka laveti cake tale. Vakamacalataka na cava ena yaco ena veivakadeitaki.

Kevaka e rere na luvemu ni vaka dromuci e loma ni wai okata ena masumasu na sala eso e rawa ni o vukei ira kina me uabaleta na rere o ya ni roro voleka mai na gauna ni papitaiso. E rawa beka ni o sarava kei luvemu e dua tale me papitaiso me raica se sa vakacava na kena lekaleka walega na gauna ni veidromuci e wai. E rawa beka ni o drau vakatovotovotaka kei luvemu mo drau bonota na ucumudrau ka nunu vata na matamudrau ena wai me vica na sekodi ena dua na gauna. Ena rairai tiko beka e dua ena nomu iwasewase e dau vakavulici ira na gone na qalo ka rawa ni soli ivakasala. Se cava ga o cakava, vakadeitaka mo cakava oqori ena loloma kei na vosota.

Na levu ga ni nona vakarautaki koya e dua na gone me vakila na veika matailalai ni papitaiso, na levu ni nodra rawa ni kune vakacegu ka vakanamata ki na veiyalayalati vakayalo era sa na cakava tiko.

Vakanamata ena Toso, ka Sega ena Vinaka Sara

Ena so na gauna, e rairai baleta ni da dau veivosakitaka vakalevu na ivakarau ni veivakasavasavataki ni papitaiso, era dau taura cala na gone ka nanuma ni dodonu mera na vinaka sara ni oti na cakacaka vakalotu oqo. E dua vei ira na italanoa matau duadua eda dau rogoca vua ena iTokani sa ikoya na taqaya e dau sotava e dua na gone ni cakava e dua na cala ena imatai ni gauna ni oti nona a papitaiso. Na veiba kei na dua na tacina se guilecava me cakava e dua na itavi dau vakavuna me ra vakila ni ra sa vakacacana na yalo vinaka me tawamudu!

Vaka itubutubu ka iliuliu, sa ka bibi dina me da vukei ira na luveda me ra kilamatata sara na ivakavuvuli ni veivutuni. Era kila tiko beka na luveda ni noda kila na noda cala kei na noda vuli mai kina e sa tiki tiko ni ivakarau eda vuli ka tubu cake kina ena vuravura oqo? Era kila tiko beka ni rawa ni ra masuta na veivosoti ena dua ga na gauna? Ka ena gauna era dau taura kina na sakaramede ena veimacawa, era sa vakavouia tiko na veiyalayalati era a vakayacora ena papitaiso? Vakadinadinataka ni madigi me da veivutuni e sa dua na veivakalougatataki ka isolisoli. Na papitaiso e sega ni baleta na vinaka sara ia baleta na noda curuma yani na salatu ni veiyalayalati ka taura tiko na ikalawa e veisiga me da vakataki Jisu Karisito vakalevu cake.

Dua na itekitekivu totoka

Me isosomi ni noda dau raica na papitaiso kei na veivakadeitaki me vaka e icavacava ni lakolako, sa rawa meda vukei ira na luveda mera raica ni sa dua na itekitekivu totoka—na itekivu ni dua na bula vou vakadua na tisaipeli ni veiyalayalati i Jisu Karisito. Se na vakila beka na luvemu na nanamaki, lomaleqa, se vakalailai mai vei rau ruarua oqori, e rawa ni o vakadeitaka ni ra sega ni lako duadua tu ena salatu oqo. Ena noda dau masumasu, vakainaki, ka dauvosota, sa rawa ni da vukei ira na luveda me ra vakila na reki ni ra taura na ikalawa lesu oqo ki na nodra itikotiko vakalomalagi.