Ko ni sa Kidavaki mai ki na iLavelave Oqo

E dua na iVolatabaki Vou me baleta e dua na Lotu e Vuravura Raraba

Kemuni na taci keitou kei na ganei keitou lomani,

E rawa ni ra kunei na lewe ni Lotu i Jisu Karisito ni Yalododonu Edaidai ena veivanua e vuravura raraba. E dina ga ni da vosataka e vuqa na vosa, eda sa duavata ena noda sasaga meda muria na iVakabula, ka da reki ni da kila ni da sa luvena kece sara na Kalou.

Mai na veisiga taumada ni Lotu vakalesui mai, na ivolatabaki eso me vaka na mekasini ni Lotu era sa dau tokoni ira tu na lewenilotu ena nodra veisasaga me ra vuli, bula, ka wasea na kosipeli i Jisu Karisito. Na itukutuku veivakauqeti eso sa dau vukei ira na lewenilotu mera sema vata kei ira na iliuliu ni Lotu kei ira vakataki ira. Ena gagadre me dulaka yani na veivakalougatataki oqo vei ira e vuqa tale na luve ni Kalou, keitou marautaka me wasea na imatai ni ilavelave ni Liaona vou oqo vata kei iko.

Na veisau tale eso ki na mekasini ni Lotu e oka kina na kena tabaki vou me baleti ira na gonelalai kei na itabagone e vuravura raraba. Na mekasini yadua oqo—na Liaona, Me iSakisaki ni iTabagone, kei na iTokani—eratou na cakacaka vata kei na ivurevure ni vuli ivolanikalou eso ni Lako Mai, Mo Muri Au ka tokona na vulici ni kosipeli ena nomu itikotiko. Era sa na tu vakarawarawa talega na mekasini oqo ena veisala eso vakalivaliva.

Na inaki ni mekasini ni Lotu e se okoya tikoga: me vukei ira na luve ni Kalou me ra saumaki vakalevu cake mai ki na nodra iVakabula, o Jisu Karisito. Keitou vakavinavinakataka na nomuni gagadre mo ni vulica ka bulataka na kosipeli, ka keitou kila ni na vukei kemuni na mekasini eso oqo ena sasaga oqori.

Wekamuni dina,

Na Mataveiliutaki Taumada