Lako Mai, Mo Muri Au: Vunau kei na Veiyalayalati 18–19 Vunau kei na Veiyalayalati 18–19
Na Talei ni Yalo ni Tamata Yadua
Na cava eda sa rui yaga vakalevu sara kina vua na Tamada Vakalomalagi?
Ena dua na gauna walega oqo au a vakauqeti meu semalesu kei na dua na matavuvale ka keirau a vakavulica ka papitaisotaka kei na noqu itokani ena gauna au a se daukaulotu gone kina ena sivia na 40 na yabaki sa oti mai Brussels, Belgium. A sa balavu sara toka na gauna au qai bau a vosa tale kina ki vei iratou.
Mai na veivakurabuitaki ni tekinolaji ni gauna oqo, au a vaqarai tinadratou na matavuvale oqo ena sala ni vakaitukutuku raraba. A rawa kina ni dua na neirau veivosaki totoka kei koya ena vidio ni veitalanoaa. Keirau a taleva lesu ena veitalanoa na veika sotavi tabu keitou a wasea ena vica vata na yabaki sa oti ni a vulica tiko na nona matavuvale na kosipeli vakalesui mai.
A sega soti ni vinaka sara na itutu ni nona bula, ka sa tawasei koya mai na nona matavuvale.na ituvaki eso Ni keirau veitalanoa tiko, au vakila na loloma titobu ni Tamada Vakalomalagi kei na iVakabula vua na marama vinaka oqo. Au vakila na nona yaga cecere tawamudu, dina ga ni sa vaka me ciri tani o koya mai na Lotu. Au vakaraitaka na noqu lomani koya ka vakadinadinataka ni lomani koya na Kalou ka sa dau nanumi koya. E tonawanawa na matai keirau ena neirau vakaraitaka na neirau veilomani vakai keirau. Keirau a yalataka me keirau na dau veitaratara vakawasoma. Au vakavinavinaka vakalevu sara ni a vakauqeti au na Kalou dauloloma ka kila na ka kecega meu dolele yani vua na noqu itokani lomani ena siga o ya.
Na “Cava na vuna” ni loloma ni Kalou.
Ena gauna a vakatarogi kina o Nifai mai vua e dua na agilosi baleta na lomasoli ni Kalou me lako sobu mai , a sauma o koya ena yalomalumalumu, “Au kila ni sa lomani ira na luvena; Ia, au sa sega ga ni kila na ibalebale ni veika kece” (1 Nifai 11:17). Au dau vakananuma wasoma na sala a mai kila kina o Nifai na dina rawarawa, totoka oqo: na Kalou e lomani ira na luvena E matata ni a kila tu o koya na ivunau i Karisito me vaka erau a vakavuvulitaka na nona “itubutubu yalovinaka” (1 Nifai 1:1). Ia a kila talega o koya na “cava na vuna” ni iVakabula. Ia na cava na “cava na vuna o ya?”
Na cava na vuna a lomasoli kina na Kalou me solia na luvena me isoro? Na cava na vuna a talai keda mai kina eke o Koya me da vakadinadinataki ka vakatovolei? Baleta, me vaka a vakatavulici ena dua na dina totoka e tautauvata, “Sa ka talei ena mata ni Kalou na yalo ni tamata” (Vunau kei na Veiyalayalati 18:10).
Na cava na vuna eda sa yaga vakalevu sara kina Vua? Me vaka na kena itovo, baleta ni da Luvena e lomani keda o koya. Ia ena vica na tikina ka tarava, e vakamacalataka kina o Koya na isolisoli cecere sa soli vei keda yadua ena vuku ni Nona lomani keda—na Luvena e Duabaug a Sa Vakatubura, o Jisu Karisito. A tala maio koya na Luvena me mai “mate vakayago; o koya sa mai colata kina na nodra rarawa na tamata kecega, me rawa vei ira na tamata kecega na veivutuni ka lako mai vua. Ka sa tucake tale mai na mate, me rawa ni kauti ira kece mai na tamata ki vua, ena ivakarau ni veivutuni” (Vunau kei na Veiyalayalati 18:11-12). E sa tukuna o Koya vei keda,“Oqo na noqu cakacaka kei na noqu lagilagi —meu vakavuna na tawa mate a kei na bula tawamudu ni tamata” (Mosese 1:39).
Veivutuni kei na Reki
E sega ni veivakurabuitaki na Nona vakila na Tamada Vakalomalagi na reki cecere ni da veivutuni. Na noda lomasoli meda veivutuni sa ivakadinadina ni noda vakavinavinaka titobu me baleta na isolisoli vakasakiti ka sega e tautauvata, ni iVakabula ka Dauveivueti kei vuravura. Ni sa vukui Jisu Karisito duadua ga eda na rawa ni yaco kina me da kilikili me da tu ena yalodei ena iserau ni Kalou (raica na Vunau kei na Veiyalayalati 121:45).
E a vakamacalataka o Peresitedi Russell M.Nelson: “E vuqa na tamata era raica na veivutuni ni sa itotogi—e dua na ka me levei vakavo ga ena veicala bibi sara. Ia na vakasama ni veitotogitaki oqo e vakavurea mai o Setani. E saga o koya me vakataotaka noda raici Jisu Karisito, ka tucake tu ka dedeka tu mai na ligana, e nuitaka ka tuvakarau me veivakabulai, veivosoti, samaki keda, veivaqaqacotaki, veivakasavasavataki, ka vakatabui keda.
E sega na ka e veisereki cake, vakaturaga cake, se bibi cake ki na noda torocake yadudua me vakataka na raicimatua tiko e veisiga ni veivutuni. Na veivutuni e sega ni caka ga vakadua; e tomani tikoga. Sai koya na idola ki na marau kei na vakacegu ni vakasama. Ni ovici vata kei na vakabauta, sa dolava na veivutuni na katuba meda taura na kaukauwa ni Veisorovaki i Jisu Karisito.”1
Sureti me Veivuke
Ena vuqa na gauna ena ivakatakila ni gauna oqo, sa sureti ira na Nona italai na Turaga me ra vukei Koya kei na Luvena ena cakacaka ni veivakabulai kei na bula vakalou (raica na Vunau kei na Veiyalayalati18:14). Vakasamataka mada oya! Ena keda ituvaki tawadodonu oqo, sa solia kina na Kalou ni vuravura oqo e dua na veisureti vei keda me vukei ira na Luvena, era sa yaga sara vakalevu, meda lesu tale Vua. E kila tu o Koya ni cakacaka e oqo. Era na lewe vuqa era na sega ni ciqoma na noda veisureti me ra “rogoci Koya.” Ia, e vakadeitaka o Koya ni sai Koya na Kalou ni “dua.” “Ia kevaka sa yaco mo drau cakacaka tiko ena nomudrau bula taucoko ena vunautaki ni veivutuni vei ira na tamata oqo, ka kauta mai e dua mada ga na yalo kivei au, sa na vuabale sara na nomudrau marau vata kei koya ena matanitu i Tamaqu!” ( Vunau kei na Veiyalayalati 18:15; vakabibitaki).
O na tarogi iko beka, “na cava e rawa niu cakava meu vukea e dua me lako mai vei Karisito, veivutuni, ka vakalougatataki ena Nona solibula ni veisorovaki?”
E a solia o Elder Dieter F. Uchtdorf ena Kuoramu ni iApositolo Le Tinikarua na ivakasala oqo me baleta na vakaitavi ena cakacaka ni veivakabulai kei na bula vakalou: Me da kila ni sega ni noda cakacaka me da veisautaka na tamata Oqori na itavi ni Yalo Tabu Nomu itavi mo wasea na veika e tu e yalomu ka bulataka dei tu na nomu vakabauta.
“Kakua ni yalolailai kevaka e dua e sega ni ciqoma na itukutuku ni kosipeli ena gauna vata ga. E sega ni nomu druka.
“Oqoei e nodrau ga na tamata oya kei na Tamada Vakalomalagi.
“E nomu itavi, mo lomana na Kalou kei na wekamu, o ira na Luvena.
“Vakabauta, lomana,ka kitaka Vakabauta, lomana,ka kitaka.
“Mo muria na salatu oqo, ena cakamana na Kalou ena vukumu mo vakalougatataki ira na Luvena taleitaki.”2
Ena Yasa ni iLati Ruarua
Na veisureti me da lako mai vei Karisito ena veivutuni e sega ni baleti ira ga o ira era bula tiko ena vuravura oqo. “Raica era na vueti ko ira na mate era sa veivutuni, kevaka era sa talairawarawa ki na cakacaka vakalotu sa vakayacori ena vale ni Kalou” (Vunau kei na Veiyalayalati 138:58). Na cakacaka ni valetabu kei na tuva kawa era tiki bibi ni vakasoqoni vata mai i Isireli era era sa veiseyaki tu ena yasa ruarua ni ilati. E rawa ni da vakila na reki cecere ni da cakava na cakacaka me baleti ira era sa lako ki na vuravura ni yalo ni da kila ni ena bula o ya, me vaka a kaya o Peresitedi Wilford Woodruff (807–98), “ena lewe lailai sara, ke so, ka ra na sega ni ciqoma na Kosipeli”3 Sega ni vakatitiqataki, ni ra na vakanamata ki na siga ena vakayacori kina na cakacaka vakalotu ni veivakabulai ena vukudra ena vale ni Turaga.
E vakavulica o Elder Dale G. Renlund ena Kuoramu ni iApositolo Le Tinikarua: “Ni da vakasoqona na noda itukutuku ni tuva kawa ka lako ki valetabu ena vukudra na noda qase eliu, e vakavotukanataka na Kalou e vuqa na veivakalogatataki yaltaki ena yasa ruarua ni lati. E via tautauvata talega, eda vakalougatataki ni da vukei ira ena noda tabanalevu kei na iteki ni da vakayacora vakakina O ira na lewenilotu era tiko volekata na valetabu era ciqoma talega na veivakakalougatatki vata oqo ni ra vakaitavi ena cakacaka ni tuva kawa, ni kumuni mai na yacadra na nodra qase eliu me vakayacori na cakacka vakalotu ni valetabu.”4
E sa totoka ni da kila ni lomani ira yadua na Luvena na Tamada Vakalomalagi. Eda sa yaga vakalevu sara ki Vua. O keda yadua e tiko na noda itavi tabu meda veiqaravi vei ira na Luvena ena yasa ruarua ni ilati ka vukei ira mera kila vinaka na kedra yaga cecere.
Vukei Ira Me Raica na Kedra Yaga
Au sureti kemuni mo ni dolele yani kivei ira era a sa tiki ni nomuni bula ka rairai sa ra guilecavi tu ena dua na gauna. Dolele yani kivei ira era sa biuta na salatu ni veiyalayalati. Veiqaravi vei ira era gadreva tu na loloma va-Karisito. Sema vata kei ira ena yasa kadua ni ilati ena cakacaka ni valetabu kei na tuvakawa, oka kina na ituvatuva vakamatanivola. Vukei ira na tani me ra vakila na loloma ni Kalou mai vei iko.
“Me vaka sa yalataki, keirau veitalanoa kei na noqu itokani mai Belgia ena vei Sigatabu me va na vula. Au sureti koya me lavetaka na app ni Gospel Library. Sa qai mai vakatakilai vei peresitedi ni tabana ena nona vanua, rau sa qai sikovi koya na dau kaulotu ka solia vua e dua na veivakalougatataki vakamatabete. Ena macawa ka tarava, ena imatai ni gauna ena loma ni 30 na yabaki, e tiko ena soqoni ni sakaramede o koya. Na iotioti ni gauna keirau veitalanoa kina, sa vakasinaiti ena reki o koya ni sa mai veisemati tale kei na Lotu i Jisu Karisito.”
A tukuna talega vei au o koya ni se tudei tikoga ena Lotu o luvena yalewa qase duadua. Au a dolele yani vakatotolo sara vua na luvena yalewa ena vidio ni veitalanoa. A vakaveikilaitaki au o koya vei iratou yadua na luvena lewe va totoka, ka tukuna vei au ni ratou lako tiko mai ki nodratou vale na daukaulotu ena bogi oya me mai vakayakavi. Sa dua na veivakalougatataki levu meu raica ni se lewe ni Lotu yalodina tikoga o koya!
Niu a sikovi koya tiko au qai kilamatata kina ena so na ivakarau lailai ga, na itukutuktu ni volanikalo oqo: “Ia oqo, kevaka sa vuabale na nomudrau marau ena dua na yalo drau sa kauta mai vei au kina matanitu iTamaqu, sa na vakacava na levu ni nomudrau marau kevaka drau sa kauta mai e levu na yalo kivei au!” Vunau kei na Veiyalayalati 18:16
Sa ka talei sara na yalo yadua!
Laveta Cake Na Liga Sa Wadamele, mai vei J. Kirk Richards
“E sega ni noda cakacaka me da veisautaka na tamata. Oqori na itavi ni Yalo Tabu. Nomu itavi mo wasea na veika e tu e yalomu ka bulataka dei tu na nomu vakabauta.
Elder Dieter F. Uchtdorf
Lux Condivis (Na Rarama Wasei), mai vei J. Kirk Richards
O keda yadua e tiko na noda itavi tabu meda veiqaravi vei ria na luvei Tamada Vakalomalagi ena yasa ruarua ni ilati
Curubasika, mai vei J. Kirk Richards