Na’o Tusiga Faatekinolosi
O Le Aafiaga Na Faia e Konafesi Aoao i Lo’u Liuaina
E alaala le tusitala i Aioua, ISA.
O savali o loo faasoaina atu i le konafesi aoao e fesoasoani ia i tatou ia sili atu ona liua ai i le upumoni ma oo mai ai le mana faaleagaga i o tatou loto.
Ua 40 tausaga talu ai, na ou tuuina atu ai lou loto ia Iesu Keriso ma amata ona auai i se Ekalesia faaevagelia. Sa ou maua se faifeau lelei tele ma faia ni uo se toatele sa fesoasoani ia te au ou te tuputupu ae ai faaleagaga. Ae ina ua mavae le tele o tausaga o auai, sa amata ona ou popole i nisi o faiga fou a le ekalesia. Sa ou matua taumafai malosi e nofo, ae sa le mafai ona ou ola i na suiga.
Ina ua amata ona ou saili mo se lotu fou, o lou uso ma lona toalua, o e sa avea ma tagata o Le Ekalesia a Iesu Keriso o le Au Paia o Aso e Gata Ai, na valaaulia au ou te sau i le la lotu. Ae sa le mafai ona ou afifiina lo’u loto ma lo’u mafaufau e uiga ia Iosefa Samita o se perofeta. Sa ou tau atu ma le faaaloalo ia i laua, “Faafetai, ae leai faafetai.”
Sa amata ona ou alu i se isi lotu faaevagelia, ae o le mea lava lea e tasi sa tupu ai foi. E lei leva, ae ou lagonaina e lei faataunuuina foi ou manaoga faaleagaga iina. O lea foi,, na toe valaaulia au e lou uso ma lona toalua e sau i le latou lotu, ma sa ou toe teena ma le faaaloalo.
O le Suiga Tele
Sa tonu ia te au e le mafai ona ou talitonuina se lotu. Sa ou faia se fuafuaga e faataitai ai na o au lou faatuatua. Ae a aunoa ma se Ekalesia po o se avanoa e faasoa atu ai lou faatuatua i isi, sa ou lagona le see ese atu o au lava mai lau tautinoga ia Iesu Keriso. Sa amata ona ou masalosalo i le mea sa ou talitonu ai mo le 30 tausaga! Sa o se suiga tele lea mo au.
Sa ou tilotilo i le toe filifiliga na foliga na totoe na iu ai ina ou fai atu i lou tuagane ma lona toalua ou te fia alu matou te o i le lotu.
Sa ou le talitonu muamua, ae o le a le galo lava ia te au le aso sa muamua sa ou auai faatasi ai ma i latou. Sa tumu lou loto i le taimi atoa o le sauniga faamanatuga, a o matou talanoaina le feagaiga fou i le aoga sa, ma sa matou toe usuina foi se pese matagofie faatasi i le Aualofa. Ma ou te fiafia i le auala e fegalegaleai ai tagata i lena alofa ma le agaalofa.
Sa ou lagonaina le i ai i lo’u aiga.
Sailiga mo Tali
Sa faaauau pea ona ou alu i le lotu, ae ina ua uma ona ou tatalo ma saili mo le toeitiiti lua tausaga, sa tele lava ni au fesili mo le Alii ma ou te le’i saunia e papatiso. Ona oo lea ia Oketopa i le 2012, na ou filifili ai e matamata i le konafesi aoao e saili mai ni au tali.
Na matuai ootia lava lou loto i sauniga uma o le Aso Toonai, ma sa ou filifili e matamata i le sauniga o le taeao o le aso sa i le maota o le Ekalesia. E ui lava sa tau leai nisi sa i ai iina, ae sa ou lagonaina lava le filemu manino e uiga i lau filifiliga ia i ai i le falesa. Sa ou lagonaina le faamaluluina o lo’u loto. Sa ou matuai fiaai lava i le upumoni.
Sa faasoa mai e Peresitene Henry B. Eyring, Fesoasoani Lua i le Au Peresitene Sili, se savali matagofie o le a le galo lava ia te au. Sa ia saunoa e uiga i le tatalo a Iosefa Samita i le falepuipui o Liperate, ina ua ia alaga atu: “Le Atua e, o fea o i ai oe? Ma o fea o i ai le faapaologa ua ufi ai lou afioaga lafi?“ (Mataupu Faavae ma Feagaiga 121:1). Sa faatusatusa e Peresitene Eyring lagona o Iosefa i le mea na ou lagonaina:
“E toatele i tatou, i taimi o le ita o le tagata lava ia, e manatu ua taumamao le Atua mai ia i tatou. E le mafai lava ona lafi le Atua, ae o nisi taimi e ufitia ai i tatou, e ufi i se faapaologa o faanaunauga lea e toso ese ai i tatou mai le Atua ma fai ai e pei e mamao ma le mafai ona tatou au atu ia te Ia.
“O le a faaitiitia o tatou lagona o le vavaeese mai le Atua pe a tatou avea atili e faapei o ni tamaiti i Ona luma. O le a fesoasoani ia i tatou e iloa ai lenei meamoni: E latalata mai le Atua ia i tatou ma silafia i tatou ma e le lafi lava mai Lana fanau.”1
E pei ona faasoa mai e Peresitene Eyring lenei savali e uiga i le mauaina o le alofa o le Atua ma Lona finagalo, Sa ou faalogo ai i se savali mai le Agaga i lou mafaufau. O ni upu faigofie e lua: “Ia papatiso.”
Ina ua talanoa Elder David A. Bednar o le Korama a Aposetolo e Toasefululua e uiga i le liua i lena lava aso,2 sa ou lagonaina le mou atu o ou popolega e uiga i le papatisoina. Sa ou iloaina ou te le o tuuese atu ou talitonuga autu mai ou aso faaevagelia e ala i le auai i se faatuatuaga fou. Sa ou fausia i luga o le faatuatua ma upumoni ua uma ona ou maua. Ua atili ai ona ou liua atu i le Alii. Ma sa fesoasoani mai Ana perofeta ia te au i le aluga o le ala.
I le taeao ina ua maea le konafesi, sa ou valaau atu i lou uso ma fesili i ai pe mafai ona ia papatisoina au. O se taimi fiafia lea na matou fetagisi uma ai.
Ua i ai i Konafesi Aoao ni Tali mo i Tatou
A o ou toe mafaufau i lou olaga, ou te faafetai mo ona avanoa na maua ai au e ala ia Iesu Keriso. Ma ou te faafetai mo le konafesi aoao. I le taimi o le konafesi aoao, sa ou lagonaina na faafofoga mai le Atua ia te au. Sa ia taliina au fesili, sa talanoa mai i ou popolega, ma alofa ia te au e ala i upu a Ana perofeta.
Ou te iloa o konafesi aoao taitasi e i ai se savali sao mai le Alii lea e fetaui tonu lava ia te oe ma mea o loo e feagai ai. A o tatou faalogo atu i perofeta ma le naunautai e talia le savali a le Atua mo i tatou, o le a tatou lagonaina o Ia. O le a tatou maua tali i a tatou tatalo ma tali i a tatou fesili. O le a tatou iloa ai o loo fetalai mai le Alii, ma o le a avea atili i tatou ma e sili atu ona liuaina ia te ia.