Mo Matua
Aoao Atu e uiga i le Faatoilaloina e ala ia Iesu Keriso
Matua Pele,
O le lomiga o le masina lenei o loo aofia ai autu taua e pei o Iesu Keriso ma Lana Togiola, faatoilaloina o mea o le lalolagi, ma le auauna atu pe afai o oe po o se uo e i ai se manaoga faapitoa. Faaaoga tusiga o loo lisi atu i lalo ma o latou ata e tatala ai talanoaga ma lou aiga ma fesoasoani ia latou malamalama i mea nei ma isi vaega o le talalelei toefuataiina a Iesu Keriso.
Talanoaga o le Talalelei
Taulai ia Keriso
I le aluga o lenei vaitau o le Eseta, e mafai ona tatou taulai atili atu i le Faaola ma Lana taulaga togiola mo i tatou. Faaaoga “Faavae o le Talalelei” i le itulau e 6 ma le tusiga a Elder Jeffrey R. Holland o loo i le itulau e 8 e aoao ai lau fanau e uiga i mea na faia e Iesu Keriso mo oe ma i latou. E mafai ona e fatuina faatasi se lisi o auala e faamanuia ai oe ma lou aiga i le taimi nei e le faataitaiga a Keriso, aoaoga, olaga, maliu, Togiola, ma le Toetu. Ia faaleleia lau talanoaga ma le tusiga o loo i le itulau e 22 e uiga i le eseesega o le Faaola ma Satani.
Mafaufau i ni auala e mafai ai e lou aiga ona faia se mea faaKeriso i le vaitau o le Eseta.
Faatoilalo ai Mea o le Lalolagi
E tatau ona sili atu le taua o le finagalo o le Alii ia i tatou nai lo mea o le lalolagi. Faitau le tusiga o loo i le itulau e 18 mai ia Elder Hans T. Boom ma talanoa o se aiga i fesili nei: O a ni mea o le lalolagi o loo faalavelave ia te oe? E mafai faapefea ona e taulai atili i le finagalo o le Alii? Pe na i ai se mea na tupu ia te oe e pei o Elder Boom? O le a se mea na e aoaoina?
Manaoga Faapitoa ma le Auauna atu
Faitau ia tusiga o loo i itulau e 30 ma le 32. Faaaoga manatu autu e foliga mai e sili ona talafeagai ma lau fanau. Afai e i ai se tagata i lou aiga e i ai se manaoga faapitoa, ia taulai atu i mea lelei e mafai ona ia faia. Afai e te auauna atu i se tasi o i ai se manaoga faapitoa, ia talanoaina pe faapefea ona suia e nei mataupu faavae le auala e mafai ona e fesoasoani ai i lena tagata.
Lagolago mo le Sau, Mulimuli Mai ia te A’u
Tagai i le itulau e 25 mo se tala puupuu mai le soifuaga o Jane Manning James, o se tamaitai faatuatua o le uluai Toefuataiga.
Tagai i le itulau e 26 mo anomea e lagolagoina au suesuega o le Sau, Mulimuli Mai ia te A’u i vaiaso taitasi.
Fiafiaga o Suesuega Faaleaiga
Lotogatasi e Tasi
Mataupu Faavae ma Feagaiga 38:24–31
I le Mataupu Faavae ma Feagaiga 38:27, na fetalai mai ai le Faaola, “Ou te fai atu ia te outou, ia tasi outou; ma afai tou te le tasi e le a au outou.” Ua uunaia i tatou ia avea ma se tasi ina ia tatou “sosola ese mai le mana o le fili” (Mataupu Faavae ma Feagaiga 38:31).
-
Tutu faatasi i le ogatotonu o le potu.
-
Filifili se tagata se toatasi e savali i le ogatotonu o le vaega.
-
Toe fai le gaoioiga ae o le taimi lenei tutu vavalalata faatasi o se vaega, ma uu lima pe a mafai.
Talanoaga: E faapefea ona puipuia atili i tatou mai faatosinaga i fafo a o tatou tutu malolosi atu ma le vavalalata faatasi? E faapefea ona puipuia i tatou e le lotogatasi sili atu?
Faaaliga Faaletagata Lava Ia
Mataupu Faavae ma Feagaiga 42:61
O le a tuuina mai e le Alii ia i tatou faaaliga mo o tatou olaga. “Afai e te ole mai, o le a e maua lea faaaliga e faaopoopo i luga o lea faaaliga, lea malamalama e faaopoopo i luga o lea malamalama” (Mataupu Faavae ma Feagaiga 42:61).
-
Nonofo i se lio o se aiga. Ia auauai e tali le fesili, “O a ni auala e mafai ona ou sailia ai faaaliga faaletagata lava ia?”
-
Tuu mai ni faataitaiga mai tusitusiga paia.
-
E Faapefea ona e “faalogo ia te Ia”?
Talanoaga: O a ni laasaga e mafai ona tatou faia o se aiga e fesoasoani ai i le tasi ma le isi ia maua ma iloa faaaliga patino?
Gaoioiga e le faamalosia: Faitau faatasi le saunoaga a Peresitene Russell M. Nelson, “Faaaliga mo le Ekalesia, Faaaliga mo o Tatou Olaga,” Liahona, Me 2018, 93–96.