Autalavou Matutua
O Suiga Musuia i le Galuega Faafaifeautalai ua Faamanuiaina ai lou Aiga
O suiga i fesootaiga a faifeautalai ma o latou aiga na fesoasoani ia te au e faasoa atu ai upumoni o le talalelei i lou tina.
Ua valu nei tausaga talu ona avea au ma se tagata o le Ekalesia, faatasi ai ma lou Tama ma ou uso e toalua. Talu mai le avea ai ma se tagata o le Ekalesia, ua ou vaai i faamanuiaga matagofie ua saunia e lou Tama Faalelagi mo lou olaga ma lou aiga. Ua faamanuiaina moni lava lou olaga e le talalelei ma na fesoasoani ia te au e maua ai lena fiafia sa ou sailia!
O le taimi muamua na amata ai ona ou faitauina le Tusi a Mamona, o le tala i le faaaliga a Liae i le laau o le ola na talanoa mai i lou loto (tagai i le 1 Nifae 8; 11). E mafai ona ou faasoa atu ona sa ou manao foi i lou aiga atoa ma tagata uma ou te alofa i ai ia mafai ona tofo i le fua o le laau ma lagona le alofa o le Atua i o latou olaga.
Mo lena mafuaaga, sa ou saunia ai au lava e auauna atu i se misiona talai ma sa tofia e galue i le misiona a Kuatemala i le Aai o Kuatemala.
I le taimi o lau misiona, ou te iloa ai le toatele o tagata ua suia mo le lelei sili atu ona o le talalelei. Ma sa faatumulia ai lou loto i le olioli i aso uma. Ae o taimi uma lava ma te aoao ai ma lau soa i aiga, sa faamanatu mai ai ia te au lou lava aiga, aemaise lava lou tina, o le sa le o se tagata o le Ekalesia. O aso uma lava o sauniuniga, sa ou taumafai ai e faamalosiau atu ia te ia e ala i au imeli e feiloai i faifeautalai. Sa ou tatalo ina ia saunia e le Tama Faalelagi lona loto e talia le talalelei.
O Se Avanoa Musuia
Sa ou i ai pea i lau misiona ae na tupu le suiga musuia e faatatau i fesootaiga a faifeautalai ma o latou aiga.1 Ina ua ou faalogo muamua i le tala, sa faailoa mai e le Agaga ia te au, o se avanoa lenei e valaaulia ai lou tina e aoao atili i le talalelei. Sa ou lagonaina le tele o le olioli i lena suiga ma lena lagona. I le aluga o le vaiaso, sa ou ole atu i le Alii e fesoasoani mai ia ou iloa le mea e finagalo o Ia ou te faasoa atu ia te ia.
Ina ua oo mai le aso o le sauniuniga ma sa ou vaai i lou tina e ala i le lau o la’u komepiuta, sa ou maua se uunaiga malosi e tatau ona fai se ma tatalo. Sa ou faali atu lena lagona ia te ia, ma sa ia malie i ai. I le taimi o le talanoaga i fesootaiga tau-vitio, sa ou faamalamalama atu ia te ia le savali autu sa ou taumafai e faasoa atu o se faifeautalai: o le talalelei a Iesu Keriso ua toefuataiina mai. Sa ou molimau atu ma lou loto atoa sa ou iloaina e moni. Sa ou valaaulia foi o ia e tatalo ma ole atu i le Atua e uiga i nei mea ia iloa e ia lava. Na faauma le ma talanoaga i se tatalo na ia faia. Sa ma lagonaina uma le malosi o le Agaga na tuia ai o maua loto. Ina ua maea le valaauga, sa ou auina atu se igoa i faifeautalai i lana eria.
Sa ou faatalitali ma le naunautai mo le vaiaso a sau e toe faalogo atu ia te ia. E pei ona sa ma faia i le taimi muamua lava, na amata le ma talanoaga faavitio i se tatalo, ona ou faalogo lea i le Agaga ia iloa le mea e faasoa atu ia te ia. Na matou faia lenei mea mo vaiaso. Mulimuli ane, i le faate’ia ai o au, na amata ona ia feiloai atu i faifeautalai. Ma sa ou matauina se susulu fou i ona mata.
E mafai e le Tama Faalelagi ona Faia Vavega e ala mai ia i Tatou
Ina ua ou toe foi mai i le fale, sa ma o ma lou tina i ana lesona ma faifeautalai. I se tasi o na lesona, sa ia faaali atu ai se ataata i ona foliga, ma faaalia lona manao e osi feagaiga ma le Alii. Sa ou tei i le faalogo atu i le ala ua ia maua ai le tali e moni le talalelei! Sa toe faapea foi, ona faatumulia e le Agaga le potu ma molimau mai i o matou loto o lea sa ma molimauina ai le upumoni.
Ma o lea, i ni nai vaiaso talu ona ou toe foi mai i le fale, sa ou molimauina ai se tasi o vavega aupito maoae o lau misiona: sa ui ifo lou tina i le vai o le papatisoga ma osia se feagaiga ma le Tama Faalelagi.
Sa tafe ifo ou loimata i ou foliga ina ua ou vaai atu ia te ia o alu i lalo i le vai. Ina ua ou fusiina o ia mulimuli ane, sa matou taufai lagonaina uma ni lagona se tele, ae o le tele lava o taimi na matou lagonaina ai le alofa o le Atua mo i matou. Sa ia tilotilo mai i ou mata ma fai mai, “sa ou lagona le pei o le Atua na opoina au ma faafeiloai au. Ou te iloa o loo Ia faatali mai mo au.”
Sa aoao mai e Elder Dieter F. Uchtdorf o le Korama a Aposetolo e Toasefululua e faapea o nisi taimi e mafai ona faia ai le galuega faafaifeautalai pe a e “malamalama e le o lau galuega le faaliliu mai o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou loto ma ola ia tutusa ma ou talitonuga. …
“Mulimuli i lenei ala, ma o le a faia e le Atua ni vavega e ala atu ia te oe e manuia ai Lana fanau faapelepele.”2
Ina ua ou faalogo i upu a lou tina, sa atili faamalosia lau molimau, ma sa ou iloaina i lena taimi ma lou loto atoa e faafofogaina e le Tama Faalelagi a tatou tatalo ma e mafai ona fesoasoani ia i tatou e faasoa atu le fua o le laau i isi — ae maise lava o tatou aiga.