Matutua ma le Faamaoni
A o Tausia isi Tagata, Ia Tausia Lelei Oe Lava Ia
E alaala le tusitala i le Aai o Yamanashi Prefecture, Iapani.
E tatau ona lava lou malosi ona faatoa mafai lea ona e fesoasoani atu i isi.” —Elder Jeffrey R. Holland
Sa ou ola ae i se aiga lea e tolu augatupulaga—o matua o lo’u tama, matua, tuagane laiti e toalua, ma le tasi o le tuafafine o tama—sa taufai nonofo faatasi i le fale e tasi. Sa tausia e lou tinamatua le tuafafine o lou tama, o le sa i ai ni luitau faaleatamai ma faalelagona. Ina ua maliu lou tinamatua, sa tauave e lou tina le tiutetauave atoatoa mo le tuafafine o lo’u tama ma tausia o ia i lo matou fale i le po ma le ao.
Na iu ina siitia atu le tuafafine o lou tama i se nofoaga autu e tausi ai tagata matutua i le lotoifale. E ui lava sa mamao ese, ae sa asiasi soo i ai lou tina. Ina ua mavae le maliu o lo’u tina, sa avea au ma punavai autu lagolago mo le tuafafine o lo’u tama. Na oo ina ou malamalama i le tuuto o lou tina. Sa ou matua faafetai foi mo tagata mataala o e na tausia le uso o lou tina.
Lagonaina o le Vaivai e i Latou o loo Tuuina atu Tausiga
O o’u lava aafiaga faaleaiga na fesoasoani ia te au e malamalama ai o loo feagai tagata o loo tuuina atu tausiga ma luitau eseese. O faamoemoega faaleaganuu, fegalegaleaiga faaleaiga, mauaina o fale — o mea uma e ono aafia ai i latou o loo tuuina atu tausiga. Ae e i ai se luitau e tasi e feagai ma i latou uma lava o loo tuuina atu tausiga i se isi itu: o le vaivai. E mafai ona patino le moni o lenei mea pe a tausia e se isi tagata matua le isi, e masani lava o le toalua e tausia le isi. O le mea moni, ua faailoa mai i suesuega o tagata o loo tausia isi e i le va o le tai 66–96 tausaga, o i latou o loo feagai ma le atuatuvale e 63 pasene le maualuga o le oti nai loo i latou e le o tausia isi.1
O Poloaiga Muamua ma le Lona Lua
O le mea moni, e mafai ona tatou aoao ni mea se tele e uiga i le tausiga faaKeriso e ala i le suesueina o poloaiga muamua ma le lona lua.
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37–39).
I nei fuaiupu, ou te talitonu o loo tuuina mai e le Alii se taiala e patino lava e fesoasoani ia i latou o loo tausia isi. O le mea muamua lava, ia alofa i le Alii. Aua nei faatuatuanai i mea faigofie e fafagaina soo ai oe faaleagaga. Tatalo. Faitau tusitusiga paia. Ia maua le filemu i lou loto. Lagonaina o le mana ma le malosi o le alofa o le Tama Faalelagi mo oe.
Atonu ua faatumulia outou i le alofa mo o outou tuaoi—i le tulaga lenei, le tagata o loo e tausia. Ae pe o e alofa foi ia te oe lava, i se auala amiotonu?
O se Auala e Itu-Lua
I lo’u aafiaga, i le avea ai ma se fesoasoani ma i lou lava aiga, ua ou iloa ai o i latou o loo tausia isi e masani ona latou lagona faapea e tatau ona latou faia mea uma mo i latou lava. Ae e le moni lea mea. O tagata e tausia i latou e le taliaina le fesoasoani e toetoe o taimi uma e “susunuina” i nisi taimi. E manaomia ona latou faatagaina isi e fesoasoani atu ia i latou. E manaomia lo latou fefautuaai ma aiga, uo, ma taitai o uarota po o paranesi. O i latou o e naunau e fesoasoani i se tasi o loo tuuina atu tausiga e manaomia le faaaloalo i manaoga o le o loo tuuina atu le tausiga e faamanuia ma leoleo e pele ia i latou.
O nisi nei o mea e ono fesoasoani e talanoaina faatasi:
-
O le a le lagolago o loo avanoa mai tagata o le aiga?
-
O le a se mea o le a maua ai ni avanoa mo le e tuuina atu tausiga e malolo ai mo ni nai minute, pe tasi se itula pe lua foi?
-
E faafia ona aoga asiasiga? O a ituaiga o asiasiga?
-
E mafai faapefea e le e tuuina atu tausiga ona maua le taimi e faafou ai feagaiga e ala i le auai i le malumalu, alu i le lotu, ma le mauaina o le faamanatuga?
-
E mafai faapefea ona manuia le e tuuina atu tausiga mai le na o le talanoa atu i se tagata?
-
Pe o i ai ea se manaomia mo se fesoasoani i meaai, femalagaaiga, po o polokalama a le malo?
Afai o oe o se e tuuina atu tausiga, ia manatua le fautuaga lenei mai ia Elder Jeffrey R. Holland o le Korama a Aposetolo e Toasefululua:
“Mo outou o e saili ma le naunautai e tauave avega a le tasi ma le isi, e taua ona e toefaamalosia oe lava ma toe faatulaga oe lava pe a ua tele naua mea e faamoemoe mai e isi mai ia te oe, ma faapea ona tele naua ai lou malosi e alu ai. E leai se tagata e malosi naua e faapea ona latou le lagona ai le vaivai po o le le fiafia pe iloa ai le manaomia ona vaai faalelei i latou lava. …
“E tatau foi ona tausi faalelei i latou e tausia isi tagata. E tatau ona lava lau penisini i le tane ona faatoa mafai lea ona e fesoasoani atu i isi.”2