Faaaofia
O le Auala e Faaalia ai le Talisapaia o le Au Nofofua
E alala le tusitala i Alapama, ISA.
O nisi nei o fautuaga e fesoasoani ia te oe ma lau uarota ia fesoasoani i tagata nofofua ia lagonaina atili le i ai i le aiga i le lotu.
Ata na tusia e Johanna Häger
“A o amata le isi a tatou sauniga o le konafesi a le uarota, faamolemole ia see atu tou te nonofo faatasi ma o outou aiga.”
O faamatalaga faapenei e masani ai lava ona ou lagona ai le le nofo lelei. I le avea ai ma se alii nofofua e auai i le Ekalesia, o fea e tatau ona ou nofo ai? O nisi taimi ou te lagona ai le le mautonu o isi tagata i le mea e tatau ona ou nofo—pe tatau ona ou i ai. O le a se mea e mafai ona tatou faia o se aiga o le talalelei e fesoasoani ai i tagata uma, pe ua faaipoipo pe leai, e lagona ai le taliaina ma le faaaofiaina? O ni manatu nei se tolu e ono fesoasoani.
Toe Mafaufau i Faiga Masani a Uarota
Ua fesoasoani le talalelei toefuataiina ia i tatou ia malamalama ai i aoaoga faavae matagofie e uiga i aiga e faavavau. Ae ua ou vaai i le auala e faia ai e nisi o faiga masani faaleaganuu o loo siomia ai le aoaoga faavae lea e mafua ai lagona o tagata e le’i faaipoipo e pei o ni tagata e le taua tele o le Ekalesia.
Mo se faataitaiga, ua ou auai i uarota e fesili mai na o ulugalii ua faaipoipo e tuuina atu ia tatalo amata ma tatalo faaiu i sauniga. Ua ou faalogo i tagata o le uarota o faaalia le popole pe a valaauina se alii nofofua i le au epikopo. O nei mea ma isi amioga laiti e mafai ona fatuina ai se papupuni faalelagona mo tagata e le’i faaipoipo e moomia ona faatoilaloina ae latou te lei lagona le i ai i le aiga i le lotu.
Pe o i ai ni au faiga masani po o lau uarota e mafai ona suia ina ia faaaofia ai? Atonu o se fesili lelei lea mo se au epikopo po o se aufono a le uarota e mafaufau i ai.
Ia Faaeteete i le Le Faaaofiaina Le Fuafuaina
O nisi taimi e oo lava ia i tatou o loo tatou manatu o lea tatou te faataitaiina le faaaofia ae e mafai ona avea ma lē faaaofiaina lē fuafuaina. Mo se faataitaiga, a o ou galue o se taitai o le vasega pepe, sa masani ona ou misia ni faasilasilaga na faasoa mai i le itula lona lua o sauniga Lotu. Ina ua ou tau atu i se taitai e uiga i lenei popolega, sa ia fai mai, “Ae e le o faalogo lou toalua i faasilasilaga i le Aualofa?”
I lena taimi, sa na o lou ata lava. Ae o le tali a lenei alii lelei sa faatusa i se mafaufauga e lē aofia ai a’u. Pe o tatou vaavaai atu i o tatou uso a tagata o le Ekalesia o se vaega o se “uarota faaleaiga,” e fausia e alii ma tamaitai faaipoipo ua i ai fanau? Pe o tatou vaai le tasi i le isi o se vaega o se “aiga o le uarota,” e fausia e tagata o e tausia ma faamalosia e le tasi le isi? E taua na vaaiga uma e lua. A o faatumauina le iloaina o aiga i a tatou uarota, e mafai foi ona tatou iloa tagata taitoatasi—o latou tulaga, mea e fiafia ai, manaoga—ma atonu e taofia ai le tupu o le lē faaaofiaina lē fuafuaina.
Faalautele le Li’o o Lou Aiga
Ina ua uma ona valaaulia e le sui o le au epikopo ia aiga e nonofo faatasi i le konafesi a le uarota, sa popō mai lo’u tauau e se tasi.
“Ou te matea o le a e i ai i lo’u aiga mo le isi itula,” o le tala lea a se tuafafine agalelei, ma valaaulia au matou te nonofo faatasi ma lona toalua ma le la fanau. Ou te faafetai mo tagata e pei o ia o le e faaalia lo latou alolofa ia te au ma mananao ia ou lagona le taliaina. O se isi tagata faapena o se epikopo, sa masani ona valaauliaina au i le afiafi faaleaiga faatasi ma lona aiga.
O ai e mafai ona manuia mai lou aiga, i le faalauteleina o le latou lio o le faaaumea? E le faapea e tatau ona atoatoa a outou taumafaiga. O se valaaulia faigofie e mafai ona faia se eseesega tele.
Au Paia Nofofua: O se Malosiaga Mamana mo le Lelei
E i ai so’u olaga atoa ma ni sootaga anoa e tele, ae e tele foi taimi o le tuuatoatasi ma le gaogao ou te moomoo ai mo nisi sootaga. E faavae i au talanoaga ma isi tagata o le Au Paia e lei faaipoipo, ou te talitonu o nei lagona e taatele.
Ae peitai, ou te taumafai e aua nei ou lagona le faanoanoa mo au lava ia. O tatou tagata e le’i faaipoipo e mafai ona avea ma se malosiaga mamana mo le lelei i olaga o isi. E mafai ona tatou fesoasoani e faamalolosia uo, o aiga tatou te alolofa i ai, ma uarota ma siteki uma. E manaomia i tatou e le Ekalesia! E le tatau ona tatou tuua le tiutetauave mo sootaga i lima o isi tagata. E mafai ona tatou faailoa atu i tatou lava i a tatou uarota, volenitia e auauna atu, ma talanoa atu mo mea tatou te manaomia.
O le tuuatoatasi, taimi gaogao o le a oo mai lava e tusa lava po o fea tatou te i ai i le olaga pe o a foi ituaiga fegalegaleaiga o loo tatou i ai (po o le le i ai foi). O le tatou latalata atili atu i lo tatou Tama Faalelagi ma le tele o lo tatou lagonaina o Lona alofa, o le tele foi lena o le mana o le a tatou maua e fai ai mea lelei, maua le olioli, ma fesootai ma o tatou uso ma tuafafine.