PŌPOAKI MEI HE KAU TAKI FAKAʻĒLIÁ
Ke Lāngilangiʻia ʻa e [ʻOtua] Māfimafí
Ne hoko ʻa e ʻaho 7 ʻo ʻEpeleli, 2019 ko ha ʻaho fakaofo moʻoni kiate au, ʻa ia te u mataʻikoloa ʻaki maʻu pē. Ne u aʻusia mo ʻEletā Vaiangina Sikāhema, ʻo e Kau Fitungofulú, fakataha mo homa ongo uaifí, ha momeniti fakaʻofoʻofa mo fakalaumālie ʻi heʻemau tangutu ʻi he Senitā Konifelenisí lolotonga ʻa e fakatahaʻanga fakamuimui ʻo e konifelenisi lahí.1 Naʻe fanongonongo ai ʻe Palesiteni Lāsolo M. Nalesoni ha temipale foʻou ki Neiafu, Tonga. Ne mau kau fakataha mo homau kakai ʻi he ngaahi ʻotu motú pea ʻi he māmaní, ʻo tangi ʻi he houngaʻiá mo mau fakafetaʻi loto-ʻofa ki he ʻOtuá ko ʻEne angaʻofá mo e ʻofa maʻu peé. Naʻe fonu homau lotó ʻi he ʻofa lahi ki homau ngaahi kui kuo nau hiki atu ki he tafaʻaki ʻe taha ʻo e veilí, ʻi heʻemau manatua ʻenau tuí mo e ngaahi feilaulau lahi kuo nau fai ʻi he ngaahi taʻu kuo maliu atú ke langa hake ʻa e puleʻanga ʻo e ʻOtuá ʻi Tongá.
Naʻe fuofua tūʻuta ʻa e kau faifekau ʻo e Siasi ʻo Sīsū Kalaisi ʻo e kau Māʻoniʻoni ʻi he Ngaahi ʻAho Kimui Ní ki Tonga ʻi he 1891, ka ʻi he siʻisiʻi hono maʻu ha ola leleí, ne nau toe foki ai mei homau fonuá.2 Pea ʻi he 1907, naʻa nau aʻu ai ki he Motu ko Vavaʻú; ʻa ia ne nau fou mai ʻi Haʻamoa. Kuo feilaulauʻi ʻe he kakai ʻo Vavaʻú ha ngaahi meʻa lahi ki hono langa ʻo e Siasí, ʻa ia ne toki mafola atu mei ai ki Tongatapu mo e ngaahi ʻotu motu kehe ʻo Tongá.
Naʻe ʻosi ha ngaahi taʻu ʻe 57 pea toki maʻu ʻe he kāingalotú ʻa e tāpuaki ke ʻalu ki he Temipale Hamilton New Zealand, ʻa ia ko e temipale ofi taha ia kiate kinautolu ʻi he taimi ko iá. Naʻe fakatau atu ʻe he Kāingalotu ʻi Tongá e meʻa kotoa ne nau maʻú ke folau vakatahi pe vakapuna ke ʻalu ki he temipalé. Hili ha ngaahi taʻu lahi mei ai, naʻe langa ʻa e Temipale Nukuʻalofa Tongá pea naʻe fakatapui ʻi he 1983, ʻo lava ai ʻa e Kāingalotú ke ʻalu ki ha temipale ʻoku ofi ange ki honau ʻapí.
ʻI he ʻahó ni, ʻoku hoko ʻa e ʻi ai ha temipale hono ua ʻi he motu siʻisiʻi ko Tongá ko ha meʻaʻofa moʻoni ia ʻo e ʻofa mei he ʻOtuá ki Heʻene fānau ʻi he ʻotu motu ʻo e tahí.
Lolotonga e lea ʻa Palesiteni Lāsolo M. Nalesoni ʻi he konifelenisi lahi ʻo ʻOkatopa 2020, naʻá ne pehē ai: “ʻOku tānaki ʻe he ʻEikí ʻa kinautolu ʻoku loto-fiemālie ke tuku ke lāngilangiʻia ʻa e ʻOtuá ʻi heʻenau moʻuí.”3 Ko e temipalé ʻa e fakaʻilonga taupotu taha ʻo e tānaki fakataha ko ʻení pea mo ʻene ofi ko ia ke lava ʻo luelue pē ki ai ha Kāingalotu tokolahí, ʻokú ne fakahaaʻi mai ʻoku mau loto-fiemālie ke tuku ke lāngilangiʻia ʻa e ʻOtuá ʻi heʻemau moʻuí.
Kuo siviʻi ʻe he ngaahi faingataʻa ʻi he ngaahi taʻu siʻi kuohilí ʻa e tui ʻa e Kāingalotu ʻi he motu ko Vavaʻú. Kuo uesia lahi ʻenau ngoué ʻi he toutou hoko ʻa e ʻalotāmakí; kuo nau aʻusia e uesia ʻo e ngaahi saikolone lahi kuo nau tō ki he fonuá; kuo nau fehangahangai mo e faingataʻaʻia lahi fakaʻekonōmika koeʻuhí ko e Covid-19 mo hono ngaahi haʻahaʻá pea kuo nau faingataʻaʻia ʻi he ngaahi pole kehekehe ʻi honau sosaietí. Neongo kotoa ʻa e ngaahi faingataʻa ko ʻení, kuo hokohoko atu ʻa e Kāingalotú ʻi hono tuku ke lāngilangiʻia ʻa e ʻOtuá ʻi heʻenau moʻuí koeʻuhí ʻoku mahino kiate kinautolu ʻa e palōmesi ne fai ʻe Palesiteni Nalesoní, “ʻi hoʻo fili ko ia ke tuku ke lāngilangiʻia ʻa e ʻOtuá ʻi hoʻo moʻuí, te ke aʻusia ʻiate koe pē ko hotau ʻOtuá ko “ha ʻOtua ʻo e ngaahi maná.’”4
Hili hono fanongonongo ʻe he Kau Palesitenisī ʻUluakí ʻe fakahoko ʻo e tanupou ʻo e Temipale Neiafu Tongá ʻi he ʻaho 11 ʻo Sepitema 2021, naʻe ngāue leva e taha kotoa ne ʻi ai honau fatongia ke fakahokó ʻi he tataki fakapotopoto ʻa homau kau taki mei he ʻĒlia Pasifikí mo e ngaahi ʻuluʻi ʻōfisi ʻo e Siasí. Naʻe ʻikai faingofua, ka ne mau fakamoʻoniʻi e tataki kimautolu ʻe he toʻukupu ʻo e ʻOtua Māfimafí. Mei he ngāue ki he ngofua ke fai e langá, ki hono aleaʻi ʻo e Totongi Vakaiʻi ʻo e Tuʻunga Uesia ki he ʻĀtakaí ne fie maʻu ʻe he laó, ki hono teuteu fakaʻosi ʻo e feituʻu ʻe fai ai e langá, pea ki he ouau tāpuakiʻi ʻo e kelekele ke langa ai e temipalé, naʻe ʻi ai ha ngaahi faingataʻa.
ʻOku fakamatalaʻi lelei taha ʻe ha konga ʻo ha lipooti ne teuteu ʻe Brother Tukia mo Sisitā Linitā Havea, ko e ongo kouʻōtineita ʻo e kōmiti fokotuʻutuʻu tanupou ʻo e temipalé, ʻa e polokalama toputapu fakatupulaki tui mo fakaofo ko ʻení.
ʻI he poʻuli hifo ʻo e ʻaho 10 ʻo Sepitema 2021, naʻe feinga ʻa e kāingalotú ke fakakakato ʻa e teuteu e konga kelekeleke ke tanupou ai e temipalé. Naʻe ʻuha hokohoko pē, ʻo aʻu pē ki he hengihengi ʻahó. Neongo ia, naʻe ʻā hake ʻa e Kāingalotú he ko e ʻaho ʻeni ne vīsone, lotua mo feilaulau ki ai ʻenau ngaahi tamaí. Ne nau fakavavevave atu ki Sainehā, fakataha pē mo e Laʻaá, ko ha maʻuʻanga ivi mo fakamoʻui fakalaumālié. Ko e feituʻu ʻeni ʻe tuʻu ai ʻa e temipale foʻoú.
Ko ha ongo maʻongoʻonga mo nonga. Naʻe molumalu ʻaupito pea ne mokulukulu pē e ngaahi loʻimata ʻo e niʻihi tokolahi ʻi he loto-fakatōkilalo mo e houngaʻia. Naʻe nofoʻi ʻe he Kāingalotú e tafaʻaki toʻomataʻu ʻo e ʻafioʻangá. Naʻe ʻikai ha fakamalumalu mei natula maʻá e kāingalotu kotoa pē ʻi he kuaeá mo e kau taki ʻo e siasí ne kau ʻi he polokalamá. Naʻe fakanonga moʻoni ʻe he ongo ʻo e Kuaea Tāpanekalé ʻa e meʻa kotoa neongo ʻa e ʻalotāmaki mo ʻaoʻaofia ʻa natulá. Naʻe hoko atu ʻa e polokalamá hangē ko hono palaní ʻo ʻikai ʻuha, he naʻe mole atu ʻa e ʻaoʻaofiá. Ko ha momeniti fakaofo ia ʻi he kamata ke fai ʻe ʻEletā Kupu ʻa e lotu tāpuakiʻi ki he tanupoú; naʻe malama mai e huelo ʻo e laʻaá, ʻo maamangia ʻa e konga kelekelé ʻi hono fakaʻofoʻofá, pea mālohi ange ai e laumālie ne hulu fau mo tuʻuloá. Ne tangi e taha kotoa ʻi he fiefia ki he Māfimafí ʻa ia kuó Ne fakahaaʻi ʻi he lāngilangi kiate kinautolu KOTOA ne ʻi aí ne hoko ʻa e tanupou ko ʻení ko ha ngāue fakalangi moʻoni!
Ke Lāngilangiʻia ʻa e [ʻOtua] Māfimafí, ʻa ia ko e “ʻOtua ʻo e ngaahi maná.”5 ʻOku ou fakamoʻoni kapau te tau fakangofua Ia, ʻa ia “ʻoku ʻikai ha kamataʻanga ʻo e ngaahi ʻahó mo ha ngataʻanga ʻo e ngaahi taʻú” ke lāngilangiʻia ʻi heʻetau moʻuí, ʻe hokohoko atu ʻetau fakamoʻoniʻi e “ngāue ʻa [Hono] ongo toʻukupú,”6 hangē pē ko ia kuó u fakamoʻoniʻi tonu Hono mālōhí mo e tokoni fakaofó lolotonga e tanupou toputapu ʻo e Temipale Neiafu Tongá.