NJIA YANGU YA AGANO
Shiriki kwenye Jioni ya Familia Nyumbani
“Wakati Mzee David A. na Dada Susan Bednar walipooana, mara kwa mara walikuwa na sala ya familia, usomaji wa maandiko na jioni ya familia nyumbani pamoja na watoto wao watatu wa kiume. Nyakati zingine mambo hayakwenda vizuri, na Mzee na Dada Bednar walijiuliza ikiwa juhudi zao zilikuwa na tija. Mara kadhaa wakati wa kujifunza kwao maandiko kulikuwa na milipuko ya sauti kama vile, ‘Ananigusa!’ ‘Mwambie asiniangalie!’ na ‘Mama, anavuta pumzi yangu!’ Sala za familia wakati mwingine ziliingiliwa na vicheko na kusontana. Na masomo ya jioni ya familia nyumbani hayakuwa mara zote yenye utulivu, kwa uwepo wa wavulana watatu wachangamfu wenye kelele nyingi.
Lakini waliendelea kujaribu.” 1
Jioni ya familia nyumbani ni muda wa kuimarisha umoja wa familia. Tunafanya hili kwa kujifunza injili pamoja, kwa kusikiliza hisia za kila mmoja, fikra na mawazo, na kwa kufurahia shughuli pamoja. Kwa kawaida inafanyika Jumatatu jioni.
Tendo la kujifunza injili nyumbani lilianza kwa Adamu na Hawa (ona Musa 6:57). Limeendelea kwa vizazi vyote vilivyofuatia, pale manabii walipowashauri wazazi kuwafundisha watoto wao kumpenda Mungu na kufuata njia Zake (ona Mambo ya Nyakati 6:5–7; Waefeso 6:4).
Jioni ya familia nyumbani ni muda wa kufurahia na kila mmoja na kuburudika pamoja. Kupitia shughuli rahisi—michezo, huduma, kushiriki talanta, kutembelea maeneo mbalimbali pendwa—familia inajenga muunganiko na kuimarisha umoja.
Jioni ya familia nyumbani ni kwa ajili ya kila mmoja. Hivi karibuni wanandoa, akina baba na akina mama pamoja na watoto, mzazi mmoja mmoja pamoja na watoto, wanandoa wasio na watoto nyumbani, vijana waseja kwenye makundi ya jioni ya nyumbani na wale wote wanaoishi peke yao au pamoja na mtu wanaeshiriki naye chumba wote wanaweza kubarikiwa kwa kufanya jioni ya familia nyumbani.
Manabii wameahidi baraka kuu kwa wale wanaofuata ushauri huu, ikiwa ni pamoja na imani kubwa kwenye mioyo ya vijana, ongezeko la uwezo wa kuepuka majaribu na amani kubwa, upendo na utulivu nyumbani.
Kushiriki kwenye jioni ya familia nyumbani mara nyingi ni changamoto na si rahisi.Lakini ikiwa utaendelea kujaribu, kama vile Mzee na Dada Bednar, wewe na familia yako mtabarikiwa.