“Kain̄i ko an Tampeļ: Kōbpopo n̄an Ro̧o̧l n̄an Im̧aan Mejān Anij,” Liaona, Juļae/O̧kj. 2022.
Kain̄i ko an Tampeļ: Kōbpopo n̄an Ro̧o̧l n̄an Im̧aan Mejān Anijj
Ij karuwanene kwe n̄an lukkuun katak kake im m̧ōņōņō kōn aorōk ko an indeeo an bujen ko an tampeļ, kain̄i ko an tampeļ, im kabun̄jar ko an tampeļ ilo am niknik n̄an itok n̄an Rilo̧mo̧o̧r eo.
Pija in Mesa Arizona Tampeļ iienkōppeļo̧k jān Leslie Nilsson
Jerbal eo im Aiboojoj eo an Anij “n̄an kakūrm̧ool jab wabanban im mour indeeo an armej.” (Moses 1:39)—n̄an kōpooj kōj n̄an mour “juon wāween eutiejļo̧k im ekwojarjarļo̧k.”1 bwe jān maron̄ rooļ n̄an Ippān.
Ilo tūriam̧o eo An ejjeļo̧k jemlokin im indeeo, Irooj, kōn rikanaan im rijiļo̧k ro An, rej wōnmaanļo̧k wōt ilo aer karuwainene ļaddik ro im leddik ro Nejin n̄an kōbpopo n̄an itok eo An im erom armej in Zaion—pojak n̄an ruttoļo̧k im jelm̧ae E (lale Alma 12:24; 34:32; Katak im Bujen Ko 45:45; 65:5; 88:96–97). Im aolep iien pād io̧lap in kōbpopo in ej ilo ekatak katak ko an Jisōs Kraist, kōjerbale tōmak ilo E, ukweļo̧k, būki bujen ko im kain̄ ko raorōk.
Juon waanjon̄ak ilo Kallim̧ur Mokta kōn karuwainene eo an Anij n̄an Ajri ro nejin n̄an kōbpopo n̄an mour kōn kienn ko reuteij im būki bujen ko im kain̄i ko an lomo̧o̧r rej letok n̄an kōj rainin.
Ilo Exodus, Anij ekar rōjan̄ Israel ro n̄an erom “ṃweiuk e aorōk” im leļo̧k er make n̄an kōpooj n̄an ioon E (lale Exodus 19:4–6, 10–11, 17). Jeova ekar leļo̧k n̄an Israel “tebōḷ ko dekā, im kien im naan in kaiñi” (Exodus 24:12), im rekar kōm̧m̧an bujen ippān Anij, im ba, “Men otemjej Jeova ear kōnono, kōmnaaj kōṃṃani” (Exodus 19:8; lale barāinwōt 24:3). Irooj ekar kallim̧ur ipper bwe elan̄e renaaj pokake bujen ko aer, Enaaj ped ilubwiljieer (lale Exodus 29:45–46). Bōtaab,ke Israel kar kam̧ool kōn “aiboojoj an Jeova” (Exodus 24:16) ioon Mount Sinai, rekar mijak, jutak ettoļo̧k, im kar reiļo̧k jān Jeova (lale Exodus 20:18–21; 32:1–6).
Waanjon̄ak eo kein karuo ilo Kallim̧ur M̧okta ej kōn Kiin̄ Solomon kalōk juon em̧ n̄an Irooj (lale 1 Kiin̄ 6:11–13). Waan bujen im jet iaan wa ko rekwojarjar kar likūt ilo “ijo ekwojarjar tata” (1 Kiin̄ 8:6), im “aiboojoj an Jeova … ear kobrak ṃōn Jeova.” (1 Kiin̄ 8:11). Solomon ekar katok juon jar in kōjeraam̧m̧an im kajjitōk bwe kōjeraam̧m̧an ko an ānbwin im jetōb pād ioon ukweļo̧k im jar Israel. Irooj ekar ron̄ jar in akweļap eo aer im kallim̧ur Israel eļap jeram̧m̧an elan̄n̄e renaaj pokake. Bōtaab, Israel ekar joļo̧k Irooj im kabun̄ n̄an riab in anij ko. (Lale 1 Kiin̄ 9–11.)
Rikanaan ro ilo Kallim̧ur M̧okta kar kapukōt ilo m̧ool n̄an katakin im kokwojarjar Israel “bwe ren maron̄ lo turin mejān Anij; Ak rekar kapen burueer im kar jab maron̄ pād ilo im̧aan Mejān;” (Katak im Bujen Ko 84:23–24).
Wōnmaanļo̧k, ajri in Israel rekar jab tōmak, mijak, ak makoko in oktak; kōnaan bar juon ial epidodoļo̧k; būrueer ekar ped ioon men ko an laļin; ak kar maron̄ joļo̧k Anij im rikanaan ro An. Aolep iien Israel ej elļo̧k jān Anij im kajej tokjen bujen ko aer im kain̄i ko aer “An illu ar urur ņae er,” (Katak im Bujen Ko), im rekar jab maron̄ bōke aolepen aiboojoj eo An.
Un eo Ekwojarjar n̄an Aiintok
Kijejeto eo an Irooj n̄an aiin armej ro An im kōjeraam̧m̧an er ilo bujen ko ilo tampeļ im kain̄i ko rekar barāinwōt waļo̧k ilo Kallim̧ur Ekāāl im Bok in Mormon. Rilo̧mo̧o̧r ekar kwaļo̧k, “Elōn̄ alen I ar kōņaan kokweilo̧ktok ro nejim̧, āinwōt lo̧lo̧ ej kokweilo̧klo̧k ro nejin jojo ium̧win pein, im kom̧ ar jab kōņaan!” (Matu 23:37; lale barāinwōt 3 Nipai 10:4–6).
Rikanaan Josep Smith ekar kōmeļeļeiki: “a kōttōpar eo n̄an aiintok doon … armej ro an Anij ilo aolepen laļin? … Kōttōbar eo ej n̄an kalōk n̄an Irooj juon em̧ ijo E emaron̄ kwaļo̧k n̄an armej ro An kain̄i ko ilo m̧weeo Im̧ōn im aiboojoj ko ilo aelōn̄ in kiin̄ eo An, im katakin armej kōn iaļen lo̧mo̧o̧r … bwe ren maron̄ … bōk revelesōn jān lan̄, im weppan̄ ilo aolep men ko an aelōn̄ eo an Anij—ak rej jab.”2
Irooj ekōnaan n̄an aiin ajri ro Nejin ilo epepen in im emōj an kwaļo̧k “men ko me kar ņooji jān m̧okta jān foundasōn eo an laļ, … aolep men ko rej ekkejeltok n̄an m̧wiin, im priesthood eo ie,” (Katak im Bujen Ko 124:41–42). Ej rōjan̄ kōj aolep n̄an kōbpopo n̄an rool n̄an Imaan Mejen—kar kōm̧m̧ane ekkar n̄an en̄taan in pinmuur eo An: “Lo, in ej ankilaō, bwe aolep ro rej kūr ioon Eta, im kabun̄-jar n̄an Eō ekkar n̄an gospel eo Aō ejjeļo̧k jem̧ļo̧kin, ren aetok ippān doon, im jutak ilo jikin ko rekwōjarjar” (Katak im Bujen Ko 101:22).
Etke Aolep Kain̄i Ko ilo Tampeļ Relukkuun Aorōk?
Tampeļ ko rej jikin kabun̄jar ko ekanooj ļap aer kwojarjar. Aolep men ko ekkatak im aolep ta ko emōj ilo tampeļ ko ilo raan-kein āliktata ej kwaļo̧k karōk ilo m̧ōņōņō eo an Jemedwōj Ilan̄ eļap, ekwojarjar n̄an Jisōs Kraist, im jerbal eo An āinwōt ad Rilo̧mo̧o̧r. Bujen ko kar būki im kain̄i ko kar kōm̧m̧ani ilo tampeļ rej aorōk n̄an kakwojarjar būruwōd im n̄an mour indeeo an ļaddik ro im leddik ro nejin Anij.
“Im priesthood in eļapļo̧k ej kōm̧akūtkūti gospel eo im kabwijer ki in men ko rettino an aelōn̄ eo, em̧ool ki in jeļāļo̧kjeņ an Anij.
“Kōn menin, ilo kain̄i ko ie, kajoor in āinwōt anij ej waļo̧k.
“Im ijello̧kun kain̄i ko ie, im maron̄ eo an priesthood eo, akajoor in āinwōt anij ej jab waļo̧k n̄an armej raņ ilo kanniōk;” (Katak im Bujen Ko 84:19–21).
Kain̄i ko me rej bōk ilo erreo im keememeji wōt rej kōpeļļok jekjek ko rekwojarjar kōn kajoor in āinwōt anij emaron̄ jiōb tok n̄an mour ko ad. Ilo bōke kaini ko an priesthood eo im kōm̧m̧ane im kōjparok bujen ko rekwojarjar jej bok iood ine n̄an im ippān Rilo̧mo̧o̧r (lale Matu 11:28–30)3 im maron̄ jeram̧m̧an kōn kajoor eļļā jān ad make jelm̧ae kabo ko im apan̄ ko ilo mour in ilo ad kōpopo n̄an rool imaan mejen Anij.
Kōjeraam̧m̧an ko an Bujen Tampeļ im Kain̄i ko
Kōmeļeļe jān Kraist im Ajri Redik, jān Carl Heinrich Bloch
Ruo iaan kōjeraam̧m̧an ko raorōk jān bujen im kain̄i ko ilo tampel rej eļapļo̧k m̧ōņōņō im kajoor.
Ripinmuur eo ej lan̄lōn̄ im menin jibadōk eo indeeo ejjeļo̧k jem̧ļo̧kin. Mool in m̧ōņōņō ej itok jān kōjerbal tōmak ilo Irooj Jisōs Kraist, erreo ilo būki im tiljek ilo kauteij bujen im kain̄i ko rekwojarjar, im kajjieon̄ n̄an lukkuun oktak n̄an Rilo̧mo̧o̧r eo im un ko An.
Alma ekar katakin ļaddik ro nejin bwe kwojarjar eļap im m̧ōņōņō ilo mour ko ad enaaj waļo̧k ne jenaaj erreeo im leļo̧k ad n̄an Pinmuur eo an Jisōs Kraist. Kōn wōt tōmak ilo Ripinmuur eo, ukweļo̧k, im kōjparok bujen ko jenaaj maron̄ bōk lem̧ōņōņō eo ejjeļo̧k jem̧ļo̧kin eo jej aolep kōņaan n̄an en̄jake n̄an būki.4
Jouj lale kallim̧ur kōn m̧ōņōņō jān Būreejtōn Russell M. Nelson: “Jej kūr aolep ajri ro nejin Anij rej pād jim̧or turājet ko ilo rōn̄ōļ n̄an itok n̄an Rilo̧mo̧o̧r eo aer, bōk kōjeraam̧m̧an ko an tampeļ eo ekwojarjar, bōk lan̄lōn̄ in kijenmej, im pojak n̄an mour indeeo.”5
Ilo raan kein ad ilo an kajoor eo an mārok nana “im rej kakure ad aeņōm̧m̧an,”6 kajoor in kōpārok eo ped ijin n̄an kōj kajjojo ilo im kōn bujen im kaini ko an tampeļ (lale Katak im Bujen Ko 38:32; 43:16; 76:39–42; 105:11–12, 33; 138:12–15). Nipai ekar loe ilo vision “iaar lo kajoor in Lamb an Anij, bwe ekar bun̄ … ioon armej in bujen ko an Irooj, …im raar pojak kōn jim̧we im kōn akajoor in Anij ilo aiboojoj eļap.” (1 Nipai 14:14).
Ilo jar in kōjeraam̧m̧an eo n̄an Kirtland Tampeļ, Rikanaan Josep Smith ekar kajjitōk ippāj Jemen “bwe rein karejeram̧ ren maron̄ ilo̧k jān m̧wiin Im̧ōm pālpel kōn kajoor eo Am̧” im “Im ejjeļo̧k kōttōbalbal in nana enaaj wōr an kajoor … jebar lōn̄tak im aanjo̧ ioon armej ro Am̧ ro ioer Etam̧ naaj likūti ilo m̧wiin” (Katak im Bujen Ko 109:22, 26).
A Glorious Light—Kirtland Temple, jān Glen S. Hopkinson, ejjab maron̄ kape
Jej aolep aikuj kajjieon̄ in ekkatak im em̧m̧an ad meļeļe n̄an kōjparok kajoor eo an bujen ko im kain̄i ko repād ilo m̧weeo im̧ōn Irooj—bwe kōj āinwōt rikaloor en maron̄ “jutak ilo jikin ko rekwōjarjar, im … jamin em̧m̧akūt” (Katak im Bujen Ko 45:32) im “juṃae ilo raan eo e nana” (Epesōs 6:13).
Karuwainene im Naan in Kam̧ool
Ij karuwanene kwe n̄an lukkuun katak kōn im m̧ōņōņō kōn aorōk ko an indeeo an bujen ko an tampeļ, kain̄i ko an tampeļ, im kabun̄jar ko an tampeļ ilo am niknik n̄an itok n̄an Rilo̧mo̧o̧r eo im būki kōjeraam̧m̧an ko emōj letok kōn Pinmuur eo An. Ij lukkuun m̧ōņōņō im kamool bwe Anij Jemed im Eo Nejin, Jisōs Kraist, remour, kōnaan eo aer eļaptata ej bwe jān rool n̄an Imaan Mejeer im bōk leen aiboojoj eo Aer (lale Katak im Bujen ko 97:16; 101:38).