Pedped ko Im̧aan Tata an Gospel eo

Jeje ko Rekwojarjar: Naan an Anij

Rikanaan ro ilo Kallim̧ur M̧okta, jān Judith A. Mehr

Jeje ko rekwojarjar rej bok ko rekwojarjar kar jeje eļaptata jān rikanaan ro. Jeje ko rekwojarjar rej kam̧ool kōn Jisōs Kraist im katakin kōj kōn gospel eo An. Jeje ko rekwojarjar kōjerbali ilo Kabun̄ in rej Baibōļ (ekoba Kallim̧ur M̧okta im Kallim̧ur Ekāāl), Bok in Mormon eo, Katak im Bujen Ko, im Bōōr eo Eļap Wōņāān.

Kallim̧ur M̧okta

Kallim̧ur M̧okta ej rekoot in pepe ko an Anij ippān armej in bujen ro An ilo iien ko etto. Ekoba katak ko an rikanaan ro āinwōt Moses, Joshua, Aiseia, Jeremia, im Daniel. Men̄e kar jeje jibuki iiō m̧okta jān lōtak eo an Jisōs Kraist, elōn̄ rikanaan ro ilo Kalim̧m̧ur M̧okta rekar jeje kōn E.

Kallim̧ur Ekāāl

Kallim̧ur Ekāāl ej rekoot in lo̧tak, mour in, katak ko, im Pinmuur eo an Jisōs Kraist. Ej barāinwōt koba katak ko an Rikaloor ro an Kraist im rijiļōk ro jet. Kallim̧ur Ekāāl ej jipan̄ kōj n̄an meļeļe elmen mour kōn gospel eo an Jisōs Kraist rainin.

Bok in Mormon: Bar Juon Kallim̧ur kōn Jisōs Kraist

Bok in Mormon ej rekoot in jet armej ro rekar jokwe ilo Amedka etto. Ekoba katak ko jān rikanaan ro, im unleplep eo an ej n̄an ba n̄an aolep armej bwe Jisōs ej RiKraist eo. Rikanaan Josep Smith ekar ukot jān pileij kooļ ko kōn menin letok im kajoor eo an Anij.

Katak im Bujen Ko

Katak im Bujen ko epād ie revelesōn ko kar leļo̧k n̄an Josep Smith im rikanaan ro jet ilo raan-kein āliktata. Revelesōn kein rej kōm̧elele elmen an kar Kabun̄ eo an Kraist ejaak. Rej barāinwōt ped katak ko an gospel raorōk kōn priesthood, kain ko an gospel, im ta enaaj waļo̧k ālikin mour in.

Bōōr eo Eļap Wōnāān

Bōōr Eo Eļap Wōņāān ekoba bok ko an Moses im Abraham, naan in kam̧ool eo an Josep Smith, im Laajrak in Tōmak ko an Kabun̄ in. Ekoba barāinwōt Josep Smith—Matu jidikin ukook eo an Josep Smith ilo Kallim̧ur Ekāāl.

Ekkatak Jeje ko Rekwojarjar

Rikanaan ro rekar katakin kōj n̄an ekkatak jeje ko rekwojarjar aolep raan. Kōm̧m̧ane menin ej jipan̄ kōļapļo̧k tōmak ko ad im n̄an epaake Jemedwōj Ilan̄ im Jisōs Kraist. Ilo ad lukkuun katak jeje ko rekwojarjar, Jetōb Kwojarjar enaaj jipan̄ kōj lo uwaak ko n̄an kajjitōk ko ad.

Rikanaan ro Raan Kein.

N̄e rikanaan ro im rijiļōk ro rainin rej kōnono kōn kajoor eo an Jetōb Kwojarjar, naan ko aer rej āinwōt jeje ko rekwojarjar. Juon waanjon̄ak in menin ej kweiļo̧k eo eļap. Jemaron̄ katak ekkatak kein jān kweiļo̧k eo eļap ilo Māe im Nobōm̧ba ennaan ko jen Liaona.

Etke Jej Riiti Jeje ko Rekwojarjar?

Jeje ko rekwojarjar rej kam̧ool kōn Jisōs Kraist. (lale Jekab 7:10–11).

Jeje ko rekwojarjar rej letok jān im̧we an Anij (lale 2 Timote 3:15–16).

Jemaron̄ mour kōn jeje ko rekwojarjar ilo mour ko ad (lale 1 Nipai 19:23).

Meļeļe ko reļapļo̧k kōn Bōōr Eo Eļap Wōņāān

Bok in Moses: Rikanaan Josep Smith kar im̧we n̄an ukōte jepta ko jinoin ilo Jenesis. Moses jepta 1 ej jenoļo̧k; jepta ko jet rej pedped ioon Jenesis 1:1–6:13.

Bok in Ebream: Rikanaan Josep Smith ej im̧we n̄an ukōt jeje ko an Ebream, jān pepa ko loi ilo Egypt

Laajrak in Tōmak: Jon̄oul jilu enaan ko jeje jān Josep Smith ej kalaajrak tōmak ko ad raorōk āinwōt membōr ro an Kabun̄ eo an Irooj.