“Juon Kein Jerbal ilo Pein Irooj,” Liaona, Juļae/O̧k 2022
Itok, Ļoor Eō
Ester
Juon Kein Jerbal ilo Pein Irooj
N̄e jej loore Jetōb im kōnaan ilo būrueer, Irooj enaaj tōl kōj n̄an kōm̧m̧ane ta eo Ej kōņāāņ bwe jān kōm̧m̧ane.
Kōmeļeļe ko jān Dilleen Marsh
N̄an erom juon kein jerbal ilo pein Irooj ej juon men epidodo. Jej aikuj in kōnaan n̄an kōtļo̧k bwe Jetōb en tōl kōj im lōn̄ ad peran n̄an loore im̧we ko An. Āinwōt wāween in ke jinen im jemen kōrā eo ippa rekar kobatok ilo Kabun̄ in ilo 1968 eo. Juon mijinede edik eo ekar kōnaan erom̧ juon kein jerbal ilo pein Irooj ekar jipan̄ boktok baam̧le eo aer n̄an Kabun̄ in.
Rein ilo baam̧le e ao juon rekar kōnono ippen mijinede ro juon kōttan, ak ālikin iien eo, jemen kōrā eo ippa ekar jab kōnaan wōnm̧aanļo̧k. Innem juon mijinede kāāl, Elder Fetzer, ekar emakūt n̄an eria eo, im mijenede in edik im eo mōttan rekar en̄jake bwe rej aikuj loļo̧k im jerbal in karejar ippān baam̧le in. Elder Fetzer ekar maron̄ im̧we būruen ro uwaan baam̧le in ilo juon wāween me mijenede ro jet rekar jab maron̄e.
Ilo jilijino allon̄ ko mijinede ro rekar jerbal in karejar kōn aikuj ko an baam̧le eo. Ilo jejjo iien, Jetōb ekar maron̄ im̧we būruen jinen im jemen kōrā eo ippa im rekar kobatok ilo Kabun̄ in. Rekar boki kōjeraam̧m̧an ko rej itok ilo ad kōm̧m̧ani im kōjparok bujen ko. Kōn er, elōn̄ļo̧k baam̧le ko rekar kobatok ilo Kabun̄ in im būki kōjeraam̧m̧an ko an gospel in.
Menin ekar waļo̧k, ilo jidik in, kōnke juon ļaddik em̧m̧an ded jān Utah ekar kōnaan bwe “Anij en anjo” ilo mour eo an. Ekar lon̄ an peran n̄an iļo̧k jān ko̧n ilo m̧weo imōn, ekkatak juon kajin ekāāl, im jerbal n̄an Irooj ilo Brazil.
Juon Oktak Epidodo
Juon iiō emootļo̧k kōrā eo ippa, Alessandra, kar jeje n̄an ilo talpo̧o̧n eo an jān juon sister ilo ward eo am ilo Brazil. Enan̄in de elōn̄ļo̧k jān ruo iiō in aer kar aliktata io̧o̧n doon. Sister eo ekar jeje: “Juon iaan raan ko enana ilo mour in aō, ijaje elmen ao kar itok n̄an jar. Ke ikar, kwar loe n̄a. Kwar jibwe peiū im ba in jijet turim. Ikar kōnaan ippem. Kwar ronjake im katakin n̄a.”
Menin emaron̄ juon kōnono eļam. Bōtaab ekar juon iien em̧m̧an n̄an an kōrā eo ippa juon kein jerbal ilo pein Irooj. Ekar jerbal in karejar n̄an sister in eo ekar ped ilo juon iien eppen. Alessandra ekar jab lukkuun ļōmņak kake. Ekar en̄jake n̄an ron̄jake im leļo̧k aeņōm̧m̧an, im ekar jerbal ekkar n̄an en̄jake eo. Kiiō, elōn̄ļo̧k jān ruo iiō tokālik, ekar bok juon bar ennaan jān sister in, kwaļo̧k an kamooļol.
Ilo men kein rej waļo̧k ikar ekkatak bwe jej jab aikuj juon kūr n̄an juon kein jerbal ilo pein Irooj. Jej aikuji wōt ikideleel. “Kōn menin, eļan̄n̄e ewōr ami ikdeelel n̄an jerbal n̄an Anij ej kūr kom̧ n̄an jerbal in” (Katak im Bujen Ko 4:3).
“N̄an juōn IIen Āinwōt In.”
Ilo Kallim̧ur M̧okta jej riit kōn juon armej eo ekar jerbal āinwōt kein jerbal ilo pein Anij. Ester ekar juon leddik em̧m̧an ded eo ekar mej jinen im jemen ke iiō ko redik. Ekar rūttoļo̧k ippān eo rilikin Mordecai.
Ālkin an Kiin̄ Ahasuerus joļo̧k Lerooj Vashti, ekar kāālet Ester bwe en lerooj eo an ekāāl. “Im kiin̄ eo ear yokwe Ester jān kōrā otemjej, im eḷapḷọk an bōk jouj im m̧ool im̧aan mejān” (Esther 2:17). Ester ekar juon Riju, ak Kiin̄ eo ekar jaje.
Haman, juon iaan ro reuteij an kiin̄ eo, kar karōk bwe en jijōt ilōn̄in aolep ro rekar uteij ippen (lale Ester 3:1). Im ekar kwaļo̧k “n̄an kọkkure, ṃan, im kōṃṃan bwe en jakoaolep ri Ju ro, jimor dik im ritto” (Ester 3:13).
Ke Ester ekar ron̄ men in kōn kweiļo̧k eo an Haman, Mordecai ekar rōjan̄ Ester n̄an kōnono ippen Kiin̄ eo. Menin ekar juon kauwōtata n̄an e, akō ekar bōk peran̄ jān naan in rojan̄ ko an Mordecai. Ekar ba, “Wōn e jab ba bwe eñin unin aṃ kar itok ñan aelōñ in ilo iien rot in?” (Ester 4:14).
“Eḷaññe I jako, I jako,” ekar ba (Ester 4:16) im ekar etal ippan̄ Kiin̄ eo ilo an jab kōjjeļļāik. Menin ej tōl n̄an mej. Kōn an kajoor, Ester ekar maron̄ im̧we Kiin̄ in. Āinwōt juon uwaak, ekar kōm̧m̧ane juon leta n̄an kōtļo̧k Riju ro. Ilo in, ekar “leļo̧k n̄an ri Ju ilo jabdewōt jikin kweilọk bwe ren kweilọklọk, im jutak kōn aer mour” (Ester 8:11).
Aolep Kūr Raorōk.
Ester ekar ikideelel n̄an juon kein jerbal ilo pein Irooj. Mour in pokake im tiljek eo an ekar kapooj e. Ke ij ļōmņak kōn an kar etal n̄an ijo jikin kiin̄ eo ilo aer kar jab karwaineneik, ikar bulon̄ kōn peran eo an. Ej kakemeemej n̄an kōn karwainene eo an Būreejtōn Russell M. Nelson n̄an aolep n̄an kōtļo̧k bwe Anij en anjo̧ ilo mour ko ad.1 Ester ekar kōnaan bwe Anij en anjo̧.
Eo jein Ester Moredecai ekar barāinwōt kein jerbal ilo pein Irooj. Eaar jeļā lale Ester. Ekar leļo̧k n̄an jipan̄, peran, im ikideelel. Ewor ad aolep kūr n̄an kōm̧m̧ane, im kajjojo kur jimor eaorōk im em̧m̧ann.
Irooj ekar likūti Ester ilo imōn Kiin̄ eo kōn juon un n̄an lomo̧o̧ren— Riju ro Āinwōt An kar kōm̧m̧an ippān Ester, Irooj ej likut kōj ia eo jemaron̄ jipan̄ n̄an kakūrmool un ko An. Kōn un in, jej aikuj in pojak im erreeo n̄an jelm̧ae iien ko rem̧m̧an n̄e Ej letok.
Iien Em̧m̧an Aolep Jikin
Iien em̧m̧an n̄an juon kein jerbal ilo pein Irooj ej ped ipelaakid. Eddo eo ad ej n̄an pojak n̄an jerbal. Jet iien jejaje n̄āāt im elmen iien em̧m̧an kein enaaj letok n̄an kōj. Jej aikuj mour weppan kōn jemjera eo an Jetōb Kwojarjar im wōr juon ikdeleel ilo būrueer. Innem Irooj enaaj tōl kōj n̄an kōm̧m̧ane ta eo ej aikuji kōj bwe jān kōm̧m̧ane.
Ilo Katak im Bujen Ko 35:3, Irooj ej ba n̄an Sidney Rigdon, “Iaar kalimjek eok im jerbal ko am. Iaar ron̄ jar ko am, im kar kōpooj eok n̄an juon jerbal eļapļo̧k.”
Irooj ejeļā kōj im ewōr an jerbal n̄aj kōj kajjojo n̄an kōm̧m̧ane. Jet iien ej jerbal ko ma kōj wōt jemaron̄ kōm̧m̧ane. Jerbal in emaron̄ ilo m̧weo āinwōt mama im baba rej jipan̄ nejin eo ej kakkōt. Ak emaron̄ ilo eddo ko ad ilo Kabun̄. Ilo m̧ool, emaron̄ jabdewōt iien, jabdewōt jikin, im ippān jadewōt.
Būreejtōn Dieter F. Uchtdorf, kar Rikakpilōklōk eo Kein Karuo ilo Būreejtōnji eo Kein Kajuon, ekar ba: “Irooj ekar lewaj am eddo ilo ewōr un. Emaron̄ lōn̄ armej im bōro ko kwe wōt komaron̄ tōpar im im̧we. Aaet ejjeļo̧k emaron̄ kōm̧m̧ane ilo wāween eo.”2
Būreejtōn Uchtdorf ekar barāinwōt ba, “Elan̄n̄e jenaaj āinwōt [Rilo̧m̧o̧o̧r eo] waanjon̄ak eo eweppān, peid emaron̄ āinwōt Pein; mejed, āinwōt Mejen; būruwōd, āinwōt Būruen.”3
Āinwōt Ester, Mordecai, Elder Fetzer, kōrā eo ippa, im elōn̄ ro jet, kōj aolep jemaron̄ kein jerbal ilo pein Irooj.