Ngaahi Peesi Fakalotofonua
Ko e ʻIlo ʻe ha Mana Fakaonopooni ha Faifekau
ʻI he konga kimuʻa ʻo e taʻu kuo ʻosí, ne kole ʻe ʻEletā ʻAlisitea B. ʻOtisā ki he kau palesiteni fakasiteikí ke fokotuʻu ha taumuʻa ki he tokolahi ʻo e kau faifekau akoʻi taimi kakato te nau ngāue ʻi Tīsema 2022.
Hili ha lotu lahi mo ha ʻaukai, ne u fokotuʻu ha taumuʻa te ne fakatupulaki kimautolu ko ha siteikí, ko ha taumuʻa ne fiemaʻu ki ai ha fuʻu tui lahi mo ne ʻomi ha ngaahi aʻusia fakalaumālie mo e mana ki he moʻui ʻa e kāingalotú. Ne u ʻiloʻi e tokolahi ʻo e kau faifekau naʻe lolotonga ngāué, mo e kau teuteu ngāue fakafaifekau ne mau lolotonga ngāue fakatahá, ʻa ia ʻe lava ʻo aʻu ki ha kau faifekau ʻe toko 10-12 ʻe ngāue ʻi Tīsemá. Ne u ongoʻi ha tataki fakalaumālie ke fokotuʻu ʻa e toko 25 ki he taumuʻa homau siteikí.
Ne u kamata fakataha leva he taimi pē ko iá mo ʻemau kau pīsopé, kau palesiteni fakakoló, kau mēmipa ʻo e fakataha alēlea māʻolungá mo e fakataha alēlea fakasiteikí. Ne mau fakaafeʻi e taha kotoa ke mau ngāue fakataha ke maʻu e kau faifekau ko ia ʻe toko 10–15 ne teʻeki ai ke mau ngāue fakatahá. Hili ha taimi nounou mei ai, ʻi he Konifelenisi Lahi ʻo ʻEpelelí, ne toe fakaafeʻi ʻe Palesiteni Lāsolo M. Nalesoni e kau talavou mo e kau finemui kotoa naʻa nau maʻu ha loto-holi ke ngāue fakafaifekau taimi kakató. Naʻe poupouʻi ʻe Palesiteni Nalesoni e taha kotoa ke ‘fekumi mo ʻamanaki ki ha ngaahi mana’ ʻi heʻetau fakatupulaki hotau ivi fakalaumālié.1
Naʻe kole ʻa ʻEletā ʻOtisā ki he kau palesiteni fakasiteiki ʻi heʻemau fakataha alēlea fakafekauʻakí, ke nau fakaafeʻi e kau pīsopé mo e kau palesiteni fakakoló ke nau fakaafeʻi ha ongo talavou he uike kotoa pē ke na ʻalu ʻo ngāue fakafaifekau. Naʻa mau tui ʻe hoko ha ngaahi mana, peá u fakalotolahiʻi homau kau takí ke toe fakafoʻou ʻenau ngāue ki hono kumi ha kau faifekaú, mo fakamamafaʻi te mau aʻusia ha ngaahi meʻa fakalaumālie mo ha ngaahi mana ʻi heʻemau fekumi ki ha ueʻi fakalaumālie mo ha tataki ke ʻiloʻi e tokotaha ke fakaafeʻí.
ʻI he fakataha alēlea hono hoko homau siteikí, ne talamai ʻe ha tangata kiate kimautolu ʻoku ʻi ai hano ongo foha te na lava ʻo ngāue fakafaifekau. Naʻe loto e foha ʻe taha ke ngāue maʻá e ʻEikí, ka naʻe ʻikai ke fie ngāue e foha ʻe tahá. Ne nofo e foha ko ʻení, ko Sione, ʻi ʻAmelika, pea naʻe ʻi ai hono kaumeʻa, pea naʻá ne pehē ne teʻeki ai ke ne maʻu ha tali ki heʻene ngaahi lotú, pe ʻoku totonu ke ʻalu ʻo ngāue fakafaifekau pe ʻikai.
ʻI he laumālie tatau ʻo hangē ko ʻAlamaá, naʻe fakatē loʻimata e tamai ko ʻení ʻo kole mai ke mau lotua ʻa Sione ke ne maʻu ha tali mei he ʻEikí.
Pea hangē pē ko e taha kotoa pē, ne hokohoko atu ʻeku lotu mo ʻaukai maʻá e talavou ko ʻení.
Ne u ʻā pongipongia hake ʻi ha pongipongi Tokonaki ʻo tokoto pē ʻo fakalaulauloto peá u aʻusia ha meʻa fakaofo mo fakatōkilalo moʻoni. Ne u mamata ʻi ha vīsone kia Sione. Ne fakahinohinoʻi au ke u ʻaʻahi kiate ia he ʻaho hono hokó, hili ʻeku ngaahi ngāue fakaʻahó. Ne hoko atu e vīsoné ʻo tuku mai kiate au e ngaahi fehuʻi pau ke u fai kia Sioné. Ne u fanongo leva ki heʻene talí, mo e anga ʻo e tali te u fai kia Sioné. Naʻe pau mo mahino lelei e pōpoaki ne fakahoko maí.
ʻI he efiafi ko iá, ne fakamaʻu ʻeku ʻaukaí pea lotua ke kei mahino lelei ai pē e meʻa kotoa ʻi he vīsoné koeʻuhí ke lava ʻo fakahoko e ngāue ne tuku mai kiate aú.
Ne u ʻalu ki ha konifelenisi fakauooti he ʻaho hono hokó, fai ha ngaahi ʻinitaviu pea heka leva ki heʻeku kaá. ʻI heʻeku mavahe mei he falelotú, ne fakamanatu mai kiate au ʻe he Laumālié ʻeku ngāue ke faí. ʻI ha founga fakaofo mo fakalaumālie, ne u toe mamata ki he vīsone ne u maʻu he ʻaho kimuʻá.
ʻI heʻeku aʻu atu ki he ʻapi ʻo e fāmilí, ne u tukituki atu he matapaá pea fakahā mai ʻoku ʻi muli ʻena tangataʻeikí, ka ʻoku ʻi ʻapi pē ʻa e faʻeé. ʻI he aʻu mai e faʻeé ki he matapaá, ne u kole ange pe ʻe lava ke u talanoa mo ia mo Sione. Naʻe lolotonga femoʻuekina ʻa Sione hono ngaohi e meʻatokoni efiafí. Ne fakaafeʻi mai ʻe he faʻeé ke u hū ange ke mau pōtalanoa.
Ne u kole kia Sione ke ne fai ha lotu pea toe hā lelei mai e vīsoné he taimi pē ko iá ʻo hangē pē ko e ʻaho kimuʻá.
Ne u ʻeke ange kia Sione pe ko e hā ʻene fakakaukau ki he ngāue fakafaifekaú? Naʻe tatau tofu pē ʻene talí mo e meʻa ne u sio ki ai ʻi he vīsoné. Naʻá ne talamai naʻe teʻeki ai ke ne fakapapauʻi pe naʻe totonu ke ʻalu ʻo ngāue fakafaifekau; he kuó ne fakalaulauloto mo lotu ka naʻe teʻeki ai pē ke ne maʻu ha tali. Ne u ʻeke ange pe kuo ʻosi maʻu hono tāpuaki fakapēteliaké. Naʻá ne talami, “ʻio”. Ne u ʻeke ange, “Ko e hā leva e meʻa ʻoku ʻasi ʻi hoʻo tāpuaki fakapēteliaké?” Naʻá ne tali mai, “Te u ʻalu ʻo ngāue fakafaifekau”.
Ko e fakahinohino tofu pē ia ne u maʻú, peá u ʻeke ange, “Ko e hā e founga ʻoku tali ai ʻe he ʻEikí ʻa e ngaahi lotú?” Ne faingataʻaʻia ʻa Sione . . . ka naʻá ne vahevahe mai ʻene ngaahi fakakaukaú. Ne fakamālohia au ʻe he Laumālié mo ha ongo fakatōkilalo moʻoni, ne u pehē ange, “Ne fakahinohinoʻi au ʻe he ʻEiki ko Sīsū Kalaisí, ʻi ha fakahā, ke u haʻu ʻo ʻaʻahi mai kiate koe he ʻahó ni. ʻOku ou fakamoʻoni atu kiate koe ʻoku tali e ngaahi lotú ʻaki e ngaahi ongo, fakakaukau, mo hono lau e folofolá mo ha ngaahi founga kehe. ʻOku ou ʻi heni he ʻaho ní ke fakafofongaʻi e Fakamoʻui ko Sīsū Kalaisí, ʻi ha tali ki hoʻo lotú ke ne toʻo kotoa atu ai e puputuʻú mo e veiveiuá. Sione, ʻoku fakaafeʻi koe ʻe he Fakamoʻuí ke ke ʻalu ʻo ngāue fakafaifekau. ʻOku ʻi ai Haʻane ngāue ke ke fai pea ko ʻEletā Hala pē te ne lava ke fai iá he ʻoku ʻi ai ha taha makehe ʻoku talitali mai kiate koe ke ke fakaafeʻi ki he vai ʻo e papitaisó”. Ko e meʻa ʻeni ne ngata ai e vīsoné.
Ne u ʻeke ange pe ko e hā ʻene ongó. Naʻá ne punou pē ʻo tangi, “Kuo tali ʻeku lotú pea ʻoku ou loto ke u ʻalu ʻo ngāue fakafaifekau”.
ʻE vavé ni pē hano fakakakato ʻe Brother Hala ʻene ngaahi sivi fakafaitoʻó mo e nifó pea fakahū leva ʻene foomu ngāue fakafaifekaú. ʻOku hoko moʻoni e ngaahi mana ʻi onopooni ʻi he taimi ʻoku tau tuku ai ʻetau falalá ki he ʻEiki ko Sīsū Kalaisí.