« ’Ua hina’aro vau ’ia ha’amana’o ’outou, » Liahona, Tetepa 2023.
« ’Ua hina’aro vau ’ia ha’amana’o ’outou »
Mosia 5:12
’Ua hōro’ahia mai ia tātou tāta’itahi te mau fa’aha’amana’ora’a ia tātou iho i te Mesia. ’A hi’o atu ia rātou ’e ’a ha’amana’o iāna.
Fa’ata’ara’a nō roto mai i Te Mesia ’e te ha’apa’o ture tao’a rahi, nā Heinrich Hofmann
’Ei tuha’a nō tō tātou orara’a tāhuti nei, tei roto tātou pā’āto’a i te hō’ē pāruru nō te ha’amo’era’a, e tītaura’a ato’a rā nō te ha’amo’e ia tātou. E fa’atupu te pāruru nō te ha’amo’era’a ia tātou i te ha’amo’e i te mau ’ohipa ’e te mau parau mau tā tātou i ’ite na i roto i tō tātou huru hou te tāhuti nei. E arata’i tō tātou huru ha’amo’era’a ia tātou ’ia ha’amo’e e ’ia hahi ’ē i te mau parau mau tā tātou i ha’api’i mai ’e ’aore rā, i ha’api’i fa’ahou i roto i teie orara’a. Maoti tātou e upo’oti’a i ni’a i tō tātou huru hi’ara’a nō te ha’amo’era’a, e riro ’ōhie noa tātou i te « i te rave ’oi’oi i te mau ’ohipa ’ī’ino, ’e ’ua taere rā i te ha’amana’o i te Fatu [tō tātou] Atua » (1 Nephi 17:45).
Faʼaha’amana’oraʼa nō te Mesia
Nā roto i te mau fa’auera’a ato’a tāna e hōro’a mai, tē fafau mai nei te Atua ē « e fa’aineine i te hō’ē rāve’a [nō tātou] ’ia ti’a [ia tātou] ’ia rave fa’aoti i te mea tāna i fa’aue mai » (1 Nephi 3:7). ’Ia ha’apa’o tātou i tāna fa’auera’a ’ia ha’amana’o, ’ua fa’aineine te Fatu i te mau fa’aha’amana’ora’a.
’Oia mau, te mau mea ato’a ’ua poietehia ’e ’ua hāmanihia nō te fa’a’ite pāpū ’e nō te fa’aha’amana’ora’a ia tātou nō te Mesia (hi’o Mose 6:63 ; hi’o ato’a Alama 30:44). ’Ua fa’aau a’ena hia, ’ei hi’ora’a, ’ia ha’amana’o tātou iāna « ’ia haere ana’e [tātou] i roto i te uru rā’au ’e te uru rā’au matara , ’e e fa’aro’o i te mau manu ’ia hīmene mārū noa i roto i te mau tumu rā’au .»1 E nehenehe ato’a te mau ’ōfa’i e ti’aoro ’e ’ei ’itera’a pāpū ’e ’ei fa’aha’amana’ora’a nō Iesu (hi’o Luka 19:40). Inaha ho’i, tē fa’a’ite pāpū nei te fenua tā’āto’a, tei fa’aro’ohia ’e tei ’ite-mata-hia, ’e tē pūpū nei te reira i te mau fa’aha’amana’ora’a māere nō tōna Rahu rahi.
Nā te mau fa’aha’amana’ora’a huru rau i roto i te mau poietera’a ato’a e fa’aha’amana’o rahi a’e ia tātou, tei ’itehia nei i roto i te mau ’ōro’a mo’a. ’Ua ha’api’i Abinadi ē, ’ua hōro’ahia ia ’Īserā’ela i tahito ra te mau ’ōro’a ’eta’eta nō te rave ’ia ti’a ia rātou ’ia « ha’amana’o i te Atua, ’e tā rātou ’ohipa iāna ra » (Mosia 13:30). ’Ua ha’api’i ato’a mai te mau peropheta nō teie ’anotau hō’ē ā ha’api’ira’a. ’Ua parau te peresideni Spencer W. Kimball (1895–1985), « Tē mana’o nei au ē, e’ita roa atu te tāivara’a, e’ita roa atu te hara, mai te mea e ha’amana’o-mau-hia e te ta’ata, te mau mea tā rātou i fafau i te hiti pape ’e ’aore rā i te ’amura’a mā’a o te ’ōro’a mo’a ’e i roto i te hiero. »2
Nō te ao ato’a nei ’e nō te ta’ata hō’ē te tāra’ehara a te Mesia. Mai te reira ato’a tāna mau fa’aha’amana’ora’a. Nō reira, ta’a ’ē noa atu te mau ’ōro’a tei pūpūhia e au nō te tā’āto’ara’a, tē hōro’a nei ’oia ia tātou tāta’itahi i te mau fa’aha’amana’ora’a Nōna, e au nō i te huru o te ta’ata hō’ē. ’Ei hi’ora’a, te ’araea mātauhia ’e ’aore rā te vari paruparu, ’aita te reira e fa’atupu i te ha’amana’ora’a ia Iesu i te ta’ata nei ’e ’aore rā, e fa’a’ī i te ferurira’a ’e te māuruuru nōna. Terā rā, te ta’ata tei fa’aho’i-hia i tōna ’ite-mata nō tō Iesu paraira’a atu i tōna nā mata e te repo ’araea e riro paha ïa ’ē ’oia i te ha’amana’o pāpū ia Iesu i te mau taime ato’a e hi’o ’oia i te ’araea—te vari paruparu ! (hi’o Ioane 9:6–7). E’ita ato’a e nehenehe ia Naamana ’ia māta’ita’i i te hō’ē ’ānāvai, nō Ioridana iho ā rā, ma te ’ore e feruri i te Fatu tei fa’aora iāna i reira (hi’o 2 Te mau Ari’i 5:1–15). ’Ua hōro’ahia ia tātou tāta’itahi hō’ē fa’aha’amana’ora’a ta’a ’ē ’aore rā hau atu nō tātou iho, i te Mesia. ’A hi’o atu ia rātou ’e ’a ha’amana’o Iāna.
Te fa’a’itera’a pāpū i te parau nō te Mesia
Te mau pāpa’a parau ’e te mau ’ā’amu, ’o te tahi atu ïa mau mea tā te Fatu i fa’aineine nō te tauturu ia tātou ’ia ha’apa’o i tāna fa’auera’a ’ia ha’amana’ohia. Te mau pāpa’ira’a mo’a—e mau pāpa’a parau nō te mau ’ohipa a te Atua e tāna mau tamari’i—e parauparau pinepine nō ni’a i te fa’a’ite-ra’a-pāpū, ’e ’aore rā te « fa’a’itera’a i te pāpa’a parau », nō ni’a iāna (hi’o 2 Korinetia 8:3 ; 1 Ioane 5:7 ; 1 Nephi 10:10 ; 12:7 ; Te Ha’api’ira’a ’e te Mau Fafaura’a 109:31 ; 112:4).
E tauturu te mau pāpa’a parau mo’a, mai te mau buka ’ā’amu o te ta’ata iho, ia tātou ’ia fa’a’ite pāpū i te reira. Te mau taime hōhonu mau e te Vārua o te hō’ē ïa hōro’a o te taime iho, tei ti’aturihia ē, e’ita roa atu tātou e ha’amo’e. Terā rā, nā tō tātou huru ha’amo’era’a e fa’atupu i te pūai o te mau ’itera’a hōhonu roa a’e ’ia mōrohi i roto i te tau. E nehenehe te hō’ē tu’ura’a i roto i te buka ’ā’amu, te hō’ē hōho’a ānei, ’e ’aore rā te hō’ē pāpa’ira’a parau e tauturu ia tātou ’eiaha noa atu e ha’amana’o i te mau taime hōhonu, e fa’aho’i ato’a mai rā i te mau mana’o horuhoru ’e te Vārua tei fāri’ihia. Nō reira, ’aita e māere ē, te ture mātāmua i muri a’e i te fa’anahora’ahia te ’Ēkālesia i roto i teie tau tu’ura’a, ’oia ho’i « E pāpa’ihia te hō’ē pāpa’a parau i rotopū ia ’outou na » (Te Ha’api’ira’a Tumu ’e te mau Fafaura’a 21:1). E fa’arahi te maura’a i te pāpa’a parau i tō tātou ha’amana’ora’a ’e e nehenehe te reira e ha’apāpū ia tātou i tā tātou mau hape ’e e hōpoi mai ia tātou i te Atua ra (hi’o Alama 37:8).
I te hope’a roa, ’ua ti’a ia tātou ’ia fa’a’ite i te parau mau nō te mea ’ua fāri’i tātou i te hō’ē fa’a’itera’a nō te parau mau nō ’ō mai i te Vārua Maita’i ra, ’oia « te pāpa’a parau o te ra’i ra » (Mose 6:61). I roto i teie ti’ara’a, tē pāpa’i nei te Vārua Maita’i i te parau mau i roto i te « papa ta’ata ra [tō tātou] ’ā’au » (2 Korinetia 3:3). E tauturu ’oia ia tātou ’ia ha’amana’o i te Mesia ’e i te mau mea ato’a tāna i ha’api’i mai ia tātou (hi’o Ioane 14:26).
Tē fa’a’itehia nei te parau o te tū’atira’a i rotopū ia Iesu, te mau pāpa’a parau, te Vārua Maita’i ’e te ha’amana’ora’a i roto i te Moroni 10:3–5. ’Ua fafauhia mai ia tātou ē, mai te mea e tai’o tātou i te Buka a Moromona, e pāpa’a parau mo’a ho’i, nā roto i te hō’ē vārua o te ha’amana’ora’a ’e e ani atu i te Atua nā roto i te i’oa o te Mesia ma te ’ā’au hina’aro mau, ma te mana’o pāpū ’e te fa’aro’o mau i te Mesia, e fa’a’ite mai te Vārua Maita’i ia tātou i te ’īra’a o te parau mau o te reira pāpa’a parau. ’E mai te mea e parau mau taua pāpa’a parau ta’a ’ē ra, ’o Iesu ïa te Mesia.
Alama Ti’afa’ahou, nā Walter Rane
’A ha’amana’o ’ia Fa’aorahia
E arata’i te ha’amana’ora’a ia Iesu i te fa’aorara’a ’e te fa’aorara’a. ’A feruri na i te ti’ara’a o te ha’amana’ora’a i roto i te fa’aorara’a o te tamaiti ’āpī ra o Alama. I te fāra’a mai te melahi ia Alama, ’ua hōro’a ’oia i te fa’auera’a ia Alama « ’ia ’ore ’ia ha’amou fa’ahou i te ’ēkālesia. » Noa atu rā, hou ’a hōro’a ai i taua mana’o ra ’ua parau te melahi : « ’A ha’amana’o na i te tītīra’a a tō ’oe nā metua… ’e ’a ha’amana’o na i te mau ’ohipa rarahi tā te Mesia i rave nō rātou ; tei roto ho’i rātou i te tītīra’a, e ’ōna… ’ua fa’aora ia rātou » (Mosia 27:16 ; reta tei fa’ahuru-’ē-hia).
E ’ere te fa’auera’a a te melahi ’ia ha’amana’o i te hō’ē arata’ira’a pa’ari noa e te fa’a’ohipara’a ’ā’ano. Nō Alama, e tāpa’o fa’a’ite ta’a ’ē, tāpa’o o te here, nō te huru ’oia i ora mai ai mai te pohe mai ā tāna e ’ite i muri iho.
E piti ’ahuru matahiti i muri mai, ’ua fa’a’ite Alama i tāna tamaiti ia Helamana, ma te hu’ahu’a maita’i, i te mea tāna i rave nā roto i tōna riro ra’a mai e hāpepa ’e e vāvā e toru mahana te maoro, « ’ia tātarahapa ho’i au ’e ’ai fātata i te pohe » (Mosia 27:28). I muri a’e i tō te melahi revara’a, ’ua ha’amana’o maita’i ’o Alama, i te mau mea ato’a ; terā rā, te mau mea ato’a tāna e ha’amana’o rā, o tāna ïa mau hara.
« ’Ua ha’amāuiuihia vau i te māuiui mure ’ore », tē ha’amana’o rā Alama. « … ’oia ïa, ’ua ha’amana’o ihora vau i tā’u ato’a ra mau hara ’e te mau ’ohipa ’ī’ino, ’e ’ua ha’amauiuihia ihora vau i te mau mauiui o hade ra » (Alama 36:12–13). Te mana’ona’ora’a nō ni’a i te ti’ara’a i mua i te Atua, tei fa’a’ī ia Alama i te « ri’ari’a rahi » tāna i mana’o ’ia horo ’ē atu ’oia, ’eiaha nā roto noa i te pohera’a atu, nā roto rā i te « ha’amou(ra’a) ho’i i te vārua ’e te tino ato’a ho’i » (Alama 36:14–15).
E ti’a tātou ’ia fa’aea ma’a taime ’e ’ia hāro’aro’a : ’Aita ’o Alama i ’aufau noa i te tahi utu’a ri’ari’a mau nō na mahana e toru tei fa’ata’a-’ōmua-hia ’ei fa’ahope’ara’a tano nō tāna mau hara. ’Aita, tei te pae hope’a ’oia—na mahana e toru mātāmua—« ’e ’ua ru’uru’uhia ho’i te mau fifi mure ’ore nō te pohe » (Alama 36:18 ; reta tei fa’ahuru-’ē-hia).
Te mea pāpū, e fa’aea noa ’oia i roto i teie ti’ara’a ri’ari’a ē hau atu i na mahana e toru—’aita e hope’ara’a—’āhani ’aita te reira i tupu, ’aua’e rā, ’ua ha’amana’o ’oia, ma te ’ore i ’ite mea nāhea rā, i te parau tohu a tōna metua tāne « nō ni’a i te taera’a mai o te hō’ē Iesu Mesia, e tamaiti a te Atua, ’ia pohe nō te mau hara a tō te ao nei ». I muri iho ’ua parau mai ’oia :
« I teie nei, tē tāpe’a ra tō’u ’ā’au i taua mana’o ra, ’ua pi’i ihora vau i roto iā’u iho : E Iesu ē, te Tamaiti a te Atua ra, aroha mai ’oe iā’u nei i tei roto i te au ’ava’ava ra, ’e tei ’ati-roa-hia ho’i i te tāpe’a mure ’ore o hade ra.
« E i teienei, inaha, i tō’u ferurira’a i te reira, ’aita vau i ha’amana’o fa’ahou i tō’u māuiui ; ’oia ïa, ’aita vau i ahoaho fa’ahou i te ha’amana’ora’a i tā’u ra mau hara » (Alama 36:17–19).
’Ua pe’e Alama i te fa’auera’a a te melahi ’ia ha’amana’o. ’Ua ha’amana’o ’ōna ia Iesu. E mai ia Iesu i fa’aora i te mau metua tane o Alama i te tītīra’a, ’ua fa’aora ’oia ia Alama i tōna ra.
’Auē ïa aroha marū ’e te fa’aorara’a rahi ! ’Auē ïa tauira’a māere o te ’ā’au ’e te ferurira’a ! O Alama ho’i tei mana’o ē, e horo ’ē atu ’oia mai te aro o te Atua ra nā roto i te fa’a’ore-roa-ra’a i tōna parau, i teienei ’ua hi’o ’oia i te Atua ’e tāna mau melahi mo’a ’e « ’ua hīa’ai atu ra…’ia pārahi ato’a ’oia i reira » (Alama 36:22).
’Ua fa’arahihia teie tauira’a semeio e te hō’ē noa ha’amana’ora’a. Tē hōro’a nei te ’ohipa i tupu nō Alama i te aura’a mau nō te mau parau hope’a o te a’ora’a hope’a a te ari’i Beniamina ra : « ’E i teienei, ’e te ta’ata ē, ’a ha’amana’o, ’ia ’ore ’ia pohe » (Mosia 4:30).
Ha’amana’o ’oia ia tātou
’A tūtava noa ai tātou i te ha’amana’o noa ia Iesu, e mea faufa’a ’ia vai noa i roto i te ferurira’a ē, e ha’amana’o noa ’oia ia tātou. ’Ua pāpa’i ha’amau ’oia ia tātou i ni’a i tōna ’apu rima (hi’o Isaia 49:16). ’A feruri na i te reira—e’ita e ti’a ia Iesu e ha’amo’e ia tātou, ’āre’a rā ’ōhie ’e te hina’aro mau, e ha’amo’e ïa ’oia i tā tātou mau hara tei ha’amo’e iāna.
E mau’ara’a maita’i te ha’amana’ora’a.