Te reo o te feiā mo’a i te mau mahana hope’a nei

E hina’aro ānei ’oe ’ia ’ite rahi atu ā ?

Nā Michael J. Lantz, Utah, Marite

E mea ta’a ’ē te hō’ē o tō’u mau hoa ’ohipa i te tahi atu mau fa’ehau, nō reira ’ua ui atu vau iāna nō te aha.

’Ua bāpetizohia te ta’ata pāpa’i e Thomas Salisbury i roto i te Roto nō Sông Bé, te fenua ’Ānāmī.

Hōho’a i hōro’ahia mai e te fatu hōho’a

’Ua fa’aō vau iā’u i roto i te nu’u fa’ehau nō te fenua Marite nō te hō’ē tau e toru matahiti te maoro, ’e ’ua tae atu vau i ’Ānāmī apato’a i te 20ra’a o tō’u matahiti. I muri a’e e va’u ’āva’e, ’ua tonohia vau ’ia ’āmui atu i te hō’ē pupu fa’ehau i te pae apato’erau nō Saigon. I reira, ’ua ’ite ’oi’oi au ē, hō’ē o tō’u mau hoa fa’ehau, ’o Thomas Salisbury, e mea ta’a ’ē ’oia i te mau ta’ata ato’a.

Nō te māere rahi o teie ta’a-’ē-ra’a i ani ai au iāna i te pae hope’a, « Tom, nō te aha ’oe i ta’a ’ē ai i te tahi atu mau ta’ata ? »

« Nō te mea e feiā mo’a vau i te mau mahana hope’a nei », tāna i pāhono mai.

« E aha te hō’ē feiā mo’a i te mau mahana hope’a nei ? » Ui atu ra vau.

’Ua fa’anaho mai ’oia iā’u ’ia fārerei iāna ’e ia Harold Lewis, hō’ē misiōnare tei ho’i mai ’o tē tāvini ra ’ei tauturu nō te ’ōmōniē nō te nu’u. I roto i tā mātou fārereira’a mātāmua i roto i te hō’ē fare ’ie tei fa’arirohia ’ei fare purera’a na’ina’i, ’ua parau vau ē mai te mea e ti’aturi mau vau i te mea tā rāua e parau mai, e bāpetizohia ïa vau. ’Ua fāri’i ato’a vau i te hō’ē Buka a Moromona, tā’u e tāpe’a i roto i te pūtē raro o tō’u piripou ’āvae roa ’e ’o tā’u e tai’o i te mau taime ’aita e ’ohipa.

’Ua tupu e rave rahi ’āparaura’a i muri mai ’e ’ua ’ite au ē, ’ua pāhono te ha’api’ira’a tāta’itahi i te mau uira’a tā’u e vai ra i roto i tā’u mā’imira’a i te parau mau. I te anira’a mai rā Tom ’e Harold iā’u ē, e hina’aro ānei au e bāpetizo iā’u, ’ua parau atu vau ’aita. ’Aita vau i ’ite nāhea vau ’ia ha’apa’o i te mau fa’auera’a ato’a tā rāua i ha’api’i mai iā’u.

I muri a’e i tō’u haerera’a i te hō’ē ’āmuira’a mata’eina’a i Saigon, ’ua haere atu vau i Auteraria nō te hō’ē hepetoma fa’afa’aeara’a ’e te tāmarūra’a. I reira tō’u ha’amatara’a i te ’ite i te faufa’a rahi o te mau ha’api’ira’a o te ’evanelia nō’u. I tō’u ho’ira’a atu i ’Ānāmī, ’ua fa’aara ’oi’oi atu vau ia Tom ē, ’ua hina’aro vau ’ia bāpetizohia vau.

Tau taime ri’i i muri noa, ’ua bāpetizo Tom iā’u i roto te Roto nō Sông Bé, ’ua ha’amau Harold iā’u ’ei melo nō te ’Ēkālesia, ’e o Timoteo Hill, tō mātou ti’a fa’atere pupu nō te ’Ēkālesia, ’ua fa’atōro’a ’oia iā’u ’ei diakono.

I tō’u ho’ira’a i te fenua Marite e ono hepetoma i muri mai, ’ua fa’a’ite atu vau i te ’evanelia i tō’u hoa tamāhine, tei riro mai tā’u vahine. ’Ua fāri’i ato’a ’oia i te parau poro’i ti’aturi o te ’evanelia.

’Ua māuruuru roa vau ia Tom i tōna uira’a mai iā’u ē, e hina’aro ānei au e ’ite rahi atu ā. ’Ua pāhono tōna hi’ora’a ’e tāna anira’a manihini i tō’u hina’aro ’ia ’ite i te parau mau ’e ’ia fana’o i te mau ha’amaita’ira’a o te ’evanelia.