Mai, pe’e mai

2 Korinetia 7

Nāhea te ’oto e au i te Atua i te tauturu ia tātou ’ia tātarahapa ?

Hōho’a nā Mark Mabry

’Ua ha’api’i te ’āpōsetolo Paulo ē, « te ’oto ho’i e au i te Atua ra e fa’atupu ïa i te tātarahapa e tae noa atu i te ora … ’āre’a te ’oto o teie nei ao e fa’atupu ïa i te pohe » (2 Korinetia 7:10). E nehenehe tātou e fāri’i i te ’oto, te ha’amā ’e te paruparu o te ao nei ’ia hara ana’e tātou. Teie rā, ’ia fāriu ana’e tātou i ni’a i te Fa’aora nō te tātarahapa, tē ani ra tātou ’iāna ’ia taui i tō tātou ’ā’au ’e ’ia taui i tō tātou ’oto ’ei ’oa’oa (hi’o Alama 36:18–20).

Te ’oto e au i te Atua ’e te tātarahapara’a mau

’Ia fāri’i ana’e tātou i te ’oto e au i te Atua, e ’ite tātou i tō tātou rāva’i ’ore ’e e hina’aro tātou e rave maita’i a’e. E roa’a te tīa’ira’a ia tātou nō te ’ananahi—’e e fāri’i tātou i te here o te Fa’aora nō tātou.

’A feruri na i teie mau uira’a ’a tuatāpapa ai ’outou te 2 Korinetia 7 :

• E aha te aura’a « ’ia ’oto ana’e tātou ma te tātarahapa ? » (’īrava 9).

• E aha te ’ohipa tā tātou e rave ’ia tae ana’e mai ia tātou te ’oto e au i te Atua ? (hi’o te mau ’īrava 10–11).

Te ’oto e au i te ao nei ’e Te ’oto e au i te Atua

« E huti te ’oto e au i te ao nei ia tātou i raro, e tūpohe i te tīa’ira’a, ’e e tūra’i ia tātou i roto i te tahi atu mau fa’ahemara’a.

« E arata’i te ’oto e au i te Atua i te fa’afāriura’a ’e i te hō’ē tauira’a o te ’ā’au. E tūra’i te reira ia tātou ’ia pāto’i atu i te hara ’e ’ia here i te maita’i. E fa’aitoito te reira ia tātou ’ia ti’a i ni’a ’e ’ia haere i te māramarama o te here o te Mesia. Te tātarahapara’a mau ’o te tauira’a ïa, e ’ere i te ha’amāuiuira’a ’e te fa’a’otora’a. ’Oia mau, e mea pinepine ’ua riro te tātarahapara’a mau ’e te ha’amana’ora’a hara nō te ha’apa’o ’ore ’ei ta’ahira’a mamae ’e te mea faufa’a roa, i roto i te fa’anahora’a mo’a nō te tātarahapara’a. ’Ia arata’i ana’e rā te ha’amā i te mana’o fa’ahapa ia tātou iho ’aore rā e tāpe’a ia tātou ’ia ti’a mai i ni’a, e fa’ataupupu ïa te reira i tō tātou tātarahapara’a ».

Elder Dieter F. Uchtdorf nō te pupu nō te Tino ’Ahuru ma Piti ’āpōsetolo, « E nehenehe tā ’outou e rave i teienei ! », Liahona, Novema 2013, 56.

’Āparaura’a

Tai’o Te Ha’api’ira’a Tumu ’e te mau Fafaura’a 18:9–13. E aha te mana’o o te Fa’aora nō tātou, noa atu ā tō tātou mau hapehape ? Nāhea tātou e nehenehe ai e taui i tō tātou hi’ora’a ia tātou iho, nō te ’āna’i i ni’a i tōna ?