Te u Poupouʻi Fēfē ha Taha Kuo Ngaohikovia?

‘E lava ke fakatupu ʻe he ngaohikoviá ha mamahi fakaeloto loloto, fakakaukau fakalilifu, mo e ngaahi tōʻonga kovi. ʻE fiemaʻu e he kau mamahí e mālohi ʻo Sīsū Kalaisí ʻi heʻenau fekumi ki he fakamoʻuí pea te nau toe fie maʻu foki mo ha tokoni fakapalōfesinale. ʻE malava ke tokoni hoʻo poupou faka-Kalaisí ki heʻenau fakaakeaké.

Ko e founga ʻeni ʻe nima te ke lava ʻo tokoniʻi ai kinautolu ne ngaohikoviá, ʻi hoʻo fakalotolahia kinautolu ke hanga ki he Fakamoʻuí pea fekumi foki ki ha tokoni fakapalōfesinale:

ʻAi ke ke ʻiloʻi. Ako ke ʻilo ko e hā e ngaohikovia pea ʻokú ne uesia fēfē e kau mamahí.
Maʻu ha mahino ki he ongo ha tokotaha ne ngaohikovia. ʻI he taimi lahi ʻoku nofo ʻa kinautolu ʻoku ngāohikoviá mo e ngaahi fakakaukau ʻoku ʻikai lelei kae pehē foki ki he ngaahi ongoʻi taʻefeʻunga mo fakamāʻia.
Fakakaukauʻi hoʻo ngaahi leá. ʻOku faʻa fakalalahi ʻa e mamahi mo e faingataʻa‘ia ʻoku aʻusia ʻe he kau mamahí ʻi he ngaahi lea ʻa e niʻihi kehé ʻoku makatuʻunga ʻi he taʻeʻilo ki he ngaohikoviá mo hono ngaahi nunuá. ʻE lava ke takiekina ʻe hono tukuakiʻi ʻo e tokotaha mamahí pe ko e ngaahi lea hangē ko e “feʻunga ā” pe “fakamolemoleʻi pea fakangaloʻi” ke fakautuutu ai e fakapulipulí mo e ongoʻi maá kae ʻikai ko e fakamoʻuí mo e nongá.
Fakafanongo mo ʻofaʻi. ʻI he taimi ʻoku ongoʻi falala atu ai e kau mamahí ke vahevahe atu ʻenau ngaahi aʻusiá kiate koé, fakafanongo kiate kinautolu ʻi he ʻofa mo e loto ongoʻi moʻoni. Mapuleʻi hoʻo loto ke akoʻi pe fai fakamaaú.
‘Iloʻi pea fakapapauʻi e ngaahi ongó. Ka tukunoaʻi e ngaohikoviá, ʻe hangē pē ia ko ha lavea fakaesino, ʻe ʻikai ke fakaakeake lelei e kau mamahí. ‘I hoʻo fakahā mo fakapapauʻi a e ngaahi ongo ‘a e tokotaha mamahí—hangē ko e loto mamahi, ongoʻi lavea, pē manavahē—te ke tokonia kinautolu ʻi he hala ki he fakaakeaké.

Ngaahi Maʻuʻanga Tokoni mei he Koló mo e Siasí

(Konga e niʻihi e ngaahi maʻutokoni ʻoku hiki atu ʻi laló ʻoku ʻikai ke faʻu, tokangaʻi, pe puleʻi ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Neongo ʻoku fakataumuʻa e naunau ko ʻení ke hoko ko ha toe maʻuʻanga tokoni, ka ʻoku ʻikai poupouʻi ʻe he Siasí ha fakamatala ʻoku ʻikai fenāpasi mo hono ngaahi tokāteliné mo e ngaahi akonakí.)

“ʻAmanaki Leleí mo e Fakamoʻuí: Tokoniʻi e Kau Mamahi ʻo e Ngaohikovia Fakasekisualé” Nanon Talley, Liahona, 2017
“Ko ha Hala Fakakavakava ki he ʻAmanaki Leleí mo e Fakamoʻuí,” Nanon Talley, Liahona, ʻEpeleli 2017
“Ngaohikovia: Tokoni ki he Tokotaha Mamahí” (ʻatā ki he kau mēmipa ʻo e fakataha alēlea fakauooti mo fakasiteiki), providentliving.lds.org
“Tokonia ʻo Kinautolu ne Hao Moʻuí,” NoMore.org