Ներածական նյութեր

Ձեռք բերել հոգևոր գիտելիքներ, Մաս 1

Գործել հավատքով

Վարդապետության սերտման նպատակներից մեկն է՝ սովորել կիրառել հոգևոր գիտելիքներ ձեռք բերելու սկզբունքները, ինչը կօգնի ձեզ կառուցել ձեր հիմքը Հիսուս Քրիստոսով: Այս դասը կարող է օգնել ձեզ կյանքի մասին հարցերի ու մտահոգությունների պատասխանները փնտրելիս գործել հավատքով առ Հիսուս Քրիստոս:

Հարցերը լա՞վն են, թե՞ վատ

Մտածեք, թե հետևյալ պատասխաններից որոնք են կիրառելի այս հարցի համար.

• Հետևյալներից որոնք են այն հնարավոր պատճառները, որ մարդը կարող է հարցեր ունենալ ավետարանի կամ Հիսուս Քրիստոսի Եկեղեցու մասին:

  1. Նրանք դեռևս չունեն ավետարանի մասին վկայություն:

  2. Նրանք այնքան են կարևորում ավետարանը, որ ցանկանում են ավելին հասկանալ:

  3. Նրանք վստահ չեն երբևէ ունեցած իրենց հավատքի հանդեպ:

  4. Աստված գուցե ոգեշնչում է նրանց մտածել մի բանի մասին, ինչը Նա ցանկանում է ուսուցանել նրանց:

     Պատասխանը կախված է յուրաքանչյուր անձի մոտեցումից և հարցեր տալու պատճառներից: Կարդացեք «Ձեռք բերել հոգևոր գիտելիքներ» բաժնի 3-րդ պարբերությունը Վարդապետության սերտման հիմնական փաստաթղթում (2022) և փնտրեք, թե մեր մոտեցումն ավետարանի հարցերին ինչպես կարող է ուժեղացնել կամ թուլացնել մեր հավատքն առ Հիսուս Քրիստոս:

• Այդ պարբերության մեջ ի՞նչն է ավելի տպավորիչ ձեզ համար: Ինչո՞ւ:

Յուրաքանչյուրը հարցեր ու մտահոգություններ ունի: Մենք պետք է զգույշ լինենք, որ չդատենք ուրիշների հավատքը, երբ նրանք հարցեր ունեն, և մենք չպետք է կասկածենք մեր իսկ հավատքին, երբ ինքներս հարցեր ունենք: Մեր հավատքն առ Հիսուս Քրիստոս և վերականգնված ավետարանի մասին մեր վկայությունը կարող է ուժեղանալ կամ թուլանալ՝ կախված մեր հարցերին ու մտահոգություներին մեր ունեցած մոտեցումից: Այսօր ուսանելու ընթացքում մտածեք, թե ձեր հարցերն ինչ դեր են խաղում ձեր հոգևոր առաջընթացում: Ի՞նչ հարցեր ունեք ավետարանի և Հիսուս Քրիստոսի Եկեղեցու մասին: Արդյո՞ք զգում եք, որ ձեր հարցերը ձեզ ավելի են մոտեցնում Փրկչին և Նրա Եկեղեցուն:

Ձեռք բերել հոգևոր գիտելիքներ

Սեմինարիայում ձեր ուսումնառության ընթացքում դուք հնարավորություն կունենաք փորձելու օգտագործել հոգևոր գիտելիքներ ձեռք բերելու սկզբունքները: Հետևյալ երեք սկզբունքները կարող են օգնել ձեզ ավելի մոտենալ Հիսուս Քրիստոսին, երբ ձեր կյանքում հարցեր կամ մտահոգություններ առաջանան.

1. Գործեք հավատքով

2. Քննեք հասկացությունները և հարցերը հավերժության հեռանկարով

3. Ձգտեք մեծացնել հասկացողությունը աստվածային աղբյուրների միջոցով

Այս դասի մնացած մասը նվիրվելու է Հիսուս Քրիստոսի հանդեպ հավատքով գործելու սկզբունքին:

Կարդացեք «Ձեռք բերել հոգևոր գիտելիքներ» բաժնի 5–7-րդ պարբերությունները Վարդապետության սերտման հիմնարար փաստաթղթից՝ փնտրելով հետևյալ նախադասությունն ավարտելու մի քանի ձև:

Երբ հարցեր կամ մտահոգություններ են ծագում, մենք կարող ենք գործել հավատքով առ Հիսուս Քրիստոս այսպես… :

1. Պատասխանեք այս հարցերից առնվազն երկուսին.

   • Ըստ ձեզ՝ ձեր ընտրած եղանակներից ո՞րն է այսօր լավագույնս կիրառելի պատանիների կամ նույնիսկ ձեր կյանքի համար: Ինչո՞ւ:

   • Այս եղանակով հավատքով գործելու սկզբունքի ընտրությունն ի՞նչ ազդեցություն կարող է ունենալ Փրկչի հետ մարդու հարաբերության վրա:

   • Ո՞ւմ գիտեք, որ հավատքով է գործել, երբ հարցեր կամ մտահոգություններ է ունեցել: Ի՞նչ է արել նա:

Կարող եք դիտել «Գործեք հավատքով. Որմնադիրը» տեսանյութը (4:57), որը հասանելի է ChurchofJesusChrist.org կայքում: Ուսումնասիրեք, թե տեսանյութի երիտասարդությունն ինչպես էր գործում Փրկչի հանդեպ հավատքով, երբ բախվել էր կարևոր հարցերի ու մտահոգությունների:

Գործեք հավատքով. Որմնադիրը

Երբ որևէ վարդապետություն կամ ուսմունք չի համապատասխանում մեր վկայության քարե պատին, արդյո՞ք մենք հրաժարվում ենք պատից ու հեռանում:

Սուրբ գրությունների օրինակներ

Սուրբ գրություններում կան շատ հատվածներ այն մարդկանց մասին, որոնք բախվել են բարդ հարցերի ու մտահոգությունների Հիսուս Քրիստոսի հանդեպ ունեցած հավատքով: Նրանցից մեկը մարգարե Նեփին է: Կարդացեք ստորև ներկայացվող օրինակները Նեփիի կյանքից՝ փնտրելով, թե հարցերի և այլ խնդիրների առաջ կանգելիս ինչպես է նա գործել հավատքով առ Հիսուս Քրիստոս:

• 1 Նեփի 2.16. Նրա մտերիմներից ոմանք բարկացած էին այն բանի համար, ինչ նրա հայրը՝ մարգարե Լեքին խնդրեց նրանց անել:

• 1 Նեփի 3.7. Նրան խնդրեցին որևէ դժվար գործ կատարել:

• 1 Նեփի 9.5–6. Տերը պատվիրեց նրան ինչ-որ բան անել որոշ պատճառներով, որոնք նա չէր հասկանում:

• 1 Նեփի 10.17, 11.1–5. Նա ցանկանում էր իր սեփական վկայությունն այն բանի, ինչ նրա հայրը՝ մարգարեն, ուսուցանել էր:

• 1 Նեփի 11.17. Նա չգիտեր ավետարանի վերաբերյալ իրեն տրված հարցի պատասխանն ամբողջությամբ:

• Հավատքով գործելու ո՞ր տարրերն է լավագույնս դրսևորել Նեփին:

2. Կատարեք հետևյալը․

Նկարագրեք որևէ ժամանակակից հարց կամ մտահոգություն, որը կարող է ոչ նպաստավոր ազդեցություն ունենալ Հիսուս Քրիստոսի կամ Նրա Եկեղեցու հանդեպ ունեցած հավատքի վրա: Ինչպե՞ս կարելի է գործել հավատքով՝ այդ հարցին կամ խնդրին բախվելիս:

• Ինչպե՞ս կարող է հավատքով գործելու կամ հավատքով չգործելու որոշումն ազդել Փրկչի հետ հարաբերության վրա:

• Ձեր այսօրվա սովորածից ի՞նչը կցանկանայիք ամենաշատը կիրառել ձեր կյանքում: Ինչպե՞ս կարող է դա օգնել ձեզ ձեր կյանքում:

Ընտրովի. ցանկանո՞ւմ եք ավելին իմանալ

Արդյո՞ք նորմալ է ավետարանի մասին հարցեր ունենալը:

Այն ժամանակ Առաջին Նախագահությունից նախագահ Դիտեր Ֆ․ Ուխդորֆը ուսուցանել է.

Հարցեր ունենալը բնական բան է. ազնիվ հարցման կաղինը հաճախ է բողբոջել և հասունացել՝ վերածվելով հասկացողության մեծ կաղնու: Կան Եկեղեցու անդամներ, որոնք ոչ մի անգամ ջանք չեն թափել լուրջ կամ զգայուն հարցերի պատասխաններ գտնելու համար: Եկեղեցու նպատակներից մեկը հավատքի սերմը սնուցելն ու մշակելն է՝ երբեմն նույնիսկ կասկածի և անորոշության ավազոտ հողում։ Հավատքը հույս է բաների մասին, որոնք չենք տեսնում, բայց որոնք ճշմարիտ են։

Ուստի, իմ սիրելի եղբայրնե՛ր և քույրե՛ր, իմ սիրելի ընկերնե՛ր, խնդրում եմ, նախ կասկածի տակ դրեք ձեր կասկածները, հետո՝ ձեր հավատքը: Մենք երբեք չպետք է թույլ տանք, որ կասկածը մեզ գերի դարձնի և հետ պահի մեզ աստվածային սիրուց, խաղաղությունից և պարգևներից, որոնք ստանում ենք Տեր Հիսուս Քրիստոսի հավատքով (Դիտեր Ֆ. Ուխդորֆ, «Եկե´ք, միացե՛ք մեզ», Լիահոնա, նոյեմբեր 2013թ., 23):

Նախագահ Ռասսել Մ. Նելսոնը բացատրել է․

Տերը կարող է ուսուցանել միայն պրպտող միտքը: (Russell M. Nelson, in M. Russell Ballard, “What Came from Kirtland” [Brigham Young University devotional, Nov. 6, 1994], 8, speeches.byu.edu)

Ի՞նչ պետք է անեմ, եթե մաքառում եմ Աստծո կամ Եկեղեցու մասին կասկածների դեմ:

Նախագահ Ռասսել Մ. Նելսոնն ասել է.

Ընտրեք հավատքն առ Հիսուս Քրիստոս: Եթե կասկածներ ունեք Հայր Աստծո և Նրա Սիրելի Որդու, Վերականգնման ճշմարտացիության կամ Ջոզեֆ Սմիթի աստվածային կոչման արժանահավատության վերաբերյալ, ընտրեք հավատքը և հավատարիմ մնացեք։ Ձեր հարցերը հղեք Տիրոջը և այլ արժանահավատ աղբյուրների: Ուսումնասիրեք ավելի շատ հավատալու ցանկությամբ, քան հույսով, թե կարող եք թերություն գտնել մարգարեի կյանքում կամ անհամապատասխանություն՝ սուրբ գրություններում: Մի զարգացրեք ձեր կասկածները՝ քննարկելով դրանք այլ կասկածողների հետ։ Թույլ տվեք, որ Տերն առաջնորդի ձեզ՝ հոգևորի բացահայտման ձեր ճամփորդության մեջ (Ռասսել Մ․ Նելսոն, «Քրիստոսը հարություն է առել․ Նրա հանդեպ հավատքը սարեր կշարժի», Լիահոնա, մայիս 2021թ., 103):

Տասներկու Առաքյալների Քվորումից երեց Ռոնալդ Ա․ Ռասբանդն ասել է.

Ես այժմ խրախուսում եմ ձեզ հիշել հոգևոր հիմքերը, որ կառուցել եք, հատկապես՝ ճգնաժամի պահերին, երբ զգացել եք Հոգին, և երբ ձեր վկայությունն ուժեղ էր: Ես խոստանում եմ, որ եթե անեք սա, խուսափեք այն ամենից, ինչը չի կառուցում և չի ամրապնդում ձեր վկայությունը կամ ծաղրում է ձեր համոզմունքները, ապա այն թանկագին ժամանակները, երբ ձեր վկայությունը բարգավաճում էր, կրկին կվերադառնա ձեր հիշողություն՝ խոնարհ աղոթքի և ծոմի միջոցով: Ես հավաստիացնում եմ ձեզ, որ կրկին կզգաք Հիսուս Քրիստոսի ավետարանի ապահովությունը և ջերմությունը: (Ռոնալդ Ա․ Ռասբանդ, «Մի խռովվեք», Լիահոնա, նոյեմբեր 2016թ., 114):