Төгс эзэмших сургаал: 1 Нифай 3:7

“Би явж бас Их Эзэний зарлиг болсон тэр зүйлүүдийг биелүүлэх болно.”

Өмнөх хичээл дээр та Их Эзэн үргэлж бидэнд тушаасан зүйлээ гүйцэтгүүлэх замыг бэлтгэдэг тухай сурч мэдсэн. Энэ хичээл нь танд 1 Нифай 3:7 дээрх төгс эзэмших сургаалын судрын эшлэл, түлхүүр үг хэллэгийг цээжилж, сургаалыг тайлбарлаж, сүнслэг мэдлэг олж авах зарчмуудыг бодит амьдралын нөхцөл байдалд ашиглахад тусална.

Тайлбарлах ба цээжлэх

Төгс эзэмших сургаалын нэг зорилго бол Есүс Христийн сайн мэдээний үнэнийг өөрийн үгээр тайлбарлаж чаддаг болоход тань туслах явдал юм. Аврагчийн сударт байдаг сургаалыг илүү сайн ойлгож, тайлбарлах дасгал хийснээр эргэн тойрныхоо хүмүүсийн амьдралыг адислах тоо томшгүй олон арга бий.

1 Нифай 3:7-г уншиж, юу заасныг өөрийн үгээр дүгнэ.

Энэ эшлэлд заасан үнэнүүд хэн нэгэнд тусалж болох нөхцөл байдлын талаар бодож үз. Дараа нь дараах асуултуудад хариул.

• Та энэ эшлэлийн ямар үнэнийг өөрийн бодсон нөхцөл байдалд хэн нэгэнтэй хуваалцах вэ? Яагаад?

• Бурхан Өөрийнхөө хүссэн зүйлийг гүйцэлдүүлэх арга замыг өөр ямар аргаар бэлтгэж болох вэ?

• Бурхан биднээс хүссэн бүх зүйлээ гүйцэлдүүлэх арга замыг бэлтгэдэг гэсэн үнэнийг харуулахын тулд та ямар туршлагаас хуваалцаж болох вэ?

1 Нифай 3:7-ийн “Би явж бас Их Эзэний зарлиг болсон тэр зүйлүүдийг биелүүлэх болно” гэсэн эшлэл, судрын гол хэллэгийг цээжлэхэд хэдэн минут зарцуул. Үүнийг хийх нэг арга бол Их Эзэний өгсөн янз бүрийн тушаалын талаар бодож, эшлэл тус бүрийн дараа судрын гол өгүүлбэрийг оюун ухаандаа давтах явдал юм.

Дадлага хийх үйл ажиллагаа

Бид бүгд хэцүү нөхцөл байдалтай тулгарч болно мөн Бурхан биднээс амьдралдаа хэцүү зүйлсийг хийхийг хүсэх болно. Сүнслэг мэдлэг олж авах зарчмуудыг хэрэгжүүлэх нь эдгээр нөхцөл байдлыг даван туулахад тань Есүс Христэд итгэх итгэлээ бэхжүүлэхэд тусална.

Дараах жишээг уншаад, дараагийн үйл ажиллагаа болгож төвлөрөхийг хүсэж буй нэг жишээгээ сонго.

1. Сара Их Эзэнд хайртай бөгөөд Түүний Сүмд үйлчлэхийг хүсдэг. Гэсэн хэдий ч тэрээр саяхан Сүмийн даалгавар хүлээн авсан бөгөөд өөрийгөө үүнийг биелүүлэх чадваргүй хэмээн бодож байсан. Тэрээр даалгаврыг хүлээн авсан боловч үүнийг хийх эсэхдээ эргэлзэж байв.

2. Розад сахихад хэцүү нэг тушаал байдаг учраас тэр өөртөө гутардаг байжээ. Тэрээр тушаалыг зарим үед дагадаг байсан ч байнга дагадаггүй байв.

Итгэлээр үйлдэх

2022 оны Төгс эзэмших сургаалыг судлах үндсэн материалын “Сүнслэг мэдлэг олж авах нь” хэсгийн 5–12-р догол мөрийг унш.

1. Дараах асуултуудад хариул.

• Ахлагч Холландын хэлсэн үгийн 6-р догол мөр Сарад эсвэл Розад хэрхэн тусалж болох вэ?

• Хэрэв Сара эсвэл Роза Бурханы асуусан зүйлийг тэр даруй гүйцэтгэж чадахгүй бол Тэнгэрлэг Эцэгийн талаарх 7-р мөр дэх үнэн хэрхэн тусалж чадах вэ?

• Хэрэв танд Сара эсвэл Розагийнхтай төстэй бодол төрсөн бол Есүс Христэд итгэх итгэлээр урагшлахад тань юу тусалсан эсвэл тусалж чадах вэ?

Утга санаа, асуултыг мөнхийн талаас нь шинжлэн судлах

Төгс эзэмших сургаалыг судлах үндсэн материалын “Сүнслэг мэдлэг олж авах нь” хэсгийн 8-р догол мөрийг унш. Сарад эсвэл Розад тусалж чадна гэж бодож буй дор хаяж гурван өөр хэллэг эсвэл санааг тэмдэглэх талаар бодож үз.

2. Дараах асуултуудад хариул.

• Таны сонгосон эшлэл бүр Сара, Роза хоёрт хэрхэн тусалж чадах вэ?

• Тэнгэрлэг Эцэгийн тухай мөн Түүний хүүхдүүдтэйгээ хэрхэн харьцдаг талаар та юу мэдэх вэ?

• Нөхцөл байдлыг авралын төлөвлөгөөний хүрээнд авч үзэх нь хэрхэн туслах вэ?

Тэнгэрээс томилогдсон эх сурвалжаар дамжуулан илүү их ойлголт олж авахаар эрэлхийлэх

Төгс эзэмших сургаалыг судлах үндсэн материалын “Сүнслэг мэдлэг олж авах нь” хэсгийн 11-р догол мөрийг унш.

3. Дараах асуултуудад хариул.

• Та Сарад эсвэл Розад өөрт нь тусалж болох үнэнийг хаанаас хайж ол гэж зөвлөх вэ?

Бурханы хүчээр оноосон эх сурвалжаас тухайн нөхцөл байдалд хамааралтай гэж үзэж буй үнэнийг хайж олоход хэдэн минут зарцуул. Таны сонгож болох нэг эх сурвалж бол Төгс эзэмших сургаалыг судлах үндсэн материалын төгсгөлд байдаг төгс эзэмших сургаалын хэсгийн жагсаалт юм. Мормоны Номын хэсгүүдийн гол судрын үг хэллэгүүдийг уншиж, тус болж болох үгсийг хайж олохыг бод. Эх сурвалжийнхаа нэгд 1 Нифай 3:7-г оруулахаа бүү март.

• Та хуваалцаж болох юуг олж мэдсэн бэ?

• Таны олж мэдсэн үнэнүүд амьдралд тань ямар өөрчлөлтийг авчирсан бэ?