1 Nefi 11

“Vër Re Denjimin e Perëndisë!”

Shkrimet e shenjta na mësojnë se çfarë është “më e dëshirueshmja” dhe “më e gëzueshmja për shpirtin” nga të gjitha gjërat që shijojmë në këtë jetë (1 Nefi 11:22–23). Ndërsa Nefi bashkëbisedoi me lajmëtarë qiellorë, ai pati një vegim të Shpëtimtarit të botës dhe mori kuptueshmërinë e vet për atë që sjell gëzimin më të shumtë: dashurinë e Perëndisë. Ky mësim mund të të ndihmojë ta ndiesh dashurinë e Atit Qiellor dhe Jezu Krishtit për ty.

Rëndësia e dashurisë së Perëndisë

Motra Suzën H. Porter, e Presidencës së Përgjithshme të Fillores, tha:

“Çasti kur e dini dhe e kuptoni se sa plotësisht ju duan si fëmijë i Perëndisë, ndryshon gjithçka.” (Suzën H. Porter, “Dashuria e Perëndisë: Më e Gëzueshmja për Shpirtin”, Liahona, nëntor 2021, f. 33)

• Çfarë mund të ndryshojë kur dikush e di dhe e kupton dashurinë e Perëndisë për të?

• Si mund të ndikojë në jetën tënde të ndierit se Perëndia të do?

Përsiat se sa shumë e ndien dashurinë e Perëndisë në jetën tënde. Ndërsa studion kapitullin 1 Nefi 11, kërko prova të dashurisë që Ati Qiellor dhe Jezu Krishti kanë për ty.

Vegimi i Nefit

• Çfarë simbolesh kryesore mund të kujtosh nga ëndrra e Lehit e shënuar te 1 Nephi 8?

Nefi dëshironte thellësisht ta kuptonte domethënien e ëndrrës së të atit dhe besonte se Zoti do t’ia bënte të ditur atij. Ndërsa përsiaste në zemrën e tij, Shpirti i Zotit iu shfaq dhe ia tregoi atij pemën e jetës. Kur Nefi kërkoi të dinte interpretimin e pemës, një engjëll iu shfaq për ta ndihmuar të mësonte më shumë rreth asaj që po shihte në vegim (shih te 1 Nefi 11:1–14).

Si pjesë e ndihmës për Nefin që ta kuptonte domethënien e pemës, engjëlli i bëri Nefit një pyetje. Lexo te 1 Nefi 11:16 për të parë cila pyetje u bë.

• Si do t’i përgjigjeshe pyetjes te vargu 16?

Lexo te vargu 17 për të parë se si u përgjigj Nefi.

• Çfarë të bën përshtypje rreth përgjigjes së Nefit te vargu 17?

“Denjim” do të thotë zbritje me dëshirë nga një pozitë me rang të lartë ose dinjitet. Për shembull, gjesti i Shpëtimtarit kur u lau këmbët dishepujve mund të konsiderohet një gjest denjimi (shih te Gjoni 13:3–17). Ndërkohë që denjimi i Perëndisë i përshkruar në këto vargje mund të japë mësim edhe rreth denjimit të Atit Qiellor, ky mësim përqendrohet kryesisht te denjimi i Jezu Krishtit.

Lexoje atë që pa Nefi te 1 Nefi 11:13–23, duke kërkuar prova të denjimit të Perëndisë.

• Çfarë prove gjete rreth denjimit të Perëndisë?

• Çfarë të vërtetash mëson rreth denjimit të Perëndisë?

Një e vërtetë që mund të mësojmë, është se denjimi i Perëndisë demonstron dashurinë e Tij për ne.

• Si mendon se e demonstron këtë të vërtetë lindja e Shpëtimtarit?

Lexo te 1 Nefi 11:26–33, duke kërkuar mënyra shtesë se si Jezusi denjoi për ta treguar dashurinë e Tij për njerëzimin.

Mund të duash të kërkosh se si pasqyrohen në këto vargje figurat e ndryshme që paraqitin jetën e Shpëtimtarit.

1. Përgjigju për pyetjet vijuese:

   • Çfarë prove gjete rreth denjimit të Shpëtimtarit?

   • Si e demonstrojnë këto veprime dashurinë e Tij?

   • Cilët janë shembuj të tjerë nga jeta e Jezu Krishtit që e ndien se e demonstrojnë dashurinë dhe denjimin e Tij?

Lexo atë që tha Plaku Kuentin L. Kuk, i Kuorumit të Dymbëdhjetë Apostujve, rreth mënyrës se si këto ngjarje na ndihmojnë ta kuptojmë dashurinë e Shpëtimtarit për ne. Ose mund të duash të shikosh materialin filmik “Të Përditshmen si Përjetësinë” nga kodi kohor 4:01 në 4:43, që është në dispozicion në ChurchofJesusChrist.org.

“Shembulli i përulësisë dhe i sakrificës së Shpëtimtarit për tërë njerëzimin është ngjarja më e rëndësishme e historisë. Shpëtimtari, edhe si një pjesëtar i Kreut‑Perëndi, ishte i gatshëm të vinte në tokë si një foshnjë e vobektë dhe të fillonte një ekzistencë që përfshiu mësimdhënien dhe shërimin e vëllezërve dhe të motrave të Tij dhe më së fundi vuajtjen e një dhembjeje të papërshkrueshme në Gjetseman e në kryq, me qëllim që ta përsoste Shlyerjen e Tij. Ky veprim dashurie dhe përulësie nga ana e Krishtit njihet si denjimi i Tij. Ai e bëri këtë për çdo burrë e çdo grua që Perëndia e ka krijuar ose do ta krijojë.” (Kuentin L. Kuk, “Të Përditshmen si Përjetësinë”, Ensign ose Liahona, nëntor 2017, f. 52)

• Si të ndihmon thënia e Plakut Kuk që ta kuptosh më mirë denjimin e Perëndisë?

Bekimet e vazhdueshme prej denjimit të Shpëtimtarit

Denjimi i Shpëtimtarit vazhdon të jetë provë e dashurisë së Tij për ne sot.

2. Përgjigju për të paktën dy prej pyetjeve vijuese:

   • Si e kanë demonstruar Ati Qiellor dhe Jezu Krishti dashurinë e Tyre për ty?

   • Si ndikon ajo që Ata kanë bërë, te mënyra se si ndihesh për Ta?

   • Çfarë ndihesh i motivuar të bësh për ta treguar dashurinë tënde për Atin Qiellor dhe Jezu Krishtin?

Fakultative: Dëshiron të Mësosh më Shumë?

Kush është Shpirti që i flet Nefit në fillim të këtij vegimi?

Plaku Xhejms E. Talmixh (1862–1933), i Kuorumit të Dymbëdhjetë Apostujve, dha mësim:

“Fakti që Shpirti i Zotit është në gjendje ta shfaqë Veten në formën dhe figurën e një njeriu, tregohet nga intervista e mrekullueshme mes Shpirtit dhe Nefit, në të cilën Ai ia zbuloi Veten profetit, e pyeti atë në lidhje me dëshirat dhe besimin e tij, e udhëzoi për gjërat e Perëndisë duke folur ballë për ballë me njeriun.” (James E. Talmage, The Articles of Faith [1968], f. 159–160; shih edhe Marion G. Romney, “The Holy Ghost”, Ensign, maj 1974, f. 90–92)

Çfarë kanë dhënë mësim udhëheqësit e Kishës rreth denjimit e Perëndisë?

Profeti Jozef Smith (1805–1844) tha:

“Kur meditojmë për shenjtërinë dhe përsosmërinë e Mësuesit tonë të madh, që na ka hapur një udhë nëpërmjet së cilës ne mund të shkojmë tek ai, madje duke sakrifikuar veten, zemrat tona treten përbrenda nga denjimi i tij.” (Mësimet e Presidentëve të Kishës: Jozef Smithi [2009], f. 56)

Plaku D. Tod Kristoferson, i Kuorumit të Dymbëdhjetë Apostujve, shpjegoi:

“Jezusi qe i Parëlinduri mes të gjithë shpirtrave dhe i Vetëmlinduri i Perëndisë në mish. Ndonëse nuk jemi lindur nga Perëndia në mish, ne jemi, ashtu si Jezusi, pasardhësit shpirtërorë të Perëndisë. Si rrjedhojë, lindja jonë në vdekshmëri është gjithashtu një lloj denjimi dhe, sikurse denjimi i Krishtit, ajo ka një qëllim fisnik. Njësoj si Jezusi, ne zbritëm nga qielli për të bërë vullnetin e Atij që na dërgoi, dhe për të arritur, me hirin e Krishtit, pavdekësinë dhe jetën e përjetshme. A mund të jetë e rëndësishme për ne që, ndërsa kërkojmë të ‘ngjit[emi] lart’, gjithashtu të zbresim nën të paktën disa gjëra që të mund t’i kuptojmë më plotësisht dhe të bëhemi më shumë si Krishti? Nëse Jezusit i nevojiteshin përvoja të caktuara, a nuk mund të na duhen edhe neve disa sfida dhe sprova, ‘që zemra[t tona] të mund të mbushe[n] me mëshirë, sipas mishit, që [ne] të mund të di[m]ë, sipas mishit, se si të ndihmoj[m]ë [njëri‑tjetrin] sipas dobësive [tona]’ [Alma 7:12]?” (D. Tod Kristoferson, “The Condescension of God and of Man” [takim shpirtëror për Krishtlindje i Presidencës së Parë, 7 Dhjetor 2014], ChurchofJesusChrist.org)