« នីហ្វៃទី ១ ១៧–១៨ ៖ ‹ ខ្ញុំបានសម្លឹងឆ្ពោះទៅរកព្រះរបស់ខ្ញុំ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ១ ១៧–១៨ ៖ ‹ ខ្ញុំបានសម្លឹងឆ្ពោះទៅរកព្រះរបស់ខ្ញុំ › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ១ ១៧–១៨
« ខ្ញុំបានសម្លឹងឆ្ពោះទៅរកព្រះរបស់ខ្ញុំ »
យើងទាំងអស់គ្នានឹងមានការសាកល្បង និងការរងទុក្ខនៅក្នុងជីវិតរបស់យើង ។ ការសាកល្បង និងការរងទុក្ខមួយចំនួននឹងកើតឡើងជាលទ្ធផលនៃអំពើទុច្ចរិតរបស់យើងផ្ទាល់ ឬដោយគ្រាន់តែយើងរស់នៅក្នុងពិភពលោកដ៏ធ្លាក់ និងមិនល្អឥតខ្ចោះនេះ ។ ដូចដែលនីហ្វៃបានជួបប្រទះពេញដំណើររបស់លោកទៅកាន់ដែនដីសន្យា ការសាកល្បង និងការរងទុក្ខមួយចំនួនបានកើតឡើង នៅពេលអ្នកនៅជុំវិញយើងប្រើប្រាស់សិទ្ធិជ្រើសរើសរបស់ពួកគេខុស ។ ទោះបីប្រភពនៃការរងទុក្ខរបស់យើងកើតឡើងពីអ្វីក៏ដោយ ព្រះយេស៊ូវគ្រីស្ទប្រទានកម្លាំង និងការព្យាបាលដល់អស់អ្នកដែលស្វែងរកទ្រង់ ។ មេរៀននេះអាចជួយអ្នកឲ្យទទួលអារម្មណ៍ស្រឡាញ់ និងដឹងគុណចំពោះព្រះអម្ចាស់ ដោយមិនគិតពីកាលៈទេសៈដែលអ្នកកំពុងប្រឈមមុខឡើយ ។
តើអ្នកនឹងប្រតិកម្មយ៉ាងណា ?
តើអ្នកធ្លាប់កត់សម្គាល់ពីរបៀបផ្សេងៗដែលជួនកាលមនុស្សមានប្រតិកម្មចំពោះស្ថានភាពស្រដៀងគ្នានេះដែរឬទេ ? សូមអានស្ថានភាពខាងក្រោម ហើយគិតអំពីរបៀបផ្សេងមួយចំនួនដែលមនុស្សនៅក្នុងស្ថានភាពទាំងនេះអាចមានប្រតិកម្ម ។
ហ្គីលើម៉ូបានទៅជួបគ្រូពេទ្យភ្នែក ដោយសារតែគាត់មើលមិនសូវឃើញច្បាស់ ។ វេជ្ជបណ្ឌិតបានប្រាប់គាត់ថា គាត់មានជំងឺដ៏កម្រមួយដែលនឹងធ្វើឲ្យគាត់ពិការភ្នែកទាំងស្រុងក្នុងរយៈពេលមួយឆ្នាំទៀត ។
ប្អូនប្រុសរបស់ ឡៃឡា ខឹងសម្បារ ហើយរុញនាង បណ្តាលឲ្យនាងរបួសកជើង ។ នាងត្រូវចូលប្រកួតក្នុងការប្រកួតជើងឯករបស់ក្រុមនាង ប៉ុន្តែឥឡូវនេះនាងមិនអាចរត់បានទេ ។
-
តើមានរបៀបខុសគ្នាណាខ្លះដែលមនុស្សនៅក្នុងស្ថានភាពទាំងនេះអាចនឹងមានប្រតិកម្មចំពោះស្ថានភាពលំបាករបស់ពួកគេ ?
-
តើអ្នកគិតថា មានហេតុផលអ្វីខ្លះដែលធ្វើឲ្យមនុស្សឆ្លើយតបតាមរបៀបវិជ្ជមាន ឬអវិជ្ជមានចំពោះការសាកល្បងដែលពួកគេបានជួប ?
ទស្សនវិស័យរបស់នីហ្វៃ
នៅពេលអ្នកបានសិក្សាព្រះគម្ពីរមរមន អ្នកប្រហែលជាបានកត់សម្គាល់ពីភាពខុសគ្នារវាងទង្វើ និងឥរិយាបថរបស់នីហ្វៃ បើប្រៀបធៀបនឹងទង្វើ និងឥរិយាបថរបស់លេមិន និង លេមយួល សូម្បីតែពេលពួកគេរងទុក្ខវេទនាដូចគ្នាជាច្រើនក៏ដោយ ។ សូមយកចិត្តទុកដាក់ចំពោះភាពខុសគ្នានេះ ពេលអ្នកសិក្សាខគម្ពីរខាងក្រោម ។
-
ការធ្វើដំណើរក្នុងទីរហោស្ថាន ៖សូមប្រៀបធៀបដំណើររឿងរបស់នីហ្វៃនៅក្នុង នីហ្វៃទី ១ ១៧:១–៣ ទៅនឹងអ្វីដែលលេមិន និងលេមយួល បាននិយាយក្នុង នីហ្វៃទី ១ ១៧:២០–២២ ។
-
ការសង់សំពៅ ៖សូមប្រៀបធៀបការឆ្លើយតបរបស់នីហ្វៃនៅក្នុង នីហ្វៃទី ១ ១៧:៨–៩, ១៥ ទៅនឹងប្រតិកម្មរបស់លេមិន និងលេមយួល នៅក្នុង នីហ្វៃទី ១ ១៧:១៧–១៨ ។
-
តើអ្នកមានគំនិត ឬចំណាប់អារម្មណ៍អ្វីខ្លះ នៅពេលអ្នកប្រៀបធៀបពាក្យសម្តី និងសកម្មភាពរបស់នីហ្វៃជាមួយនឹងពាក្យសម្តីរបស់លេមិន និង លេមយួល ?
-
តើអ្នកសម្គាល់ឃើញអ្វីខ្លះអំពីទំនាក់ទំនងដែលបុគ្គលម្នាក់ៗមានជាមួយព្រះ ?
យើងទាំងអស់គ្នាមានពេលខ្លះដែលយើងឆ្លើយតបបានល្អចំពោះស្ថានភាពលំបាក ហើយពេលខ្លះទៀតមិនសូវល្អទេ ។ សូមគិតថា ជាទូទៅតើអ្នកប្រព្រឹត្តដូចនីហ្វៃ ឬដូច លេមិន និងលេមយួល ច្រើនជាង នៅពេលអ្នកប្រឈមមុខនឹងស្ថានភាពលំបាក ។ នៅពេលអ្នកបន្តសិក្សា សូមរកមើលការបង្រៀនដែលអាចជួយអ្នកឲ្យឆ្លើយតបតាមរបៀបវិជ្ជមានបន្ថែមទៀត នៅពេលអ្នកប្រឈមមុខនឹងការលំបាក ឬការសាកល្បងនានា ។
លីហៃ និងគ្រួសាររបស់លោកជិះសំពៅទៅកាន់ដែនដីសន្យា
បន្ទាប់ពីនីហ្វៃ និងបងប្អូនរបស់លោកបានបញ្ចប់ការសង់សំពៅ នោះព្រះអម្ចាស់បានត្រាស់បង្គាប់ដល់លីហៃ និងក្រុមគ្រួសាររបស់លោកឲ្យចាប់ផ្ដើមជិះសំពៅនោះឆ្ពោះទៅកាន់ដែនដីសន្យា ( សូមមើល នីហ្វៃទី ១ ១៨:១–៨ ) ។
សូមអាន នីហ្វៃទី ១ ១៨:៩–២១ ដោយរកមើលការលំបាកមួយចំនួនដែលបានជួបប្រទះក្នុងអំឡុងពេលធ្វើដំណើរនេះ ។ នៅពេលអ្នកសិក្សា សូមបន្តប្រៀបធៀបទង្វើ និងឥរិយាបថរបស់នីហ្វៃជាមួយនឹងទង្វើ និងឥរិយាបថរបស់ លេមិន និង លេមយួល ។ អ្នកប្រហែលជាចង់មើលវីដេអូ « Lehi’s Family Sails to the Promised Land » ចាប់ពីនាទីទី ៣:១៣ ដល់នាទីទី ១១:៣១ ដែលមាននៅលើគេហទំព័រ ChurchofJesusChrist.org ។
គ្រួសារលីហៃធ្វើដំណើរតាមទឹកទៅដែនដីសន្យា | នីហ្វៃទី១ ១៨
នីហ្វៃទី១ ១៨ | គ្រួសារលីហៃធ្វើដំណើរតាមទឹកទៅដែនដីសន្យាលើសំពៅដែលនីហ្វៃ និងបងប្រុសរបស់គាត់បានសង់ ។
-
សូមឆ្លើយសំណួរខាងក្រោមនេះឲ្យបានយ៉ាងហោចណាស់ពីរនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្នកចាប់អារម្មណ៍អ្វីខ្លះពីដំណើររឿងនេះ ?
-
សូមកត់សម្គាល់អ្វីដែលនីហ្វៃបានកត់ត្រានៅក្នុង ខទី ១៦ ។ ប្រសិនបើអ្នកមានឱកាសសួរលោកនូវសំណួរមួយចំនួនអំពីទង្វើរបស់លោកនៅក្នុងខគម្ពីរនេះ តើអ្នកនឹងសួរលោកអំពីអ្វី ?
-
តើអ្នកគិតថា លោកអាចឆ្លើយតបនឹងសំណួររបស់អ្នកដោយរបៀបណា ?
-
អែលឌើរ ឌេល ជី រិនឡាន់ ក្នុងកូរ៉ុមនៃពួកសាវកដប់ពីរនាក់បានចែកចាយហេតុផលមួយដែលនីហ្វៃអាចឆ្លើយតបតាមរបៀបដែលលោកបានឆ្លងកាត់ការលំបាករបស់លោក ។
“That I Might Draw All Men unto Me”
Elder Renlund shows how drawing closer to God, particularly through the sacrament, can replace selfishness, entitlement, and skepticism with love and gratitude.
ដោយសារពួកគេនៅឆ្ងាយពីព្រះអង្គសង្គ្រោះ លេមិន និង លេមយួល បានរអ៊ូរទាំ ចាប់ផ្តើមមានជម្លោះ ហើយគ្មានជំនឿ ។ ពួកគេមានអារម្មណ៍ថា ជីវិតមិនយុត្តិធម៌ ហើយថាពួកគេមានសិទ្ធិទទួលបានព្រះគុណរបស់ព្រះ ។ ផ្ទុយទៅវិញ ដោយសារគាត់បានចូលទៅជិតព្រះ នីហ្វៃច្បាស់ជាទទួលស្គាល់ថា ជីវិតនឹងមានភាពអយុត្តិធម៌បំផុតសម្រាប់ព្រះយេស៊ូវគ្រីស្ទ ។ ទោះជាគ្មានទោសអ្វីសោះ ព្រះអង្គសង្គ្រោះបានរងទុក្ខខ្លាំងបំផុត ។
កាលណាយើងខិតទៅជិតព្រះយេស៊ូវគ្រីស្ទនៅក្នុងគំនិត និងចេតនានៃដួងចិត្តរបស់យើងកាន់តែខ្លាំង នោះយើងកាន់តែដឹងគុណចំពោះការរងទុក្ខដែលគ្មានកំហុសរបស់ទ្រង់ យើងមានអំណរគុណកាន់តែច្រើនចំពោះព្រះគុណ និងការអភ័យទោស ហើយយើងកាន់តែចង់ប្រែចិត្ត ហើយប្រែក្លាយឲ្យដូចជាទ្រង់ ។ ( ឌេល ជី រិនឡាន់ « That I Might Draw All Men unto Me » Liahona ខែ ឧសភា ឆ្នាំ ២០១៦ ទំព័រ ៤០ )
-
តើសេចក្ដីពិតអ្វីដែលអ្នកបានរៀនចេញពីសេចក្ដីថ្លែងការណ៍របស់អែលឌើរ រិនឡាន់ ដែលអាចជួយអ្នកក្នុងការសាកល្បងរបស់អ្នក ?
សេចក្តីពិតមួយដែលអ្នកប្រហែលជាបានរកឃើញនោះគឺ ពេលយើងនៅជិតព្រះយេស៊ូវគ្រីស្ទ នោះយើងអាចទទួលអារម្មណ៍ស្រឡាញ់ និងដឹងគុណទ្រង់ សូម្បីតែក្នុងគ្រាលំបាកៗក៏ដោយ ។
សូមចំណាយពេលបន្តិចដើម្បីសញ្ជឹងគិតពីអ្វីដែលអ្នកបានរៀននៅថ្ងៃនេះ ។ សូមវាយតម្លៃពីអារម្មណ៍នៃភាពជិតស្និទ្ធខ្លាំងប៉ុនណាដែលអ្នកមានចំពោះព្រះវរបិតាសួគ៌ និងព្រះយេស៊ូវគ្រីស្ទ ។ តើអ្នកអាចធ្វើអ្វីខ្លះដើម្បីចូលមកជិតទ្រង់ទាំងទ្វេ ? តើអ្នកគិតថា ការណ៍នេះអាចធ្វើឲ្យមានការផ្លាស់ប្តូរអ្វីខ្លះក្នុងជីវិតរបស់អ្នក ? សូមកត់ត្រាគំនិត និងចំណាប់អារម្មណ៍ខាងវិញ្ញាណរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។