« នីហ្វៃទី ១ ១៦–១៨ ៖ លីអាហូណា ៖ មគ្គុទ្ទេសក៍នៅក្នុងទីរហោស្ថាន » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី ១ ១៦–១៨ ៖ លីអាហូណា ៖ មគ្គុទ្ទេសក៍នៅក្នុងទីរហោស្ថាន » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី ១ ១៦:១៨
លីអាហូណា ៖ មគ្គុទ្ទេសក៍នៅក្នុងទីរហោស្ថាន
តើអ្នកធ្លាប់មានអារម្មណ៍វង្វេង និងច្របូកច្របល់អំពីអ្វីដែលអ្នកគួរធ្វើ ឬផ្តោតលើនៅក្នុងជីវិតដែរឬទេ ? តើជីវិតរបស់អ្នកអាចខុសគ្នាយ៉ាងណា ប្រសិនបើអ្នកអាចទទួលស្គាល់កាន់តែប្រសើរនូវការដឹកនាំដែលព្រះអម្ចាស់កំពុងព្យាយាមប្រទានដល់អ្នក ? មិនយូរប៉ុន្មានបន្ទាប់ពីគ្រួសាររបស់លីហៃ បានចាកចេញពីក្រុងយេរូសាឡិម ព្រះអម្ចាស់បានប្រទានការណែនាំបន្ថែមដល់ពួកគេតាមរយៈលីអាហូណា ។ មេរៀននេះអាចជួយអ្នកឲ្យទទួលស្គាល់ និងធ្វើតាមការណែនាំរបស់ព្រះអម្ចាស់នៅក្នុងជីវិតរបស់អ្នក ។
មគ្គុទ្ទេសក៍នៅក្នុងទីរហោស្ថាន
សូមពិនិត្យមើលរូបភាពមួយចំនួននៃឧបករណ៍ប្រកបដោយអព្ភូតហេតុដែលបានផ្តល់ឲ្យលីហៃ មិនយូរប៉ុន្មានបន្ទាប់ពីលោកបានដឹកនាំគ្រួសាររបស់លោកចេញពីក្រុងយេរូសាឡិម ។
-
តើអ្នកដឹងអ្វីខ្លះអំពីវត្ថុដែលត្រូវបានពិពណ៌នានៅក្នុងរូបភាពទាំងនេះ ? ( សូមមើល នីហ្វៃទី ១ ១៦:១០ ) ។
-
តើវាមានគោលបំណងអ្វី ?
បន្ទាប់ពីត្រូវបានព្រះអម្ចាស់ណែនាំឲ្យធ្វើដំណើរកាន់តែឆ្ងាយទៅក្នុងទីរហោស្ថាន លីហៃបានភ្ញាក់ឡើងហើយឃើញឧបករណ៍ ឬបរិក្ខារដ៏ប្រកបដោយអព្ភូតហេតុដែលព្រះអម្ចាស់បានប្រទានមក ។ លីអាហូណាជា « គឺជាដុំមូលមួយធ្វើពីលង្ហិនដែលមានទ្រនិចពីរ ដែលចង្អុលប្រាប់ទិស—ដូចជាត្រីវិស័យ—ហើយក៏ជាការបង្គាប់ខាងវិញ្ញាណដល់លីហៃ និងពួកអ្នកដែលដើរតាមលោក នៅពេលណាពួកគេសុចរិត » ( សេចក្តីណែនាំដល់បទគម្ពីរទាំងឡាយ « លីអាហូណា » scriptures.ChurchofJesusChrist.org ) ។
សូមស្រមៃមើលថា តើវាមានសភាពយ៉ាងណា នៅពេលភ្ញាក់ពីដំណេកនៅព្រឹកមួយ ហើយឃើញឧបករណ៍ដូចជាលីអាហូណា នៅក្បែរទ្វាររបស់អ្នក ដែលអ្នកអាចប្រើដើម្បីនាំផ្លូវអ្នកពេញមួយថ្ងៃ ។
-
តើអ្វីអាចនឹងខុសគ្នាក្នុងជីវិតរបស់អ្នក ប្រសិនបើអ្នកមានអ្វីមួយដូចជាលីអាហូណា ដើម្បីនាំផ្លូវអ្នក ?
-
តើមានកាលៈទេសៈអ្វីខ្លះដែលអ្នកកំពុងប្រឈមមុខក្នុងពេលបច្ចុប្បន្ន ដែលអ្នកចង់បានការដឹកនាំ និងការណែនាំបន្ថែម ?
អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានពិពណ៌នាអំពីហេតុផលមួយដែលយើងគួរស្វែងរក ដើម្បីយល់កាន់តែច្បាស់អំពីរបៀបដែលលីអាហូណាបានដំណើរការ ។ សូមចំណាំថាឃ្លា « គំរូ និងស្រមោល » សំដៅលើវត្ថុ ព្រឹត្តិការណ៍ រឿង ឬមនុស្សដែលតំណាងឲ្យអ្វីមួយផ្សេងទៀត ។
ការពិពណ៌នានៅក្នុងព្រះគម្ពីរមរមនអំពីលីអាហូណា ដែលជាវត្ថុដឹកនាំ ឬត្រីវិស័យដែលលីហៃ និងគ្រួសាររបស់លោកប្រើក្នុងការធ្វើដំណើររបស់ពួកគេនៅក្នុងទីរហោស្ថាន ជាពិសេសត្រូវបានបញ្ចូលក្នុងបញ្ជីថា ជាគំរូ និងស្រមោលមួយសម្រាប់សម័យរបស់យើង និងជាមេរៀនសំខាន់មួយអំពីអ្វី ដែលយើងគួរតែធ្វើ ដើម្បីរីករាយនឹងពរជ័យនៃព្រះវិញ្ញាណបរិសុទ្ធ ។ ( ដាវីដ អេ បែដណា « That We May Always Have His Spirit to Be with Us » Liahona ខែ ឧសភា ឆ្នាំ ២០០៦ ទំព័រ ៣០ )
ភាពស្រដៀងគ្នារវាងលីអាហូណា និងព្រះវិញ្ញាណបរិសុទ្ធ
នៅក្នុងសៀវភៅកំណត់ហេតុការសិក្សារបស់អ្នក សូមធ្វើតារាងដូចខាងក្រោម ។ សូមពិចារណាធ្វើបញ្ជីអំពីភាពស្រដៀងគ្នាមួយចំនួនរវាងលីអាហូណា និងព្រះវិញ្ញាណបរិសុទ្ធ ដែលអ្នកបានដឹងរួចហើយ ។ នៅពេលអ្នកសិក្សា សូមពិចារណាពីអ្វីដែលអ្នកកំពុងរៀន ដែលជួយអ្នកយល់កាន់តែច្បាស់អំពីព្រះវិញ្ញាណបរិសុទ្ធ និងរបៀបដែលអ្នកអាចប្រើអំណោយទាននេះបានកាន់តែប្រសើរនៅក្នុងជីវិតរបស់អ្នក ។
|
លក្ខណៈរបស់លីអាហូណា |
ភាពស្រដៀងគ្នាទៅនឹងព្រះវិញ្ញាណបរិសុទ្ធ |
|---|---|
លក្ខណៈរបស់លីអាហូណា
| ភាពស្រដៀងគ្នាទៅនឹងព្រះវិញ្ញាណបរិសុទ្ធ
|
សូមអានសេចក្តីយោងបទគម្ពីរខាងក្រោម ហើយកត់ត្រាព័ត៌មានលម្អិតអំពីលីអាហូណានៅក្នុងជួរឈរខាងឆ្វេងនៃតារាងរបស់អ្នក ។ ព័ត៌មានលម្អិតទាំងនេះអាចរួមបញ្ចូលអំពីរបៀបដែលលីអាហូណាដំណើរការ មូលហេតុដែលវាត្រូវបានផ្តល់ឲ្យ និងអ្វីដែលបានកើតឡើងដែលបណ្តាលឲ្យវាឈប់ដំណើរការ ។ បន្ទាប់មក សូមពិចារណាប្រកបដោយការអធិស្ឋានអំពីរបៀបដែលសេចក្ដីលម្អិតទាំងនេះអំពីលីអាហូណាទាក់ទង ឬជានិមិត្តរូបឲ្យកិច្ចការនៃព្រះវិញ្ញាណបរិសុទ្ធ ។ សូមកត់ត្រាភាពស្រដៀងគ្នានៅក្នុងជួរឈរខាងស្តាំនៃតារាងរបស់អ្នក ។ ឧទាហរណ៍ ៖ នៅក្នុង នីហ្វៃទី ១ ១៦:១០ យើងរៀនថា លីអាហូណាបានចង្អុលបង្ហាញផ្លូវដែលលីហៃ និងគ្រួសាររបស់លោកគួរទៅក្នុងទីរហោស្ថាន ។ ស្រដៀងគ្នានេះដែរ ព្រះវិញ្ញាណបរិសុទ្ធអាចចង្អុលទិសដៅដែលយើងត្រូវដើរនៅក្នុងជីវិត ។
-
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
តើអ្វីជាសេចក្ដីពិតសំខាន់បំផុតពីរ ឬបីដែលអ្នកបានរៀនអំពីព្រះវិញ្ញាណបរិសុទ្ធ ដោយការប្រៀបធៀបទ្រង់ទៅនឹងលីអាហូណា ?
-
តើពេលណាដែលអ្នក ឬអ្នកដទៃបានជួបប្រទះនូវសេចក្ដីពិតមួយ ឬច្រើនអំពីព្រះវិញ្ញាណបរិសុទ្ធ ?
-
តើការព្យាយាមទទួលស្គាល់ និងធ្វើតាមការណែនាំពីព្រះវិញ្ញាណបរិសុទ្ធអាច ជះឥទ្ធិពលដល់ទំនាក់ទំនងរបស់អ្នកជាមួយព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?
-
សូមចំណាយពេលបន្តិចដើម្បីសញ្ជឹងគិតអំពីសមត្ថភាពរបស់អ្នក ក្នុងការទទួលបានការណែនាំពីព្រះវិញ្ញាណបរិសុទ្ធ និងឥទ្ធិពលដែលទ្រង់មានលើជម្រើសដែលអ្នកជ្រើយយក ។ សូមពិចារណាកត់ត្រាគំនិត ឬចំណាប់អារម្មណ៍ដែលអ្នកអាចមាន ។