« វាយតម្លៃការសិក្សារបស់អ្នកទី ២ ៖ នីហ្វៃទី១ ១៦–នីហ្វៃទី២ ២៥ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« វាយតម្លៃការសិក្សារបស់អ្នក » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
វាយតម្លៃការសិក្សារបស់អ្នកទី ២
គោលបំណងមេរៀននេះគឺដើម្បីជួយអ្នកឲ្យវាយតម្លៃការរីកចម្រើន ដែលអ្នកបានដកពិសោធអំឡុងការសិក្សាព្រះគម្ពីរមរមនរបស់អ្នក ។
ការគិតពិចារណាអំពីការរៀនសូត្រដំណឹងល្អ
សូមយកកញ្ចក់ ឬវត្ថុដែលអាចឆ្លុះបានផ្សេងទៀតចេញមក ហើយចំណាយពេលមើលខ្លួនឯងបន្តិច ។ សូមបង្វែរកញ្ចក់ទៅខាងស្តាំ និងខាងឆ្វេងបន្តិច ហើយកត់ចំណាំនូវអ្វីដែលអ្នកមិនអាចមើលឃើញដោយគ្មានកញ្ចក់ ។
-
តើការមានកញ្ចក់ឆ្លុះមានអត្ថប្រយោជន៍អ្វីខ្លះ ?
-
តើការឆ្លុះកញ្ចក់មើលខ្លួនយើងស្រដៀងនឹងការគិត និងការវាយតម្លៃការរៀនសូត្រដំណឹងល្អរបស់យើងយ៉ាងដូចម្ដេច ?
ស្រដៀងនឹងការអាចមើលឃើញរូបរាងខាងក្រៅរបស់អ្នក ការចំណាយពេលដើម្បីមើល ហើយគិតអំពីបទពិសោធន៍នៃការរៀនសូត្រអំពីដំណឹងល្អរបស់អ្នកអាចជួយអ្នកតាមរបៀបជាច្រើនបាន ។ នៅពេលអ្នកគិតពិចារណាអំពីអ្វីដែលអ្នកបានរៀនពីការសិក្សារបស់អ្នកនៅក្នុងព្រះគម្ពីរមរមន នោះព្រះវិញ្ញាណបរិសុទ្ធអាចជួយអ្នកឲ្យស្គាល់វឌ្ឍនភាពរបស់អ្នក និងគូសចំណាំផ្នែកនានាសម្រាប់ការកែលម្អបាន ។ មេរៀននេះនឹងជួយអ្នកឲ្យគិតពិចារណាពីការរីកចម្រើនផ្ទាល់ខ្លួន និងបទពិសោធន៍របស់អ្នកពីការសិក្សាព្រះគម្ពីរមរមន ។
ការគិតពិចារណាពីវឌ្ឍនភាពខាងវិញ្ញាណ
សូមសញ្ជឹងគិតលើការបំផុសគំនិត និងអារម្មណ៍មកពីព្រះវិញ្ញាណបរិសុទ្ធ ដែលអ្នកប្រហែលជាបានទទួលនៅពេលសិក្សាព្រះគម្ពីរមរមន ។ មានវិធីជាច្រើនដែលព្រះវិញ្ញាណបរិសុទ្ធអាចទាក់ទងជាមួយអ្នក ។ ឧទាហរណ៍ ៖ ខគម្ពីរមួយចំនួនអាចទាក់ទាញចំណាប់អារម្មណ៍របស់អ្នក ហើយអ្នកមានអារម្មណ៍ថាចង់គូសចំណាំខគម្ពីរទាំងនោះ ។ អ្នកប្រហែលជាធ្លាប់ទទួលអារម្មណ៍សុខសាន្ត ឬសេចក្ដីស្រឡាញ់ ។ អ្នកប្រហែលជាបានអាន ហើយទទួលអារម្មណ៍បំផុសគំនិតឲ្យធ្វើតាមវិធីជាក់លាក់មួយ ឬបានរកឃើញចម្លើយចំពោះសំណួរដែលអ្នកមាន ។
-
សូមឆ្លើយសំណួរខាងក្រោមនេះយ៉ាងហោចណាស់ឲ្យបានបី ៖ វាអាចមានប្រយោជន៍ក្នុងការពិនិត្យមើលសៀវភៅកំណត់ហេតុការសិក្សារបស់អ្នក ដើម្បីជួយអ្នកឆ្លើយតបទៅនឹងសំណួរនានា ។
-
តើដំណើររឿង ឬវគ្គបទគម្ពីរណាខ្លះមកពីព្រះគម្ពីរមរមនបានជួយអ្នកឃើញពីរបៀបដែលព្រះវរបិតាសួគ៌ទាក់ទងបុត្រាបុត្រីរបស់ទ្រង់ ?
-
តើគំនិត ឬអារម្មណ៍អ្វីខ្លះដែលអ្នកបានដកពិសោធនៅក្នុងថ្នាក់សិក្ខាសាលា ឬនៅក្នុងការសិក្សាផ្ទាល់ខ្លួនរបស់អ្នកនៅឆ្នាំនេះ ?
-
តើអ្នកបានធ្វើអ្វីខ្លះ ដើម្បីស្វែងរកវិវរណៈពីព្រះវរបិតាសួគ៌ ?
-
តើអ្នកអាចធ្វើអ្វីខ្លះ ដើម្បីស្វែងរកវិវរណៈ ហើយត្រៀមខ្លួនដើម្បីទទួលស្គាល់វិវរណៈ នៅពេលវិវរណៈកើតមានឡើង ?
-
តើអ្នកបានប្រព្រឹត្តយ៉ាងណាចំពោះចំណាប់អារម្មណ៍ដែលអ្នកបានទទួល ?
-
សូមពន្យល់ពីការធ្លាក់របស់អ័ដាម និងអេវ៉ា និងដង្វាយធួននៃព្រះយេស៊ូវគ្រីស្ទ
មនុស្សគ្រប់រូបត្រូវបានរងឥទ្ធិពលដោយសារការធ្លាក់របស់អ័ដាម និងអេវ៉ា ។ ព្រះគម្ពីរមរមនបង្រៀនអំពីឥទ្ធិពលទាំងនេះ និងពីរបៀបដែលព្រះអង្គសង្គ្រោះប្រោសលោះយើងពីការធ្លាក់ ។ លំហាត់ខាងក្រោមអាចជួយឲ្យអ្នកអនុវត្តការពន្យល់អំពីការធ្លាក់របស់អ័ដាម និងអេវ៉ា និងដង្វាយធួនរបស់ព្រះយេស៊ូវគ្រីស្ទ ។
សូមស្រមៃថាអ្នកគឺជាអ្នកផ្សព្វផ្សាយសាសនា ហើយអ្នក និងដៃគូរបស់អ្នកកំពុងរៀបចំដើម្បីបង្រៀននរណាម្នាក់អំពីការធ្លាក់នេះ ។ អ្នកបានសម្រេចចិត្តថា ម្នាក់ក្នុងចំណោមអ្នកទាំងពីរ គួរតែបង្រៀនអំពី ការធ្លាក់ និងឥទ្ធិពលរបស់វាទៅលើមនុស្សជាតិ ហើយម្នាក់ទៀតគួរតែបង្រៀនអំពី របៀបដែលព្រះអង្គសង្គ្រោះជួយយើងយកឈ្នះលើឥទ្ធិពលនៃការធ្លាក់នេះ ។
សូមជ្រើសរើសប្រធានបទមួយក្នុងចំណោមប្រធានបទទាំងពីរដែលអ្នក និងដៃគូរបស់អ្នកគ្រោងនឹងបង្រៀន ។
សូមប្រើខគម្ពីរដើម្បីជួយអ្នកពន្យល់ពីប្រធានបទដែលអ្នកបានជ្រើសរើស ។ វាអាចមានប្រយោជន៍ក្នុងការរំឭកឡើងវិញនូវ នីហ្វៃទី២ ២:១៧–២៧; ៩:៦–១២; ១០:២៣–២៥ កំណត់ចំណាំនៅក្នុងសៀវភៅកំណត់ហេតុការសិក្សារបស់អ្នក ឬ « ការធ្លាក់របស់អ័ដាម និងអេវ៉ា » នៅក្នុងប្រធានបទនៃដំណឹងល្អ ( topics.ChurchofJesusChrist.org ) ដើម្បីជួយឲ្យអ្នករៀបចំចែកចាយ ។
បន្ទាប់ពីអ្នកបានបញ្ចប់ សូមពិចារណាការចែកចាយការពន្យល់របស់អ្នកជាមួយមនុស្សម្នាក់ទៀត ។ ឧទាហរណ៍ ៖ សមាជិកគ្រួសារ មិត្តភក្តិ ឬអ្នកដឹកនាំសាសនាចក្រ ។
-
សូមកត់ត្រាការពន្យល់របស់អ្នកអំពីប្រធានបទដែលអ្នកបានជ្រើសរើស ។
អារម្មណ៍របស់ខ្ញុំអំពីព្រះយេស៊ូវគ្រីស្ទ
ព្រះគម្ពីរមរមនថ្លែងទីបន្ទាល់អំពីព្រះយេស៊ូវគ្រីស្ទ ។ សូមសញ្ជឹងគិតអំពីអ្វីដែលអ្នកបានរៀន ឬសិក្សាអំពីព្រះអង្គសង្គ្រោះ ។ សូមរំឭកជំពូកដែលអ្នកបានសិក្សា ដូចជា នីហ្វៃទី១ ១៩, នីហ្វៃទី២ ៩ និង នីហ្វៃទី២ ២៥ ។ អ្នកក៏អាចរកមើលវគ្គបទគម្ពីរដែលអ្នកបានគូសចំណាំផងដែរ ។ វាអាចមានប្រយោជន៍ក្នុងការរំឭកអ្វីដែលអ្នកបានសរសេរនៅក្នុងសៀវភៅកំណត់ហេតុការសិក្សារបស់អ្នក ជាពិសេសកំណត់ត្រាដែលបង្ហាញអារម្មណ៍របស់អ្នកចំពោះទ្រង់ ។
-
សូមបំពេញចំណុចដូចតទៅនេះ ។ សូមរួមបញ្ចូលអ្វីដែលអ្នកបានធ្វើ ឬការពន្យល់ខ្លីៗអំពីវា ។
-
សូមតែងកំណាព្យ ឬសរសេរសំបុត្រមួយច្បាប់ទៅព្រះអង្គសង្គ្រោះដែលបង្ហាញពីអារម្មណ៍របស់អ្នកចំពោះទ្រង់ ។ សូមពិចារណាប្រើពាក្យ ឬឃ្លាពីបទគម្ពីរ ឬបទគម្ពីរយោង ។
-
សូមចងក្រងបញ្ជីពាក្យដែលពិពណ៌នាអារម្មណ៍របស់អ្នកអំពីព្រះអង្គសង្គ្រោះ ។ សូមបញ្ចូលការពិពណ៌នាមួយចំនួនមកពីព្រះគម្ពីរ ។ សូមបង្កើតចង្កោមពាក្យ ឬសរសេរពាក្យនៅលើក្រដាសនីមួយៗ ហើយពិចារណាព្យួរវានៅក្នុងបន្ទប់របស់អ្នក ឬនៅកន្លែងផ្សេងទៀតដែលអ្នកនឹងឃើញវាជាញឹកញាប់ ។
-
សូមគូរអ្វីមួយដែលជួយអ្នកបង្ហាញពីអារម្មណ៍របស់អ្នកអំពីព្រះអង្គសង្គ្រោះ ។
-