Jarom–Omni

Ialay ang Inyong Buong Kaluluwa kay Jesucristo

dalagitang nagdarasal

Saan ka humihingi ng patnubay kapag gumagawa ka ng mahahalagang desisyon sa buhay? Inilaan ng Ama sa Langit at ni Jesucristo ang mga banal na kasulatan bilang pangunahing pinagmumulan ng patnubay at tulong para sa lahat. Ang mga aklat nina Jarom at Omni ay naglalaman ng maraming turo na magpapala sa iyong buhay. Ang lesson na ito ay naglalayong tulungan kang sanayin ang pagtukoy at pagsasabuhay ng mga alituntunin mula sa mga banal na kasulatan na maaaring magpala at gumabay sa iyong buhay.

Pagmamaneho ng barko

manibela sa barko

Isipin na ang paglalakbay mo sa buhay ay parang barkong naglalayag sa karagatan. Ano ang ilang bagay na maikukumpara mo sa manibela o timon na gumagabay sa barko sa paglalakbay nito?

Nagbigay si Elder David A. Bednar ng Korum ng Labindalawang Apostol ng posibleng sagot:

Elder David A. Bednar

Tulad ng timon na gumagabay sa isang barko gayon din ang mga alituntunin ng ebanghelyo sa atin. Dahil sa mga wastong alituntunin, magagawa nating mahanap ang daan at makatayong matibay, matatag, at hindi matitinag nang sa gayon ay makapagbalanse tayo at hindi mahulog sa nagngangalit na mga unos ng kadiliman at pagkalito sa mga huling araw. (David A. Bednar, “Ang mga Alituntunin ng Aking Ebanghelyo,” Liahona, Mayo 2021, 126)

• Paano maitutulad ang isang alituntunin ng ebanghelyo sa manibela o timon ng barko?

• Mula sa scale na 1 hanggang 10, gaano ka kakumpiyansa na matutukoy mo ang mga tunay na alituntunin mula sa mga banal na kasulatan at magagamit mo ang mga ito upang gabayan ang iyong buhay? Bakit?

• Ano ang nagawa mo noon na nakatulong sa iyo na makahanap ng mga alituntunin sa mga banal na kasulatan?

Kung gusto mong pagbalik-aralan kung paano matutukoy ang mga alituntunin, maaari mong balikan ang mga sumusunod na lesson: “2 Nephi 1” at “Jacob 4.”

Pag-isipan sandali ang isang alituntunin na natukoy mo kamakailan sa seminary o sa iyong personal na pag-aaral ng mga banal na kasulatan.

• Ano ang alituntuning nahanap mo? Paano napagpala ng alituntuning iyon ang iyong buhay?

Pagtukoy ng mga alituntunin ng ebanghelyo

Ang mga aklat nina Jarom at Omni ay naglalaman ng mga huling isinulat sa maliliit na lamina ni Nephi at kinabibilangan ng maraming alituntunin na magpapala sa ating buhay. Natanggap ni Jarom ang mga lamina mula sa kanyang amang si Enos, at itinala niya ang mga paghihirap at pagpapala ng mga Nephita sa loob ng mga 40 taon. Pagkatapos ay ipinasa niya ang mga lamina sa kanyang anak na si Omni. Ang aklat ni Omni ay naglalaman ng mga isinulat ng limang magkakaibang tagapag-ingat ng mga talaan ng mga Nephita at sumasaklaw sa humigit-kumulang 190 taon.

Basahin ang mga sumusunod na scripture passage at sanaying tumukoy ng mga alituntunin ng ebanghelyo na magagamit mo sa iyong buhay. Maaaring may ilang alituntuning nakapaloob sa bawat grupo ng mga talata. Tumukoy ng kahit isa man lang mula sa bawat scripture passage.

1. Jarom 1:3–4

2. Jarom 1:5–9

3. Jarom 1:10–12

4. Omni 1:12–16

5. Omni 1:25–26

Pagbibigay ng iyong sarili sa Tagapagligtas at sa Kanyang gawain

Matapos matukoy ang isang alituntunin, mahalagang mag-ukol ng oras na pag-isipan kung ano ang ibig sabihin nito at kung paano mo ito maipamumuhay. Halimbawa, sa Omni 1:26, maaaring natukoy mo ang sumusunod na alituntunin: Kung lalapit tayo kay Cristo at iaalay ang ating buong kaluluwa sa Kanya, tayo ay maliligtas.

• Ano ang ilang paraan kung paano mo maaaring mas maunawaan at maipamuhay ang alituntuning ito?

Ang sumusunod ay isang ideya:

Maaaring makatulong na ikumpara ang alituntuning ito sa isang bagay na maaari mong ibigay sa iba sa araw-araw.

• Ano ang maibibigay mo sa iba?

• May mga paraan ba na maaari ka lang magbigay ng bahagi ng maibibigay mo? Bakit?

• Kailan mo maibibigay ang lahat ng kaya mong ibigay? Bakit?

• Paano ito maiaangkop sa pag-aalay ng ating buong kaluluwa kay Jesucristo?

icon, isulat

1.  Sagutin ang mga sumusunod na tanong:

• Ano sa palagay mo ang ibig sabihin ng ialay ang iyong buong kaluluwa kay Jesucristo?

• Sa palagay mo, bakit hinihingi sa atin ng Panginoon na ibigay natin sa Kanya ang ating buong kaluluwa?

• Sino ang kilala mo na isang mabuting halimbawa ng isang taong nagsisikap na ibigay ang kanyang buong kaluluwa kay Jesucristo? Paano siya napagpala sa paggawa nito?

ChurchofJesusChrist.org

Magdrowing ng isang bilog na kumakatawan sa iyong buhay. Kulayan ang bahagi ng bilog na sa palagay mo ay pinakamainam na kumakatawan sa kung gaano kalaking bahagi ng iyong sarili ang kasalukuyang ibinibigay mo sa Panginoon. Pag-isipan sandali kung paano mo mas lubos na maibibigay ang iyong buong kaluluwa kay Jesucristo. Magsulat ng isa o dalawang paraan kung paano mo ito pagsisikapang gawin at kung paano makatutulong sa iyong buhay ang paggawa ng mga bagay na ito.

Pag-unawa at Pagsasabuhay ng mga Alituntunin

Alalahanin ang mga alituntuning natukoy mo kanina mula kina Jarom at Omni.

icon, isulat

2.  Sagutin ang mga sumusunod na tanong:

• Alin sa mga alituntuning natukoy mo ang pinakamakabuluhan sa iyo? Bakit?

• Paano mo mas mauunawaan at maipamumuhay ang alituntuning ito?

• Paano makatutulong ang pagpapamuhay ng alituntuning ito upang mas mailapit mo ang iyong buhay kay Jesucristo?

Opsiyonal: Gusto Mo Bang May Matutuhan Pa?

Omni 1:12–22. Sino ang iba’t ibang grupo ng mga tao na binanggit sa aklat ni Omni?

Sa aklat ni Omni, nalaman natin ang tatlong grupo ng mga tao na dinala ng Panginoon sa lupang pangako. Ang unang grupo na binanggit ay ang pamilya ni Lehi at ang kanilang mga inapo. Ang pangalawang grupo, na tinawag na mga tao ni Zarahemla, o mga Mulekita, ay lumisan sa Jerusalem at naglakbay patungo sa lupain ng Amerika sa kaparehong panahon ng paglisan ng pamilya ni Lehi. Sumama sila sa mga Nephita sa ilalim ng pamumuno ni Haring Mosias (tingnan sa Omni 1:19). Ang pangatlong grupo ay ang mga Jaredita, na nagtungo sa lupang pangako bago pa ang unang dalawang grupo. Nalipol nila ang kanilang sarili sa mga digmaang sibil sa pagitan ng 600 at 300 BC. Ang huling hari ng mga Jaredita, isang lalaking nagngangalang Coriantumer, ay nakaligtas sa pagkalipol at tila nagpagala-gala hanggang sa matagpuan niya ang mga tao ni Zarahemla bago siya mamatay (tingnan sa Omni 1:21). Ang aklat ni Eter ay naglalaman ng pinaikling tala ni Moroni tungkol sa mga Jaredita.

Omni 1:26. Paano ko maiaalay ang aking buong kaluluwa kay Jesucristo?

Itinuro ni Elder Jeffrey R. Holland ng Korum ng Labindalawang Apostol:

Elder Jeffrey R. Holland

Bawat isa sa atin ay kailangang lumapit kay Cristo nang may … di-natitinag na katapatan sa Kanyang ebanghelyo. … Sa salita ng mga kabataan ngayon, kailangan nating “itodo” ang ating katapatan. (Jeffrey R. Holland, “Ang Pinakamahalagang Pag-aari,” Liahona, Nob. 2021, 8)

Itinuro ni Elder Neal A. Maxwell (1926–2004) ng Korum ng Labindalawang Apostol ang ibig sabihin ng pag-aalay ng ating mga sarili sa Panginoon:

Elder Neal A. Maxwell

Ang tunay na personal na sakripisyo ay hindi kailanman ang paglalagay ng hayop sa altar. Sa halip, ito ay ang kahandaang ialay sa altar ang pagiging asal-hayop natin at hayaang matupok ito! (Neal A. Maxwell, “Deny Yourselves of All Ungodliness,” Ensign, Mayo 1995, 68)

Sa paksa ring iyon, itinuro kalaunan ni Elder Maxwell:

Sa pagpapasakop ninyo ng inyong kalooban sa Diyos, ibinibigay ninyo sa Kanya ang nag-iisang bagay na talagang maibibigay ninyo sa Kanya. (Neal A. Maxwell, “Alalahanin Kung Paano Naging Maawain ang Panginoon,” Liahona, Mayo 2004, 46)

Idinagdag ni Brother Russell T. Osguthorpe, dating Sunday School General President:

Brother Russell T. Osguthorpe

Ang pagpapaubaya ng ating kalooban sa Panginoon ay ginagawa natin araw-araw. Hindi ito kakaibang gawain. Hindi ito ang katapusan, kundi simula lamang ito. Masasabi natin ang nais Niyang ipasabi. Magagawa natin ang nais Niyang ipagawa. Maaari tayong maging saksi sa mundo ng pinakamamahal na Anak ng Diyos—lahat dahil sa gusto nating gawin ito. Kapag nagbago ang ating puso, ang pasasalamat natin sa Pagbabayad-sala ay labis na nadaragdagan kaya’t patuloy tayo nitong pinatatatag. (Russell T. Osguthorpe, “Ipapaubaya Ko sa Kanya ang Aking Kalooban” [Church Educational System devotional para sa mga young adult, Nob. 3, 2013])