Мозая 2:1–18

“Бусдадаа үйлчлэх нь”

Юу агуу удирдагчийг бий болгодог вэ? Хаан Бенжамины хэлсэн үгээс бид тэрээр өөрийн хүмүүст ямар төрлийн удирдагч, үлгэр жишээ нэгэн байсныг олж хардаг. Хаан Бенжамин хүмүүстээ үйлчлэхдээ Бурханд мөн адил үйлчилдэг, мөн бие биедээ үйлчлэхийг тэдэнд заадаг нэгэн байсан. Энэ хичээл бусдад сайн үйлчилснээр Бурханд илүү сайн үйлчлэхэд нь суралцагчдад туслах зорилготой.

Та үйлчлэлийг юу гэж үздэг вэ?

Та энэ долоо хоногт хэн нэгэнд үйлчилж болох янз бүрийн аргыг 60 секундэд бодоод бич.

• Хэн нэгнийг эдгээр зүйлийг хийхэд юу урам зориг өгөх вэ?

• Хэн нэгнийг эдгээр зүйлийг хийхэд нь юу эргэлзүүлдэг вэ?

Дараахаас аль нь үйлчлэх боломжуудын талаарх таны одоогийн ойлголтыг дүрсэлж байна вэ?

• Би үйлчлэх боломжуудыг хайдаг.

• Надаас тусламж хүссэн үед би дуртайяа хариулдаг.

• Би үйлчлэхийг хүсдэг ч үйлчлэлийг амьдралынхаа нэн тэргүүнд тавихад хүндрэлтэй санагддаг.

• Би өөр хэн нэгэн үйлчлэлийг хийчихнэ гэж боддог хандлагатай.

• Би үйлчлэх дуртай ч бусад хүн намайг юу гэж бодох бол гэхээс санаа зовдог.

• Би үйлчлэх дуртай ч бусдад анзаарагдахыг эсвэл танигдахыг хүсдэггүй.

• Бусад:

Өнөөдрөөс эхлэн энэ хичээлийг судлахдаа эргэн тойрныхондоо хэрхэн бас яагаад илүү дээр үйлчлэх талаараа бодож үз.

Хаан Бенжамины үйлчлэлийн жишээ

Хаан Бенжамин амьдралынхаа төгсгөл үед өөрийн хүү Мозаягаас Нифайн хүмүүсийг дуудаж, тэдэнтэй ярилцаасай гэж хүссэн. Тэд хаан Бенжаминыг сонсохоор гэр бүлээрээ ариун сүмд цугларсан (Мозая 2:1–9-ийг үзнэ үү).

Мозая 2:10–14-ийг уншаад, хаан Бенжамины хүмүүстээ хэрхэн үйлчилж байсныг олж мэд.

1.  Дараах асуултуудад хариул.

• Хаан Бенжамины юу таны анхаарлыг татаж байна вэ?

• Хэрвээ хүмүүс хаан Бенжамин шиг амьдарч байсан бол танай гэр бүл, сургууль эсвэл нийгэм ямар ялгаатай байх байсан бэ?

Бид яагаад үйлчилдэг вэ

Мозая 2:15–18-ыг уншаад, хаан Бенжамин үйлчлэлийн талаар юу гэж заасныг хайж ол.

• Та нар ямар ямар үнэнийг тодорхойлсон бэ?

Moзая 2:17 бол төгс эзэмших сургаалын судрын хэсэг юм. Төгс эзэмших сургаалын судрын хэсгүүдийг дараа нь амархан олохын тулд онцгойлон тэмдэглэхийг бодож үз. Та дараагийн хичээл дээр асуулт эсвэл нөхцөл байдалд энэ хэсэгт заасан сургаалыг хэрэгжүүлэх дадлага хийх боломжтой болно.

Хаан Бенжаминаас бидний сурч мэдэж болох нэг үнэн бол “та нар бусдадаа үйлчилж байгаа нь та нар зөвхөн Бурхандаа үйлчилж байгаа юм” билээ.

2.  Дараах асуултуудад хариул.

• Бид бусдад үйлчлэхдээ хэрхэн Бурханд үйлчилдэг вэ?

• Та энэ шүлгүүдээс Есүс Христийг санагдуулсан юуг олж харсан бэ?

Ерөнхийлөгч Томас С.Монсоны (1927–2018) дараах мэдэгдлийг уншаад, бидний бусдад үйлчлэх үйлчлэл, Бурхантай харилцах харилцааны талаар түүний юу заасныг олж мэд.

Бид тэнгэр лүү харж байхдаа илүү ихийн төлөө тэмүүлэх үүрэг хариуцлагаа ухамсарладаг. Жинхэнэ аз жаргалыг олохын тулд, бид үүнийг өөрсдөөсөө гадуур хайж олох ёстой. Өөрийнхөө аминч үзлийг хаяж, бусдад үйлчлэхэд өөрийгөө зориулаагүй хүн хэзээ ч амьдралын утга учрыг олоогүй байдаг. … Хүмүүст харамгүй хандахгүйгээр Христэд зөв хандах боломжгүй гэж Шинэ Гэрээ заадаг. …

Бид Аврагчийг үйлчлэлийнхээ үлгэр жишээ болгон хардаг. Хэдийгээр Тэрээр дэлхийд Бурханы Хүү болон ирсэн ч Өөрийн эргэн тойронд байсан хүмүүст даруухан үйлчилсэн. Тэрээр тэнгэрээс дэлхий дээр мөнх бус хүмүүн болж амьдрахаар мөн Бурханы хаант улсыг байгуулахаар ирсэн юм. Түүний сүр жавхлантай, алдар суут сайн мэдээ нь дэлхийн сэтгэлгээг өөрчилсөн билээ. Тэрээр өвчтөнүүдийг адисалж; хазгарыг алхдаг, сохрыг хардаг, дүлийг сонсдог болгосон. Тэрээр үхэгсдийг хүртэл амилуулсан. (Thomas S. Monson, “The Joy of Service,” New Era, Oct. 2009, 4, 6)

• Аврагчийн жишээг бодох нь таныг бусдад үйлчлэхэд хэрхэн урам зориг өгдөг вэ?

  ChurchofJesusChrist.org 

Нэмэлт жишээнүүдийг “Нэмэлт: Нэмэлт мэдээлэл авахыг хүсэж байна уу?” хэсгийн “Зарим Христийнх шиг үйлчлэлийн жишээ юу вэ?” гарчгаас олж болно.

• Та бусдад үйлчилснээрээ хэрхэн адислагдаж байсан бэ?

• Та бусад хүний үйлчлэлээр хэрхэн адислагдаж байсан бэ?

Төлөвлөгөө гаргах

Халамжийн нийгэмлэгийн ерөнхий ерөнхийлөгчийн зөвлөлийн нэгдүгээр зөвлөх Шэрон Юбанк эгч үйлчлэлийн талаарх энэхүү чухал ойлголтыг ийн хуваалцсан. Бусдад үйлчлэх төлөвлөгөө гаргахад бэлдэж байхдаа түүний юу зааж байгааг бодож үз. “Та бол бэлэг” (0:54) видеог үз ChurchofJesusChrist.orgэсвэл дараах мэдэгдлийг уншина уу.

Хэрэв бид үзэл бодлоо өөрчилбөл, ядуус хийгээд гачигдагсдад анхаарал халамж тавих нь эд зүйл өгөхөөс илүүтэй хүн хоорондын харилцаа холбоог ойртуулах, утга учиртай яриа өрнүүлэх, баялаг, эерэг харилцааг бий болгох зэрэгт чиглэх болно гэдгийг ойлгох ба ингэснээр Их Эзэн биднийг хаа нэгтээ илгээх боломжтой болно. …

… Аврагчийн нэгэн адил, тусламж хэрэгтэй байгаа хүмүүст таны өгч чадах хамгийн сайхан бэлгүүдийн нэг нь та өөрөө гэдгийг сана. (Sharon Eubank, “Turning Enemies into Friends” [Brigham Young University forum, Jan. 23, 2018], 6–7, speeches.byu.edu)

• Үйлчлэлийн талаарх Юбанк эгчийн заасан зүйлээс юу танд онцгой санагдсан бэ?

Та түүний заасныг ямар арга замаар хийж болох вэ? Гэр бүл, найз нөхдийнхөө тухай эсвэл нийгэмлэгийнхээ талаар бод. Тэнгэрлэг Эцэгээс та үйлчилж болох арга замын талаар сэдэл өгөхийг гуйн залбир. Судлах тэмдэглэлдээ санаанд орж ирсэн хүмүүсийн нэрс, тэдэнд хэрхэн тусалж болох тухай санаагаа бич. Сэтгэгдлийнхээ дагуу үйлдлээ хэзээ хийхээ шийд. Яг одоо танд хийж чадах зүйл байж ч мэдэх юм.

Нэмэлт: Нэмэлт мэдээлэл авахыг хүсэж байна уу?

Бид бусдад хэрхэн илүү үр дүнтэй үйлчилж болох вэ?

Хүүхдийн хэсгийн ерөнхий ерөнхийлөгч асан Жой Д.Жөүнс ийн заасан.

Зарим тохиолдолд эхлээд бид үүрэг хариуцлага хүлээсний улмаас үйлчилж болох ч тийм үйлчлэл ч гэсэн биднийг ямар нэгэн илүү дээд зүйлд тулгуурлан “илүү давуу арга замаар” үйлчлэхэд хүргэдэг [1 Коринт 12:31]. …

Бурханы бидний төлөө хийсэн бүх зүйлд төвлөрөх үед үйлчлэл маань талархлын угаас урсан гардаг. Үйлчлэл маань бидэнд ямар ашигтай байх талаар санаа зовохоо багасгах тусам бид Бурханыг эн тэргүүнд тавих нь үйлчлэлийн маань гол хэсэг гэдгийг ойлгодог. (Жой Д.Жөүнс, “Түүний төлөө,” 2018 оны 10-р сарын Ерөнхий чуулган, 121–124)

Арван хоёр төлөөлөгчийн чуулгын ахлагч M.Рэссэлл Баллард дараах урилгыг өгсөн.

Өглөө бүр залбирахдаа, Тэнгэрлэг Эцэгээс Түүний хайртай хүүхдүүдийн нэгэнд үйлчлэх боломжийг таньж мэдэхэд удирдахыг залбиран гуй. Тэгээд өдрийн турш хайр, итгэлээр дүүрэн зүрх сэтгэлтэйгээр тусламж хэрэгтэй хэн нэгнийг олохоор яв. … Хэрэв та нар үүнийг хийх юм бол сүнслэг мэдрэмжүүд тань тэлэн нэмэгдэж, урьд нь хэзээ ч боломжгүй мэт байсан үйлчлэх боломжуудыг олж нээх болно. (М.Рассэлл Баллард, “Санаа сэтгэлээ бүрэн зориулсан байх нь,” 2012 оны 10-р сарын Ерөнхий чуулган, 37)

Халамжийн нийгэмлэгийн ерөнхий ерөнхийлөгч Жийн Б.Бингам ийн заасан.

Заримдаа бид хөршдөө үйлчлэхийн тулд ямар нэг агуу бөгөөд баатарлаг үйлс бүтээх ёстой гэж боддог. Гэвч үйлчлэлийн энгийн үйлдлүүд бусдад төдийгүй өөрсдөд маань хүчирхгээр нөлөөлж чадна. Аврагч юу хийсэн бэ? Түүний Цагаатгал, Амилалтын мөнхийн бэлгээр дамжуулан “Дэлхий дээр амьдарч байсан мөн амьдрах бүх хүнд ийм хүчтэй нөлөөг хэн ч үзүүлж байгаагүй” [“Амьд Христ: Төлөөлөгчдийн гэрчлэл,” ChurchofJesusChrist.org]. Тэрээр инээмсэглэж, ярьж, хамт алхаж мөн сонсож, цаг гаргаж, урамшуулан дэмжиж бас зааж, хооллож, уучилж байсан. Тэр гэр бүл, найз нөхөд, хөршүүддээ болон танихгүй хүмүүст ч мөн адил үйлчилж, танилуудаа болон хайртай хүмүүсээ Өөрийн сайн мэдээний гайхамшигт адислалуудын баяр хөөрийг хүлээн авахад урьсан. Үйлчлэл, хайрын эдгээр “энгийн” үйлдэл өнөөдөр бидний хийх тохинууллын загвар болж өгдөг. (Жийн Б.Бингам, “Аврагчийн адил тохинуулах нь,” 2018 оны 4-р сарын Ерөнхий чуулган, 104)

Хэрэв хэн нэгэн сайн хариу өгөхгүй бол эсвэл таны үйлчлэлээс татгалзвал яах вэ?

Хүүхдийн хэсгийн ерөнхий ерөнхийлөгч асан Жой Д.Жөүнс ийн заасан.

Та тусламж хэрэгтэй хэн нэгнийг хайрлан, чин сэтгэлээсээ туслах гэж хичээсэн байхад хичээл зүтгэлийг тань ойшоохгүй эсвэл магадгүй үнэлээгүй эсвэл бүр хүсэхгүй байгааг нь мэдэрсэн үеэ эргэн санана уу. Тэр үед та үйлчлэлийнхээ үнэ цэнд эргэлзэж байсан уу? Хэрэв тийм бол хаан Бенжамины хэлсэн “Та нар зөвхөн Бурхандаа үйлчилж байгаа” [Мозая 2:17] гэсэн үгс таны эргэлзээ, гомдлыг тайлах болно.

Бид атаа хорсол төрүүлэхийн оронд үйлчлэлээр дамжуулан Тэнгэрлэг Эцэгтэйгээ илүү төгс харилцааг үүсгэж чадна. Түүнийг хайрлах хайр болон Түүний төлөөх үнэнч байдал маань алдар нэр, талархал хүлээн авах хэрэгцээг үгүй болгож, Түүний хайрыг бидэн рүү болон биднээр дамжин урсан орж ирэх боломжийг олгодог. (Жой Д.Жөүнс, “Түүний төлөө,” 2018 оны 10-р сарын Ерөнхий чуулган, 122)

Зарим Христийнх шиг үйлчлэлийн жишээ юу вэ?