Almà 32

“Hanatanjaka ny finoanareo”

Zavatra azo tsapain-tanana maro samihafa no azo ampiasaina hanampiana antsika hahatakatra ny filazantsaran’i Jesoa Kristy. Rehefa nampianatra ny Zôramita i Almà, dia nampitahainy tamin’ny voa azontsika ambolena ao am-pontsika izay amin’ny farany afaka ny ho tonga “hazo maniry hatrany amin’ny fiainana maharitra mandrakizay” ny tenin’ Andriamanitra (Almà 32:41). Ity lesona ity dia natao hanampiana anao hamboly ny tenin’ Andriamanitra ao am-ponao sy hikolokolo ny fijoroana ho vavolombelona anananao momba izany.

Fampitahana

Ny fanaovana fampitahana dia afaka ny ho fomba mahomby hampianarana sy hianarana ny filazantsaran’i Jesoa Kristy. Fenoy ireto banga manaraka ireto. Mahaiza mamorona ary jereo raha misy fomba mihoatra ny iray ahafahanao mameno ny fehezan-teny.

• Ny fiainana dia tahaka ny satria .

• Ny finday avo lenta dia tahaka ny satria .

• Ny fahazoana fijoroana ho vavolombelona dia tahaka ny satria .

Rehefa nanompo teo anivon’ny Zôramita i Almà sy i Amioleka, dia nisy andian’olona naneho ahiahy fa tsy afaka mitsaoka an’ Andriamanitra izy ireo satria noroahina tao amin’ny toerana nivavahan’izy ireo noho ny fahantran’izy ireo (jereo ny Almà 32:5). Na dia fantatsika aza fa ny Tompo dia nampianatra mazava ny maha-zava-dehibe ny fandehanana any amin’ny Fiangonany rehefa Sabata, i Almà dia namaly tamin’ny alalan’ny fampianarana ireo izay tsy navela niangona ireo fahamarinana manan-danja momba ny fitsaohana izay afaka ny hiseho ao am-pontsika, na aiza na aiza toerana misy antsika ara-batana.

Vakio ny fehezan-teny voalohany ao amin’ny Almà 32:28, avy eo dia vakio ny andininy 41 ary mitadiava fampitahana iray nampiasain’i Almà izay afaka miantefa amintsika ihany koa.

• Inona avy no fitovitoviana hitanao amin’ny fambolena hazo mamoa avy amin’ny voa iray sy ny fambolena ny fijoroana ho vavolombelona anananao momba an’i Jesoa Kristy sy ny fampianarany?

Ny fampitahan’i Almà ny tenin’ Andriamanitra amin’ny voa iray dia azo ampiharina amin’ny fahazoana fijoroana ho vavolombelona momba ny lafiny rehetra amin’ny filazantsara. Na izany aza, nohazavain’i Almà taty aoriana fa fijoroana ho vavolombelona momba an’i Jesoa Kristy no nantenainy hambolen’ireo Zôramita ireo tao am-pon’izy ireo (jereo ny Almà 33:22–23).

• Nahoana no “voa” tena manan-danja hambolena ao am-ponao ny finoana ny Mpamonjy?

Makà fotoana hieritreretana ny tanjaky ny fijoroana ho vavolombelona anananao amin’ny ankapobeny momba an’i Jesoa Kristy sy ny fampianarany amin’izao fotoana izao. Saintsaino ihany koa raha misy lafiny manokana amin’ny fijoroana ho vavolombelona anananao tianao hampatanjahana, toy ny fitiavan’ny Ray any An-danitra anao na ny maha-tena nisy marina ny Fahitana Voalohany hitan’i Joseph Smith. Rehefa manohy mandalina ianao anio, dia mitadiava fahamarinana izay afaka manampy anao hahatakatra tsara kokoa ny fomba hahazoana fijoroana ho vavolombelona na ny fomba hanatanjahana ny fijoroana ho vavolombelona anananao.

Mamboly sy mikolokolo ny tenin’ Andriamanitra ao am-pontsika

Bokin’i Môrmôna: Boky torolalana ho an’ny mpampianatra (2024)—“Almà 32: -Hampatanjaka ny finoanareo-”

Mamboly ilay voa

Vakio ny Almà 32:21–23, 26–30, ary asio marika ireo teny sy andian-teny izay manampy anao hahatakatra ny fomba fambolena fijoroana ho vavolombelona iray.

• Inona no mety hahasarotra ny fanaovan’ny olona izany?

• Araka ny voalazan’ny andininy 28–30, inona no hiseho rehefa manisy toerana ao am-pontsika ho an’i Jesoa Kristy sy ny fampianarany isika?

1. Ataovy ireto manaraka ireto:

   Manorata fehezan-teny famintinana iray mikasika ny zavatra nianaranao avy tamin’ireo andininy ireo momba ny fanampiana ny fijoroana ho vavolombelona anananao eo amin’ny dingam-panombohany.

Mikolokolo ilay voa

Nampianarin’i Almà fa ny fambolena ny voa sy ny fahitana ny fahatsaran’izany dia ampahany voalohany fotsiny ihany eo amin’ny fambolena fijoroana ho vavolombelona iray. Vakio ny Almà 32:37–43 hitadiavana fampianarana izay manampy anao hahatakatra ny fomba anampiana ny fijoroana ho vavolombelona iray hitohy hitombo.

• Inona avy ireo ohatra sasantsasany izay maneho ireo fomba mety hanaovan’ny olona iray tsirambina ny fijoroana ho vavolombelona ananany momba an’i Jesoa Kristy sy ny fampianarany?

• Inona avy ireo fomba sasantsasany ahafahanao mikolokolo ny fijoroana ho vavolombelona anananao momba an’i Jesoa Kristy sy ny filazantsarany mba hanampiana izany hihamatanjaka kokoa?

2. Ataovy ireto manaraka ireto:

   Manorata fehezan-teny iray mamintina ny zavatra nianaranao tao amin’ireo andininy ireo momba ny fanatanjahana ny fijoroana ho vavolombelona ananana iray izay efa maniry ao anatinao.

© 2023 by Intellectual Reserve, Inc. All rights reserved.

Ny fijoroana ho vavolombelona anananao

Mba hanampiana anao hahita ny fifandraisan’ny fampitahana nataon’i Almà amin’ny fijoroana ho vavolombelona anananao momba an’i Jesoa Kristy sy ny filazantsarany, dia manaova kisary toy ity manaraka ity ao amin’ny diary fandalinanao. Ataovy mivelatra manerana ilay pejy ny sarinao mba hisian’ny toerana hanoratana eo ambanin’ny dingam-pitomboana tsirairay.

Makà fotoana hampitahana ny fijoroana ho vavolombelona anananao momba ny Mpamonjy sy ny fampianarany amin’ny fitomboan’ny hazo mamoa iray. Misafidiana lafiny maro amin’ny filazantsaran’i Jesoa Kristy, ary soraty tsirairay eo ambanin’ireo dingam-pitomboana izay tsapanao fa maneho indrindra ny fijoroana ho vavolombelona anananao amin’izao fotoana izao amin’ireny sehatra ireny.

Ohatra, ny olona iray dia afaka manoratra hoe “velona i Jesoa Kristy” eo ambanin’ilay hazo mamoa ary ny hoe “herin’ny fisoronana” eo ambanin’ilay voa. Izay olona izay avy eo dia afaka manoratra lafiny hafa ao amin’ny filazantsaran’ny Mpamonjy, toy ny hoe “mpaminany velona,” “asa atao any amin’ny tempoly,” “ny Bokin’i Môrmôna,” ary “vavaka,” eo ambanin’ny dingam-pitomboana izay maneho ny fijoroana ho vavolombelona ananany ao amin’ny tsirairay amin’ireo sehatra ireo.

Manaova drafitra momba ny fomba hiezahanao hampihatra ny fampianaran’i Almà eo amin’ny fiainanao. Azonao atao ny mieritreritra ny zavatra mety hataonao mba “[hanisana] toerana” ao am-ponao sy eo amin’ny fiainanao lafiny iray ao amin’ny fijoroana ho vavolombelona anananao mba hitsimohan’izany. Azonao heverina ihany koa ny fomba ahafahanao “mamahana” ny ampahany amin’ny fijoroana ho vavolombelona anananao izay efa nanomboka naniry. Raketo ao anatin’ny diary fandalinanao ny eritreritrao sy ny fahatsapanao ary ny tanjonao.

Tsy voatery atao: Te hianatra misimisy kokoa ve ianao?

Ahoana no ahafahako manana finoana an’i Jesoa Kristy sy ny filazantsarany misimisy kokoa?

Ny Loholona Richard G. Scott (1928–2015) tao amin’ny Kôlejin’ny Apôstôly Roambinifolo dia nampianatra izao:

Ny fijoroana ho vavolombelona matanjaka iray dia tsy azo aorina eo ambonina fototra malemy. Noho izany, aza mody mino zavatra iray rehefa tsy azonao antoka izany. Katsaho ny hahazo fijoroana ho vavolombelona manamafy izany. Mivavaha mafy, miainà fiainana feno fahamarinana, ary mangataha fanamafisana ara-panahy. … Ampahafantaro ny Raintsika any An-danitra ny zavatra tsapanao, ny zavatra ilainao, ny ahiahinao, ny zavatra antenainao ary ny zava-kinendrinao. Miresaha Aminy amim-pahatokiana tanteraka, ao anatin’ny fahafantarana fa hihaino sy hamaly Izy. Mandehana manohy amim-paharetana ny fiainanao avy eo amin’ny fanaovana ireo zavatra fantatrao fa marina, mandroso amim-pahatokiana azo avy amin’ny finoana sy fahamarinana, miandry amim-paharetana ireo valiny izay ho avy araka ny fomba sy ny fotoana eritreretin’ny Tompo fa mety indrindra. (Richard G. Scott, “The Power of a Strong Testimony,” Ensign, Nov. 2001, 88)

Nanazava izao ny Filoha Henry B. Eyring ao amin’ny Fiadidiana Voalohany:

Ny fijoroana ho vavolombelona dia mitaky fanolokoloana avy amin’ny alalan’ny vavaky ny finoana, sy faniriana hivoky amin’ny tenin’ Andriamanitra ao amin’ny soratra masina, ary fankatoavana ny fahamarinana izay voaraintsika. Mampidi-doza ny tsy firaharahiana ny vavaka. Mampidi-doza ny fijoroana ho vavolombelona ananantsika ny fandalinana sy famakiana ny soratra masina atao tsotsotra fotsiny. Singa mahavelona ho an’ny fijoroana ho vavalombelona ananantsika izy ireo. (Henry B. Eyring, “Fijoroana ho vavolombelona mitombo,” Liahona, mey 2011, 127)