Alma 34:1–17

Shlyerja e Pafundme dhe e Përjetshme e Jezu Krishtit

A e ke menduar ndonjëherë se si do të ishte jeta jote pa Jezu Krishtin dhe Shlyerjen e Tij? Amuleku u dha mësim zoramitëve se të gjithë njerëzit janë të ngurtësuar, të rënë dhe të humbur pa flijimin e pafundmë dhe të përjetshëm të Birit të Perëndisë. Ky mësim ka për qëllim të të ndihmojë ta kuptosh se si Jezu Krishti mund të të bekojë nëpërmjet flijimit të Tij shlyes të pafundmë dhe të përjetshëm.

Si do të ishte jeta ndryshe?

Si do të ishte jeta ndryshe pa …?

Mendo për disa mënyra se si mund t’i përgjigjesh kësaj pyetjeje lidhur me njerëzit ose gjërat ku ti mbështetesh. Për shembull, ti mund të mendosh rreth mënyrës se si jeta jote do të ishte ndryshe pa një person të veçantë, një pjesë të teknologjisë ose mjeteve që ti i përdor shpesh ose një veprimtari që ti e pëlqen.

Gjeje një çast për të krijuar një listë në ditarin tënd të studimit rreth disa prej mënyrave se si jeta jote do të ishte ndryshe pa Jezu Krishtin dhe Shlyerjen e Tij. Ndërsa studion sot, ti do të mësosh të vërteta që mund të të ndihmojnë më mirë ta kuptosh nevojën tënde për Jezu Krishtin.

Amuleku u dëshmon zoramitëve rreth Jezu Krishtit

Mund të të kujtohet se Alma dhe Amuleku predikuan mes zoramitëve, që besonin se “nuk do të ketë Krisht” (Alma 31:16). Pasi Alma i përfundoi mesazhet e tij të shënuara tek Alma 32–33, Amuleku dha dëshminë e tij për Shpëtimtarin.

Lexo tek Alma 34:1–10, duke kërkuar atë që Amuleku tregoi rreth Jezu Krishtit dhe Shlyerjes së Tij.

Alma 34:9–10 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

• Cilat fjalë ose fraza rreth Jezu Krishtit dhe Shlyerjes së Tij t’u dukën veçanërisht kuptimplota? Përse?

• Çfarë mësove nga këto vargje rreth arsyes përse ne kemi nevojë që Jezu Krishti të shlyejë për ne?

• Si do t’i përmblidhje mësimet e Amulekut tek Alma 34:8–10 si një pohim të vërtete?

Mund të kesh përcaktuar një të vërtetë të ngjashme me sa vijon: Pa Shlyerjen e pafundme dhe të përjetshme të Jezu Krishtit, i gjithë njerëzimi do të ishte i humbur përgjithmonë.

• Pse të gjithë njerëzit “do të mbaroj[n]ë patjetër” ose do të humbasin përgjithmonë pa Jezu Krishtin dhe Shlyerjen e Tij?

I pafundmë dhe i përjetshëm

Merre parasysh t’i shenjosh fjalët “i pafundmë dhe i përjetshëm” në fund të vargut 10 dhe ta kopjosh diagramin vijues në ditarin tënd të studimit:

• Çfarë mendon se do të thotë që Shlyerja e Jezu Krishtit është e pafundme dhe e përjetshme?

Presidenti Rasëll M. Nelson tregoi pikëpamjet vijuese:

“Shlyerja e Tij është e pafundme – pa mbarim. Ishte gjithashtu e pafundme në atë që i gjithë njerëzimi do të shpëtohej nga një vdekje pa mbarim. Ajo ishte e pafundme në kuptimin e vuajtjes së Tij të pamasë. … Ishte e pafundme në shtrirje – duhej të bëhej njëherësh për të gjithë. Dhe mëshira e Shlyerjes shtrihet jo vetëm te një numër i pafundmë njerëzish, por gjithashtu te një numër i pafundmë botësh të krijuara prej Tij. Ishte e pafundme përtej çfarëdo shkalle njerëzore matjeje apo kuptimi njerëzor.” (Russell M. Nelson, “The Atonement”, Ensign, nëntor 1996, f. 35)

• Çfarë të ndihmoi kjo thënie të mësosh ose ndiesh rreth Jezu Krishtit dhe flijimit të Tij shlyes?

Si lidhet kjo me ty?

Ndërkohë që Shpëtimtari mund të bekojë një numër të pafundmë njerëzish nëpërmjet Shlyerjes së Tij, Ai mund të të bekojë edhe ty vetë. Merre parasysh ta përditësosh diagramin në ditarin tënd të studimit që të duket si në vijim:

Studioji burimet vijuese, duke kërkuar disa nga mënyrat se si Shpëtimtari mund të të bekojë vetë për shkak të Shlyerjes së Tij të pafundme dhe të përjetshme.

• Alma 34:11–17

• 2 Nefi 9:10

• Doktrina e Besëlidhje 58:42

Presidenti Ted R. Kelister, ish‑President i Përgjithshëm i Shkollës të së Dielës, dha mësim:

“Me raste, kam takuar shenjtorë të mirë që kanë pasur vështirësi për ta falur veten, të cilët në mënyrë të pafajshme, por të gabuar, kanë vendosur kufizime në fuqitë shëlbuese të Shpëtimtarit. Padashur, ata e kanë kthyer një Shlyerje të pafundme në një Shlyerje të fundme, që në njëfarë mënyre nuk e prek mëkatin ose dobësinë e tyre të veçantë. Por ajo është një Shlyerje e pafundme sepse përfshin dhe përmban çdo mëkat e dobësi, si dhe çdo keqtrajtim apo dhembje të shkaktuar nga të tjerët.” (Ted R. Kelister, “Shlyerja e Jezu Krishtit”, Liahona, maj 2019, f. 85–86)

1. Përgjigjju për të paktën një prej pyetjeve vijuese:

   • Çfarë mësove rreth disa prej mënyrave se si Shpëtimtari mund të të bekojë ty vetë nëpërmjet Shlyerjes së Tij të pafundme dhe të përjetshme?

   • Si do të ishte jeta jote ndryshe pa Jezu Krishtin dhe Shlyerjen e Tij?

Fakultative: Dëshiron të Mësosh më Shumë?

Si mund të më bekojë Jezu Krishti vetë mua nëpërmjet Shlyerjes së Tij të pafundme dhe të përjetshme?

Plaku Majkëll Xhon U. Teh, i Të Shtatëdhjetëve, dha mësim:

“Shpeshherë e kemi më të lehtë të mendojmë e flasim për Shlyerjen e Krishtit në terma të përgjithshëm sesa ta pranojmë domethënien e saj vetjake në jetën tonë. Shlyerja e Jezu Krishtit është e pafundme, e përjetshme dhe gjithëpërfshirëse për nga gjerësia dhe thellësia e saj, por tërësisht vetjake dhe individuale për nga efektet e saj. Për shkak të flijimit të Tij shlyes, Shpëtimtari ka fuqinë të na pastrojë, të na shërojë e të na forcojë një e nga një.” (Majkëll Xhon U. Teh, “Shpëtimtari Ynë Vetjak”, Liahona, maj 2021, f. 99–100)

Si mund të më sigurojnë shpresë Jezu Krishti dhe Shlyerja e Tij?

Plaku Diter F. Uhtdorf, i Kuorumit të Dymbëdhjetë Apostujve, dha mësim:

“Shlyerja e pafundme e Shpëtimtarit e ndryshon plotësisht mënyrën se si mund t’i shohim shkeljet dhe papërsosurinë tonë. Në vend që të jetojmë me to dhe të ndihemi si pa shëlbim ose pa shpresë, ne mund të mësojmë prej tyre dhe të ndihemi plot shpresë. Dhurata pastruese e pendimit na lejon t’i lëmë pas mëkatet tona dhe të bëhemi një krijesë e re.

Për shkak të Jezu Krishtit, dështimet tona nuk kanë pse të na përkufizojnë. Ato mund të na përmirësojnë.” (Diter F. Uhtdorf, “Perëndia mes Nesh”, Liahona, maj 2021, f. 8)

Plaku Gerit W. Gong, i Kuorumit të Dymbëdhjetë Apostujve, dha mësim:

“Kur u ndiem, ose ndihemi, të pasigurt, të vetmuar, të acaruar, të zemëruar, të lënë në baltë, të zhgënjyer ose të veçuar nga Perëndia dhe Kisha e Tij e rivendosur, mund të kërkohet një shkallë më e madhe përpjekjesh dhe besimi për t’u futur sërish në shtegun e Tij të besëlidhjeve. Por ia vlen! Ju lutem ejani, ose ejani sërish, te Zoti Jezu Krisht! Dashuria e Perëndisë është më e fortë se zinxhirët e vdekjes – fizike ose shpirtërore. Shlyerja e Shpëtimtarit tonë është e pafundme dhe e përjetshme. Secili prej nesh shkon në udhë të gabuar dhe dështon. Për njëfarë kohe, ne mund ta humbasim udhën. Perëndia plot dashuri na siguron, pavarësisht se ku jemi ose çfarë kemi bërë, që nuk ka udhë pa kthim. Ai pret i gatshëm për të na përqafuar.” (Gerit W. Gong, “Zjarri Ynë i Kampit të Besimit”, Liahona, nëntor 2018, f. 41)