Alma 42, Pjesa 2

“Mëshira Kërkon të Penduarin”

Për ta ndihmuar birin e tij, Koriantonin, të pendohej, Alma i dha mësim atij rreth drejtësisë dhe mëshirës së Perëndisë dhe se si “askush, përveç të penduarve të vërtetë, nuk shpëton” (Alma 42:24). Kur e kuptojmë planin e mëshirës të Atit Qiellor, ne jemi më të prirur të pendohemi. Ky mësim mund të të ndihmojë të kuptosh se si Shlyerja e Jezu Krishtit të lejon ta marrësh mëshirën e premtuar në planin e Atit Qiellor.

Ligji zbaton ndëshkimin

• Cilat janë disa rrethana në të cilat drejtësia është e dëshirueshme? Po mëshira?

Ne jemi të gjithë të bekuar për shkak se Ati Qiellor është edhe i drejtë, edhe i mëshirshëm. Për shkak të planit të Atit Qiellor, ne të gjithë do të kthehemi në praninë e Perëndisë për t’u gjykuar (shih tek Alma 42:23). Në gjendjen e tij mëkatare, Koriantoni nuk ishte i përgatitur për gjykim. Alma shpresonte se duke i mësuar Koriantonit rreth planit të Atit Qiellor, ajo do ta shtynte Koriantonin të pendohej dhe t’i shërbente Perëndisë. Ndërsa studion kapitullin tek Alma 42, kërko se çfarë e mësoi Alma Koriantonit se mund të bënte për të marrë mëshirën e Perëndisë.

Ashtu si ligjet luajnë një rol të rëndësishëm në shoqëri, ato janë një pjesë thelbësore e planit të Atit Qiellor.

Lexo tek Alma 42:17–21, duke kërkuar disa nga qëllimet e ligjit në planin e Atit Qiellor (shih edhe te 2 Nefi 2:13).

• Çfarë mësove rreth ligjit në planin e Atit Qiellor?

Vizatoje një peshore të ngjashme me atë në vijim në ditarin tënd të studimit.

Emërtoje peshoren “Drejtësia”.

Sipas ligjit të drejtësisë, ne përballemi me pasoja për veprimet tona. Ne marrim bekime kur i bindemi ligjit dhe ndëshkim kur e shkelim ligjin.

Emërtoje njërën anë të peshores “shkelja e ligjit” dhe anën tjetër “ndëshkimi i mbajtur nga mëkatari”.

Nëse e shkelim një ligj, peshorja e humbet ekuilibrin. Drejtësia kërkon që peshorja të jetë e ekuilibruar. Nevojitet një pagesë (ose ndëshkim) që të ekuilibrohet peshorja (shih tek Alma 42:22).

• Çfarë do të na ndodhte nëse peshorja e drejtësisë do të mund të ekuilibrohej vetëm nga ndëshkimi ynë?

Ndëshkimi për mëkatin është vdekja shpirtërore, “përjasht[imi] nga prania e Zotit” (Alma 42:11).

Mëshira kërkon ata që pendohen

Për shkak se Perëndia është “një Perëndi i përsosur, i drejtë dhe gjithashtu një Perëndi i mëshirshëm” (Alma 42:15), Ai përgatiti një plan që ne të mund të marrim mëshirë kur mëkatojmë.

Lexo tek Alma 42:15, 22–25, duke kërkuar atë që siguroi plani i Atit Qiellor për ta ekuilibruar peshoren e drejtësisë.

Vëri kryqin ose fshije fjalën mëkatari nga peshorja e drejtësisë dhe zëvendësoje atë me Shpëtimtari.

1. Përgjigju për pyetjet vijuese:

   • Si do ta shpjegoje diagramin e peshores së drejtësisë me fjalët e tua?

   • Çfarë bëri Jezu Krishti që të jepej mëshirë? (Shih te Doktrina e Besëlidhje 19:16–19.)

   • Çfarë kërkohet nga ne për të marrë mëshirën e Shpëtimtarit? (Shih tek Alma 12:32–34; 34:15–16.)

Një parim që mësojmë është se nëse jemi me të vërtetë të penduar, ne do të marrim mëshirë nëpërmjet Shlyerjes së Shpëtimtarit.

I penduar do të thotë të jesh i përulur dhe të shprehësh pikëllim për mëkatin (shih te 2 Korintasve 7:10; 2 Nefi 2:7; Mosia 4:10)

2. Përgjigju për pyetjen vijuese:

   • Si mendon, pse shpëtohen vetëm të penduarit me të vërtetë?

Përfytyro sikur je Koriantoni dhe nuk je penduar ende për të gjitha mëkatet e tua. Lexo tek Alma 42:26–30, duke kërkuar fjalë ose fraza që do të të jepnin shtysë të pendoheshe.

• Cilat fjalë ose fraza mund të të japin shtysë të pendohesh? Përse?

Pasi i dha mësim Koriantonit rreth planit të Atit Qiellor (shih tek Alma 40–42), Alma i kujtoi Koriantonit se ai ishte “thirrur nga Perëndia të predikonte fjalën” që të “s[illte] shpirtra në pendim” (Alma 42:31). Koriantoni u pendua për mëkatet e tij dhe e përmbushi thirrjen e tij (shih tek Alma 49:30).

Reflekto për nevojën tënde për t’u penduar dhe mendo për mënyrën se si mund të jesh me të vërtetë i penduar. Mbaje mend se Ati Qiellor do të të falë kur pendohesh (shih te Mosia 26:30; Isaia 1:18).

3. Plotësoje sa vijon:

   Shkruaj tri ose katër fjali që e shpjegojnë rolin e Shlyerjes së Jezu Krishtit në planin e Atit Qiellor. Përfshiji rolet e drejtësisë dhe të mëshirës dhe atë që duhet të bëjmë për të marrë mëshirë. Mbaje shënim çdo ndjenjë që dëshiron të shprehësh rreth Shpëtimtarit.

Fakultative: Dëshiron të Mësosh më Shumë?

Çfarë do të thotë të jesh me të vërtetë i penduar?

Plaku D. Tod Kristoferson, i Kuorumit të Dymbëdhjetë Apostujve, dha mësim:

“Për t’u klasifikuar mes të penduarve me të vërtetë, veprat rastësore të bindjes nuk do të jenë të mjaftueshme. Ne duhet të hyjmë në mënyrën e duhur në besëlidhje dhe të ngulojmë për t’i mbajtur ato deri në pikën që pritshmëria jonë për shpëtimin të pohohet nga Shpirti i Shenjtë i Premtimit (shih te DeB 132:7, 19).” (D. Todd Christofferson, “Justification and Sanctification”, Ensign, qershor 2001, f. 24)

A mund të paguaj për mëkatet e mia dhe të shpëtohem?

Plaku Brus C. Heifën, i Të Shtatëdhjetëve, shpjegoi:

“Mëshira dhe pendimi janë riaftësuese, jo ndëshkuese. Shpëtimtari na kërkon të pendohemi jo vetëm për ta shpaguar Atë që pagoi borxhin tonë ndaj drejtësisë, por për të na shtyrë gjithashtu që t’i nënshtrohemi zhvillimit vetjak që do të pastrojë vetë natyrën tonë. ‘Njeriu i natyrshëm’ do të mbetet një armik ndaj Perëndisë përgjithmonë – edhe pasi të paguajë për mëkatet e veta – vetëm nëse ai gjithashtu ‘bëhet një shenjtor nëpërmjet shlyerjes së Krishtit Zot’ (Mosia 3:19).” (Bruce C. Hafen, “Beauty for Ashes: The Atonement of Jesus Christ”, Ensign, prill 1990, f. 9)

Çfarë ofron Jezu Krishti si Ndërmjetësi ynë?

Plaku D. Tod Kristoferson, i Kuorumit të Dymbëdhjetë Apostujve, dha mësim:

“Meqë Shpëtimtari pagoi për mëkatet tona dhe e përmbushi drejtësinë për ne, ne bëhemi borxhlinj ndaj Tij dhe jo ndaj drejtësisë. Prandaj, ne duhet t’i plotësojmë kushtet që ka vendosur Ai për falje dhe pastrim. Përndryshe, Ai e tërheq ndërmjetësimin e Tij të ofruar dhe ne mbetemi të vetëm për t’u përballur me kërkesat e drejtësisë, duke mos i pasur mjetet për t’u bërë të pastër. Duhet të zgjedhim Krishtin për të marrë atë që Krishti ofron.” (D. Todd Christofferson, “Justification and Sanctification”, Ensign, qershor 2001, f. 23)

Cila është marrëdhënia ndërmjet dashurisë së Perëndisë dhe ligjit të Tij?

Presidenti Dallin H. Ouks, i Presidencës së Parë, dha mësim:

“Dashuria e Perëndisë nuk i zëvendëson ligjet e Tij e urdhërimet e Tij dhe rezultati i ligjeve e urdhërimeve të Perëndisë nuk e zvogëlon qëllimin dhe efektin e dashurisë së Tij. …

Disa duket ta vlerësojnë dashurinë e Perëndisë për shkak të shpresës së tyre se dashuria e Tij është aq e madhe dhe e pakushtëzuar, sa do t’i shfajësojë mëshirshëm nga mosbindja e tyre ndaj ligjeve të Tij. Në të kundërt, ata që e kuptojnë planin e Perëndisë për fëmijët e Tij, e dinë se ligjet e Perëndisë janë të pandryshueshme, gjë që është një tjetër provë e madhe e dashurisë së Tij për fëmijët e Tij. Mëshira s’mund ta grabitë drejtësinë dhe ata që marrin mëshirë janë ‘ata që e kanë ruajtur besëlidhjen dhe e kanë mbajtur urdhërimin’ (DeB 54:6).” (Dallin H. Ouks, “Dashuria dhe Ligji”, Liahona, nëntor 2009, f. 26, 27)