3 Nefia 6–7

Mitarika mankamin’ny fizarazarana sy ny faharavana ny avonavona

Efa nahatsikaritra ve ianao fa na dia aorian’ny zavatra mahafinaritra iainana miaraka amin’ Andriamanitra aza, dia miala Aminy ny olona sasany any aoriana? Taorian’ny niarovan’ Andriamanitra ny Nefita tamin’ny jirik’i Gadiantôna dia niverina nody izy ireo ary nanomboka nanorina indray ny fiainan’izy ireo. Tamin’ny alalan’ny avonavona sy ny fizarazarana no nitarihan’i Satana ny olona hikomy tamin’ Andriamanitra. Tena goavana ny vokatr’izany ka nirodana ny fitondram-panjakana ary voazara ho foko ny olona. Ity lesona ity dia afaka manampy anao hahatakatra tsara kokoa ny vokatry ny avonavona sy ny fomba handresena izany amin’ny alalan’ny fanarahana ny Mpamonjy.

• Moa ve ny olona iray afaka ny ho:

• Mpanankarena sady manetry tena?

• Mahantra sady miavonavona?

• Manam-pahalalàna sady manetry tena?

• Tsy manam-pahalalàna sady miavonavona?

Eritrereto ny zavatra mitarika ny olona sasany ho mpiavonavona amin’izao androntsika izao. Inona no fiantraikan’’ny fiavonavonana eo aminao sy ny hafa ary ny fiarahamonina? Rehefa mandalina ianao, dia saintsaino ny fomba mety hahafahan’ity lesona ity mihatra amin’ny fiainanao sy ny toe-javatra iainanao.

Ny fakam-panahy mitohin’i Satana

Rehefa avy nandresy an’i Gidiania sy ny jirik’i Gadiantôna tamin’ny fanampian’ny Tompo ny Nefita, dia “nasiany farany … ireo tsikombakomba ratsy sy miafina ary vetaveta rehetra” (3 Nefia 5:6). Niverina tany amin’ny tranony izy ireo ary nanomboka nanorina indray ny fiainan’izy ireo. Saingy niasa mandrakariva mba hamitaka ny olona hanaraka azy i Satana. Tao anatina fotoana fohy dia niova ny Nefita. Ao amin’ny 3 Nefia 6–7, i Môrmôna dia nanampy antsika hahatakatra ny zavatra nataon’ny olona izay nahatonga ny maro tamin’izy ireo ho faty tao anatin’ny famongorana izay nialoha ny fahatongavan’ny Mpamonjy tao Amerika tamin’ny farany (jereo ny 3 Nefia 8). Ireo fampianarana ireo ihany koa dia manazava ny antony nahavonona ny hafa tamin’ny fisehoan’i Kristy tao amin’ny tempoly tao amin’ny tanin’i Soafeno (jereo ny 3 Nefia 11).

Manaova tabilao mitovy amin’ity manaraka ity. Vakio ireo andalan-tsoratra masina ary fenoy ny zavatra ianaranao momba ny toe-javatra misy ny olona.

Ny faha-26 taona (3 Nefia 6:4–9)	Ny faha-29 taona (3 Nefia 6:10–18)
Ny faha-26 taona (3 Nefia 6:4–9)	Ny faha-29 taona (3 Nefia 6:10–18)

• Inona no nahatonga ilay fiovana tao anatin’ny fotoana fohy toy izany?

• Inona avy no fahamarinana azontsika ianarana avy amin’ireo ohatra ireo?

Fahamarinana iray mety ho hitanao ny hoe rehefa miavonavona isika, dia manome fahefana lehibe kokoa an’i Satana haka fanahy antsika sy hitarika antsika amin’ny faharatsiana.

Eritrereto ny dikan’ny hoe miavonavona. Mitadiava hevi-baovao ato amin’ity teny nambaran’ny Filoha Ezra Taft Benson (1899–1994) manaraka ity.

Ny tena fototry ny avonavona dia ny fandrafiana— fandrafiana an’Andriamanitra sy fandrafiana ny mpiara-belona amintsika. Ny Fandrafiana dia midika hoe “fankahalana an’i, tsy fitiavana an’i, na fanoherana.” Io no hery tian’i Satana hanjakana amintsika. (Ezra Taft Benson, “Beware of Pride,” Ensign, May 1989, 4)

• Nahoana, araka ny eritreritrao, no mamela an’i Satana hanana hery mitarika lehibe kokoa eo amintsika ny fiavonavonana?

• Inona no maha-samy hafa an’izany amin’ny fomba ampaherezan’ny Ray any An-danitra sy i Jesoa Kristy antsika?

Vokatry ny avonavona tamin’izany sy amin’izao

Noho ny avonavon’ny olona dia nanomboka voakasik’izany ny ampahany rehetra teo amin’ny fiarahamonina. Vakio ny 3 Nefia 6:20–30 na ny 7:1–14, hitadiavana ohatra amin’ny fomba niantraikan’ny avonavona tamin’ny isam-batan’olona sy ny fiarahamonina.

1. Valio ireto fanontaniana manaraka ireto:

• Inona avy no ohatra amin’ny vokatry ny avonavona hitanao tao amin’ireo andininy ireo?

• Amin’ny fomba ahoana no ampiasan’i Satana ny avonavona hitarihana ny olona ho amin’ny faharatsiana amin’izao androntsika izao?

Mandresy ny avonavona

Eritrereto ny fomba iantraikan’ny avonavonao na ny avonavon’ny hafa aminao sy ny fomba azonao handresena ny avonavona sy ny vokany.

Na dia nahatonga faharavana be aza ny avonavona, dia nihaino ny tenin’ny mpaminany ny olona sasany ary nanohy nanara-dia ny Mpamonjy.

Vakio ny 3 Nefia 7:15–26 hitadiavana ny zavatra nampianarin’i Nefia ny olona sy ny fiantraikan’izany tamin’izy ireo. Mety hanampy raha asiana marika ny fotoana tsirairay anononana ny Mpamonjy.

2. Valio ity fanontaniana manaraka ity:

• Inona avy no ohatra hitanao tao amin’ireo andininy ireo momba ny fomba nanampian’ny Mpamonjy sy ny filazantsarany ny olona sasany handresy ny avonavona sy ny faharatsiana?

Ity rafi-tantara manaraka ity dia afaka manampy anao haneho ny fahalalana anananao momba ny fiantraikan’ny avonavona sy ny fomba ahafahan’ny fanarahana an’i Jesoa Kristy manampy amin’ny fandresena ny avonavona.

I Jim io. Tsy mbola fantany fa manana olana amina resaka avonavona izy.

3. Valio ireto fanontaniana manaraka ireto:

• Inona no porofo andrasanao ho hita eo amin’ny fiainan’i Jim fa manana olana amina resaka avonavona izy?

Rehefa tonga saina ny amin’ny olana ananany izy ary miaiky fa vokatry ny avonavony ny maro tokoa amin’ireo fahasorenana lehibe indrindra eo amin’ny fiainany, dia te hahazo valiny mikasika ny fomba ialana amin’ny avonavona izy.

• Inona avy no vahaolana harosonao mba hanampiana an’i Jim handresy ny avonavona?

Tsy voatery atao: Te hianatra bebe kokoa ve ianao?

Ahoana no ahitantsika ny avonavona sy ny fizarazarana amin’izao androntsika izao?

Nanazava toy izao ny Loholona Quentin L. Cook ao amin’ny Kôlejin’ny Apôstôly Roambinifolo:

Amin’izao androntsika izao dia lehibe loatra ny tsy firaharahiana ilay didy hoe tokony hiray hina ao amin’ny soratra masina, ary ho an’olona maro dia ny fanavakavahana saranga no hifantohana, izay matetika mifototra amin’ny toerana misy anao eo amin’ny fiarahamonina, ny maha lahy na vavy, ny volon-koditra, ary ny harena. Any amin’ny firenena maro, ary saika na aiza na aiza mihitsy, dia mizarazara be ny olona raha ny amin’ny tokony ho fomba fiainana. Ao amin’ny Fiangonan’ny Tompo, ny hany kolontsaina arahintsika ary ampianarintsika dia ny kolontsainan’ny filazantsaran’i Jesoa Kristy. Ny firaisankina katsahintsika dia ny mba hiray amin’ny Mpamonjy sy ireo fampianarany. …

… Nataon’ny Bokin’i Môrmôna mazava tsara fa tsy tokony hisy karazana -ita, na foko, na saranga. Tsy maintsy miray hina isika sy manan-jo mitovy eo anatrehan’Andriamanitra. (Quentin L. Cook, “Miomàna hihaona amin’ Andriamanitra,” Liahona, mey 2018, 116)

Inona avy no famantarana vitsivitsy manondro ny fisian’ny avonavona?

Nilaza toy izao ny Loholona Gary E. Stevenson ao amin’ny Kôlejin’ny Apôstôly Roambinifolo:

Rehefa mieboebo isika dia miezaka maka ny voninahitra ho eo amintsika fa tsy manome izany an’ny hafa, anisan’izany ny Tompo. Ny fieboeboana matetika dia fifaninanana; fironana mikatsaka ny hanana kokoa sy hieritreritra ny tenantsika ho tsaratsara kokoa noho ny hafa. Matetika ny fieboeboana dia miteraka fahatezerana sy fankahalana. Mahatonga ny olona hitana lolompo na tsy hamela heloka izany. (Loholona Gary E. Stevenson, “Fanakona-masoandro ara-panahy,” Liahona, nôv. 2017, 47)

Ahoana no maha-manan-danja ireo zava-niseho ao amin’ny Bokin’i Môrmôna amin’izao androntsika izao?

Ny Filoha Ezra Taft Benson (1899–1994) dia nampitaha ireo zava-niseho ao amin’ny Bokin’i Môrmôna amin’izao androntsika izao rehefa nilaza hoe:

Ao amin’ ny Bokin’ i Môrmôna dia mahita lamina entina hiomanana amin’ ny Fiaviana Fanindroany isika. Misy ampahany lehibe ao amin’ny boky mifantoka amin’ny am-polo taona vitsivitsy talohan’ny nahatongavan’i Kristy tany Amerika. Amin’ny alalan’ny fandalinana tsara izany fotoana izany dia afaka mamantatra ny antony naharingana ny olona sasantsasany tao anatin’ny fitsarana mahatsiravina isika izay nialoha ny Fiaviany sy ny antony nahatonga ireo olona hafa nijoro teo amin’ny tempoly teo amin’ny tanin’i Soafeno sy nikasika tamin’ny tànany ny ratra teo amin’ny Tanany sy ny Tongony. (Ezra Taft Benson, “Ny Bokin’i Môrmôna—Vato ifaharan’ny fivavahantsika,” Liahona, ôktôbra 2011)