Tombano ny fianaranao 7

Almà 53–3 Nefia 7

Ny fisaintsainana sy fanombanana ny fianaranao ara-panahy dia afaka manampy anao hanakaiky kokoa ny Mpamonjy. Ity lesona ity dia afaka manampy anao hahatsiaro sy hanombana ny fomba nanampian’ny zavatra tsapanao tamin’ny Almà 53–3 Nefia 7 anao hitombo ara-panahy.

Ny maha zava-dehibe ny fahatsiarovana

Ny Filoha Spencer W. Kimball dia nampianatra fa mety ho ny hoe mahatsiaro no teny manan-danja indrindra ao amin’ny rakibolana. (Jereo ny “Circles of Exaltation” [address to Church Educational System religious educators, June 28, 1968], 5.)

• Nahoana, araka ny eritreritrao, no nilaza ny zavatra nataony momba ny teny hoe mahatsiaro ny Filoha Kimball?

• Inona no lesona vitsivitsy nianaranao avy amin’ny Almà 53–3 Nefia 7 ka hanan-danja aminao ny fahatsiarovana azy? Nahoana?

Mety ho tsaroanao fa i Helamàna dia namporisika an’i Nefia sy i Lehia zanany lahy hahatsiaro lesona sy olona manan-danja (jereo ny Helamàna 5:4–14). Mitovitovy amin’izany, ity lesona ity dia natao hanampiana anao hahatsiaro ireo fahamarinana nianaranao sy ireo fanoloran-tena nataonao tao anatin’ireo herinandro lasa.

Hazavao ny anjara asan’ny mpaminany

Alaovy sary an-tsaina hoe ianao dia mahatsapa ho entanim-panahy hanasa namana iray hijery fihaonamben’ny Fiangonana maneran-tany miaraka aminao. Eo am-piomananao am-bavaka hanao izay nolazain’io bitsika io dia manapa-kevitra ianao ny hanazava amin’ny namanao hoe inona izany mpaminany izany ary nahoana ianao no mientanentana hihaino azy. Tsaroanao fa ianao dia efa nianatra mombana mpaminany lehibe sasantsasany ao amin’ny Bokin’i Môrmôna izay afaka manampy anao hanazava ny anjara asan’ny mpaminany amin’ny namanao.

Fanteno ilay tantaran’i Nefia (Helamàna 7–11) na ny an’i Samoela ilay Lamanita (Helamàna 13–15). Avereno jerena ao amin’ireo toko mifandray amin’izany ny tantaran’izy ireo, amin’ny alalan’ny famakiana haingana ireo andininy sy ny fijerena ireo sasin-tenin’ny toko na ireo fanamarihana izay mety ho nataonao tao amin’ny diary fandalinanao.

1. Valio ireto fanontaniana manaraka ireto:

• Ahoana no ahafahanao mampiasa io tantara io mba hanazavana ny anjara asan’ny mpaminany amin’ny namanao?

• Inona avy ireo andininy avy ao amin’ny soratra masina mety hampidirinao ao anatin’ny fanazavanao?

• Inona avy no fahamarinana fanampiny na zavatra niainana manokana azonao zaraina mba hanampiana ny namanao hahatakatra ny maha-zava-dehibe ny mpaminany?

Tombano ny toe-tsainao sy fanirianao

Rehefa mijery io kisary io ianao, dia mety hahatsiaro ny porofon’ny fitamberimberenan’avonavona manerana ny Helamàna 1–16 sy ny 3 Nefia 1–7. Mety hahafantatra ohatra hitanao teo amin’ny fiainanao manokana na teo amin’ny tontolo manodidina anao ihany koa ianao.

Rehefa nandalina ny Helamàna 11–12 ianao, dia mety ho efa nanombana ny ezaka nataonao mba hanetry tena. Mety ho efa nirakitra an-tsoratra ny fanoloran-tena iray tao amin’ny diary fandalinanao koa ianao mba hitomboan’ny fanetren-tena anananao sy handresena ny avonavona. Avereno jerena ny zavatra nosoratanao ary saintsaino ny fomba nahavitanao izany fanoloran-tena izany. Saintsaino ireto fanontaniana manaraka ireto ary raketo an-tsoratra ao amin’ny diarinao ny valinteninao.

• Inona no nataonao tao anatin’ireo herinandro farany mba hahatsiarovana ny Tompo sy ny zavatra rehetra nataony ho anao? Toy ny ahoana no halehiben’ny fahatsapanao fa nanampy anao hijanona ho manetry tena ny fahatsiarovana ny Tompo?

• Misy fanovana tianao hatao ve mba hanampiana anao hahatsiaro ny Tompo isan’andro sy hanana fanetren-tena misimisy kokoa?

Misaintsaina drafitra hanorenana ny fototrao amin’i Jesoa Kristy

Tao amin’ireo lesona farany ianao dia nandalina tantara maro mombana olona izay nandresy ireo fanakianana mafy natao momba ny fiainan’izy ireo, ny fivavahan’izy ireo, ary ny fijoroana ho vavolombelona ananan’izy ireo momba an’i Jesoa Kristy. Teo am-pandalinana dia mety nanao fanoloran-tena ianao mba hanampy anao hanorina fototra matanjaka kokoa eo amin’i Jesoa Kristy mba hanoherana ny fanafihan’i Satana.

Makà minitra vitsy hamerenana mijery ny iray na mihoatra izany amin’ireto tantara manaraka ireto:

I Lehôntia sy i Amalikià (Almà 47:10–18)

Ny Kapiteny Môrônia nanangana toerana mimanda (Almà 50:1–6)

Ny torohevitr’i Helamàna tamin’ireo zanany lahy (Helamàna 5:12)

• Inona avy ireo lesona vitsivitsy azontsika ianarana avy amin’ireo tantara ireo ka afaka manampy antsika hanohitra fakam-panahy?

Saintsaino ireo tanjona napetrakao vao haingana mba hanorenana ny fototrao amin’i Jesoa Kristy.

2. Valio ireto fanontaniana manaraka ireto:

• Inona avy no fahombiazana niainanao tamin’ny ezaka nataonao mba hanorina ny fototrao amin’i Jesoa Kristy?

• Inona avy no sakana hitanao tamin’ny fanorenana fototra matanjaka? Ahoana no niezahanao nandresy izany?

• Inona no fitahiana azonao noho ny fiezahanao nanorina ny fototrao tamin’i Jesoa Kristy? Nanova inona ho anao izany?

Vakio indray ny Helamàna 5:12 ary eritrereto ombam-bavaka raha misy zavatra tokony hatombokao, hajanonao, na hotohizanao hatao mba hanorenana fototra matanjaka kokoa eo amin’i Jesoa Kristy. Raha tsapanao fa mila manitsy izay mety ho tanjona napetrakao ianao, dia mety ho azonao atao ny manoratra izany ao amin’ny diary fandalinanao na amin’ny toerana hafa izay ahafahanao misaintsaina izany tsy tapaka.