Մորոնի 2–3

Քահանայության իշխանություն

Աստծո կողմից տրված իրական քահանայության իշխանությունը կարևոր է Փրկչի Եկեղեցում: Ապագա սերունդներին ուղղված իր վերջին խոսքերում Մորոնին ուսուցանել է քահանայության արարողությունները կատարելու իշխանության մասին: Դրանով նա պահպանեց կարևոր ճշմարտություններ այն մասին, թե ինչպես է օգտագործվում քահանայությունը: Այս դասը կօգնի ձեզ հասկանալ քահանայության իշխանությունը Փրկչի Եկեղեցում:

Երբևէ կորցրե՞լ եք որևէ բան, որը կարևոր էր ձեզ համար: Մեծ ուրացության ժամանակ շատ պարզ և արժեքավոր ճշմարտություններ կորսվեցին (տես 1 Նեփի 13.26–29, 32): Մորմոնի Գիրքն օգնում է վերականգնել կորսված բազմաթիվ ճշմարտություններ:

«Արժեք»

Մորոնին իր տնտեսության քահանայություն վերջին կրողներից էր Ամերիկա մայրցամաքում: Նա գիտեր, որ իր մահից հետո Փրկչի Եկեղեցու և Նրա քահանայության իշխանության մասին կարևոր գիտելիքները կկորսվեն: Իր վերջին խոսքերում Մորոնին գրեց այն, ինչն իր կարծիքով կարող էր «արժեքավոր լինել» ապագա սերունդների համար (Մորոնի 1.4): Նա գրել է քահանայության իշխանության և արարողությունների մասին, որոնք հասանելի են միայն Փրկչի Եկեղեցում:

Երբ հարություն առած Փրկիչն այցելեց նեփիացիներին, «նա իր ձեռքով դիպավ իր ընտրած աշակերտներին» և «նրանց Սուրբ Հոգու պարգևը շնորհելու զորություն տվեց» (3 Նեփի 18.36–37): Մորոնին իր հիշատակարանում ներառեց տասներկու նեփիացի աշակերտներին ուղղված Փրկչի ցուցումներն այն մասին, թե ինչպես շնորհել Սուրբ Հոգու պարգևը:

Սուրբ Հոգու պարգևը շնորհելու իշխանություն

Կարդացեք Մորոնի 2.1–3 հատվածները՝ փնտրելով, թե ինչ արժեքավոր բան է ուսուցանել Մորոնին:

• Ի՞նչ գտաք այս հատվածներում, որն ըստ ձեզ արժեքավոր է:

• Ըստ ձեր իմացածի, քահանայության ինչպիսի՞ իշխանություն է անհրաժեշտ՝ Սուրբ Հոգու պարգևը շնորհելու համար:

• Ի՞նչ ճշմարտություններ կարող ենք սովորել Մորոնի 2 գլխից։

Ճշմարտություններից մեկն այն է, որ Մելքիսեդեկյան քահանայություն կրողները Սուրբ Հոգու պարգևը Եկեղեցու մկրտված անդամներին շնորհում են ձեռնադրումով։

1. Պատասխանեք հետևյալ հարցերից առնվազն երկուսին.

   • Ըստ ձեզ, ինչո՞ւ է Սուրբ Հոգու շնորհումն այդքան կարևոր: (Դա ցույց տվող պատմությունը կարող եք կարդալ Գործք Առաքելոց 8.14–24 հատվածներում):

   • Իմացությունը, որ Սուրբ Հոգու պարգևը շնորհելու իշխանությունը գալիս է Փրկչից, ինչպե՞ս կարող է ազդել այս պարգևի վերաբերյալ ձեր զգացմունքների վրա:

   • Սուրբ Հոգու պարգևն ինչպե՞ս է օրհնել ձեր կյանքը։

Կարգել մարդկանց քահանայության պաշտոններում

Այնուհետև Մորոնին բացատրեց, թե ինչպես կարգել քահանաներին և ուսուցիչներին:

Կարդացեք Մորոնի 3.1–4 հատվածները՝ փնտրելով, թե մարդիկ ինչպես են կարգվում քահանայության պաշտոններում:

• Ի՞նչ նկատեցիք քահանայության պաշտոններում մարդկանց կարգման վերաբերյալ։

Թեև Մորոնին 3 գլխում հատուկ նշվում է քահանայության պաշտոնների և ուսուցիչների կարգման մասին, իշխանությունը վերաբերում է նաև բոլոր նրանց, ովքեր կոչումներ ունեն Փրկչի Եկեղեցում:

• Ինչո՞ւ է անհրաժեշտ, որ Փրկչի Եկեղեցում ծառայող մարդիկ ունենան Նրա իշխանությունը:

Քահանայության իշխանությունը գալիս է Հիսուս Քրիստոսից: Բոլոր նրանք, ովքեր կոչումներ ունեն Եկեղեցում, ունեն քահանայության իշխանություն, և նրանք, ովքեր կարգվել են Ահարոնյան կամ Մելքիսեդեկյան քահանայության պաշտոններում, ունեն քահանայության իշխանության գիծ: Այս գիծը հետագծում է քահանայություն կրողի իշխանությունը մինչև Հիսուս Քրիստոսը: Մելքիսեդեկյան քահանայություն կրողներն իրենց իշխանության գծի գրառման վերաբերյալ կարող են հարցում կատարել ChurchofJesusChrist.org կայքում։ Եկեղեցին Ահարոնյան քահանայություն կրողների համար իշխանության գծերի գրառումներ չի տրամադրում: Այնուամենայնիվ, եթե Ահարոնյան քահանայություն կրողը ձեռնադրվել է Մելքիսեդեկյան քահանայություն կրողի կողմից, նա կարող է իմանալ իրեն կարգած մարդու իշխանության գծի մասին:

Տասներկու Առաքյալների Քվորումից երեց Ջեֆրի Ռ. Հոլլանդը բացատրել է.

Աստվածային իշխանությամբ գործելը պահանջում է ավելին, քան պարզապես հասարակական համաձայնագիր: Այն չի կարող առաջանալ աստվածաբանական ուսուցումից կամ համայնքի կողմից լիազորությամբ: Ոչ, Աստծո լիազորված աշխատանքում պետք է լինի ավելի մեծ զորություն, քան այն, ինչ ունեն մարդիկ եկեղեցու նստատեղերում կամ փողոցներում կամ սեմինարիաներում՝ մի փաստ, որը շատ ազնիվ կրոնական հետազոտողներ գիտեին և բացեիբաց ընդունում էին սերունդների ընթացքում, որը հանգեցրեց Վերականգնմանը: …

… [Եկեղեցում յուրաքանչյուր քահանայություն կրողի քահանայության իշխանության գիծը] շարունակական շղթայով ձգվում է դեպի հրեշտակային սպասավորներ, որոնք եկել են Աստծո Որդու կողմից՝ կրելով այս անզուգական պարգևը երկնքից: (Ջեֆրի Ռ. Հոլլանդ, «“Our Most Distinguishing Feature», Լիահոնա, մայիս 2005 թ․, 44)

2. Պատասխանեք հետևյալ հարցերին.

   • Ինչո՞ւ է կարևոր, որ քահանայության իշխանությունը կարող է հետագծվել մինչև Հիսուս Քրիստոսը:

   • Հիսուս Քրիստոսի հետ այս կապի մասին իմանալն ինչպե՞ս կարող է ազդել քահանայության միջոցով ձեր ստացած արարողությունների, կոչումների կամ օրհնությունների վերաբերյալ ձեր զգացողության վրա։

Կիսվեք ձեր սովորածով

3. Կատարեք հետևյալը․

   Պատկերացրեք, որ ձեր ընտանիքի անդամը պատրաստվում է մկրտվել և հաստատվել, կարգվել քահանայության կամ ձեռնադրվել կոչման համար: Ինչո՞վ կարող եք կիսվել նրա հետ Մորոնի 2 կամ 3 գլուխներից, որպեսզի օգնեք հասկանալ իրադարձության նշանակությունը:

Ընտրովի. Ցանկանո՞ւմ եք ավելին իմանալ

Ի՞նչ է անում քահանայությունը մեզ համար։

Նախկինում Առաջին նախագահությունից նախագահ Դիտեր Ֆ․ Ուխդորֆն ասել է.

Բոլորս գիտենք, որ քահանայությունը ոչ թե անուն է կամ կոչում, այլ շատ ավելին է: Մարգարե Ջոզեֆ Սմիթն ուսուցանել է. «Քահանայությունը հավիտենական սկզբունք է և գոյություն է ունեցել Աստծո հետ հավերժությունից … մինչև հավերժություն, առանց օրերի սկզբի կամ տարիների վերջի» [Եկեղեցու նախագահների ուսմունքները. Ջոզեֆ Սմիթ (2007), 104]։ Այն կրում է «նույնիսկ Աստծո գիտության բանալիները» [Վարդապետություն և Ուխտեր 84․19]։ Իրականում, քահանայության միջոցով «բացահայտվում է աստվածայնության զորությունը» [Վարդապետություն և Ուխտեր 84․20]։

Քահանայության օրհնությունները մեր հասկացողության սահմաններից դուրս են: Մելքիսեդեկյան քահանայություն հավատարիմ կրողները կարող են «դառնալ … ընտրյալներն Աստծո» [Վարդապետություն և Ուխտեր 84․34]։ Նրանք «Հոգու միջոցով սրբագործվում են՝ ի նորացումն իրենց մարմինների» [Վարդապետություն և Ուխտեր 84․33], և, ի վերջո, կարող են ստանալ «այն ամենն, ինչ Հայրն ունի» [Վարդապետություն և Ուխտեր 84․38]։ Գուցե դժվար լինի ըմբռնել, սակայն դա գեղեցիկ է, և ես վկայում եմ, որ դա ճշմարիտ է: (Դիտեր Ֆ. Ուխդորֆ, «Ձեր ներուժը՝ ձեր արտոնությունը», Լիահոնա, մայիս 2011 թ., 58)

Ո՞վ կարող է զգալ քահանայության օրհնությունները:

Առաջին Նախագահությունից նախագահ Դալլին Հ. Օուքսը նշել է.

Ի տարբերություն քահանայության բանալիների և քահանայության արարողությունների, քահանայության օրհնությունները նույն պայմաններով հասանելի են և տղամարդկանց, և կանանց։ Սուրբ Հոգու պարգևը և տաճարի օրհնություններն այդ ճշմարտության հայտնի օրինակներն են։ (Դալլին Հ. Օուքս, «Քահանայության բանալիները և իշխանությունը», Լիահոնա, մայիս 2014 թ․, 52)