Materiale Paraqitëse

Të Mësuarit me anë të Besimit

Roli i Nxënësit

Seminari i San‑Hoze‑de‑Okoas në Republikën Domenikane

Ati Qiellor dhe Jezu Krishti të duan dhe dëshirojnë që të ta mësojnë ungjillin me anë të Fuqisë së Frymës së Shenjtë. Çfarë mund të bësh për të marrë më shumë nga ajo që Ata janë të gatshëm të të mësojnë? Ky mësim mund të të ndihmojë të përfitosh sa më shumë nga përvoja jote e seminarit duke kuptuar se çfarë do të thotë të mësosh me anë të besimit te Jezu Krishti.

Marrja e një roli aktiv në të mësuarit shpirtëror. Të mësuarit e ungjillit që nxit kthimin në besim, kërkon përpjekje të qëndrueshme nga ana e nxënësit. Ndihmojini nxënësit tuaj ta kuptojnë vlerën e marrjes së një roli aktiv në procesin e mësimdhënies dhe të të mësuarit.

ikonë, udhëzime për mësimdhënien

Përgatitja e nxënësve: Ftojini nxënësit të lexojnë paragrafët 1–2 në pjesën “Marrja e Njohurisë Shpirtërore” te materiali Dokumenti Bazë i Zotërimit Doktrinor (2022) dhe të përgatiten për të treguar se çfarë mund të bëjmë për të mësuar të vërtetat shpirtërore.

Veprimtari të Mundshme të të Mësuarit

Zotit i pëlqen shumë përpjekja

ikonë, udhëzime për mësimdhënien

Merreni parasysh të shkruani në tabelë thënien vijuese si referencë për nxënësit. Nëse dëshironi, mund t’i vini nxënësit të shohin materialin filmik “Një Thirrje Veçanërisht Fisnike”, në dispozicion në ChurchofJesusChrist.org, nga kodi kohor 02:16–03:49 ose t’i vini të lexojnë thënien e mëposhtme.

Presidenti Rasëll M. Nelson dha mësim:

Presidenti Rasëll M. Nelson

“Zotit i pëlqen shumë përpjekja, sepse përpjekja sjell shpërblime që nuk mund të vijnë pa të.” (Rasëll M. Nelson, në Xhoi D. Xhons, “Një Thirrje Veçanërisht Fisnike”, Liahona, maj 2020, f. 16)

• Si mund ta zbatojmë thënien e Presidentit Nelson në jetën tonë? Për shembull, si mund të zbatohet në punën misionare, dhënia e shërbesës ose marrja e një arsimimi?

• Si mendon se mund të zbatohet tek të mësuarit e ungjillit të Jezu Krishtit në seminar këtë vit?

ikonë, udhëzime për mësimdhënien

Merreni parasysh të paraqitni paragrafin dhe pyetjet vijuese në mënyrë që nxënësit të vlerësojnë veten në heshtje.

Për të të ndihmuar ta vlerësosh të mësuarit e ungjillit prej teje, mendo për pyetjet e mëposhtme:

• Çfarë përpjekjesh po bën aktualisht për të mësuar ungjillin e Jezu Krishtit? Si e ke ftuar Perëndinë të të mësojë?

• A e ndien se po merr rezultatet që dëshiron dhe të nevojiten? Përse po ose përse jo?

Teksa e studion këtë mësim, mendo për mënyrat se si dëshiron të mësosh dhe të rritesh këtë vit në seminar. Kërko udhërrëfimin e Atit Qiellor nëpërmjet Frymës së Shenjtë për të të ndihmuar të dish se si ta zbatosh këtë mësim në jetën tënde.

Mësime nga Libri i Mormonit

Lexo të paktën dy nga fragmentet vijuese të zotërimit doktrinor, duke kërkuar se si vetë përpjekjet dhe dëshirat tona luajnë një rol dhe se si Perëndia luan një rol në të mësuarit e ungjillit prej nesh.

ikonë, udhëzime për mësimdhënien

Nxënësit mund të punojnë në grupe të vogla, ku çdo nxënës lexon një fragment të ndryshëm dhe ia tregon atë që mësoi grupit të tij.

Merreni parasysh të shkruani në tabelë titujt “Përpjekjet Tona” dhe “Roli i Perëndisë” dhe t’i ftoni nxënësit të shkruajnë atë që zbulojnë poshtë titullit të përshtatshëm. Nxitini ata t’i tregojnë klasës hollësi mbi atë çka shkruajnë.

• 2 Nefi 28:30

• 2 Nefi 32:3

• 2 Nefi 32:8–9

• Ethëri 12:6

• Moroni 10:4–5

• Çfarë gjete që mund të të ndihmojë të mësosh më shumë nga Perëndia gjatë seminarit?

• Cilat mendon se do të ishin rezultatet nëse dikush do të priste që Perëndia t’i jepte njohuri, por të mos bënte përpjekjet e veta? Ose nëse bëri një përpjekje, por nuk e kërkoi ndihmën e Perëndisë? Përse?

Duke u bazuar tek ajo çka ke studiuar sot deri tani, përmblidh me një fjali çfarë kupton rreth të mësuarit të ungjillit.

ikonë, udhëzime për mësimdhënien

Merreni parasysh t’i ftoni nxënësit t’ia tregojnë klasës fjalinë e tyre përmbledhëse. Nxënësit mund të përcaktojnë shumë të vërteta të ndryshme, të tilla si vijon:

• Perëndia do të na mësojë rresht pas rreshti nëse dëshirojmë të mësojmë prej Tij.

• Ne duhet të jemi të gatshëm të studiojmë e të lutemi me besim te Jezu Krishti nëse dëshirojmë ta dimë të vërtetën.

Falënderojini nxënësit për komentet e tyre dhe sigurojini ata se ajo çka treguan kontribuon për të mësuarit e gjithsecilit. Kjo mund të ndihmojë për t’i nxitur nxënësit e tjerë të flasin dhe për të krijuar një mjedis ku të marrin pjesë.

A mund ta ndryshojë seminari jetën tënde?

ikonë, udhëzime për mësimdhënien

Merreni parasysh t’i bëni nxënësit të shohin materialin filmik “Seminary Can Change Lives” [“Seminari Mund të Ndryshojë Jetën”] (04:14), në dispozicion te ChurchofJesusChrist.org. Kërkojuni nxënësve të mendojnë rreth arsyeve të mundshme përse materiali filmik titullohet “Seminari Mund të Ndryshojë Jetën” dhe jo “Seminari do të ta Ndryshojë Jetën”. Ftojini nxënësit të japin mendimet e tyre pas materialit filmik.

Lexo thënien vijuese nga Presidenti Rasëll M. Nelson, duke kërkuar atë që do të ndihmojë të përcaktojë a do të ndryshohet jeta jote nga seminari.

Presidenti Rasëll M. Nelson

“Sa më shumë që ta ndiqni shembullin e Jezu Krishtit, aq më të suksesshëm do të jeni.

Atëherë, çfarë do t’ju ndihmojë të bëheni një dishepull i tillë i përkushtuar i Jezu Krishtit? Një përgjigje është seminari dhe instituti – jo thjesht frekuentimi por pjesëmarrja në mënyrë aktive në orën mësimore dhe ndjekja me besnikëri plotësisht e çdo detyre të dhënë. …

Diplomimi në seminar dhe institut do ta rritë aftësinë tuaj për të shkëlqyer në gjërat më të rëndësishme që do të bëni ndonjëherë në jetë. Gëzimi i vërtetë do të jetë i juaji!” (Russell M. Nelson, “A Personal Invitation to Participate in Seminary and Institute”, shkurt 2019, ChurchofJesusChrist.org)

• Çfarë të bëri përshtypje nga thënia e Presidentit Nelson? Përse?

• Si mund të përqendrohesh te ndjekja e Jezu Krishtit gjatë përvojës tënde në seminar?

• Çfarë mendon se do të thotë “pjesëmarrja në mënyrë aktive” në seminar?

ikonë, udhëzime për mësimdhënien

Ftojini nxënësit të diskutojnë mënyra të veçanta për të marrë pjesë në mënyrë aktive në seminar. Ndihmojini ata të kuptojnë se nxënësit me personalitete dhe rrethana të ndryshme mund të marrin pjesë në mënyrë aktive në mënyra të ndryshme. Për shembull, si mundet një nxënës i ndrojtur dhe një nxënës i hedhur të marrin pjesë secili në mënyrë aktive në seminar sipas mënyrës së tij?

Si të përfitohet sa më shumë nga seminari

ikonë, udhëzime për mësimdhënien

Për veprimtarinë vijuese, merrni parasysh të paraqitni këtë figurë ose një figurë tjetër të një djali të ri në seminar. Ftojini nxënësit ta bëjnë situatën të ndihet më reale duke i dhënë djalit të ri një emër dhe duke përshkruar personalitetin e tij, formimin ungjillor, se si ndihet rreth seminarit e kështu me radhë. Më pas ftojini nxënësit të shkruajnë në ditarët e tyre të studimit këshillën që do t’i jepnin këtij djali të ri përpara se t’ia tregojnë këshillën klasës.

Pjesëmarrës në klasën e seminarit

Përfytyro sikur djali i ri në këtë figurë po e frekuenton seminarin për herë të parë. Ai dëshiron të mësojë e të rritet shpirtërisht, por nuk është i sigurt se si ta bëjë këtë. Duke u bazuar tek ajo qe ke mësuar sot dhe te përvojat e tua të shkuara në seminar dhe kishë, mbaj shënim këshillën që do t’i jepje atij.

Sigurohu që të përfshish

• çfarë mund të bëjë ai përpara, gjatë dhe pas orës mësimore për ta përmirësuar të mësuarit e tij shpirtëror

• se si mund të përqendrohej te ndjekja e Shpëtimtarit dhe ta ftonte Frymën e Shenjtë për t’i dhënë mësim

• veprime ose qëndrime që mund ta bënin më të lehtë ose më të vështirë për të mësuar shpirtërisht, si për të ashtu dhe për të tjerët në klasë

ikonë, udhëzime për mësimdhënien

Teksa nxënësit japin këshillat e tyre, merreni parasysh t’i ndihmoni ata të shohin vlerën e përgatitjes së zemrave dhe mendjeve të tyre për të mësuar përpara orës mësimore. Ju mund t’i ndihmoni nxënësit ta bëjnë këtë duke iu bërë ftesa që të përgatiten duke përdorur disa nga sugjerimet nga pjesa “Përgatitja e nxënësve” që gjendet në fillim të çdo mësimi. Gjithashtu ndihmojini ata të shohin rëndësinë e të vepruarit sipas të vërtetave që mësojnë, pasi të largohen nga ora mësimore.

Vendos një synim për të përfituar sa më shumë nga përvoja jote në seminar këtë vit. Për ta bërë këtë, ti mund t’u përgjigjesh pyetjeve vijuese:

• Çfarë po pret të përfitosh nga seminari këtë vit?

• Çfarë je i gatshëm të bësh për t’i treguar Zotit se dëshiron të mësosh nga Ai dhe të bëhesh më shumë si Ai?

Komente dhe Informacion për Rrethanat

Çfarë mund të bëj për ta marrë dhe për ta kujtuar atë që Ati Qiellor dëshiron që të ma mësojë?

Plaku Riçard G. Skot (1928–2015), i Kuorumit të Dymbëdhjetë Apostujve, shpjegoi:

Plaku Riçard G. Skot

“Shkruani në një vend të sigurt gjërat e rëndësishme që mësoni nga Shpirti. Ju do ta shihni se, teksa mbani shënim një mbresë të vyer, shpesh të tjera do të vijnë, të cilat përndryshe nuk do t’i kishit marrë. Gjithashtu, njohuria shpirtërore që fitoni, do të jetë në dispozicion gjatë gjithë jetës suaj. Gjithmonë, ditën ose natën, kudo që të jeni, çfarëdo që të jeni duke bërë, kërkoni të dalloni e t’i përgjigjeni drejtimit të Shpirtit. Kini në dispozicion një copë letre ose një kartë për të mbajtur shënim një udhërrëfim të tillë.

Shprehini mirënjohje Zotit për udhërrëfimin shpirtëror që merrni, dhe bindjuni asaj. Kjo praktikë do ta përforcojë aftësinë tuaj për të mësuar me anë të Shpirtit. Do ta përmirësojë udhërrëfimin nga Zoti në jetën tuaj. Ju do të mësoni më shumë teksa veproni sipas njohurisë, përvojës dhe frymëzimit që ju është komunikuar nga Fryma e Shenjtë.” (Richard G. Scott, “How to Learn by the Spirit”, New Era, shtator 2014, f. 48)

Përse pjesëmarrja ime në orën mësimore është e rëndësishme?

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim:

Plaku Riçard G. Skot

“Vendimi [i nxënësve] për të marrë pjesë është një ushtrim i lirisë së zgjedhjes që e lejon Frymën e Shenjtë të përçojë një mesazh të posaçëm, të personalizuar për nevojat e tyre individuale. …

Kjo pjesëmarrje do të sjellë drejtimin e Shpirtit në jetën [e nxënësve]. … Pjesëmarrja u lejon individëve të përjetojnë të qenit të udhëhequr nga Shpirti. Ata mësojnë të dallojnë dhe të ndiejnë se çfarë është udhërrëfimi shpirtëror.” (Richard G. Scott, “To Learn and to Teach More Effectively” [takim shpirtëror i Javës Arsimore të Universitetit “Brigam Jang”, 21 gusht 2007], f. 4–5, speeches.byu.edu)

Plaku Dejvid A. Bednar, i Kuorumit të Dymbëdhjetë Apostujve, tha:

Plaku Dejvid A. Bednar

“Besimi i vërtetë përqendrohet në dhe te Zoti Jezu Krisht dhe gjithnjë të çon në veprim. …

… Të mësuarit me anë të besimit kërkon përpjekje shpirtërore, mendore e fizike dhe jo thjesht pranim pësor. Është në sinqeritetin dhe rrjedhën logjike të veprimit tonë të frymëzuar nga besimi, që ne i tregojmë Atit tonë Qiellor dhe Birit të Tij, Jezu Krishtit, gatishmërinë tonë për të mësuar e për të marrë udhëzim nga Fryma e Shenjtë.” (David A. Bednar, “Seek Learning by Faith”, Liahona, shtator 2007, f. 63–64)

Veprimtari Plotësuese të të Mësuarit

Veprimtari alternative për fillimin

Për të nisur mësimin, merrni parasysh të ftoni një nxënës ose të gjithë klasën të bëjë diçka që do të kërkojë pak përpjekje për t’u përfunduar – si për shembull, marrja e një mjeti që është fillimisht i paarritshëm ose zgjidhja e një gjëegjëze ose enigme që do të kërkojë pak mendim. Jepuni një shpërblim të vogël atyre që bënë përpjekje për ta përfunduar detyrën. Më pas paraqitni thënien nga Presidenti Nelson rreth përpjekjes, që gjendet në fillim të mësimit.

Dokumenti Bazë i Zotërimit Doktrinor

Ftojini nxënësit të lexojnë paragrafët 1–2 në pjesën “Marrja e Njohurisë Shpirtërore” te materiali Dokumenti Bazë i Zotërimit Doktrinor (2022). Kërkojuni atyre të shenjojnë çdo fjalë ose frazë që përshkruan atë që pritet nga ne për të mësuar shpirtërisht. Më pas kërkojuni atyre të shenjojnë në një mënyrë të ndryshme çdo fjalë ose frazë që përshkruan rolin e Perëndisë në të mësuarit tonë.

Veprimtari alternative për përfundimin

Ftojini nxënësit t’i shkruajnë një letër vetes, ta vendosin në një zarf të mbyllur dhe ta dorëzojnë. Informojini ata se letra nuk do të lexohet, por do t’u rikthehet atyre më vonë në semestër për t’i ndihmuar të gjykojnë përparimin e tyre vetjak. Ftojini ata të përfshijnë në letër atë që shpresojnë të mësojnë dhe të ndiejnë në seminar dhe atë që janë të gatshëm të bëjnë përpara, gjatë dhe pas orës mësimore për t’i treguar Perëndisë se ata duan të mësojnë nga Ai dhe të bëhen më shumë si Ai.