Materiale Paraqitëse

Studimi i Shkrimeve të Shenjta

Mbahuni Fort te Fjala e Perëndisë

Shkrimet e shenjta janë unike në aftësinë e tyre për t’i thelluar besimin dhe dashurinë për Atin Qiellor dhe Jezu Krishtin. Studimi i vazhdueshëm dhe kuptimplotë i shkrimeve të shenjta e fton besimin dhe e forcon jetën tonë të përditshme. Qëllimi i këtij mësimi është t’i shtojë dëshirën dhe aftësinë tuaj për t’i studiuar shkrimet e shenjta çdo ditë dhe për të marrë bekimet e premtuara që e shoqërojnë studimin e shkrimeve të shenjta.

Nxitja e zakonit të studimit të përditshëm të shkrimeve të shenjta. Pak gjëra do të kenë një ndikim më të fuqishëm dhe më afatgjatë për mirë në jetën e nxënësve sesa të ndihmuarit e tyre që të mësojnë t’i duan shkrimet e shenjta dhe t’i studiojnë ato çdo ditë. Një mënyrë për ta bërë këtë është të diskutoni me nxënësit për dobitë dhe bekimet e studimit të përditshëm, vetjak të shkrimeve të shenjta.

Përgatitja e nxënësve: Jepuni nxënësve fletushkën “Vlerësimi i Studimit të Shkrimeve të Shenjta” nga ky mësim për ta marrë në shtëpi dhe për ta plotësuar. Merreni parasysh t’i ftoni nxënësit t’u kërkojnë pjesëtarëve të familjes t’u përgjigjen gjithashtu pyetjeve dhe t’i diskutojnë përgjigjet e tyre së bashku.

Veprimtari të Mundshme të të Mësuarit

Studimi i përditshëm i shkrimeve të shenjta

Për t’i ndihmuar nxënësit ta kuptojnë rëndësinë e përpjekjes së qëndrueshme për studimin e shkrimeve të shenjta me kalimin e kohës, merrni parasysh të ftoni një nxënës/e që ndihet mirë duke bërë pompa [ushtrim fizik], që të vijë përpara klasës e ta demonstrojë. Pasi ai ose ajo të ketë mbaruar, merrni parasysh të pyesni: “A është nxënësi/ja më i/e fortë tani pasi ai ose ajo bëri disa pompa? Përse po ose përse jo?”

Nëse një person do të donte të bëhej më i fortë duke bërë pompa, çfarë do t’i duhej të bënte? Sa kohë mund t’i duhej për të parë një rritje të dallueshme në forcë? Çfarë sfidash mund të duhet të kalojë ky person?

• Si mund të lidhet kjo me studimin e shkrimeve të shenjta?

Lexo thëniet vijuese nga Presidenti Tomas S. Monson (1927–2018) dhe Xhuli B. Bek, në atë kohë Këshilltare e Parë në Presidencën e Të Rejave, dhe shqyrto se çfarë mësojnë ata rreth studimit të shkrimeve të shenjta:

“Duke shpenzuar ditë për ditë kohë për studimin e shkrimeve të shenjta, pa dyshim, do të na forco[hen] themelet tona të besimit dhe dëshmitë tona të së vërtetës.” (Tomas S. Monson, “Sa i Fortë një Themel”, Konferenca e Përgjithshme tetor 2006, f. 90)

“Ndonëse nuk e konsideroj veten eksperte, … jam mirënjohëse që fillova zakonin për gjatë gjithë jetës të leximit [të shkrimeve të shenjta]. Do të ishte e pamundur t’i mësoja mësimet që përmbajnë shkrimet e shenjta duke i lexuar ato plotësisht vetëm një herë ose duke studiuar vargje të përzgjedhura në një orë mësimore.” (Julie B. Beck, “My Soul Delighteth in the Scriptures”, Liahona, maj 2004, f. 107)

• Çfarë gjete?

Merrni parasysh të paraqitni vetëvlerësimin vijues mbi studimin e shkrimeve të shenjta në mënyrë që nxënësit ta plotësojnë vetë atë.

Merre parasysh se si ndihesh rreth studimit tënd të shkrimeve të shenjta.

Fletushkë: “Vlerësimi i Studimit të Shkrimeve të Shenjta”

Manual i Mësuesit për Librin e Mormonit (2024) – “Studimi i Shkrimeve të Shenjta”

Vlerësoje veten për pohimet vijuese në një shkallë nga 1 te 5 (1 është më e ulëta dhe 5 është më e larta):

• Studimi i shkrimeve të shenjta çdo ditë është një përparësi për mua.

• Jam në dijeni dhe i përdor aftësitë për studimin e shkrimeve të shenjta (lutjen, përsiatjen, poshtëshënimet, shënimet e kështu me radhë), të cilat më ndihmojnë t’i kuptoj më mirë shkrimet e shenjta.

• E kuptoj se çfarë lexoj në shkrimet e shenjta.

• Studimi i shkrimeve të shenjta më ndihmon të ndihem më afër Jezu Krishtit.

Mund t’i ftoni nxënësit të tregojnë sfidat me të cilat mund të përballen në lidhje me studimin e përditshëm dhe kuptimplotë të shkrimeve të shenjta. Merrni parasysh t’i ftoni nxënësit të tregojnë zgjidhje të mundshme për sfidat. Ndihmojini nxënësit ta kuptojnë se, pavarësisht se si dolën në vlerësim, ata mund ta rritin aftësinë e tyre për të marrë bekime nga studimi i shkrimeve të shenjta.

© 2023 by Intellectual Reserve, Inc. All rights reserved.

Bekimet nga studimi i shkrimeve të shenjta

Lexoji vargjet vijuese duke kërkuar bekimet që vijnë nga studimi i shkrimeve të shenjta.

Mund t’i ftoni nxënësit t’i shkruajnë në tabelë bekimet e ndryshme nga studimi i shkrimeve të shenjta. Teksa ata shkruajnë, ftojini të vendosin gjithashtu një shenjë përzgjedhëse në krah të çdo bekimi që kanë marrë.

• 1 Nefi 15:24

• 2 Nefi 32:3

• Mosia 1:3–5

• Alma 17:2–3

• Alma 37:8–9

• Çfarë të vërtetash të lidhura me studimin e shkrimeve të shenjta mund të përcaktosh nga këto vargje?

Nxënësit mund të përcaktojnë të vërteta të tilla si: Nëse ia vëmë veshim dhe mbahemi fort te fjala e Perëndisë, Ai do të na bekojë për t’i bërë ballë tundimit dhe të ligës (shih te 1 Nefi 15:24); Jezu Krishti do të na ndihmojë të dimë çfarë të bëjmë në jetën tonë teksa ushqehemi me bollëk me fjalët e Tij (shih te 2 Nefi 32:3) dhe studimi i shkrimeve të shenjta mund të më ndihmojë të di për Jezu Krishtin dhe të gëzohem në Të (shih tek Alma 37:9).

• Cilat nga këto të vërteta ose bekime ke përjetuar?

Për bekime të tjera që vijnë nga studimi i shkrimeve të shenjta, shihni te “Komente dhe Informacion për Rrethanat”.

Si mund të përfitoj më shumë nga studimi i shkrimeve të shenjta?

Pyetja vijuese mund të diskutohet nga nxënësit në grupe të vogla ose në dyshe. Merreni parasysh t’i ftoni nxënësit të tregojnë idetë e tyre. Ju mund t’u kërkoni nxënësve të tregojnë hollësi të tjera rreth përgjigjeve të tyre, si për shembull si, kur apo pse e përdorin atë praktikë.

• Çfarë mund ta ndihmojë një person që të përfitojë më shumë nga studimi prej tij ose saj i shkrimeve të shenjta?

Lexo thënien vijuese nga Plaku D. Tod Kristoferson, i Kuorumit të Dymbëdhjetë Apostujve, dhe kërko aftësi të tjera që mund të ndihmojnë që studimi i shkrimeve të shenjta të ketë më shumë ndikim.

“Ndonjëherë, është gjë e mirë të lexoni një libër të shkrimeve të shenjta brenda një periudhe të caktuar kohe për të marrë një kuptim të përgjithshëm të mesazhit të tij, por për kthimin në besim, ju duhet të kujdeseni më shumë për sasinë e kohës që kaloni në shkrimet e shenjta sesa për sasinë e asaj që lexoni në atë kohë. Ju përfytyroj ndonjëherë duke lexuar pak vargje, duke ndaluar për t’i përsiatur, duke i lexuar me kujdes vargjet sërish dhe, ndërsa mendoni rreth kuptimit të tyre, duke u lutur për t’i kuptuar, duke bërë pyetje në mendjen tuaj, duke pritur për mbresa shpirtërore dhe duke i hedhur në letër mbresat dhe idetë që ju vijnë, që ju të mund t’i kujtoni dhe të mësoni më shumë. Duke studiuar në këtë mënyrë, ju mund të mos lexoni shumë kapituj ose vargje në gjysmë ore, por ju do t’i bëni vend në zemrën tuaj fjalës së Perëndisë dhe Ai do t’ju flasë juve.” (D. Todd Christofferson, “When Thou Art Converted”, Liahona, maj 2004, f. 11)

• Çfarë sheh në këto ide që mund ta bekojë përvojën tënde me studimin e shkrimeve të shenjta?

Nxënësit mund të shtojnë ide të tjera në tabelë, të cilat nuk ishin tashmë të shkruara.

Përveç aftësisë së studimit të shkrimeve të shenjta që vijon, ide për aftësi të shumta që mund të përdoren, jepen në pjesën “Veprimtari Plotësuese të të Mësuarit” më poshtë.

Ju mund t’i ftoni nxënësit ta kryejnë veprimtarinë vijuese qetësisht më vete. Më pas ndajini ata në grupe të vogla ose dyshe për të treguar se çfarë mësuan.

Përdori 5 ose 10 minutat e tjera për t’u përpjekur t’i përdorësh sugjerimet e dhëna nga Plaku Kristoferson. Shpenzo kohë për të përsiatur, për të rilexuar, për t’u lutur, për të bërë pyetje dhe për të shkruar mbresat. Këtu janë disa fragmente të mundshme të shkrimeve të shenjta që mund t’i përdorësh (përzgjidh lirisht fragmente të ndryshme nga Libri i Mormonit).

Mosia 3; Alma 32; 3 Nefi 11

Pasi nxënësit të kenë pasur kohë për të studiuar, ftojini ata të tregojnë rreth përvojave të tyre. Pyetjet në vijim mund të ndihmojnë.

• Cila ishte përvoja jote me studimin e shkrimeve të shenjta në këtë mënyrë?

• Si mundet që studimi në këtë mënyrë të ndikojë te studimi yt vetjak i shkrimeve të shenjta?

Vendos një synim për studimin e shkrimeve të shenjta

Një nga qëllimet e seminarit është të të ndihmojë të afrohesh më shumë me Jezu Krishtin nëpërmjet studimit të përditshëm të shkrimeve të shenjta. Për të të ndihmuar, ka një kërkesë për kreditet e seminarit për të lexuar librin e shkrimit të shenjtë të vitit aktual në të paktën 75 përqind të ditëve kalendarike të semestrit.

Kërko frymëzim nëpërmjet Frymës së Shenjtë për të vendosur një synim për studimin vetjak. Për të të ndihmuar, fillo duke bërë një lutje për të kërkuar frymëzim nga Ati Qiellor. Mendo për pyetjet vijuese teksa vendos një synim:

• Kur dhe ku mund t’i studioja shkrimet e shenjta çdo ditë?

• Sa kohë do të studioj çdo ditë?

• Çfarë mund të bëj për ta ftuar Frymën e Shenjtë më plotësisht në përvojën time të studimit të shkrimeve të shenjta?

Komente dhe Informacion për Rrethanat

Çfarë bekimesh të tjera mund të vijnë nga studimi i shkrimeve të shenjta?

Plaku D. Tod Kristoferson, i Kuorumit të Dymbëdhjetë Apostujve, dha mësim:

“Në fund, qëllimi kryesor i gjithë shkrimit të shenjtë është që të mbushë shpirtin tonë me besim tek Perëndia Atë dhe tek Biri i Tij, Jezu Krishti.” (D. Tod Kristoferson, “Bekimi prej Shkrimeve të Shenjta”, Liahona, maj 2010, f. 34)

Presidenti Rasëll M. Nelson dha mësim:

“Zhytja e përditshme në fjalën e Perëndisë është jetike për mbijetesën tonë shpirtërore, veçanërisht në këto ditë të rrëmujës në rritje. Teksa ushqehemi me bollëk përditë me fjalët e Krishtit, fjalët e Krishtit do të na thonë se si të reagojmë ndaj vështirësive me të cilat kurrë nuk menduam se do të përballeshim.” (Rasëll M. Nelson, “Dëgjojeni Atë”, Liahona, maj 2020, f. 89)

Shih materialin filmik “Scriptures Legacy” [“Trashëgimia e Shkrimeve të Shenjta”] nga kodet kohore 04:51 deri në 06:24 dhe nga 13:00 deri në 15:24. Ai ilustron sakrificën e bërë për të nxjerrë në dritë shkrimet e shenjta dhe mënyrën se si ato e bekojnë jetën. Ky material filmik gjendet te ChurchofJesusChrist.org.

Veprimtari Plotësuese të të Mësuarit

Përfshirja e lutjes në studimin e shkrimeve të shenjta

Ndihmojini nxënësit të kuptojnë mënyrat e ndryshme me anë të të cilave lutja mund të përdoret për të përmirësuar studimin e shkrimeve të shenjta. Merrni parasysh të bëni pyetjen që vijon:

• Për çfarë mund të luteshit në fillim dhe gjatë studimit të shkrimeve të shenjta?

Merrni parasysh të tregoni thënien vijuese nga Presidenti Hauard W. Hantër (1907–1995): “Nuk ka gjë më të dobishme sesa lutja për të hapur kuptimin tonë për shkrimet e shenjta. Nëpërmjet lutjes ne mund ta përqendrojmë mendjen për të kërkuar përgjigje për kërkimet tona” (“Reading the Scriptures”, Ensign, nëntor 1979, f. 64).

Përsiatja

Nëse dëshironi, mund t’i ndihmoni nxënësit të kuptojnë se përsiatja e fjalës së Perëndisë mund të çojë drejt zbulesës vetjake. Fragmentet vijuese ndihmojnë për ta ilustruar këtë të vërtetë: 1 Nefi 11:1; Helamani 10:2–3; Doktrina e Besëlidhje 76:19; Doktrina e Besëlidhje 138:1, 11. Merrni parasysh këto pyetje për diskutim:

• Si mendoni, përse përsiatja mund të çojë drejt zbulesës vetjake?

• Për çfarë mund të përsiatë një person teksa studion shkrimet e shenjta?

• Si mund ta lejoni këtë aftësi ta bekojë më plotësisht studimin tuaj?

Kërkimi i parimeve

Ndihma ndaj nxënësve që të përcaktojnë parimet, mund të ndihmojë për ta përmirësuar studimin e tyre të shkrimeve të shenjta. Nëse dëshironi, mund t’ua tregoni nxënësve këtë thënie për t’i ndihmuar ata të dinë se çfarë janë parimet.

Plaku Riçard G. Skot (1928–2015), i Kuorumit të Dymbëdhjetë Apostujve, tha: “Parimet janë e vërteta e përqendruar, e mbledhur për zbatim në një mori të gjerë rrethanash. Një parim i vërtetë i bën vendimet të qarta edhe nën rrethanat më të ngatërruara dhe shtrënguese” (“Acquiring Spiritual Knowledge”, Ensign, nëntor 1993, f. 86).

Përdorimi i poshtëshënimeve

Një mënyrë se si nxënësit mund të kenë një studim lartësues shpirtërisht të shkrimeve të shenjta, është duke përdorur poshtëshënimet. Ato përmbajnë referenca për vargje të tjera ose mjete shtesë për t’i ndihmuar nxënësit ta kuptojnë më mirë atë që po lexojnë.

Merreni parasysh t’u jepni nxënësve një mundësi për t’u ushtruar duke treguar një shembull ku poshtëshënimet kanë qenë të dobishme për ta thelluar kuptueshmërinë.