ការរៀនសូត្រដោយសេចក្តីជំនឿ ៖ តួនាទីរបស់សិស្ស ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ការរៀនសូត្រដោយសេចក្តីជំនឿ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ឯកសារណែនាំ
ការរៀនសូត្រដោយសេចក្តីជំនឿ
តួនាទីរបស់សិស្ស
ព្រះវរបិតាសួគ៌ និងព្រះយេស៊ូវគ្រីស្ទស្រឡាញ់អ្នក ហើយចង់បង្រៀនអ្នកពីដំណឹងល្អដោយព្រះចេស្ដានៃព្រះវិញ្ញាណបរិសុទ្ធ ។ តើអ្នកអាចធ្វើអ្វីខ្លះដើម្បីទទួលបានអ្វីដែលទ្រង់ទាំងទ្វេមានព្រះទ័យចង់បង្រៀនអ្នកបន្ថែមទៀត ? មេរៀននេះអាចជួយអ្នកទទួលបានអត្ថប្រយោជន៍ច្រើនបំផុតពីបទពិសោធន៍នៅថ្នាក់សិក្ខាសាលារបស់អ្នក ដោយការយល់ពីអត្ថន័យនៃការរៀនសូត្រដោយសេចក្ដីជំនឿលើព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
ព្រះអម្ចាស់សព្វព្រះទ័យនឹងការប្រឹងប្រែង
សូមពិចារណាសរសេរសេចក្ដីថ្លែងការណ៍ខាងក្រោមនៅលើក្ដារខៀនសម្រាប់ជាឯកសារយោងរបស់សិស្ស ។ អ្នកប្រហែលជាចង់ឲ្យសិស្សមើលវីដេអូ « An Especially Noble Calling » មាននៅលើគេហទំព័រ ChurchofJesusChrist.org ចាប់ពីនាទីទី ២:១៦–៣:៤៩ ឬឲ្យពួកគេអានសេចក្តីថ្លែងការណ៍ខាងក្រោម ។
ប្រធាន រ័សុល អិម ណិលសុន បានបង្រៀន ៖
ព្រះអម្ចាស់សព្វព្រះទ័យនឹងការខិតខំ ហើយគ្មានរង្វាន់ណាបានមកដោយគ្មានការប្រឹងប្រែងទេ ។ ( រ័សុល អិម ណិលសុន នៅក្នុង ចយ ឌី ចូនស៍ « An Especially Noble Calling » Liahona ខែ ឧសភា ឆ្នាំ ២០២០ ទំព័រ ១៦ )
-
តើយើងអាចអនុវត្តសេចក្ដីថ្លែងការណ៍របស់ប្រធាន ណិលសុន នៅក្នុងជីវិតរបស់យើងដោយរបៀបណា ? ឧទាហរណ៍ តើវាអាចអនុវត្តចំពោះកិច្ចការផ្សព្វផ្សាយសាសនា ការបម្រើ ឬការទទួលបានការអប់រំដោយរបៀបណា ?
-
តើអ្នកគិតថាវាអាចអនុវត្តបានចំពោះការរៀនសូត្រដំណឹងល្អនៃព្រះយេស៊ូវគ្រីស្ទនៅក្នុងថ្នាក់សិក្ខាសាលានៅក្នុងឆ្នាំនេះដោយរបៀបណា ?
សូមពិចារណាបង្ហាញកថាខណ្ឌ និងសំណួរខាងក្រោមនេះដើម្បីឲ្យសិស្សស្វ័យវាយតម្លៃដោយស្ងប់ស្ងាត់ ។
ដើម្បីជួយអ្នកឲ្យវាយតម្លៃលើការរៀនសូត្រដំណឹងល្អផ្ទាល់ខ្លួនរបស់អ្នក សូមគិតអំពីសំណួរខាងក្រោមនេះ ៖
-
តើអ្នកកំពុងប្រឹងប្រែងអ្វីខ្លះដើម្បីរៀនដំណឹងល្អនៃព្រះយេស៊ូវគ្រីស្ទ ? តើអ្នកបានអញ្ជើញព្រះឲ្យបង្រៀនអ្នកដោយរបៀបណា ?
-
តើអ្នកមានអារម្មណ៍ថា អ្នកកំពុងទទួលបានលទ្ធផលដែលអ្នកចង់បាន និងត្រូវការដែរឬទេ ? ហេតុអ្វីមានអារម្មណ៍ដូច្នេះ ឬហេតុអ្វីមិនមានអារម្មណ៍ដូច្នេះ ?
នៅពេលអ្នកសិក្សាមេរៀននេះ សូមគិតអំពីវិធីដែលអ្នកចង់រៀន និងរីកចម្រើននៅក្នុងថ្នាក់សិក្ខាសាលាឆ្នាំនេះ ។ សូមស្វែងរកការណែនាំពីព្រះវិញ្ញាណបរិសុទ្ធដើម្បីជួយអ្នកឲ្យដឹងពីរបៀបអនុវត្តមេរៀននេះក្នុងជីវិតរបស់អ្នក ។
ការបង្រៀនពីព្រះគម្ពីរមរមន
សូមអានយ៉ាងហោចណាស់វគ្គចំណេះចំណានខាងគោលលទ្ធិចំនួនពីរខាងក្រោម ដោយរកមើលពីរបៀបដែលការខិតខំ និងបំណងប្រាថ្នារបស់យើង និងរបៀបដែលព្រះដើរតួក្នុងការរៀនសូត្រដំណឹងល្អរបស់យើង ។
សិស្សអាចធ្វើការជាក្រុមតូចៗ ដោយសិស្សម្នាក់ៗអានវគ្គបទគម្ពីរផ្សេងៗគ្នា និងចែកចាយអ្វីដែលពួកគេរៀនជាមួយក្រុមរបស់ពួកគេ ។
សូមពិចារណាសរសេរចំណងជើង « ការខិតខំរបស់យើង » និង « តួនាទីរបស់ព្រះ » នៅលើក្ដារខៀន ហើយអញ្ជើញសិស្សឲ្យសរសេរអ្វីដែលពួកគេរកឃើញនៅក្រោមចំណងជើងដែលត្រឹមត្រូវ ។ សូមលើកទឹកចិត្តឲ្យពួកគេចែកចាយជាមួយថ្នាក់នូវសេចក្តីលម្អិតដែលពួកគេបានសរសេរ ។
-
តើអ្នកបានរកឃើញអ្វីខ្លះដែលអាចជួយអ្នករៀនបន្ថែមទៀតពីព្រះអំឡុងពេលថ្នាក់សិក្ខាសាលា ?
-
តើអ្នកគិតថាលទ្ធផលនឹងទៅជាយ៉ាងណា ប្រសិនបើបុគ្គលម្នាក់រំពឹងថាព្រះនឹងប្រទានចំណេះដឹងដល់ពួកគេ ប៉ុន្តែមិនបានប្រឹងប្រែងដោយខ្លួនឯងនោះ ? ឬប្រសិនបើពួកគេខំប្រឹងតែមិនបានស្វែងរកជំនួយពីព្រះ ? ហេតុអ្វី ?
ដោយផ្អែកលើអ្វីដែលអ្នកបានសិក្សារហូតមកដល់ពេលនេះ សូមសង្ខេបជាមួយប្រយោគនូវអ្វីដែលអ្នកយល់អំពីការរៀនសូត្រដំណឹងល្អ ។
សូមពិចារណាអញ្ជើញសិស្សឲ្យចែកចាយប្រយោគសង្ខេបរបស់ពួកគេជាមួយថ្នាក់ ។ សិស្សអាចរកឃើញសេចក្ដីពិតខុសៗគ្នាជាច្រើន ដូចជាសេចក្តីពិតខាងក្រោមនេះ ៖
-
ព្រះនឹងបង្រៀនយើងមួយបន្ទាត់ម្តងៗ ប្រសិនបើយើងមានបំណងចង់រៀនពីទ្រង់ ។
-
យើងត្រូវតែស្ម័គ្រចិត្តសិក្សា និងអធិស្ឋានដោយសេចក្ដីជំនឿលើព្រះយេស៊ូវគ្រីស្ទ ប្រសិនបើយើងចង់ដឹងការពិត ។
សូមអរគុណដល់សិស្សចំពោះមតិយោបល់របស់ពួកគេ ហើយធានាដល់ពួកគេថាអ្វីដែលពួកគេបានចែកចាយរួមចំណែកដល់ការរៀនសូត្ររបស់មនុស្សគ្រប់គ្នា ។ ការណ៍នេះអាចជួយជំរុញសិស្សផ្សេងទៀតឲ្យចែកចាយ និងបង្កើតបរិយាកាសនៃការចូលរួម ។
តើសិក្ខាសាលាអាចផ្លាស់ប្តូរជីវិតរបស់អ្នកបានដែរឬទេ ?
សូមពិចារណាឲ្យសិស្សមើល « Seminary Can Change Lives » ( ៤:១៤ ) ដែលមាននៅនៅលើគេហទំព័រ ChurchofJesusChrist.org ។ សូមឲ្យសិស្សគិតអំពីហេតុផលដែលអាចមានដែលវីដេអូនេះត្រូវបានដាក់ឈ្មោះថា « Seminary can Change Lives » ជាជាង « Seminary Will Change Your Life » ។ សូមអញ្ជើញសិស្សឲ្យចែកចាយគំនិតរបស់ពួកគេបន្ទាប់ពីមើលវីដេអូនេះ ។
សូមអានសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ដោយរកមើលអ្វីដែលនឹងជួយកំណត់ថា តើជីវិតរបស់អ្នកនឹងត្រូវបានផ្លាស់ប្តូរដោយសិក្ខាសាលា ។
កាលណាអ្នកធ្វើតាមគំរូរបស់ព្រះយេស៊ូវគ្រីស្ទកាន់តែច្រើន នោះអ្នកនឹងកាន់តែជោគជ័យ ។
ប្រសិនបើដូច្នេះ តើអ្វីនឹងជួយអ្នកឲ្យក្លាយជាសិស្សដ៏ស្មោះត្រង់របស់ព្រះយេស៊ូវគ្រីស្ទ ? ចម្លើយមួយគឺថ្នាក់សិក្ខាសាលា និងថ្នាក់វិទ្យាស្ថាន—មិនគ្រាន់តែចូលរៀនប៉ុណ្ណោះទេ ប៉ុន្តែត្រូវចូលរួមយ៉ាងសកម្មនៅក្នុងថ្នាក់ និងធ្វើតាមរាល់កិច្ចការដែលបានដាក់ឲ្យធ្វើដោយស្មោះត្រង់ផងដែរ ។ …
ការបញ្ចប់ការសិក្សាពីថ្នាក់សិក្ខាសាលា និងថ្នាក់វិទ្យាស្ថាននឹងជួយពង្រីកសមត្ថភាពរបស់អ្នកក្នុងការធ្វើអ្វីដែលសំខាន់បំផុតក្នុងជីវិត ។ អំណរពិតប្រាកដនឹងក្លាយជារបស់អ្នក ! ( រ័សុល អិម ណិលសុន « A Personal Invitation to Participate in Seminary and Institute » ខែ កុម្ភៈ ឆ្នាំ ២០១៩ នៅលើគេហទំព័រ ChurchofJesusChrist.org )
-
តើអ្នកចាប់អារម្មណ៍អ្វីខ្លះអំពីសេចក្ដីថ្លែងការណ៍របស់ប្រធាន ណិលសុន ? ហេតុអ្វី ?
-
តើអ្នកអាចផ្ដោតលើការធ្វើតាមព្រះយេស៊ូវគ្រីស្ទ អំឡុងពេលបទពិសោធន៍របស់អ្នកនៅក្នុងថ្នាក់សិក្ខាសាលាដោយរបៀបណា ?
-
តើអ្នកគិតថា « ការចូលរួមយ៉ាងសកម្ម » ក្នុងថ្នាក់សិក្ខាសាលាមានន័យដូចម្តេច ?
សូមអញ្ជើញសិស្សឲ្យពិភាក្សាអំពីវិធីជាក់លាក់ ដើម្បីចូលរួមយ៉ាងសកម្មនៅក្នុងថ្នាក់សិក្ខាសាលា ។ សូមជួយពួកគេឲ្យយល់ថា សិស្សដែលមានបុគ្គលិកលក្ខណៈ និងកាលៈទេសៈផ្សេងគ្នាអាចចូលរួមយ៉ាងសកម្មតាមរបៀបផ្សេងៗ ។ ឧទាហរណ៍ តើសិស្សដែលអៀនខ្មាស និងសិស្សដែលរួសរាយអាចចូលរួមយ៉ាងសកម្មតាមរបៀបរបស់ពួកគេដោយរបៀបណា ?
របៀបដើម្បីទទួលបានអត្ថប្រយោជន៍ច្រើនបំផុតពីសិក្ខាសាលា
សម្រាប់សកម្មភាពខាងក្រោមនេះ សូមពិចារណាពីការបង្ហាញរូបភាពនេះ ឬរូបភាពផ្សេងទៀតរបស់យុវជនម្នាក់នៅក្នុងថ្នាក់សិក្ខាសាលា ។ សូមអញ្ជើញសិស្សឲ្យធ្វើឲ្យស្ថានភាពកាន់តែមានអារម្មណ៍ពិត ដោយដាក់ឈ្មោះយុវជន និងពិពណ៌នាអំពីបុគ្គលិកលក្ខណៈ ប្រវត្តិនៃដំណឹងល្អ អារម្មណ៍របស់គាត់ចំពោះថ្នាក់សិក្ខាសាលាជាដើម ។ បន្ទាប់មក សូមអញ្ជើញសិស្សឲ្យសរសេរនៅក្នុងសៀវភៅកំណត់ហេតុការសិក្សារបស់ពួកគេ នូវដំបូន្មានដែលពួកគេនឹងផ្តល់ដល់យុវជននេះ មុននឹងចែកចាយដំបូន្មានរបស់ពួកគេជាមួយថ្នាក់រៀន ។
សូមស្រមៃគិតថាយុវជនក្នុងរូបភាពនេះកំពុងចូលរៀនថ្នាក់សិក្ខាសាលាជាលើកដំបូង ។ គាត់ចង់រៀន និងរីកចម្រើនខាងវិញ្ញាណ ប៉ុន្តែមិនដឹងពីរបៀបធ្វើវាទេ ។ ដោយផ្អែកលើអ្វីដែលអ្នកបានរៀននៅថ្ងៃនេះ និងបទពិសោធន៍ពីមុនរបស់អ្នកនៅក្នុងថ្នាក់សិក្ខាសាលា និងសាសនាចក្រ សូមកត់ត្រាដំបូន្មានដែលអ្នកនឹងផ្តល់ឲ្យគាត់ ។
សូមប្រាកដថាបានរួមបញ្ចូល
-
អ្វីដែលគាត់អាចធ្វើពីមុន អំឡុងពេល និងក្រោយពេលរៀន ដើម្បីពង្រឹងការសិក្សាខាងវិញ្ញាណរបស់គាត់
-
របៀបដែលគាត់អាចផ្ដោតលើការធ្វើតាមព្រះអង្គសង្គ្រោះ ហើយយាងអញ្ជើញព្រះវិញ្ញាណបរិសុទ្ធឲ្យបង្រៀនគាត់
-
សកម្មភាព ឬអាកប្បកិរិយាដែលអាចធ្វើឲ្យវាកាន់តែងាយស្រួល ឬកាន់តែពិបាករៀនខាងវិញ្ញាណ ទាំងសម្រាប់គាត់ និងសម្រាប់អ្នកដទៃក្នុងថ្នាក់
កាលសិស្សចែករំលែកដំបូន្មានរបស់ពួកគេ សូមពិចារណាជួយពួកគេឲ្យឃើញពីតម្លៃក្នុងការរៀបចំចិត្ត និងគំនិតរបស់ពួកគេដើម្បីរៀនមុនមកថ្នាក់ ។ អ្នកអាចជួយសិស្សធ្វើការណ៍នេះដោយផ្តល់ការអញ្ជើញដល់ពួកគេឲ្យរៀបចំខ្លួនប្រើប្រាស់យោបល់មួយចំនួននៃ « ការរៀបចំសិស្ស » ដែលមាននៅផ្នែកខាងលើនៃមេរៀននីមួយៗ ។ សូមជួយពួកគេឲ្យមើលឃើញពីសារៈសំខាន់នៃការធ្វើតាមសេចក្តីពិតដែលពួកគេរៀនបន្ទាប់ពីពួកគេចេញពីថ្នាក់ទៅ ។
សូមដាក់គោលដៅដើម្បីទទួលបានអត្ថប្រយោជន៍ច្រើនបំផុតពីបទពិសោធន៍សិក្ខាសាលារបស់អ្នកនៅឆ្នាំនេះ ។ ដើម្បីធ្វើដូច្នេះ អ្នកអាចឆ្លើយសំណួរខាងក្រោមនេះ ៖
-
តើអ្នកសង្ឃឹមរៀនអ្វីចេញពីថ្នាក់សិក្ខាសាលានៅឆ្នាំនេះ ?
-
តើអ្នកមានឆន្ទៈធ្វើអ្វីខ្លះ ដើម្បីបង្ហាញព្រះអម្ចាស់ថា អ្នកចង់រៀនពីទ្រង់ ហើយក្លាយកាន់តែដូចទ្រង់ ?