Мормоны Номын удиртгал хэсэг

Мормоны Номын удиртгал

Манай шашны тулгуурын чулуу

Иосеф Смит Мормоны Номыг манай шашны тулгуур чулуу гэж хэлжээ. Уг ном дотор энэ нь үнэн эсэхийг Бурханаас асуухыг уриалсан байдаг. Сая сая хүн энэхүү уриалгыг дагаж, Мормоны Номын үнэнийг Ариун Сүнснээс гэрчилсэн гэрчийг хүлээн авсан. Энэ хичээл нь Мормоны Номын үнэн зөвийн талаарх гэрчлэлээ хүчирхэгжүүлэх зорилгоор үүнийг өдөр бүр судлах хүслээ нэмэгдүүлэхэд тань туслах зорилготой.

Өдөр бүр судраас судлахад урамшуулах. Өдөр бүр судар судлах дадал нь суралцагчдад насан туршийн адислал өгч чадна. Суралцагчдад өдөр бүр судраас суралцахын адислалуудын талаар заах арга замыг эрэлхийл.

Суралцагчийн бэлтгэл: 2016 оны 10-р сарын Ерөнхий чуулганд ахлагч Гари Э.Стивэнсоны хэлсэн “Номонд ханд мөн Их Эзэнд ханд үгийг сонсох юм уу уншихад суралцагчдыг урь.

Боломжит суралцах үйл ажиллагаа

Мормоны Номын адислал

Мормоны Номыг уншсанаар ирэх адислалуудын дараах жагсаалтыг суралцагчдад харуулж болно. Суралцагчид аль адислалыг хамгийн их хүсдэг, мөн адислал нь тэдний өдөр тутмын амьдралд хэрхэн нөлөөлөх талаар ярилц. Адислал хүлээн авахын тулд юу хийх хүсэлтэй болохоо суралцагчид хуваалцаж болно. Эдгээр адислалыг бошиглолын мэдэгдэлд жагсаасан байдаг.

Эдгээр бошиглолын мэдэгдлийн заримыг хичээлээс суралцаж болох ба зарим нь “Тайлбар ба нөхцөл байдлын талаарх мэдээлэл” хэсэгт бий.

• • Сүнсний дуу хоолойг сонсох илүү сайн чадвар

  • Амьдралын чиглэл ба асуултын хариулт

  • Уруу таталт, хорон мууг эсэргүүцэх илүү их чадвар

Эдгээр нь Мормоны Номыг судалснаар авах адислалуудын хэсэг юм.

Мормоны Номын удиртгал хэсгийн 6-р догол мөрөөс Иосеф Смитийн хэлсэн үгийг уншаад, тэмдэглэж авах талаар бод.

• Иосеф Смитийн хэлсэн үгээс танд юу нь онцгой байсан бэ?

Манай шашны тулгуур чулуу

Тулгуур чулууны үүргийг ойлгоход нь (нуман хаалганы дээд голд байрлах чулуу) суралцагчдад тусал. Нэг арга нь нуман хаалганы гол чулууны дүрсийг үзүүлж, нуман хаалганы аль чулуу хамгийн чухал болохыг сурагчдаар хэлэлцүүлэх явдал юм.

Ерөнхийлөгч Эзра Тафт Бэнсон (1899–1994) ийн заасан.

“Мормоны Ном нь бидний хийж байгаа бүх зүйлийн тулгуур чулуу болох Есүс Христийн тухай бидний гэрчлэл дэх тулгуур чулуу мөн. Энэ нь Түүний бодит байдлыг хүчтэй бөгөөд тодорхой гэрчилдэг. …

… Мормоны Ном бол гэрчлэлийн тулгуур чулуу мөн. Хэрэв тулгуур чулууг авбал нуман хаалга нурж унана, Сүм ч мөн адил Мормоны Ном үнэн учраас оршин тогтнож байгаа, эс бөгөөс оршин тогтнож чадахгүй. (Ezra Taft Benson, “The Book of Mormon—Keystone of Our Religion,” Ensign, Nov. 1986, 5, 6)

Есүс Христийг гэрчилсэн бидний тулгуур чулуу

• Мормоны Ном бол Есүс Христийг гэрчилсэн бидний тулгуур чулуу гэдэг нь юу гэсэн үг гэж та бодож байна вэ?

Мормоны Номын зохиолчид Есүс Христийг байнга гэрчилдэг.    

Дараах дасгалд суралцагчдыг оролцуулах олон арга зам бий. Бүтээлчээр хандан, суралцагч бүрийг татан оролцуулах арга замыг эрэлхийл. Нэг арга нь суралцагч бүрд Мормоны Номоос хуулбарласан хуудсыг өгч, Аврагчийн тухай эшлэл бүрийг хуудсан дээрээ тэмдэглэхийг даалгаж болно. Дараа нь эдгээр хуудсыг бусад суралцагчид үзүүлж болох юм.

Мормоны Номоос дурын хуудсыг сонгоод, тэр хуудаснаас Аврагчийн тухай дурдсан тохиолдлуудыг хайж ол.

• Та Аврагчийн тухай юу олж мэдсэн бэ?

• Таны олсон хэсгүүд Аврагчийн талаар юуг ойлгож, мэдрэхэд тань тусалсан бэ?

Есүс Христийн тухай илүү хүчтэй гэрчлэлтэй болсноор та хэрхэн адислагдах талаараа тунгаан бод. Мормоны Номыг судлах явцдаа Есүс Христийн талаарх эшлэл, Түүний тухай юу сурч мэдэж болохоо олж мэд. Ингэснээр Аврагчийн талаарх таны мэдлэг болон гэрчлэл өсөх болно.

Бидний гэрчлэлийн тулгуур чулуу

Дараах үгийн талаар өөрсдөө тунгаан бодоход суралцагчдыг урь.

• Доорх үгийн аль нь Мормоны Номын талаарх таны сэтгэлийг хамгийн сайн илэрхийлж байна вэ?

  • Хувийн гэрчлэлээ хүлээн авсан, Мормоны Ном үнэн гэдгийг баталсан хүмүүст би итгэдэг.

  • Мормоны Номыг үнэн эсэхийг би мэдэхгүй байна.

  • Мормоны Ном үнэн гэдэг гэрчлэлийг би Ариун Сүнснээс хүлээн авсан.

• Тэнгэрлэг Эцэг ямар учраас танд Мормоны Номын үнэнийг мэдүүлэхийг хүссэн гэж та бодож байна вэ?

Удиртгал хэсгийн сүүлээсээ хоёр дахь догол мөрийг болон Моронай 10:3–5-ыг уншаад, Мормоны Ном үнэн эсэхийг мэдэхийн тулд юу хийж болохоо олж мэд.

• Таны уншсанаар Мормоны Ном үнэн эсэхийг мэдэхийг хүссэн хүн юу хийх хэрэгтэй вэ?

Дараахтай төстэй зарчмыг олж тогтооход нь суралцагчдад тусал: Хэрэв би Мормоны Номыг уншиж, захиасыг нь тунгаан бодож, үүний үнэн эсэхийг Бурханаас асуувал Ариун Сүнснээс гэрчлэл хүлээн авч чадна.

Арван хоёр төлөөлөгчийн чуулгын ахлагч Үлиссэс Соарэс семинарт сурч байхад нь Мормоны Номын гэрчлэл нь хэрхэн өссөн талаар хуваалцжээ. ChurchofJesusChrist.org-оос “Мормоны Ном ирсэн нь” видеог цагийн код 12:03-аас 14:12 хүртэл үзнэ үү.

Мормоны Номын удиртгал хэсгийн сүүлийн догол мөрийг уншихдаа Мормоны Номын гэрчлэлтэй хамт өөр ямар мэдлэг ирдэг болохыг олж мэд.

• Мормоны Номыг гэрчлэх нь таны амьдралд хэрхэн нөлөөлөх вэ?

Мормоны Номын талаарх гэрчлэлээ хуваалцаж, мөн гэрчлэлээ хуваалцах хүсэлтэй суралцагчдыг урих талаар бод.

Мормоны Номыг өдөр бүр судал

Ерөнхийлөгч Рассэлл М.Нэлсон Мормоны Номыг өдөр тутам судалснаар хүртэх амлалтыг бидэнд өгсөн. Түүний үгийг доороос унших буюу ChurchofJesusChrist.org сайтаас “Мормоны Ном: Үүнгүйгээр таны амьдрал ямар байх байсан бэ?” видеог цагийн код 11:52-оос 13:05 хүртэл үзнэ үү.

Та нар өдөр бүр Мормоны Номыг залбирч судалбал өдөр бүр илүү сайн шийдвэр гаргадаг болно гэдгийг би амлаж байна. Судалж байгаа зүйлийнхээ талаар тунгаан бодох үед тэнгэрийн цонх нээгдэн, та нар асуултуудынхаа хариултыг болон хувийнхаа амьдралд удирдамж хүлээн авах болно гэдгийг би амлая. Та нар өдөр болгон Мормоны Номд өөрсдийгөө эзэмдүүлбэл порнограф, биднийг хэврэг болгох өөр бусад донтолтын салдаггүй тахлын эсрэг мөн тухайн өдрийн хилэнцийн эсрэг дархлаатай болох боломжтой гэдгийг би амлаж байна.

Би “Мормоны Ном үнэн” хэмээн бусдын бас өөрийн хэлэхийг сонсох бүрдээ “Сайхан хэрэг байна. Гэхдээ хангалтгүй” гэж дуу алдмаар санагддаг. Бид Мормоны Ном бол Бурханы үг эргэлзээгүй мөн гэдгийг зүрхнийхээ ‘угаас’ гүн гүнзгий мэдрэх хэрэгтэй [Алма13:27]. Бид үүнгүйгээр нэг ч өдөр амьдрахыг хүсэхгүй болтлоо тийм гүн гүнзгий мэдрэх ёстой. (Рассэлл М.Нэлсон, “Мормоны Ном: Үүнгүйгээр таны амьдрал ямар байх байсан бэ?,” 2017 оны 10-р сарын Ерөнхий чуулган, 55–59)

• Энэ үгээс юу танд сэтгэгдэл төрүүлсэн бэ?

• Өдөр бүр Мормоны Ном унших уриалгаас та юу мэдэж мэдэрдэг вэ?

Өдөр бүр судар судлахад тулгарах саад бэрхшээл, эдгээрийг давтан туулах арга замын талаар ярилц.

Хэрэв суралцагчид төгсөлтийн семинарын кредиттэй холбоотой хувийн судар судлах зорилгоо хараахан тодорхойлоогүй бол үүнийг хийх боломжит үе нь одоо байж болох юм. Суралцагчид хүсвэл гэр бүлийн гишүүн, Сүмийн удирдагч эсвэл семинарын багштайгаа зорилгоо хуваалцаж болно. Мормоны Номыг уншин, хувийн адислалуудаа хуваалцаж, мөн хүсэлтэй суралцагчдаар адислалыг нь хуваалцуулах талаар бод.

Тайлбар ба нөхцөл байдлын талаарх мэдээлэл

Тулгуур чулуу гэж юу вэ?

Тулгуур чулууны үүргийн талаар илүү ихийг мэдэхийг хүсвэл “Номонд ханд мөн Их Эзэнд ханд” видеог цагийн код 5:16-аас 6:41 хүртэл үзнэ үү.

Мормоны Номд Есүс Христийг хэр олонтоо дурддаг вэ?

Арван хоёр төлөөлөгчийн чуулгын ахлагч Гари Э.Стивэнсон ийн заасан.

Та нар энэхүү нандин номын хуудаснуудыг эргүүлэн уншихдаа өөрсдийн хайрт Аврагч, Их Эзэн Есүс Христийн талаар бараг хуудас бүр дээр гарахыг олж мэднэ. Түүний нэрийг аль нэг хэлбэрээр дунджаар 1.7 шүлэг тутамд дурдсан байдаг. (Гари Э.Стивэнсон, “Номонд ханд мөн Их Эзэнд ханд,” 2016 оны 10-р сарын Ерөнхий чуулган, 47)

Мормоны Номыг судалснаар би хэрхэн адислагдах вэ?

Ерөнхийлөгч Эзра Тафт Бэнсон (1899–1994) ийн гэрчилсэн.

Мормоны Ном бидэнд зөвхөн үнэнийг заадаг төдий зүйл биш юм. Энэ нь үүнээс ч илүү ихийг заадаг. Мормоны Ном Христийн тухай гэрчилдэг төдийгүй үүнээс илүү ихийг гэрчилдэг. Бас үүнээс ч илүү зүйл бий. Таныг энэ номыг нягт няхуур судалж эхлэх тэр мөчөөс эхлэн та нарын амьдрал руу урсан орох хүч энэ номд байдаг. Та нар уруу таталтыг сөрөн зогсох агуу хүчийг олох болно. Та нар хууран мэхлэгдэхээс зайлсхийх хүчийг олно. Та нар хавчиг бөгөөд нарийн зам дээр үлдэх хүчийг олно. Судруудыг “амьдралын үгс” [Сургаал ба Гэрээ 84:85] гэж нэрлэдэг бөгөөд Мормоны Номын тухайд энэ нь хамгийн үнэн билээ. Та нар эдгээр үгийн төлөө өлсөж цангасан үедээ амьдрал улам элбэг хангалуун болохыг мэдэх болно. (Ezra Taft Benson, “The Book of Mormon—Keystone of Our Religion,” Ensign, Nov. 1986, 7)

Ерөнхийлөгч Томас С.Монсон (1927–2018) ийн гэрчилсэн.

Бид бүгдээрээ Мормоны Номыг өдөр бүр залбиран судалж, тунгаан бодож байгаасай гэж би чин сэтгэлээсээ хүсэж байна. Ингэснээр бид Сүнсний дуу хоолойг сонсох, уруу таталтыг эсэргүүцэх, эргэлзээ, айдсыг ялан гарах, амьдралдаа тэнгэрийн тусламжийг хүлээн авах нөхцөл байдалд байх болно. Үүнийг би бүх зүрх сэтгэлээрээ гэрчилж байна. (Томас С.Монсон, “Мормоны Номын хүч,” 2017 оны 4-р сарын Ерөнхий чуулган, 73)

Би хэрхэн Мормоны Номыг судлах цаг гаргах вэ?

Арван хоёр төлөөлөгчийн чуулгын ахлагч Гари Э.Стивэнсон ийн заасан.

Мормоны Номыг гэрчлэлийнхээ тулгуур чулуу болгоход тань туслахын тулд би та нарт нэгэн даалгавар өгмөөр байна. Дэлхийн олон оронд залуу үеийнхэн маань өдөрт дунджаар долоон цагийг зурагт, компьютер, гар утасныхаа дэлгэцийг харан өнгөрүүлж байгааг би саяхан олж мэдлээ. Үүнийг бодоод та нар бага зэрэг өөрчлөлт хийж чадах уу? Та нар өдөр бүр дэлгэц ширтдэг цагаасаа, ялангуяа олон нийтийн сүлжээ, интернэт, тоглоом эсвэл зурагт үздэг цагийнхаа багахан хэсгийг Мормоны Номыг уншихад зориулах уу? Хэрэв миний харсан судалгаа үнэн бол та нар өдөр бүр Мормоны Ном уншихад дор хаяж 10 минутыг хялбархан гаргаж чадна. Та нар үүнийг илүү амтархан, ойлгож болохуйц байдлаар төхөөрөмж эсвэл ном хэлбэрээр уншин судлах боломжтой. (Гари Э.Стивэнсон, “Номонд ханд мөн Их Эзэнд ханд,” 2016 оны 10-р сарын Ерөнхий чуулган, 33)

Нэмэлт суралцах үйл ажиллагаа

Тулгуур чулуутай нуман хаалганы дүрсийг зур. Тулгуур чулуугаа “Мормоны Ном” гэж тэмдэглэ. Нуман хаалганы бусад чулууг Аврагчийн сайн мэдээний бүрэлдэхүүн хэсгээр нэрлэж бичихэд суралцагчдыг урь. Дараа нь Мормоны Номын гэрчлэл нь Аврагчийн сайн мэдээний бусад хэсгийн гэрчлэлийг хүлээн авахад хэрхэн тус болохыг ярилц. Шаардлагатай бол Мормоны Номын удиртгал хэсгийн сүүлчийн догол мөрийг унш.

Суралцагчид доорхтой төстэй нуман хаалга үүсгэсэн байна.