1 Нифай 8:1–18

Бурханы хайр бол бүхнээс илүү, хамгийн ихээр хүслийг татагч буюу

Бурханы хайрыг та хэрхэн дүрслэх вэ? Лихай үзэгдэлдээ үзэсгэлэнтэй мод харсан байдаг. Тэрээр уг модны жимснээс хүртэхэд амьдралдаа амсаж үзсэн бүхнээс “дээгүүр тэргүүн амтат” байжээ (1 Нифай 8:11). Мод, модны жимс нь Есүс Христийн төрөлт, амьдрал, тохинуулал, цагаатгагч золиосоор илэрсэн Бурханы хайрыг илэрхийлнэ. Уг жимс “[Лихайн] сэтгэлийг үлэмж агуу баяслаар дүүргэсэн” (1 Нифай 8:12). Энэ хичээл нь Бурханы хайр, Есүс Христийн Цагаатгалыыг мэдрэх хүслийг тань нэмэгдүүлэхэд туслах зорилготой.

Суралцагчдаа туршлагаа хуваалцахад урамшуул. Ангийн суралцагч бүрд сайн мэдээний дагуу амьдрах талаарх гэрчлэл, ойлголт, туршлагын баялаг эх сурвалж бий. Хичээлтэй холбогдолтой хувийн туршлагаа хуваалцах боломжийг суралцагчдад олго. Туршлагаасаа хуваалцах хүсэлтэй суралцагчдад талархлаа илэрхийл.

Суралцагчийн бэлтгэл: Бурханы хайрыг хүмүүс ямар арга замаар мэдэрч болох вэ? Бурханы таныг гэх хайрыг та хэзээ мэдэрсэн бэ? зэрэг асуултуудын хариултыг тунгаан бодоход суралцагчдыг урь. Суралцагчид мөн гэр бүлийнхээ гишүүдтэй эсвэл Сүмийн удирдагчтай өөрсдийг нь хайрлах Бурханы хайрыг хэрхэн мэдэрснээ ярилцаж болно.

Боломжит суралцах үйл ажиллагаа

Харанхуй ба гэрэл

Ерөнхий чуулган дээр эдгээр түүхийг хуваалцсан видеог үзүүлж болно. Та мөн харанхуйд ямар мэдрэмж төрдөг, тэндээс гэрлийг хэрхэн хүсдэг болохыг мэдрэхэд суралцагчдадаа туслах зорилгоор хувийн туршлагаасаа хуваалцаж болно. Энэ нь амьдралдаа тохиосон харанхуйг даван туулахад нь Есүс Христ тэдэнд хэрэгтэй болохыг ойлгоход суралцагчдад тусална.

24 километр урттай харанхуй хонгилыг дугуйгаар туулсан нь (Вэрн П.Станфилл, “Гэрлийг сонго,” 2015 оны 10-р сарын Ерөнхий чуулган, 44–46-г үзнэ үү).

Солт Лэйк ариун сүмийн гэрэл шөнө асаагүй байлаа (Шэрон Юбанк, “Христ бол харанхуйг гийгүүлэгч гэрэл,” 2019 оны 4-р сарын Ерөнхий чуулган, 87–91-ийг үзнэ үү).

Гүн агуйд орсон нь (Тимоти Ж.Дайкэс “Гэрэл гэрэлтэй нэгдэн нийлдэг,” 2021 оны 4-р сарын Ерөнхий чуулган, 116–119-ийг үзнэ үү).

Их Эзэний өршөөлийг хүсэн залбирч буй Лихай

Цөлд амьдарч байхдаа үзсэн үзэгдлийнхээ талаар Лихай гэр бүлийнхэнтэйгээ хуваалцжээ. Уг үзэгдэлдээ тэрээр “бүрэнхий мөн дүнсгэр аглаг буйдыг” харсан болой (1 Нифай 8:4).

Дараах шүлгийг дүрслэн бодоход нь суралцагчдад туслахын тулд удаан уншихыг эсвэл таныг унших үед нүдээ анин шүлэгт дүрсэлж буй зүйлсийг төсөөлөхийг тэднээс хүсэж болно.

Лихайд юу тохиолдсон мөн юу мэдэрснийг нь 1 Нифай 8:5–8-аас олж унш. Энэ нь уншсан зүйлээ төсөөлөн бодоход тустай. Оюун санаандаа бодит мэт дүрслэл буулгах эсвэл үйл явдлыг кино үзэж буй мэт төсөөлөхөд туслах тайлбар хэсгүүдийг хай.

• Ямар бодол эсвэл мэдрэмж Лихайг өршөөл гуйж залбирахад хүргэсэн гэж та бодож байна вэ?

Бид амьдралдаа харанхуйг мэдрэх янз бүрийн арга замын талаар мөн Их Эзэний өршөөлийг хичээнгүйлэн гуйх шалтгаануудын талаар эргэцүүлэн бодох цаг гарга.

1 Нифай 8:9–12-ыг уншихдаа Их Эзэн хэрхэн Лихайд тусалсныг олж мэд.

 

Лихайн харсан модыг төлөөлөх энгийн зураглалыг судлах тэмдэглэлдээ зур. 1 Нифай 8:10–12 дээрх Лихайн дүрслэл дээр тулгуурлан, модон дээр жимс зурж, жимсэнд нэр өг. (Жимсний нэрийн тухай нэмэлт тайлбарыг 1 Нифай 15:36, Алма 32:42-оос унш.) Зурахдаа энэ мод болон жимс нь юуг илэрхийлж болох тухай бод.

Хожим нь Нифай Лихайн харсан модны утга учир, үзэгдлийг өөрөө мэдэж, ойлгохыг хүсжээ. Нифайг заалгасан зүйлсээсээ юу ойлгосон талаараа тунгаан бодож байх үед Сүнс түүнд онгон Мариа бяцхан Есүсийг тэвэрч байгаа үзэгдлийг харуулжээ (1 Нифай 11:13, 20-ийг үзнэ үү.)

Дараах зургийг ажиглан, модны утга учрын талаар олж мэдэхийг хүсэх үед нь Нифайд энэ үзэгдлийг яагаад харуулсныг бодож үз.

1 Нифай 11:21–23-ыг уншихдаа Нифайд өөр юуг үзүүлснийг мөн модны утга учрыг ойлгоход нь энэ нь түүнд хэрхэн тусалсан тухай олж унш. Та юу сурч мэдсэн дээрээ үндэслэн модонд нэр өг.

• Бурханы хайрыг мэдрэхэд Аврагч бидэнд хэрхэн тусалдаг гэж та бодож байна вэ?

Арван хоёр төлөөлөгчийн чуулгын ахлагч Дэвид А.Бэднар ийн заасан.

Бурханы Өөрийн хүүхдүүдийг хайрладаг хайрын хамгийн агуу нотолгоо нь Их Эзэн Есүс Христийн мөнх бус үйлчлэл, цагаатгагч золиос болон Амилалт юм. Тэрхүү модны жимсийг Аврагчийн Цагаатгалын адислалуудын бэлгэ тэмдэг гэж үзэж болно. (Дэвид А.Бэднар, “Ирээд, хар,” 2014 оны 10-р сарын Ерөнхий чуулган, 126)

• Лихайн үзэгдэл, ахлагч Бэднарын хэлсэн үгээс Бурханы хайрын талаар та ямар үнэнийг тодорхойлж чадах вэ?

Суралцагчид хэд хэдэн үнэнийг тодорхойлж болно. Олж тодорхойлсон үнэн нь яагаад чухал болохыг илэрхийлэхэд нь суралцагчдаа урамшуул.

Бурханы хайр, аугаа баяр баяслыг Есүс Христээр дамжуулан мэдрэх

Эндээс бид Есүс Христээр дамжуулан илчлэгдсэн Бурханы хайр юунаас ч илүү хүсэл татам бөгөөд аугаа баяр баяслыг авчирдаг гэсэн нэг үнэнийг мэдэж авч болно.

Есүс Христийн ачаар Бурханы хайрыг хэрхэн мэдэрч болохыг танихад тань дараах үйл ажиллагаанууд тусална. Эдгээр үйл ажиллагааг хийж байхдаа Есүс Христээр мөн Түүний Цагаатгалаар дамжуулан ирдэг олон адислалыг тодорхойлоод, зурсан жимсэн дээрээ буюу дэргэд нь тэдгээрийг бич.

Дараах үйл ажиллагааг өөр өөр аргаар хийж үзэх нь үр дүнтэй байж болно. Үйл ажиллагаа 1-ийн хувьд суралцагчид хоёр хоёроороо эсвэл жижиг бүлгээр ажиллаж болно. Үйл ажиллагаа 2 дээр нэг видео сонгож, ангийнхандаа үзүүлбэл үр дүнтэй. Үйл ажиллагаа 3-ыг суралцагчид ганц, ганцаараа бие даан гүйцэтгэж болно.

Үйл ажиллагаа 1

Үзэгдэл үзсэнийхээ дараа Лихай юу гэрчилснийг 1 Нифай 10:5–6-аас унш. Мөн дараах судруудаас заримыг нь унших буюу Есүс Христийн Цагаатгалаар бид ямар адислал хүлээн авч болох тухай бусад судрыг унш. Исаиа 53:4–5; Иохан 1:17; Мозая 4:2–3; Алма 7:11–12; Хиламан 5:12

Үйл ажиллагаа 2

ChurchofJesusChrist.org дээрх дараах видеонуудын нэгийг үзэж, Есүс Христээр дамжуулан хүлээн авах адислалуудын тухай олж мэд.

 

“Христийн ачаар” (2:36)

“Аврагчаас ирэх амар амгалан” (4:09)

Үйл ажиллагаа 3

Есүс Христийн санал болгосон адислалыг хэрхэн мэдэрснээ эсвэл үүнийг бусад хүний амьдралаас хэрхэн олж харсан арга замыг тунгаан бод. Харанхуйн үед Их Эзэн таныг хэрхэн адисалж байсан арга замуудыг энд тусгаж болно.

Та юу сурч мэдсэн бэ?

Жимсний зурган дээрээ тэмдэглэсэн Есүс Христийн Цагаатгалаар дамжуулан хүлээн авч болох адислалуудыг хэсэг хугацаанд тунгаан бод. Эдгээр адислал яагаад “хүртсэн нэгнийг аз жаргалтай болгодог” 1 Нифай 8:10), “бүхнээс дээгүүр тэргүүн амтат” байсныг (1 Нифай 8:11), мөн таныг “үлэмж аугаа баяраар дүүргэдэг” (1 Нифай 8:12) тухай тунгаан бод.

Сурч мэдсэн зүйлсээ мөн энэ нь яагаад өөрсдөд нь утга учиртай байсан тухай хуваалцахыг хэдэн суралцагчаас хүс. Дараах асуултууд тус болж болох юм.

• Таныг хайрлах Бурханы хайрын талаар та юу олж мэдсэн бэ?

• Есүс Христээр дамжуулан ямар адислалыг амьдралдаа хүлээн авахыг та хамгийн их хүсэж байна вэ? Яагаад?

• Бурхан Өөрийн хүү Есүс Христийг таныг цагаатгахын төлөө илгээн, хайраа үзүүлсний улмаас та хэрхэн адислагдсан бэ?

Суралцагчдын туршлагыг сонссоныхоо дараа, Аврагчаар мөн Түүний Цагаатгалаар дамжуулан бидний хүлээн авч чадах адислал, Бурханы хайрын гэрчлэл, санаа бодлоо хуваалцаж болно.

Тайлбар ба нөхцөл байдлын талаарх мэдээлэл

Есүс Христийн Цагаатгалаар дамжуулан бид ямар ямар адислал хүлээн авч чадах вэ?

Судрууд Аврагчийн Цагаатгалаараа дамжуулан бидэнд өгдөг олон адислалыг гэрчилдэг. Бидний нүгэл өршөөгдөж, бидний зүрх сэтгэл ариусгагдаж чадна (Мозая 4:2–3-ыг үзнэ үү). Бид Бурханд нийцэж чадна (Иаков 4:11-ийг үзнэ үү). Бид “нигүүлсэл ба үнэнийг” хүлээн авдаг (Иохан 1:17). Бид ертөнцийг ялж, амар амгаланг мэдэрч чадна (Иохан 16:33). Бид зовлон зүдүүр, шаналал, уй гашуу, өвчин зовлондоо бурханлаг тусламж, эдгэрэлтийг хүлээн авч чадна (Исаиа 53:4–5; Алма 7:11-ийг үзнэ үү). Тэрээр бидний сул доройг мэддэг бөгөөд үүн дээр бидэнд тусална (Алма 7:12-ыг үзнэ үү). Тэр уруу таталтын эсрэг биднийг хүчирхэгжүүлж чадна (Сургаал ба Гэрээ 62:1-ийг үзнэ үү). Тэр бол бат бөх суурь бөгөөд хэрэв бид амьдралаа Түүн дээр суурилуулан босговоос бид хэзээ ч унахгүй (Хиламан 5:12-ыг үзнэ үү). Бүх хүн төрөлхтөн үхэгсдээс амилуулагдах болно (Мозая 16:7–8; Алма 7:12; 1 Коринт 15:22-ыг үзнэ үү). Бид Аврагчтай адил болж, мөнх амьдралыг өвлөн авч чадна (Моронай 7:48; 2 Нифай 2:27-г үзнэ үү).

Нэмэлт суралцах үйл ажиллагаа

Баяр хөөрийг Есүс Христээр дамжуулан мэдрэх тухай судрын жишээнүүд

Энэ үйл ажиллагаа нь Есүс Христээр дамжуулан илчлэгдсэн Бурханы хайр бүхнээс илүү хүсэл татам бөгөөд аугаа баяр хөөр авчирдаг гэсэн нэг үнэнийг ойлгоход суралцагчдад тусална. Мормоны Номд болон бусад сударт Бурханд хандсан, тусламж хэрэгтэй хүмүүс Түүний хайр, баяр хөөрийг хүртсэн тухай олонтоо дурддаг (амьдралын модноос жимсийг бэлгэдлээр хүртэх маягаар). Нэг жишээ уншиж, жишээнээс юу сурч мэдэж болохыг олж мэдэх цагийг суралцагчдад гаргаж өгөх талаар бодож үз.

Жишээ 1: Бенжамин хааны хүмүүс

• Их Эзэнээс эмээх айдсын учир тэд газарт унасан байв (Мозая 4:1).

• Тэд өршөөл гуйн залбирсан (Мозая 4:2).

• Тэд Есүс Христээр дамжуулан баяр хөөрөөр дүүргэгдсэн байв (Мозая 4:3).

• Хаан Бенжамин тэдний хэрхэн Бурханы хайрыг амталсныг цохон дурджээ (Мозая 4:11).

Жишээ 2: Алма

• Алма буруугаа мэдэрч, айжээ (Алма 36:11–16).

• Тэд өршөөл гуйн залбирсан (Алма 36:17–18).

• Тэрээр Есүс Христээр дамжуулан баяр баясал мэдэрсэн (Алма 36:19–21).

Жишээ 3: Иосеф Смит

• Иосеф Смит харанхуйд автаж, айдас мэдрэв (Иосеф Смит—Түүх 1:15).

• Тэр чөлөөлөгдөхийг гуйн залбирчээ (Иосеф Смит—Түүх 1:16).

• Тэнгэрлэг Эцэг, Есүс Христ хоёр Иосеф Смитэд агуу сүр жавхлантайгаар үзэгдэв (Иосеф Смит—Түүх 1:17).

• Ариун төгөлд мэдэрсэн туршлагынхаа талаар Иосеф Смит “Бодгаль минь хайраар дүүрч, би олон өдөр агуу их баяр баяслыг мэдэрсэн …” хэмээн бичжээ (josephsmithpapers.org, History, circa Summer 1832, 3).

• Иносыг оруулаад бусад жишээнд (Инос 1:1–8-ыг үзнэ үү), Хаан Лемонай (Алма 18:20–21, 41; 19:6, 12–13-ыг үзнэ үү), Лемонай хааны эхнэр (Алма 19:4, 8–11, 29–30-ийг үзнэ үү), леменчүүдийн бүлэг (Хиламан 5:23–28, 40–48-ыг үзнэ үү) мөн нифайчуудад Есүс Христ үзэгдсэн нь (3 Нифай 8:19–25; 11:1–17; 4 Нифай 1:16-г үзнэ үү) зэрэг жишээнүүд багтана.

Баяр хөөрөө бусадтай хуваалцах хүсэл

Лихай амьдралын модны жимснээс хүртэж, бодгаль нь агуу баяраар дүүрэхэд энэ баяр хөөрөө гэр бүлтэйгээ хуваалцахыг хүсэв (1 Нифай 8:12-ыг үзнэ үү). Ахлагч Дэвид А.Бэднар ”Лихай уг модны жимснээс хүртэн, агуу баяр хөөрийг мэдэрсэн даруйдаа гэр бүлийнхэндээ өгч, тэдэнд үйлчлэхийг хүсэж эхэлсэн. Ийнхүү тэрээр Христээс тусламж эрэхдээ бусдад хайр, үйлчлэлээ зориулсан юм” хэмээн заасан (“Ирээд, хар,” 2014 оны 10-р сарын Ерөнхий чуулган, 126).

Суралцагчид Аврагч Есүс Христийг дагаснаар олсон баяр баясгалангийнхаа тухай мөн энэ баяр баясгаланг гэр бүлийнхэндээ болон бусад хүнтэй хэрхэн хуваалцдаг талаараа ярилцах нь ач тустай байж болох юм.