1 Nifae 16–18

O Le Liahona: O Se Taiala i le Vao

E i ai ea se taimi e te lagona ai le leiloa ma le le mautonu e uiga i mea e tatau ona e faia pe taulai atu i ai i le olaga? Mata e faapefea ona ese lou olaga pe ana faapea e sili atu ona mafai ona e iloa le taitaiga sa taumafai le Alii e tuuina atu ia te oe? E lei leva ona tuua e le aiga o Liae Ierusalema, ae tuuina atu e le Alii ia i latou se taitaiga faateleina e ala i le Liahona. O lenei lesona e mafai ona fesoasoani ia te oe ia iloa ma mulimuli ai i le taitaiga a le Alii i lou olaga.

Taialaina o tagata aoao e saili faaaliga faaletagata lava ia. Fesoasoani i tamaiti aoga ia talitonu e mafai ona aoaoina i latou ma faagaeetiaina e le Agaga Paia. Uunaia i latou e faalatalata atu i le Tama Faalelagi i le tatalo e valaaulia ai le Agaga e aoao i latou.

Sauniuniga a le tamaitiiti aoga: Valaaulia tamaiti aoga e matau auala e tuuina mai ai e le Alii ia i latou le taitaiga ma le taiala i le faagasologa o le aso.

Gaoioiga e Ono Mafai Ona Aoao Ai

O se taiala i le vao

O le gaoioiga lenei ua faamoemoe e fesoasoani i tamaiti aoga e fesootai i le aafiaga o Liae i le tuuina atu o le Liahona. O se isi auala atonu e mo tamaiti aoga e tusi ai a latou lava ata e faavae i mea ua uma ona latou iloa e uiga i le Liahona ona faaaoga lea o le faamatalaga pe a manaomia e faalauteleina ai le malamalama.

Iloilo ni nai ata faaalia o le meafaigaluega faavavega na tuuina atu ia Liae ae lei leva ona ia taitaia lona aiga mai Ierusalema.

• O le a se mea ua e iloa e uiga i le aitema o loo faaalia i nei ata? (tagai 1 Nifae 16:10).

• O le a lona faamoemoega?

Faaaoga mea nei pe a manaomia e fesoasoani ai i tamaiti aoga ia malamalama po o le a le Liahona. E mafai foi ona fesoasoani le maimoa i le “Ua Saunia e le Alii le Liahona” (3:02), o loo maua i le ChurchofJesusChrist.org.

Ina ua uma ona faatonuina e le Alii e malaga mamao atu i le vao, sa ala ae Liae ma maua se meafaigaluega faavavega, po o se meafaitino, na saunia e le Alii. O le Liahona o se “polo apamemea e lua ona vae na tuuina atu ai faatonuga—o se tapasa—ma faatonuga faaleagaga foi ia Liae ma e na mulimuli ia te ia pe a latou amiotonu” (Taiala i Tusitusiga Paia, “Liahona,” scriptures.ChurchofJesusChrist.org).

Vaai faalemafaufau pe faape’i le ala ae i se tasi taeao ma maua i talaane o lou faitotoa se meafaigaluega e pei o le Liahona e mafai ona e faaaogaina e taiala ai oe i le faagasologa o lou aso.

Mafaufau e fai atu fesili nei, matau ia tali a tamaiti aoga e toe tagai i ai pe a uma ona suesue e tamaiti aoga pe faapefea ona faapei le Liahona o le Agaga Paia.

• O le a se mea e ono ese i lou olaga pe afai e i ai se mea e pei o le Liahona e taialaina ai oe?

• O a nisi o tulaga o loo e feagai ai i le taimi nei lea e te manaomia ai se taiala ma se taitaiga faaopoopo?

Sa faamatala e Elder David A. Bednar o le Korama a Aposetolo e Toasefululua se tasi o mafuaaga e tatau ai ona tatou saili ia malamalama atili i le ala e galue ai le Liahona. Matau o le fasifuaitau “faatusa ma se ata faaalia” e faasino i mea faitino, mea e tutupu, tala, po o tagata e fai ma sui o nisi o mea.

O le faamatalaina o le Liahona e le Tusi a Mamona, o le faatonu po o le tapasa sa faaaogaina e Liae ma lona aiga i la latou malaga i le vao, ma sa patino lava lona aofia ai i tusitusiga, o se faatusa ma se ata faaalia mo o tatou aso, ma o se lesona taua o mea e tatau ona tatou faia ina ia olioli ai i faamanuiaga o le Agaga Paia. (David A. Bednar, “Ina ia Tatou Maua Pea Lona Agaga e Faatasi ma i Tatou,” Liahona, Me 2006, 30)

O mea e tulaga tutusa ai le Liahona ma le Agaga Paia

I lau api faamaumau mo suesuega, fatu se siata e pei o lea o loo i lalo. Mafaufau e lisi nisi o mea e tulaga tutusa ai le Liahona ma le Agaga Paia ua uma ona e iloa. A o e suesue, mafaufau i mea ua e aoaoina e fesoasoani e te malamalama atili ai i le Agaga Paia ma pe faapefea ona e faaaogaina lelei lenei meaalofa i lou olaga.

Foliga o le Liahona	O tulaga e tutusa ai ma le Agaga Paia
Foliga o le Liahona	O tulaga e tutusa ai ma le Agaga Paia

Mafaufau e faaali atu se siata talitutusa ma valaaulia tamaiti aoga e faamaumau mea ua latou aoaoina e saunia ai i latou e talanoaina mea na latou maua.

Faitau mau faasino nei, ma faamaumau auiliiliga e uiga i le Liahona i le koluma agavale o lau siata. E mafai ona aofia ai le ala na galue ai le Liahona, le pogai na saunia ai, ma le mea na mafua ai ona na taofia ai lona galueaina. Ona mafaufau lea ma le agaga tatalo pe faapefea e nei auiliiliga e uiga i le Liahona ona fesootai pe faatusa i galuega a le Agaga Paia. Faamaumau tulaga e tutusa ai i le koluma taumatau o le siata. Mo se faataitaiga, i le 1 Nifae 16:10, ua tatou aoao ai faapea na faasino mai e le Liahona le ala e tatau ona o ai Liae ma lona aiga i le vao. E faapena foi, e mafai e le Agaga Paia ona faasino le ala e tatau ona tatou o i ai i le olaga.

Fuafua pe sili atu ona aoga le faitau taitoatasi e tamaiti aoga o fuaitau o mau, i ni paga, po o ni vaega toalaiti. Mo ituaiga eseese, e mafai ona e tuuina i luga ni ata se fitu o le Liahona faataamilo i le potu faatasi ma se tasi o mau faasino nei e faapipii i ata taitasi. E mafai e tamaiti aoga ona faasolosolo i le potu e iloilo ata eseese ma faamaumau aoaoga e uiga i le Liahona i a latou siata. Ona mafai lea e tamaiti aoga ona toe foi i o latou nofoaga e mafaufau loloto i mea e tulaga tutusa ai le Liahona ma le Agaga Paia ia i latou lava.

• 1 Nifae 16:10

• 1 Nifae 16:15–16

• 1 Nifae 16:18–20, 25–27

• 1 Nifae 16:28

• 1 Nifae 16:29

• 1 Nifae 18:8–13, 21–22

• Alema 37:38–42

Valaaulia tamaiti aoga e faasoa mai upumoni sa latou aoaoina e uiga i le Agaga Paia mai a latou suesuega. O faataitaiga o upumoni atonu na latou faailoa mai e aofia ai mea nei: a o tatou faalogo i uunaiga a le Agaga Paia, e mafai e le Alii ona taiala i tatou i la tatou malaga i le olaga; e galue le Agaga Paia i o tatou olaga e tusa ma le faatuatua, filiga, ma le gauai tatou te tuuina atu; ma e tuuina mai e le Agaga Paia ia i tatou le malamalama e uiga i ala o le Alii.

Afai na faaalia le siata mo le vasega, mafaufau e valaaulia tamaiti aoga e faatumu i mea sa latou aoaoina e uiga i le Liahona. Ona mafai lea ona outou talanoaina faatasi pe faapefea ona fesootai nei upumoni i le malamalama ma le faaaogaina o le meaalofa o le Agaga Paia.

• O anafea na e iloa ai pe na iloa ai e isi se tasi pe sili atu o nei upumoni e uiga i le Agaga Paia?

• E faapefea e le saili ia iloa ma mulimuli i le taitaiga mai le Agaga Paia ona aafia ai lou sootaga ma le Tama Faalelagi ma Iesu Keriso?

Faaaoga sina taimi e toe manatunatu ai i lou gafatia e maua ai le taitaiga mai le Agaga Paia ma lona aafiaga i filifiliga e te faia. Mafaufau e faamaumau soo se manatu po o ni uunaiga atonu o ia te oe.

Afai e manaomia e tamaiti aoga se fesoasoani faaopoopo e iloa ma mulimuli ai i le taitaiga a le Agaga Paia, faasoa atu faamatalaga mai le vaega o “Manatu ma Talaaga o Faamatalaga” i le faaiuga o le lesona lenei. Ma le isi, afai e lava le taimi ma o le a aoga mo tamaiti aoga, mafaufau e faaaoga le vaega o le “Gaoioiga Faaopoopo e Aoao ai”.

Molimau atu i le taua o le faatagaina o le Agaga Paia e taitaia o tatou olaga. E mafai foi e tamaiti aoga ona faasoa mai a latou molimau ma aafiaga.

Manatu ma Talaaga o Faamatalaga

E faapefea ona pei le Liahona o le Agaga Paia?

Na aoao mai Elder David A. Bednar o le Korama o Aposetolo e Toasefululua:

E faapei foi ona faamanuiaina Liae i ona po anamua, e faapena foi ona tofu i tatou i nei ona po ma se tapasa faaleagaga lena e mafai ai ona taitaiina ma faatonutonu i tatou i la tatou malaga i le olaga nei. …

“A o taitasi i tatou ma fetaomi atu i luma i le ala o le ola, tatou te maua le taitaiga mai le Agaga Paia e faapei foi ona taitaiina Liae e ala i le Liahona. …

E patino ona galue le Agaga Paia i o tatou olaga e faapei foi ona faia e le Liahona mo Liae ma lona aiga, e tusa ai ma lo tatou faatuatua ma le filiga ma le usiusitai. (David A. Bednar, “Ina ia Tatou Maua Pea Lona Agaga e Faatasi ma i Tatou,” Liahona, Me 2006, 30–31)

E faapefea ona ou iloa atili le Agaga Paia i lo’u olaga?

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

E le talia e le Agaga lo tatou gauai atu e ala i le leotetele po o le luluina o i tatou i se faamalosi. Ae e musumusu mai. E pa’i mai ma le malū lea afai tatou te pisi tele, o le a lē mafai lava ona tatou lagonaina. …

E mai lea taimi i lea taimi o le a ia uunai mai ma le mausali ia tatou gauai atu ai. Ae o le tele lava o taimi, afai tatou te le lagonaina le lagona malu, o le a aluese le Agaga ma faatali sei tatou o atu e saili ma faalogologo ma faapea atu i la tatou ala ma uiga faaalia, e pei o Samuelu o anamua, “Fetalai mai [le Alii e], aua o loo faalogologo atu lau auauna.” (1 Samu. 3:10.) (Boyd K. Packer, “The Candle of the Lord,” EnsignIan. 1983, 53)

Gaoioiga Faaopoopo e Aoao Ai

O nisi faatusatusa i le Liahona

Valaaulia tamaiti aoga e faailoa mai isi meafaigaluega e faaopoopo i le Agaga Paia e faaaoga e le Alii e tuuina mai ai ia i tatou le taitaiga. O faataitaiga e aofia ai faamanuiaga faapeteriaka, o tusitusiga paia, ma fautuaga mai matua po o taitai o le Ekalesia. E mafai e tamaiti aoga ona talanoaina auala e talitutusa ai punaoa faaopoopo nei ma le Liahona.

O le Liahona ma faamanuiaga faapeteriaka

Afai o le a aoga mo tamaiti aoga se talanoaga e uiga i faamanuiaga faapeteriaka, mafaufau e faasino atu i le faamatalaga i le “Faamanuiaga Faapeteriaka” (Autu o le Talalelei, topics.ChurchofJesusChrist.org).

O saunoaga nei a Peresitene Thomas S. Monson (1927–2018) ma Peresitene Bonnie H. Cordon, Peresitene Aoao o Tamaitai Talavou, e mafai foi ona fesoasoani.

O le Alii lava lea e tasi na saunia se Liahona mo Liae ua saunia mo oe ma au i aso nei se meaalofa e tulagaese ma taua e tuuina mai ai le taitaiga i o tatou olaga, e faailoga ai tulaga lamatia i lo tatou saogalemu, ma faatulaga le ala, e oo lava i le ala saogalemu—e le mo se nuu folafolaina, ae i lo tatou aiga faalelagi. O le meaalofa lea ou te faatatau i ai ua ta’ua o lou faamanuiaga faapeteriaka. …

… O lou faamanuiaga e le tatau ona gaugau ma teu lelei. E le tatau ona faavaa pe faalauaiteleina. Ae, e tatau ona faitauina. E tatau ona e fiafia i ai. E tatau ona mulimulitaia. O lou faamanuiaga faapeteriaka o le a tauaveina oe i po sili ona pogisa. O le a taitaia oe i tulaga lamatia o le olaga. … O lou faamanuiaga faapeteriaka o se Liahona patino ia te oe e faatulaga ma taiala ai lou ala. (Thomas S. Monson, “O Lou Faamanuiaga Faapeteriaka: O se Liahona o le Malamalama,” EnsignNov. 1986, 65–66)

Saili lou faamanuiaga faapeteriaka, tafi ese le pefu pe afai e tatau ai, ae suesue soo i ai. Afai e le’i iai, ia fai—i se taimi vave. Aua nei faatuai ona saili po o a mea o finagalo le Alii e ta’u atu nei ia te oe e uiga po o ai oe. (Bonnie H. Cordon, “Sau ia Keriso ae Aua le Sau Nao Oe,” Liahona, Nov. 2021, 10)

Afai e lei mauaina e tamaiti aoga o latou faamanuiaga faapeteriaka, e mafai ona e valaaulia i latou e mafaufau ma le agaga tatalo ia maua se faamanuiaga ma ia talanoaina lenei mea ma o latou matua po o taitai o le Ekalesia.