2 Nephi 4

Awit ni Nephi

Lahat ay nahaharap sa tukso at nalulungkot o pinanghihinaan ng loob kung minsan. Ganito rin ang nadama ng propetang si Nephi. Matapos maranasan ang pagkamatay ng kanyang amang si Lehi, at pagharap sa kanyang galit na mga kapatid, nagsulat si Nephi tungkol sa ilan sa kanyang pinakamatitinding damdamin. Ipinahayag niya ang kanyang kagalakan gayundin ang kanyang kalungkutan. Ipinapakita sa atin ng kanyang halimbawa kung paano tayo makababaling sa Panginoon kapag nararanasan natin ang mga hamon ng mortalidad. Ang lesson na ito ay makatutulong sa iyo na paglabanan ang tukso at panghihina ng loob nang may pananampalataya sa pamamagitan ng pagbaling sa Panginoon.

Pag-anyaya sa mga mag-aaral na ibahagi ang kanilang mga nadarama, karanasan, at patotoo. Bawat indibiduwal sa iyong klase ay makapag-aambag. Kapag tinulungan mo ang mga estudyante na ibahagi ang kanilang mga nadarama, karanasan, at patotoo, mapagpapala nila ang buhay ng mga nakapaligid sa kanila. Lahat ng nasa klase ay mapapasigla ng Espiritu Santo.

Paghahanda ng estudyante: Maaari mong anyayahan ang mga estudyante na humingi ng tulong sa Diyos sa tukso o hamong kinakaharap nila.

Mga Posibleng Aktibidad sa Pag-aaral

Mga hamon ng mortalidad

Isang paraan upang simulan ang lesson ay talakayin ang mga hamon sa buhay na karaniwan sa lahat. Halimbawa, lahat tayo ay nahaharap sa tukso at nalulungkot o pinanghihinaan ng loob kung minsan. Maaari mong bigyan ng oras ang mga estudyante upang tahimik nilang mapag-isipan ang mga sumusunod na tanong. Maaari ding isulat ng mga estudyante sa kanilang journal ang isang partikular na tukso o dahilan kung bakit pinanghihinaan sila ng loob.

• Sa iyong palagay, bakit natutukso ang lahat at kung minsan ay pinanghihinaan ng loob?

• Mula 1 hanggang 10, gaano mo kahusay na nakakayanan ang mga paghihirap at problemang ito?

• Paano mapagpapala ang iyong buhay kung mas napaglabanan mo ang tukso at panghihina ng loob?

Awit ni Nephi

Basahin ang 2 Nephi 4:12–13, 18, at alamin ang ilan sa mga hamong naranasan ni Nephi.

• Sa iyong palagay, ano ang nadama ni Nephi sa mga hamong ito?

Ang mga talatang 2 Nephi 4:16–35 ay madalas tukuyin bilang awit ni Nephi. Ang awit ay “isang tula o himnong binigyang-inspirasyon.” (Gabay sa mga Banal na Kasulatan, “Awit,” https://www.churchofjesuschrist.org/study/scriptures/gs/psalm?lang=tgl). Isinulat ni Nephi sa mga talatang ito ang tungkol sa ilan sa kanyang pinakamatitinding damdamin. Ibinahagi niya ang kanyang mga hamon at kung paano niya pinaglabanan ang tukso at panghihina ng loob. Habang pinag-aaralan mo ang mga talatang ito, maghangad ng inspirasyon sa pamamagitan ng Espiritu Santo upang malaman kung ano ang magagawa mo sa mga partikular na hamong kinakaharap mo.

Maaari mong alalahanin ang apat na hakbang upang matulungan kang ihalintulad ang mga banal na kasulatan sa iyong buhay:

1. Maghanap ng mahahalagang detalye.

2. Ikumpara ang iyong buhay.

3. Tumuklas ng mahahalagang aral.

4. Tukuyin kung paano personal na ipamumuhay ang mga aral.

Bigyan ang mga estudyante ng kopya ng handout na sasagutan nila nang mag-isa. Ang isa pang opsiyon ay sagutan ang unang dalawang hanay bilang isang klase at pagkatapos ay hatiin ang huling tatlong hanay sa mga grupo at sabihin sa bawat grupo na ibahagi ang natutuhan nila.

Maaaring hikayatin ang mga estudyante na magsulat ng mga personal na ideya at damdamin nila tungkol sa mga talatang ito sa kanilang banal na kasulatan.

© 2023 by Intellectual Reserve, Inc. All rights reserved. 2 Nephi 4:16–35. Maaari mong itanong ang ilan sa mga sumusunod.

Ang ilan sa mga pahayag na matatagpuan sa bahaging “Komentaryo at Pinagmulang Impormasyon” ay maaaring makaambag sa talakayan.

Ang Awit ni Nephi at Ako (2 Nephi 4:16–35)

Manwal ng Aklat ni Mormon para sa Seminary Teacher (2024)—“2 Nephi 4: Awit ni Nephi”

	Karanasan ni Nephi	Karanasan Ko
2 Nephi 4:16	Karanasan ni Nephi Ano ang nadarama ni Nephi?	Karanasan Ko Kailan ako nakadama ng katulad nito?
2 Nephi 4:17–19	Karanasan ni Nephi Ano ang nadarama ni Nephi?	Karanasan Ko Kailan ako nakadama ng katulad nito?
2 Nephi 4:20–25	Karanasan ni Nephi Anong mga karanasan sa Diyos ang nakatulong kay Nephi upang paglabanan ang tukso at panghihina ng loob nang may pananampalataya?	Karanasan Ko Ano ang ilang espirituwal na karanasan na naaalala ko kapag ako ay natutukso o pinanghihinaan ng loob?
2 Nephi 4:26–29	Karanasan ni Nephi Anong mga uri ng mga ideya ang nakatulong kay Nephi na maging malakas kapag siya ay natutukso o pinanghihinaan ng loob?	Karanasan Ko Anong mga uri ng mga ideya ang makatutulong sa akin na maging malakas kapag ako ay natutukso o pinanghihinaan ng loob?
2 Nephi 4:30–35	Karanasan ni Nephi Ano ang hinangaan ko sa panalangin ni Nephi?	Karanasan Ko Paano ko tutularan ang halimbawa ni Nephi sa sarili kong mga panalangin?

• Anong mga talata o parirala sa 2 Nephi 4 ang mahalaga para sa iyo? Bakit?

• Ano ang natutuhan mo tungkol sa Tagapagligtas mula sa 2 Nephi 4?

• Paano nakaimpluwensya ang paghahalintulad ng mga banal na kasulatan sa iyong buhay sa pag-aaral mo ng 2 Nephi 4?

• Ano ang ilang alituntuning natukoy mo?

  Bilang bahagi ng talakayan, tulungan ang mga estudyante na matukoy ang iba’t ibang alituntunin. Halimbawa:

  • Ang pagtitiwala sa Panginoon at pag-alala sa mga nakaraang espirituwal na karanasan ay makatutulong sa akin na paglabanan ang tukso at panghihina ng loob nang may pananampalataya.

  • Kung taimtim akong mananalangin sa Diyos, matatanggap ko ang Kanyang tulong kapag ako ay natutukso at pinanghihinaan ng loob.

• Sa iyong palagay, paano makatutulong sa iyo ang mga alituntuning ito upang bumaling ka sa Panginoon kapag natutukso ka o pinanghihinaan ng loob?

Ang aking planong mapaglabanan ang tukso at panghihina ng loob

Maaari mong anyayahan ang mga estudyante na pag-usapan kung kailan sila bumaling sa Panginoon sa mahirap na panahon.

Tularan ang halimbawa ni Nephi at sumulat ng sarili mong awit. Maaaring makatulong ang ilan sa mga sumusunod na tanong:

• Anong alituntunin, turo, o (mga) talata mula sa 2 Nephi 4 ang maiaangkop mo sa iyong buhay?

• Paano mo ipamumuhay ito?

• Sa iyong palagay, paano makatutulong sa iyo ang paggawa nito upang bumaling ka sa Tagapagligtas?

• Kapag humihirap ang buhay, paano ka tutugon nang may pananampalataya sa Tagapagligtas?

Hilingin sa mga handang estudyante na ibahagi ang kanilang awit sa klase. Maaari kang magpatotoo tungkol sa Tagapagligtas. Maaaring makatulong na ipaalala sa mga estudyante na mahaharap sila sa mga balakid at kadalasan ay kailangang paulit-ulit na pagsikapang madaig ang mga ito. Gayunman, sa pamamagitan ng biyaya ni Jesucristo, makatatanggap sila ng lakas na madaig o matiis ang lahat ng bagay.

Komentaryo at Pinagmulang Impormasyon

Paano makatutulong sa akin ang pag-alala sa mga nakaraang espirituwal na karanasan?

Itinuro ni Elder Neil L. Andersen ng Korum ng Labindalawang Apostol:

Kasama ng mapayapang patnubay na natatanggap natin mula sa Espiritu Santo, paminsan-minsan, makapangyarihan at napakapersonal na tinitiyak ng Diyos sa ating lahat na kilala at mahal Niya tayo at na pinagpapala Niya tayo nang personal at hayagan. Sa gayon, sa mga sandali ng ating paghihirap, ipinapaalala sa atin ng Tagapagligtas ang mga karanasang ito sa ating isipan. …

Maaari ninyong isipin ang inyong mga espirituwal na alaala sa ganitong paraan. Lakip ang patuloy na panalangin, determinasyong tuparin ang ating mga tipan, at kaloob na Espiritu Santo, tumatahak tayo sa landas ng ating buhay. Kapag pinadidilim ng personal na paghihirap, pagdududa, o panghihina ng loob ang ating landas, o kapag ang mga sitwasyon sa mundo na hindi natin kontrolado ay nagiging dahilan para mag-alala tayo tungkol sa hinaharap, ang mga alaala na espirituwal na nagpapatibay mula sa ating aklat ng buhay ay parang kumikinang na mga bato na nililiwanagan ang daang tinatahak natin, na tinitiyak sa atin na kilala tayo ng Diyos, mahal Niya tayo, at isinugo Niya ang Kanyang Anak na si Jesucristo upang tulungan tayong makauwi. (Neil L. Andersen, “Mga Alaala na Espirituwal na Nagpapatibay,” Liahona, Mayo 2020, 19, 21)

Itinuro ni Elder Ronald A. Rasband ng Korum ng Labindalawang Apostol:

Hinihikayat ko kayo ngayon na gunitain, lalo na sa panahon ng krisis, kung kailan ninyo nadama ang Espiritu at malakas ang inyong patotoo; alalahanin ang mga espirituwal na pundasyong naitatag ninyo. (Ronald A. Rasband, “Baka Iyong Malimutan,” Liahona, Nob. 2016, 114)

Paano ko mapaglalabanan ang tukso at panghihina ng loob?

Itinuro ni Elder Jeffrey R. Holland ng Korum ng Labindalawang Apostol:

Kapag naharap tayo sa … mga tukso sa ating panahon, dapat nating ipahayag, tulad ng ginawa ng binatang si Nephi, “[Hindi ako] mag[bi]bigay-puwang kailanman sa kaaway ng aking kaluluwa” [2 Nephi 4:28]. Maitataboy natin ang masama. Kung talagang gusto natin, ang kaaway na iyan ay maitataboy ng mapantubos na kapangyarihan ng Panginoong Jesucristo. (Jeffrey R. Holland, “Huwag nang Magbigay-Puwang Kailanman sa Kaaway ng Aking Kaluluwa,” Liahona, Mayo 2010, 46)

Itinuro ni Elder Allen D. Haynie ng Pitumpu:

Mga kapatid, kung kayo ay pinanghihinaan ng loob o nagtatanong kung makakaahon ba kayo sa espirituwal na hukay na hinukay ninyo, mangyaring alalahanin Siya na tumayo “sa pagitan [natin] at sa katarungan,” na “puspos ng habag sa mga anak ng tao,” at umako ng ating mga kasamaan at kasalanan at “tinugunan ang mga hinihingi ng katarungan” [Mosias 15:9]. Sa madaling salita, tulad ng ginawa ni Nephi noong siya ay nag-alinlangan, dapat lamang ninyong alalahanin “kung kanino kayo nagtiwala,” [2 Nephi 4:19], maging kay Jesucristo, [at pagkatapos ay magsisi] at muling makaranas ng “ganap na kaliwanagan ng pag-asa” [2 Nephi 31:20]. (Allen D. Haynie, “Alalahanin Kung Kanino Tayo Nagtitiwala,” Liahona, Nob. 2015, 123)

Mga Karagdagang Aktibidad sa Pag-aaral

2 Nephi 4:17, 19. “Gayunpaman”

Ituon ang pansin ng mga estudyante sa salitang “gayunpaman” sa 2 Nephi 4:17, 19. Pansinin ang pagbabago sa mga damdaming ipinahayag mismo ni Nephi bago at pagkatapos ng salitang ito. Talakayin kung ano ang matututuhan ng mga estudyante mula sa mga karanasan sa buhay at halimbawa ni Nephi.

2 Nephi 4:17. “O kahabag-habag akong tao”

Maaaring makinabang ang mga estudyante sa pagkukumpara kay Nephi at kay Apostol Pablo. Tingnan sa 2 Nephi 4:17–19; Roma 7:22–25; 2 Corinto 12:7–10. Talakayin kung paano tayong lahat matutulungan ni Jesucristo na madaig ang ating kahinaan. Maaaring makatulong na ipaliwanag na kapag mas napalapit tayo sa Ama sa Langit, mas maingat tayo upang hindi malihis mula sa kabutihan (tingnan sa Bruce C. Hafen, “Ang Pagbabayad-sala: Lahat para sa Lahat,” Liahona, Mayo 2004, 97–99).

2 Nephi 4:15. “Ang aking kaluluwa ay nalulugod sa mga banal na kasulatan”

Sabihin sa mga estudyante na magbahagi ng mga banal na kasulatan na ikinalulugod nila. Maaaring isulat ng mga estudyante sa pisara ang mga reperensyang banal na kasulatan at maaari nilang talakayin kung bakit makabuluhan sa kanila ang mga scripture passage na iyon. Bukod pa rito, maaaring anyayahan ang mga estudyante na magbahagi ng isang piling talata sa pamilya o mga kaibigan sa home evening, sa text message, o sa social media.

2 Nephi 4:15–16. “Ang mga bagay ng aking kaluluwa”

Maaari mong anyayahan ang mga estudyante na magnilay-nilay at isulat ang mga bagay ng kanilang kaluluwa. Upang simulan ang aktibidad na ito, maaari mong ibahagi ang pahayag na ito ni Elder Ronald A. Rasband ng Korum ng Labindalawang Apostol, kung saan binanggit niya si Nephi:

“‘Masdan, ang aking kaluluwa ay nalulugod sa mga bagay ng Panginoon; at ang aking puso ay patuloy na nagbubulay sa mga bagay na aking nakita at narinig’ [2 Nephi 4:16; nilagyan ng diin].

“Mula sa mga salita ni Nephi ay maitatanong ‘Ano ang mga bagay na pinagninilayan ninyo?’ ‘Ano ang mga bagay na talagang mahalaga sa inyo?’ ‘Ano ang mga bagay ng inyong kaluluwa?’” (“Ang mga Bagay ng Aking Kaluluwa,” Liahona, Nob. 2021, 39).

Ang awit ni Nephi sa awitin

Ang mga salita sa awit ni Nephi ay nilapatan ng musika at kinanta sa pangkalahatang kumperensya. Maaari mong ipatugtog ang awitin sa klase at anyayahan ang mga estudyante na ikumpara ang mga titik ng himno sa mga damdamin at ideyang nakasaad sa 2 Nephi 4:16–35.