2 Nefi 5:1–9

Paralajmërimet e Perëndisë

Kjo duhet t’ia ketë thyer zemrën Nefit. Për shkak se Lamani dhe Lemueli planifikonin ta vrisnin, Nefi u paralajmërua t’i merrte “ata që besonin në paralajmërimet dhe zbulesat e Perëndisë” (2 Nefi 5:6) dhe të arratiseshin për në vendin e shkretë. Nganjëherë, edhe ne mund të paralajmërohemi nga Zoti për rreziqe fizike dhe shpirtërore përreth vetes. Ky mësim mund të të ndihmojë t’i ndjekësh paralajmërimet që Zoti jep me dashuri për të të mbrojtur.

Nxitja e një mjedisi me pranim dhe respekt. Kultivoni një ndjesi përkatësie në secilin nxënës duke e pranuar çiltërsisht se çdo nxënës është i nevojshëm, duke çmuar një larmi formimesh dhe rrethanash dhe duke u siguruar mundësi nxënësve që të marrin forcë nga njëri-tjetri dhe Shpëtimtari. Mundet edhe t’i ndihmoni nxënësit që ta kuptojnë se ata luajnë një rol në punën e Perëndisë.

Përgatitja e nxënësve: Merreni parasysh t’i ftoni nxënësit të vijnë në klasë të përgatitur për të treguar një përvojë kur dikush u dha atyre një paralajmërim për të cilin qenë mirënjohës.

Veprimtari të Mundshme të të Mësuarit

Paralajmërimet

Merrni parasysh të paraqitni disa shenja paralajmëruese dhe të bëni pyetje si ato në vijim për t’i ndihmuar nxënësit të diskutojnë se si paralajmërimet mund të jenë bekime.

Mundet edhe të merrni parasysh të vini diçka të ndotur ose që ngjit në njërën nga karriget dhe të vendosni shenja paralajmërues kudo përreth asaj karrigeje përpara orës mësimore.

• Pse shenjat paralajmëruese si kjo janë të rëndësishme?

• Pse disa njerëz mund t’i shohin shenjat paralajmëruese me mirënjohje? me irritim?

• Kur ke qenë mirënjohës që u paralajmërove?

Ndërsa studion sot, mendo rreth arsyes pse Perëndia na dërgon paralajmërime. Përpiqu gjithashtu që t’i kujtosh mënyrat e ndryshme se si mund të kesh reaguar ndaj paralajmërimeve që Ai ka dhënë.

Paralajmërimet e Perëndisë për Nefin

Lexo te 2 Nefi 5:1–9, duke kërkuar një paralajmërim që Zoti i dha Nefit pasi u bë udhëheqësi shpirtëror i familjes pas vdekjes së Lehit.

Përpiqu ta vësh veten në vend të njërit nga adoleshentët nefitë, familja e të cilit u ftua të ndiqte Nefin.

• Pse mund të ketë qenë e vështirë të largoheshe?

• Çfarë do të thoshte për ty të merrje vendimin për ta ndjekur Nefin në vendin e shkretë?

• Sipas vargut 6, çfarë e përcaktoi se kush shkoi me të?

Një e vërtetë që mund të mësojmë nga ky rrëfim, është se Perëndia mund të na udhëheqë larg rrezikut nëse zgjedhim t’u besojmë zbulesave të Tij dhe t’ua vëmë veshin profetëve të Tij.

Një diskutim në klasë mund t’i ndihmojë nxënësit të ndihen mirënjohës që Perëndia na do aq sa të na paralajmërojë për rreziqet.

Për të lehtësuar një diskutim, mund t’i inkurajoni nxënësit të përpiqen të imagjinojnë se si bota (ose jeta e tyre personale) do të ishte e ndryshme nëse Perëndia nuk do të na paralajmëronte kurrë, për asgjë. Mandej ftojini nxënësit që t’ia tregojnë mendimet e tyre klasës. Ndërsa nxënësit i diskutojnë mendimet e tyre, ndihmojini ata të kuptojnë se paralajmërimet e Perëndisë janë një shenjë e dashurisë dhe e kujdesit të Perëndisë për ne. Materiali filmik vijues dhe disa nga pyetjet vijuese mund të përdoren për ta çuar më tej diskutimin si klasë.

• Pse mendon se kemi nevojë për paralajmërimet e Perëndisë në kohën tonë?

• Cilat janë mënyrat e ndryshme në të cilat Perëndia ua bënë të njohura paralajmërimet e Tij njerëzve në përgjithësi dhe individëve për rrethanat e tyre specifike?

• Cilat janë arsyet pse dikush mund të zgjedhë të mos i ndjekë paralajmërimet e Perëndisë dhe si mund t’i përgjigjeshe dikujt që jep një nga ato arsye?

• Si je mbrojtur ti ose njerëzit e tu të dashur nga ndjekja e paralajmërimeve të Perëndisë? Jep një shembull specifik nëse të vjen një i tillë ndër mend.

Perëndia na paralajmëron nëpërmjet profetëve të Tij

Një nga mënyrat se si Perëndia plot dashuri na paralajmëron për rrezikun, është nëpërmjet profetëve të Tij të gjallë. Për shembull, te 2 Nefi 5:5–6, shumë nga familja e Nefit ia vunë veshin paralajmërimit që iu dha atij nga Zoti për t’u larguar në vendin e shkretë. (Shih edhe tek Amos 3:7.) Ne gjithashtu gjejmë shumë paralajmërime profetike nga Perëndia për ne në shkrimet e Tij të shenjta.

Shpenzo ca kohë për të kërkuar në shkrimet e shenjta për paralajmërime që na i ka dhënë Perëndia nëpërmjet profetëve të Tij në të shkuarën. (Disa shembuj përfshijnë vargjet Alma 41:10; Moroni 10:30, 32; Doktrina e Besëlidhje 63:57–58; 89:1–4.)

Merreni parasysh t’i lejoni nxënësit të gjejnë vetë paralajmërime nga Perëndia në shkrimet e shenjta. Mund t’u jepni shembujt e mësipërm ose shembuj të tjerë në se kanë nevojë për ndihmë.

Paraqitni pyetjet vijuese ndërkohë që ata studiojnë. Më pas, ftojini ata që t’i japin përgjigjet e tyre në grupe të vogla.

• Çfarë paralajmërimesh gjete që mendon se i nevojiten më së shumti botës sot?

• Cilat mendon se janë pasojat për bindjes ose shpërfilljen e atyre paralajmërimeve?

• Në ç’mënyrë janë këto paralajmërime një shenjë e dashurisë së Perëndisë?

• Si do të të ndihmojë bindja ndaj paralajmërimeve që gjete, që të bëhesh më i ngjashëm me Jezu Krishtin?

• Si mund të na largojë nga Ai shpërfillja e paralajmërimeve të Tij?

Paralajmërimet e Perëndisë për ty

Merreni parasysh të tregoni një përvojë vetjake kur u bekuat nga ndjekja e një paralajmërimi nga Perëndia.

Më pas, jepuni nxënësve kohë të mjaftueshme në heshtje për të përsiatur dhe shkruar mendimet dhe ndjenjat e tyre në ditarët e tyre të studimit për ta mbyllur mësimin. Thënia dhe nxitjet vijuese mund të jenë të dobishme për t’i përgatitur nxënësit përpara se të shkruajnë.

Presidenti Bojd K. Paker (1924–2015), i Kuorumit të Dymbëdhjetë Apostujve, dha mësim:

“Nuk pritet që ju t[a kaloni] jetë[n] pa bërë gabime, por ju nuk do të bëni gabime të mëdha pa qenë të paralajmëruar më parë nga nxitjet e Frymës së Shenjtë. Ky premtim vlen për të gjithë anëtarët e Kishës.” (Bojd K. Paker, “Këshillë për Rininë”, Liahona, nëntor 2011, f. 18)

• A ka qenë Ati Qiellor duke më paralajmëruar për diçka specifike në jetën time nëpërmjet mendimeve ose ndjenjave nga Shpirti?

• A ka paralajmërime specifike nga Perëndia që i kam marrë nëpërmjet udhëheqësve të Kishës, prindërve, bekimeve të priftërisë ose mënyrave të tjera? Si po eci me ndjekjen e tyre?

• Cila është një gjë që mendoj se Ati Qiellor dëshiron që unë të bëj me atë që mësova ose ndjeva sot?

Komente dhe Informacion për Rrethanat

Si mund të gjej siguri shpirtërore në botë sot?

Presidenti Henri B. Ajring, i Presidencës së Parë, dha mësim:

“Duket se nuk ka fund dëshira e Shpëtimtarit për të na udhëhequr drejt sigurisë. Dhe ka qëndrueshmëri në mënyrën se si Ai na e tregon shtegun. Ai thërret me më shumë se një mënyrë që ajo të mund të mbërrijë tek ata që janë të gatshëm ta pranojnë. Dhe ato mënyra gjithmonë përfshijnë dërgimin e mesazhit me anë të gojës së profetëve të Tij, kurdoherë që njerëzit janë të cilësuar për të pasur profetë të Perëndisë mes tyre. Ata shërbëtorë të autorizuar kanë gjithmonë përgjegjësinë të paralajmërojnë njerëzit, duke u treguar rrugën drejt sigurisë.” (Henry B. Eyring, “Finding Safety in Counsel”, Ensign, maj 1997, f. 24.)

Presidenti Bojd K. Paker (1924–2015), i Kuorumit të Dymbëdhjetë Apostujve, dha mësim:

“Si shërbëtor i Zotit, unë ju premtoj se ju do të jeni të mbrojtur dhe të ruajtur nga sulmet e kundërshtarit nëse ju do t’u vini veshin nxitjeve që vijnë nga Fryma e Shenjtë.” (Bojd K. Paker, “Këshillë për Rininë”, Liahona, nëntor 2011, f. 18)

Veprimtari Plotësuese të të Mësuarit

Zotërimi doktrinor: Ezekiel 3:16–17

Kur të flisni rreth rolit të profetëve për të paralajmëruar, merreni parasysh të lexoni vargjet Ezekiel 3:16–17 dhe të diskutoni se si profetët janë si roja. Ftojini nxënësit të tregojnë pse këndvështrimi i një profeti dhe mënyra si ai i sheh situatat mund të ndryshojë nga mënyra si i shohin njerëzit e tjerë.

Shkëputja nga ligësia

Ftojini nxënësit të japin shembuj nga shkrimet e shenjta ku Zoti paralajmëron një person ose një grup njerëzish që të shkëputen nga një situatë e ligë. (Shembujt mund të përfshijnë vargjet 1 Nefi 2:1–2; Omni 1:12–13; ose Ethëri 9:2–3.)

Ftojini nxënësit të japin shembuj në kohën tonë të rasteve kur më e mira do të ishte të shkëputeshim nga situata shpirtërisht të rrezikshme. Ftoni vullnetarë të tregojnë se si janë bekuar nga ndjekja e një paralajmërimi nga Perëndia për t’u shkëputur nga një situatë e tillë.

Mund të jetë gjithashtu e dobishme të diskutoni mënyra se si ata mund të marrin ndihmë dhe mbrojtje nga Perëndia nëse nuk është e mundur të largohen nga një situatë e rrezikshme shpirtërisht për pak kohë.

Për Forcën e Rinisë (broshurë, 2011)

Në pjesën e mësimit “Perëndia na paralajmëron nëpërmjet profetëve të Tij”, merrni parasysh t’i ftoni nxënësit të gjejnë dhe shpërndajnë paralajmërime nga profetët e kohës së sotme në materialin Për Forcën e Rinisë (broshurë, 2011) për të cilat janë mirënjohës.

Ne mund t’u mirëbesojmë paralajmërimeve të Perëndisë

Merrni parasysh të sillni dy enë në klasë, njëra me diçka të mirë brenda dhe tjetra me diçka edhe më të mirë brenda.

Thuajini një vullnetari që ai mund ta marrë atë që është brenda njërës enë, por duhet të zgjedhë pa e ditur se ç’ka brenda tyre. Kërkojini vullnetarit të largohet nga dhoma për një minutë përpara se të zgjedhë. Ndërkohë që ai ose ajo ka ikur, tregojuani disa nxënësve se çfarë ka brenda secilës enë. Udhëzojini disa prej tyre që ta paralajmërojnë nxënësin kundër zgjedhjes së asaj të mirës dhe disa prej tyre që ta paralajmërojnë kundër zgjedhjes së asaj më të mirës. Më pas, ftojeni vullnetarin ose vullnetaren të kthehet në dhomë dhe lejojini nxënësit të përpiqen të ndikojnë te vendimi i tij ose i saj. Pasi vullnetari të zgjedhë, pyeteni pse ishte e vështirë ta dinte se mendimet dhe paralajmërimet e cilit duhej të dëgjonte.

Ftojini nxënësit të tregojnë gjëra që bota mendon se janë të sigurta dhe të mira, por për të cilat Zoti na ka paralajmëruar nëpërmjet profetëve të Tij. Ftojini nxënësit të tregojnë pse mund t’u mirëbesojmë paralajmërimeve dhe këndvështrimit të Perëndisë dhe jo mendimeve të njerëzve në botë.