2 Nefi 3

“Një Shikues të Zgjedhur do të Ngre Unë”

Kapitulli 3 te 2 Nefi shënon fjalët që Lehi i tha në prag të vdekjes, birit të tij më të vogël, Jozefit. Lehi citoi një profeci të bërë nga Jozefi i Egjiptit përafërsisht 1700 vjet përpara lindjes së Krishtit. Imagjinoje habinë e Jozef Smithit kur zbuloi se ai ishte subjekti i një pjese të madhe të profecisë së bërë nga Jozefi i Egjiptit. Qëllimi i këtij mësimi është të të ndihmojë ta thellosh dëshminë tënde për thirrjen hyjnore të Profetit Jozef Smith.

Mësimdhënia e shkrimeve të shenjta dhe fjalëve profetike me bindje dhe qëllim. Shkrimet e shenjta dhe fjalët e profetëve dhe të apostujve të ditëve të mëvonshme janë burime të së vërtetës. Sigurohuni që gjithçka që jepni mësim, të përputhet me shkrimet e shenjta dhe fjalët e profetëve. Mësimdhënia e së vërtetës do ta ftojë Frymën e Shenjtë në klasë.

Përgatitja e nxënësve: Ftojini nxënësit të lexojnë ose shikojnë bisedën e Plakut Nil L. Andersen “Jozef Smithi”, nga konferenca e përgjithshme e tetorit 2014 (Liahona, nëntor 2014, f. 28–31) dhe të kërkojnë arsyen pse është e rëndësishme të kenë një dëshmi personale që Jozef Smithi u thirr nga Perëndia.

Veprimtari të Mundshme të të Mësuarit

Vini re se ky mësim përqendrohet te misioni hyjnor i Jozef Smithit. Ky mësim do të trajtojë rolin e shkrimeve të shenjta sikurse përmendet te 2 Nefi 3:12.

Katër Jozefët

Merreni parasysh një nga mundësitë në vijim. Mund t’i paraqitni figurat dhe referencat e shkrimeve të shenjta vijuese në rend të ngatërruar dhe t’i ftoni nxënësit ta lidhin vargun me figurën e duhur. Ose paraqitini referencat e shkrimeve të shenjta me vargjet që lidhen me to dhe ftojini nxënësit të zbulojnë se cilët janë individët. Inkurajojini nxënësit t’i shënojnë këta emra në shkrimet e tyre të shenjta.

Katër individët e përmendur te 2 Nefi 3 të gjithë kanë të njëjtin emër. Lexoji vargjet për çdo figurë dhe përcakto se kë përfaqësojnë këto katër figura.

2 Nefi 3:3; 2 Nefi 3:4; 2 Nefi 3:11; 2 Nefi 3:15

Sigurohuni që nxënësit ta kuptojnë se figurat përfaqësojnë 1) Jozefin, të birin e Lehit, 2) Jozefin e Egjiptit, 3) Profetin Jozef Smith dhe 4) babanë e Profetit, Jozef Smith Plakun.

Një pjesë e madhe e kapitullit 2 Nefi 3 përqendrohet te një profeci e bërë nga Jozefi i Egjiptit rreth “shikues[it]” dhe profetit Jozef Smith dhe misionit të tij në ditët e mëvonshme.

Presidenti Brigam Jang (1801–1877) bëri deklaratën vijuese rreth përgatitjes së Zotit për misionin e Jozef Smithit:

“Ishte dekretuar në këshillat e përjetësisë, shumë kohë më parë se të hidheshin themelet e tokës, se ai, Jozef Smithi, duhej të ishte njeriu, në periudhën e fundit ungjillore të kësaj bote, që do t’ua sillte njerëzve fjalën e Perëndisë dhe do të merrte plotësinë e çelësave dhe fuqisë së Priftërisë së Birit të Perëndisë. Zoti e kishte ruajtur atë dhe atin e tij, dhe atin e atit të tij, dhe paraardhësit e tyre të gjithë deri tek … Adami. Ai e ka vëzhguar atë familje e atë gjak ndërsa ka qarkulluar që nga burimi i tij deri tek lindja e atij njeriu. Ai qe parashuguruar në përjetësi për të kryesuar këtë periudhë të fundit ungjillore.” (Teachings of Presidents of the Church: Brigham Young [1997], f. 96, 343)

• Çfarë mund të na mësojnë këto fjalë rreth thirrjes së Jozef Smithit?

• Çfarë mund të na mësojnë ato rreth Zotit?

Profeci për Jozef Smithin

Për veprimtarinë vijuese, merreni parasysh t’i ndani nxënësit në dyshe dhe ta vini një nxënës të lexojë te 2 Nefi 3:6–12 dhe tjetrin të lexojë te 2 Nefi 3:13–15, 24. Çdo nxënës më pas mund t’i mësojë tjetrit atë që ai ose ajo gjeti. Mund të jetë e dobishme të ecni përreth dhomës dhe të ndihmoni ndonjë nxënës që mund të ketë pyetje rreth vargjeve.

Ndërkohë që i fliste të birit, Jozefit, Lehi citoi një pjesë të profecisë nga Jozefi i Egjiptit nga fletët prej tunxhi (shih edhe te Përkthimi prej Joseph Smith-it, Zanafilla 50:24–38 [në shtojcën Përkthimi prej Joseph Smith-it]). Kjo profeci qe kryesisht rreth Profetit Jozef Smith në ditët e mëvonshme. Lexo te 2 Nefi 3:6–15, 24 dhe shenjoi fjalët ose frazat që të mësojnë rreth Jozef Smithit. (Vër re se fraza “fryti i ijeve të tua” u referohet fëmijëve ose pasardhësve.)

• Çfarë të bën më shumë përshtypje rreth Jozef Smithit?

  Merreni parasysh t’i ftoni nxënësit të shkruajnë në tabelë fjalë ose fraza që u lanë mbresa. Mund t’u drejtoni gishtin frazave në tabelë dhe t’u kërkoni nxënësve të tregojnë pse qenë kuptimplota këto fraza.

• Si do t’i përmblidhje mësimet rreth Profetit Jozef Smith nga ajo që lexove te 2 Nefi 3?

Një e vërtetë që mund të mësojmë, është se Zoti ngriti Profetin Jozef Smith që të ndihmojë të ndodhë Rivendosja e ungjillit të Jezu Krishtit.

• Si mendon, përse është e rëndësishme të kesh një dëshmi vetjake për këtë të vërtetë?

Plaku Nil L. Andersen, i Kuorumit të Dymbëdhjetë Apostujve, dha mësim:

“Komentet negative rreth Profetit Jozef Smith do të shtohen teksa shkojmë drejt Ardhjes së Dytë të Shpëtimtarit. Gjysmë të vërtetat dhe mashtrimet e holla nuk do të pakësohen. Do të ketë anëtarë të familjes dhe miq të cilët do të kenë nevojë për ndihmën tuaj. …

Të rinjve … unë u jap një sfidë të veçantë: Fitoni një dëshmi vetjake për Profetin Jozef Smith.” (Nil L. Andersen, “Jozef Smithi”, Liahona, nëntor 2014, f. 30)

Më e mira mund të jetë që t’i vini nxënësit të përsiatin dhe të reflektojnë në heshtje mbi përgjigjet e tyre për pyetjen e radhës. Mundet edhe t’u kërkoni t’i shënojnë përgjigjet e veta në ditarët e studimit.

• Sa i sigurt te vetja ndihesh për thirrjen hyjnore të profetit Jozef Smith?

Nxënësit mund të përfitojnë nga bërja e pyetjeve rreth Jozef Smithit ose rreth marrjes së një dëshmie për thirrjen e tij profetike. Biseda e Plakut Andersen e referuar në përgatitjen e nxënësve mund të jetë një burim i dobishëm për t’i trajtuar pyetjet e tyre. Nxënësit që e lexuan bisedën në përgatitje për këtë mësim, mund të jenë në gjendje të trajtojnë disa nga pyetjet e shokëve të tyre të klasës.

Marrja e një dëshmie për Jozef Smithin

Imagjinoje skenarin vijues:

Kur shoku yt Marku mësoi se ishe anëtar i Kishës së Jezu Krishtit të Shenjtorëve të Ditëve të Mëvonshme, ai filloi të lexonte rreth Jozef Smithit në faqen e internetit të Kishës. Atij iu ngjall kureshtja nga ftesa që të mësonte vetë se Jozef Smithi ishte një profet i Perëndisë. Ndërsa të tregonte disa nga gjërat që po mësonte, ai pyeti: “Si mund ta mësojmë vetë a ishte profet Jozef Smithi?”

• Çfarë do t’i thoshe Markut?

Për ide të tjera mbi marrjen e dëshmisë që Jozef Smithi është profeti i Zotit, shiko ose lexo atë që sugjeroi Plaku Andersen:

“Një dëshmi për Profetin Jozef Smith mund t’i vijë në mënyrë të ndryshme secilit prej nesh. Ajo mund të vijë kur gjunjëzoheni në lutje, duke i kërkuar Perëndisë t’ju konfirmojë që ai ishte një profet i vërtetë. Mund të vijë kur lexoni rrëfimin e Profetit për Vegimin e Parë. Një dëshmi mund të pikojë në shpirtin tuaj kur e lexoni Librin e Mormonit në mënyrë të vazhdueshme. Ajo mund të vijë kur jepni dëshminë tuaj për Profetin ose kur qëndroni në tempull dhe e kuptoni se fuqia e shenjtë e vulosjes u rivendos në tokë nëpërmjet Jozef Smithit. Me besim dhe qëllim të vërtetë, dëshmia juaj për Profetin Jozef Smith do të forcohet.” (Nil L. Andersen, “Jozef Smithi”, Liahona, nëntor 2014, f. 30)

Kjo mund të jetë një mundësi e mirë për t’i ftuar nxënësit të japin dëshmitë e tyre për Jozef Smithin. Mund të ndihmoni që nxënësit të përgatiten duke i ftuar t’i shkruajnë përgjigjet e tyre për disa nga pyetjet vijuese në ditarët e tyre të studimit. Kur nxënësit të mbarojnë së shkruari, ftojini ata që janë të gatshëm, t’ia tregojnë klasës. Merreni parasysh të jepni vetë dëshminë tuaj për Jozef Smithin. Mund të jetë mirë edhe që t’i ndihmoni nxënësit të dallojnë se zgjedhja për të besuar te thirrja hyjnore e Jozef Smithit është e lavdërueshme edhe kur ka pasiguri. Bindja e tyre mund të forcohet me kalimin e kohës nëpërmjet përvojës.

• Çfarë të ka ndihmuar të besosh se Jozef Smithi është një profet?

• Çfarë të ka ndihmuar Profeti Jozef Smith të kuptosh ose ndiesh për Jezu Krishtin?

• Çfarë mund të bësh për ta thelluar dëshminë tënde për Jozef Smithin?

• Si do të ndikonte (ndikon) pasja e një dëshmie për Jozef Smithin në jetën tënde?

Komente dhe Informacion për Rrethanat

A e adhurojmë Jozef Smithin?

Plaku Gerit W. Gong, i Kuorumit të Dymbëdhjetë Apostujve, dha mësim:

“Ne adhurojmë Perëndinë, Atin e Amshuar dhe Birin e Tij, Jezu Krishtin, jo Profetin Jozef, as ndonjë burrë apo grua tjetër të vdekshme.” (Gerit W. Gong, “Të Gjitha Kombet, Fiset dhe Gjuhët”, Liahona, nëntor 2020, f. 39)

Çfarë kanë thënë profetët e kohës së sotme rreth Jozef Smithit?

Presidenti Rasëll M. Nelson, dëshmoi:

“E di se Jozef Smithi është profeti i parashuguruar të cilin Zoti e zgjodhi për ta hapur këtë periudhë të fundit ungjillore. Nëpërmjet tij, Kisha e Zotit u rivendos në tokë. Jozefi e vulosi dëshminë e tij me gjakun e tij. Sa shumë e dua dhe e nderoj atë!” (Rasëll M. Nelson, “Dëgjojeni Atë”, Liahona, maj 2020, f. 92)

Presidenti Dallin H. Ouks, i Presidencës së Parë, dha mësim:

“Ashtu si shenjtorë të tjerë besnikë të ditëve të mëvonshme, unë e kam ndërtuar jetën time mbi dëshminë dhe misionin e Profetit Jozef Smith. Në të gjitha leximet dhe kërkimet e mia origjinale, nuk e kam humbur kurrë bindjen rreth dëshmisë sime për thirrjen e tij profetike, për ungjillin dhe rivendosjen e priftërisë që Zoti e filloi nëpërmjet tij.” (Dallin H. Oaks, “Joseph, the Man and the Prophet”, Ensign, maj 1996, f. 73)

Ku mund të mësoj më shumë rreth Jozef Smithit?

Lexo esenë mbi Temat e Ungjillit “Përkthimi i Librit të Mormonit” (topics.ChurchofJesusChrist.org) për të mësuar më shumë rreth përkthimit të Librit të Mormonit.

Lexo te Saints: The Story of the Church of Jesus Christ in the Latter Days [Shenjtorët: Historia e Kishës së Jezu Krishtit në Ditët e Mëvonshme], vëll. 1, The Standard of Truth, [Standardi i së Vërtetës] 1815–1846 (2018).

Veprimtari Plotësuese të të Mësuarit

2 Nefi 3:8. “Unë do ta bëj atë të madh në sytë e mi”

Zoti shpalli se Ai do ta bënte Jozef Smithin të madh në sytë e Tij sepse ai do të bënte punën e Zotit. Mund t’i vini nxënësit ta lexojnë këtë varg dhe të kërkojnë atë që e bëri Jozef Smithin të madh në sytë e Zotit. Merrni parasysh të diskutoni se si të qenit i madh në sytë e Zotit është ndryshe nga të qenit i madh në sytë e botës. Më pas mund t’i ftoni nxënësit të mendojnë rreth mënyrës se si mund ta ndjekin shembullin e Profetit Jozef Smith për bërjen e punës së Zotit.

2 Nefi 3:12. Si veprojnë bashkë Bibla dhe Libri i Mormonit

Ndihmojini nxënësit të kuptojnë se “fryti i ijeve të tua” u referohet pasardhësve të Jozefit të Egjiptit, të cilët do të ndihmonin që të nxirrej në dritë Libri i Mormonit. Fryti i ijeve të Judës u referohet pasardhësve të Judës, të cilët do të ndihmonin që të nxirrej në dritë Bibla. Ftojini nxënësit të kërkojnë se si veprojnë bashkë Bibla dhe Libri i Mormonit. Merrni parasysh t’i renditni në tabelë ato që gjejnë nxënësit. Nxënësit mund të diskutojnë se si Bibla dhe Libri i Mormonit veprojnë bashkë për t’i përmbushur ato qëllime dhe të gjejnë shembuj specifikë. Për shembull, nxënësit mund të krahasojnë vargjet Lluka 11:9 dhe 2 Nefi 4:35 rreth lutjes, ose Mateu 6:14–15 dhe Mosia 26:30–31 rreth faljes.

2 Nefi 3:13. “Nga dobësia ai do të bëhet i fortë”

Mund t’i ftoni nxënësit të lexojnë te 2 Nefi 3:13 dhe të kërkojnë atë që mësojnë rreth Jozef Smithit. Ju mund të bëni pyetje si ato që vijojnë:

• Në çfarë mënyrash mund të jetë konsideruar i dobët Jozef Smithi?

• Si e bëri Zoti të fortë atë?

• Në çfarë mënyrash e konsideroni veten të dobët?

• Si mund t’ju bëjë Zoti të fortë?