Zotërimi Doktrinor: 2 Nefi 2:27

Ne Jemi të Lirë të Zgjedhim Nëpërmjet Ndërmjetësit të Madh

Fuqia Kthyese në Besim e Librit të Mormonit

Në një mësim të mëparshëm, “2 Nefi 2:26–30”, mësove se ne jemi të lirë të zgjedhim lirinë dhe jetën e përjetshme nëpërmjet Jezu Krishtit. Ky mësim mund të të ndihmojë të mësosh përmendsh referencën e zotërimit doktrinor dhe frazën kyç të shkrimit të shenjtë për vargun 2 Nefi 2:27, të shpjegosh doktrinën dhe t’i zbatosh parimet e marrjes së njohurisë shpirtërore në situata nga jeta reale.

Zgjerimi i njohurisë nëpërmjet veprimtarive për përsëritjen e zotërimit doktrinor. Bërja e këtyre veprimtarive rregullisht i ndihmon nxënësit t’i mësojnë përmendsh frazat kyç të shkrimeve të shenjta. Ju mund të dëshironi t’i nxitni nxënësit tuaj që ta vazhdojnë jashtë klasës studimin e fragmenteve të zotërimit doktrinor.

Përgatitja e nxënësve: Mund t’i ftoni nxënësit të përpiqen të mësojnë përmendsh vargun 2 Nefi 2:27. Kujtojini nxënësit që mund të përdorin programin kompjuterik Doctrinal Mastery [Zotërimi Doktrinor].

Veprimtari të Mundshme të të Mësuarit

Ky mësim për fragmentin e zotërimit doktrinor është hartuar për t’u dhënë pas mësimit “2 Nefi 2:26–30”, që është mësimi kontekstual për fragmentin e zotërimit doktrinor 2 Nefi 2:27. Nëse ky mësim për fragmentin e zotërimit doktrinor nevojitet të zhvendoset në një javë tjetër, sigurohuni që të jepni edhe mësimin përkatës kontekstual gjatë asaj jave.

Mëso përmendsh dhe shpjego

Përdorni çfarëdo metode të efektshme dhe të përshtatshme për t’i ndihmuar nxënësit ta mësojnë përmendsh referencën e shkrimit të shenjtë dhe frazën kyç të shkrimit të shenjtë për vargun 2 Nefi 2:27 dhe të shpjegojnë të vërtetat që gjenden në këtë fragment.

Nëse përdoret sugjerimi vijues, merrni parasysh t’i ftoni nxënësit të krijojnë një vizatim si klasë në tabelë ose në një fletë të madhe letre. Kini kujdes që ta zhvilloni shkurt veprimtarinë e vizatimit në mënyrë që të ketë kohë të mjaftueshme për ushtrimin e vënies në zbatim. Nëse është e mundur, mbajeni të paraqitur vizatimin e klasës për pak ditë që t’i ndihmoni nxënësit ta mësojnë më mirë përmendsh referencën dhe frazën kyç të shkrimit të shenjtë.

Lexo te 2 Nefi 2:27 dhe bëj një vizatim që të ndihmon ta përfytyrosh kuptimin e frazës kyç të shkrimit të shenjtë: “Ata janë të lirë të zgjedhim lirinë dhe jetën e përjetshme … ose … robërinë dhe vdekjen”. Përfshije frazën kyç në vizatimin tënd për të të ndihmuar ta mësosh përmendsh.

Në vijim, shkruaj në vizatimin tënd se çfarë do të thotë që ne jemi të lirë të zgjedhim lirinë dhe jetën e përjetshme nëpërmjet Jezu Krishtit, ose të zgjedhim robërinë dhe vdekjen. Përfshij atë që do të thotë ky varg për ty vetë, dhe si mund të të ndihmojë për ta ndjekur më mirë Jezu Krishtin.

Nëse krijohet një vizatim si klasë, ftojini nxënësit të punojnë së bashku për të shkruar një shpjegim të vargut.

Nëse nxënësit i përfunduan vizatimet individuale, ftojini ata të shkruajnë vetë shpjegimet e tyre dhe më pas të lëvizin nëpër dhomë dhe t’ua tregojnë vizatimin dhe shpjegimin e tyre së paku dy nxënësve të tjerë.

Në fund, ndërkohë që e vështron figurën, përsërit referencën e shkrimit të shenjtë dhe frazën kyç të shkrimit të shenjtë derisa t’i dish përmendsh.

Ushtroje vënien në zbatim

Një alternativë për sugjerimin vijues për t’i ndihmuar nxënësit t’i përsëritin parimet e marrjes së njohurisë shpirtërore është të ftoni tre nxënës përpara orës së mësimit që secili të studiojë njërin nga parimet. Në këtë pikë të mësimit, ftojini ata që secili të përdorë një ose dy minuta për t’i shpjeguar klasës parimin që studioi.

Për t’i përsëritur parimet e marrjes së njohurisë shpirtërore, shih a mund ta mbash mend se cili është secili nga tri parimet. Më pas shih a mund t’i përputhësh frazat vijuese me parimin vijues. (Lexo paragrafët 5–12 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor [2018] për të kontrolluar saktësinë tënde.)

• “Të na mbrojë nga keqinformimi dhe nga ata që përpiqen ta shkatërrojnë besimin”

• “T’i shohim idetë duke u nisur nga standardi i Zotit për të vërtetën, në vend që të pranojmë kushtet paraprake ose hamendësimet e botës”

• “Të mbështetemi te dëshmia që e kemi tashmë”

Ndihuni i lirë t’i përshtatni skenarët që sugjerohen në programin mësimor për t’i përputhur më mirë me rrethanat e nxënësve tuaj. Për shembull, në skenarin vijues alkooli mund të zëvendësohet me një sjellje të ndryshme mëkatare.

Edhe skenarë të ndryshëm mund të përdoren për të arritur të njëjtin qëllim. Për shembull, nxënësit mund të përqendrohen te një skenar i ndryshëm rreth një anëtareje të Kishës e cila është e mërzitur sepse prindërit e saj inkurajojnë ndjekjen e një standardi specifik të Kishës. E irrituar, ajo mund të përgjigjet: “Kam lirinë time të zgjedhjes! Mund të bëj çfarë të dua!” Nxënësit më pas mund të zbatojnë parimet e marrjes së njohurisë shpirtërore dhe vargun 2 Nefi 2:27 për këtë skenar.

Lexoje skenarin vijues dhe mendo se si parimet e marrjes së njohurisë shpirtërore mund të zbatohen nga Ivani.

Ivani kishte bërë plane ta kalonte pasditen e së shtunës me shokët e tij, por kur njëri prej tyre papritmas u shfaq me alkool për ta ndarë me të tjerët, ai ndjeu se ishte koha që të largohej. Ai e dinte se shokët e tij nuk do të habiteshin sepse ai kishte shkuar vazhdimisht në shtëpi në situata të ngjashme në të kaluarën. Ndërsa largohej, e dëgjoi shokun e tij, Danielin, të thoshte: “Duket sikur Kisha e Ivanit nuk e lejon atë të bëjë asgjë”.

Ivani vazhdoi të mendonte rreth komentit të Danielit ndërsa ecte drejt shtëpisë.

Shqyrtoji konceptet dhe pyetjet me një këndvështrim të përjetshëm

Lexo te paragrafi 8 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2018). Kushtoji vëmendje të veçantë asaj që do të thotë t’i riformulosh pyetjet.

• Si do ta përshkruaje se çfarë do të thotë ta riformulosh një koment ose një pyetje?

Dëgjojini me kujdes përgjigjet e nxënësve për pyetjen e mëparshme që t’ju ndihmojnë ta dini se sa mirë e kuptojnë nxënësit këtë koncept. Nëse e kuptojnë mirë, merreni parasysh të ftoni një nxënës që t’i udhëheqë nxënësit e tjerë për ta riformuluar komentin e Danielit.

Nëse nxënësit nuk janë ende të përgatitur për t’i riformuluar idetë pa ndihmë, merrni parasysh të përdorni disa nga sugjerimet vijuese për t’i ndihmuar ata.

1. Përcakto premisa ose supozime të mundshme.

   • Çfarë duket se beson Danieli rreth lirisë dhe qëllimit të lirisë së zgjedhjes?

   • Çfarë duket se beson ai rreth standardeve të Kishës së Shpëtimtarit?

2. Merre parasysh çështjen në kontekstin e planit të shpëtimit dhe mësimeve të Shpëtimtarit.

   • Çfarë ke përjetuar nga të jetuarit e ungjillit të Jezu Krishtit që të ndihmon t’i shohësh gjërat ndryshe nga sa i sheh Danieli?

   • Çfarë aspektesh të planit të shpëtimit mendon se do të ishte më e dobishmja t’i kuptonte Danieli?

   • Çfarë lloj lirie u ofron Shpëtimtari atyre që e përdorin lirinë e tyre të zgjedhjes për t’i zbatuar urdhërimet e Tij? Çfarë lloj robërie rezulton nga refuzimi i tyre?

Merreni parasysh t’i ndani nxënësit në dyshe me secilin nxënës që studion njërin nga dy parimet vijuese të marrjes së njohurisë shpirtërore. Më pas ftojini ata t’ia japin përgjigjet e tyre për pyetjet shoqëruese partnerit të tyre.

Lexoji paragrafët 5–7, 11 në pjesën “Marrja e Njohurisë Shpirtërore” te Dokumenti Bazë i Zotërimit Doktrinor (2018) dhe përsiat se si zbatohet ndjekja e dy parimeve për situatën e Ivanit.

Vepro me besim

• Nëse Ivani fillon ta vërë në dyshim vendimin e tij për t’u larguar nga situata të rrezikshme shpirtërisht, çfarë mund t’i tregosh atij nga paragrafët 5–7? Përse?

Kërko kuptueshmëri të mëtejshme nëpërmjet burimeve të caktuara në mënyrë hyjnore

• Çfarë burimesh të përmendura te paragrafi 11 mendon se do të ishin më të dobishme për Ivanin?

• Si mund ta ndihmojnë atë të vërtetat te 2 Nefi 2:27?

Përsëritja e zotërimit doktrinor

Gjatë mësimeve të ardhshme, ndihmojini nxënësit ta përsëritin shkurtimisht referencën dhe frazën kyç të shkrimit të shenjtë për vargun 2 Nefi 2:27. Një mënyrë për ta bërë këtë është t’i ftoni nxënësit ta vështrojnë vizatimin që krijuan, dhe të shohin a mund ta mbajnë mend ende referencën dhe frazën kyç të shkrimit të shenjtë. Kjo mund të përsëritet në fillim ose në fund të disa mësimeve të ardhshme.