2 Nefia 9:27–49

“Ny fiheverana ny zava-panahy dia fiainana mandrakizay”

zatovovavy mitsiky sady mamindra

Impiry ianao no mieritreritra momba ny hoe hitondra anao mankaiza ny zavatra ataonao sy ny fihetsikao? Rehefa avy nanambara i Jakoba fa manana hery hanafahana ny olona rehetra amin’ny vokatry ny Fahalavoana i Jesoa Kristy, dia nampitandrina tsy hanao zavatra na fihetsika mampanalavitra antsika amin’ny Tompo izy. Nijoro ho vavolombelona momba an’i Jesoa Kristy sy ny zavatra azontsika atao hanatonana Azy sy hahavoavonjy izy. Afaka manampy anao hiala amina fitondrantena izay mitarika ho any amin’ny tsy fahasambarana ary mampisaraka anao amin’i Jesoa kristy ity lesona ity.

Mametraka fanontaniana izay manasa handinin-tena. Ny fandinihan-tena sy ny fanombanan-tena dia afaka manasa ny Fanahy Masina hanampy ny mpianatra tsirairay hahita ny zavatra “araka ny tena toetrany, sy … ny ho tena toetrany” (Jakoba 4:13). Ny fanombanan-tena mahomby dia manampy ny mpianatra hihevitra ny fahatakaran’izy ireo fahamarinana ara-pilazantsara amin’izao fotoana izao sy ny fanirian’izy ireo na ny antony manosika azy ireo.

Fanomanana ny mpianatra: Asao ny mpianatra mba hijery tsara hoe inona amin’ny zavatra ataon’izy ireo manomboka izao hatramin’ny fotoam-pianarana manaraka no manampy azy ireo hahatsapa ho akaiky kokoa an’ Andriamanitra ary inona no mahatonga azy ireo hahatsapa ho lavitra Azy kokoa.

Ireo sahanasa fianarana azo atao

Elanelana amin’ Andriamanitra

Alohan’ny fotoam-pianarana dia hevero ny hanafina vatomamy (na zavatra hafa tian’ny mpianatra ny mitady azy) iray na maromaro ao amin’ny efitrano. Manasà mpianatra maromaro hitady ireo zavatra nafenina. Manomeza fanampiana amin’ny teny toy ny hoe mafana sy mafana kokoa rehefa manakaiky ny toerana nanafenana ilay zavatra ny mpianatra ary mampiasà teny toy ny hoe mangatsiaka na mangatsiaka kokoa rehefa manalavitra izy ireo. Aorian’ny fahitana ny vatomamy na zavatra hafa dia hevero ny hametraka fanontaniana toy izao manaraka izao:

• Nanampy anao hahita ilay zavatra tamin’ny fomba ahoana ireo teny nampiasaina nanoroana anao?

• Inona no mety mahatonga ny olona iray tsy hanaraka ireo teny fanoroana hanampiana azy hahazo zavatra mitondra soa?

Asao hisaintsaina mangina ity andiam-pehezan-teny manaraka ity ny mpianatra:

Mieritrereta fotoana teo amin’ny fiainanao izay nahatsapanao manokana ho akaiky an’ Andriamanitra sy fotoana izay nahatsapanao ho lavitra Azy. Inona avy ireo zavatra natao sasantsasany izay mety ho nitarika tamin’ireo vokatra ireo?

• Inona no hitanao?

• Inona araka ny eritreritrao no nanampy an’i Jakoba hahatsapa ny zavatra nosoritsoritany ao amin’ny 2 Nefia 9:49?

Eritrereto ny fiainanao sy ny fahatsapanao ho akaiky an’ Andriamanitra amin’izao fotoana izao. Rehefa mandalina ny toritenin’i Jakoba ao amin’ny 2 Nefia 9 ianao, dia mitadiava fampianarana izay afaka manampy anao hanatona akaiky kokoa ny Ray any An-danitra sy i Jesoa Kristy.

“Atongilano amin’ny teniko ny sofinareo”

Taorian’ny nampianarany momba ny anjara asa tanan’i Jesoa Kristy amin’ny fanampiana antsika handresy fahotana sy fahafatesana (jereo ny 2 Nefia 9:1–26), dia nampitandrina ny Nefita momba ny fihetsika sy fitondrantena izay hampanalavitra azy ireo amin’ny Mpamonjy i Jakôba.

Zarao misasaka ny kilasy ary saraho ity vakiteny ampanaovina manaraka ity. (Ny antsasaky ny kilasy dia afaka mamaky ny 2 Nefia 9:27–30, ary ny antsasany hafa dia afaka mamaky ny 2 Nefia 9:31–38.)

Vakio ny 2 Nefia 9:27–38, hitadiavana ireo fihetsika sy zavatra atao nampitandreman’i Jakôba. Mety ho azonao heverina ny hanao lisitra azy ireo eo am-pamakiana izany.

Eritrereto ny fomba iharan’ny tsirairay amin’ireo fitondrantena nampitandreman’i Jakôba ireo amin’ny tanora ankehitriny. Ohatra, na dia tsy mandray anjara amina famonoana olona aza ny ankamaroan’ny zatovo, ny andininy 35 dia afaka manampy anao hahatadidy ny hiala amin’ireo eritreritra, fahatsapana ary fitondrantena mahery setra (jereo ny Matio 5:21–22, 38–42).

Fomba iray hanampiana ny mpianatra hahita ny fifandraisan’ireo fampianaran’i Jakôba amin’ny fiainan’izy ireo ny fanasana azy ireo hamantatra fampianarana avy ao amin’ny Ho zatovo mahery!: Torolalana amin’ny fanaovana safidy (kiboky, 2022) izay mifandray amin’ny 2 Nefia 9. Azonao atao ny mangataka ny mpianatra handalina ary hizara amin’ny iray kilasy ny sasany amin’ny torohevitra hitan’izy ireo. Ohatra amin’ny fampianarana ireo fahamarinana mandrakizay sy fanasana ary fitahiana ampanantenaina ao amin’ny pejy 31–32 (izay mifandray amin’ny andininy 28–29, 34) sy ny fampianarana momba ny lalàn’ny fahadiovam-pitondrantena ao amin’ny pejy 23–28 (izay mifandray amin’ny andininy 36).

• Inona avy ireo ohatra maneho ny fomba hifandraisan’ireo fampianaran’i Jakôba amin’ny zatovo ankehitriny?

• Ahoana no ahafahan’ireo fihetsika sy fitondrantena notanisain’i Jakôba miantraika amin’ny fifandraisantsika amin’ Andriamanitra?

Ny olona iray maneho ireo fitondrantena sy fihetsika nampitandreman’i Jakôba dia azo faritana ho “mihevitra ny zavatry ny nofo” (2 Nefia 9:39).

Vakio ny 2 Nefia 9:39, hitadiavana ny zavatra nampianarin’i Jakôba momba ny vokatry ny fiheverana ny zavatry ny nofo sy ny fiheverana ny zava-panahy.

Mba hanampiana ny mpianatra haharay ireo fampianaran’i Jakôba ao amin’ny 2 Nefia 9:39, dia hevero ny hanasa azy ireo hanao sary na zavatra mahatsikaiky izay maneho ny andian-teny hoe “ny fiheverana ny zava-panahy … dia fiainana mandrakizay.”

• Inona no hitanao?

• Inona araka ny eritreritrao no dikan’ny hoe fiheverana ny zava-panahy?

Avy amin’io andininy io, isika dia mianatra fa ny fiheverana ny zavatry ny nofo dia mitondra mankany amin’ny fahafatesana ara-panahy. Ny fiheverana ny zava-panahy dia mitondra mankany amin’ny fiainana mandrakizay.

• Inona avy ny zavatra sasany azonao atao isan’andro mba hihazonanao ny sainao hifantoka ara-panahy amin’i Jesoa Kristy?

• Inona avy ireo eritreritra na fahatsapana anananao momba ny fanambaran’ny Filoha Nelson?

Manatòna ny Iray Masin’ny Isiraely

Asao hisaintsaina mangina ny fomba iharan’ny zavatra ianaran’izy ireo amin’ny tenany ny mpianatra. Mety ho afaka mametraka fanontaniana toy ireo voatanisa ao amin’ity andiam-pehezan-teny manaraka ity ianao, saingy aza asaina mizara ny mpianatra.

Avereno eritreretina ireo fitondrantena feno fiheverana ny zavatry ny nofo notanisain’i Jakôba ao amin’ny 2 Nefia 9:27–38. Inona amin’ireo fampitandremana ireo no hitanao fa sarotra indrindra? Misy fiovana azonao atao izay hanampy anao hanakaiky kokoa ny Ray any An-danitra sy i Jesoa Kristy ve? Hevero hoe dingana inona no mety ho azonao atao.

Rehefa mieritreritra ny toe-javatra misy anao manokana ianao, dia vakio ny tenin’i Jakôba ao amin’ny 2 Nefia 9:40–45. Tadiavo ireo fampianarany, indrindra ireo izay momba ny Mpamonjy, izay mety hanampy anao amin’ny toe-javatra misy anao amin’izao fotoana izao.

• Teny sy andian-teny inona avy no hitanao ho manan-danja indrindra? Nahoana?

• Ahoana no mety hahafahan’ny fahatsiarovana “ny fahalehibeazan’ny Iray Masin’ny Isiraely” (andininy 40) manampy anao hihevitra kokoa ny zava-panahy?

Omeo fotoana hieritreretana ny zavatra nianaran’izy ireo sy tsapan’izy ireo tamin’ny lesona androany ny mpianatra. Asao izy ireo hirakitra an-tsoratra ny eritreriny sy ireo zavatra tsapany ao amin’ny diary fandalinan’izy ireo. Rehefa vitan’izy ireo izany, dia hevero ny hanasa mpianatra manolo-tena vitsivitsy hizara ny sasany amin’ny zavatra nosoratan’izy ireo raha tsy mahakasika azy ireo manokana loatra izany. Mijoroa ho vavolombelona momba ireo fahamarinana izay nifanakalozanareo hevitra.

Fanazavana sy fampahalalana avy amin’ny zava-miseho

2 Nefia 9:28–29. Nahoana no zava-dehibe ny hanaovana ny fianarana ara-panahy ho laharam-pahamehana noho ny fianarana tsy ara-pivavahana?

Nampianatra toy izao ny Filoha Henry B. Eyring ao amin’ny Fiadidiana Voalohany:

Filoha Henry B. Eyring

Mazava fa ny fanaovana ny fianarana ara-panahy ho lohalaharana dia tsy manafaka antsika amin’ny fianarana zavatra tsy ara-pivavahana. Etsy ankilan’izay dia mampisy tanjona ny fianarantsika zavatra tsy ara-pivavahana izany ary mamporisika antsika hiezaka mafy kokoa amin’izany.

Raha hazonintsika amin’ny toerana tokony hisy azy ny fianarana ara-panahy, dia tsy maintsy handray fanapahan-kevitra manahirana isika amin’ny fomba hampiasantsika ny fotoantsika. Saingy tsy tokony hisy velively safidy an-tsitrapo eo amin’ny fomba fiainana mahazatra antsika hamela ny ara-panahy ho lasa ambinkambin-javatra. Tsy hisy mihitsy. Hitarika amin’ny loza izany. Mety tsy tonga dia hibaribary ilay loza amin’ny voalohany, na mety tsy hazava akory amin’ny fiainana an-tany aza. Kanefa tsarovy fa raha liana amin’ny fianarana ianao dia tsy ho an’ny fiainana an-tany fotsiny fa ho an’ny fiainana mandrakizay. Rehefa amin’ny fomba fijery ara-panahy no ahitanao izany fahamarinana izany dia hametraka ho lohalaharana ny fandalinana ara-panahy ianao nefa tsy hanambany ny fandalinana ny ara-nofo koa. Raha ny marina dia hiasa mafy kokoa amin’ny fianarana zavatra tsy ara-pivavahana ianao mihoatra noho ny hanaovanao izany raha tsy misy izany fahitana ara-panahy izany. (Henry B. Eyring, “Education for Real Life,” Ensign, ôkt. 2002, 18)

Jereo “Ny faniriana marin’ny fanahy” mba hahalalana misimisy kokoa momba ny maha zava-dehibe ny hampidirana an’ Andriamanitra ao amin’ny tanjona sy asa amin’ny fianarana ataonao.

2 Nefia 9:39. Ahoana no ahafahan’ny fiezahana hanana toe-tsaina tia mihevitra ny zava-panahy manampy ahy hanana fomba fijery hafa?

Nampianatra toy izao ny Filoha Dallin H. Oaks ao amin’ny Fiadidiana Voalohany:

Filoha Dallin H. Oaks

Rehefa manalavitra ny zavatr’izao tontolo izao isika, dia mahatsapa ho akaiky kokoa ny Raintsika any An-danitra ary afaka ny hotarihin’ny Fanahiny kokoa. Izany toe-piainana izany no antsointsika hoe fiainam-panahy.

Ho an’ny mahatoky, ny fiainam-panahy dia maso ijerentsika ny fiainana ary fandrefesana iray hanombanantsika izany. …

Ny hoe mihevitra ny zava-panahy dia mijery sy manombana ireo zavatra niainantsika amin’ny resaka fomba fijery mibanjina ny mandrakizay mivelatra kokoa.

… Amin’ny alalan’ireo maso fitaratry ny fiainam-panahy, isika dia mahita ny didin’ Andriamanitra rehetra ho toy ny fanasana ho amina fitahiana. (Dallin H. Oaks, “Spirituality,” Ensign, nôv. 1985, 61, 63)

2 Nefia 9:40. Ahoana no ahafahan’ny fahatsiarovana “ny fahalehibeazan’ny Iray Masin’ny Isiraely” manampy ahy hihazona fisainana mihevitra ny zava-panahy?

Nanambara toy izao ny Loholona Dale G. Renlund ao amin’ny Kôlejin’ny Apôstôly Roambinifolo:

Loholona Dale G. Renlund

Tian’ny Raintsika any An-danitra hahatsiaro ny hatsaram-pony sy ny hatsaram-pon’ny Zanaka Malalany isika, tsy noho ny fanomezam-boninahitra Azy Ireo fa noho ny fiantraikan’izany fahatsiarovana izany eo amintsika. Mivelatra ny fomba fijerintsika sy ny fahatakarantsika rehefa misaintsaina ny hatsaram-panahin’Izy Ireo. Lasa manetry tena kokoa, mivavaka kokoa, mazoto kokoa isika rehefa misaintsaina ny famindram-pon’Izy ireo. …

Manasa anareo aho hahatsiaro isan’andro ny hatsaram-pon’ny Ray any An-danitra sy i Jesoa Kristy ary ny zavatra nataon’Izy Ireo ho anareo. Aoka ny fisaintsainanareo ny hatsaram-pon’Izy Ireo hamatotra mafy kokoa ny fonareo mirenireny amin’Izy Ireo. Saintsaino ny famindram-pon’Izy Ireo, dia ho voatahy amin’ny fahatsapana mora kokoa ny zavatra ara-panahy ianareo ka ho tonga tahaka an’i Kristy bebe kokoa. (Dale G. Renlund, “Saintsaino ny hatsaram-po sy ny halehibeazan’ Andriamanitra,” Liahona, mey 2020, 41, 44)

Sahanasa fianarana fanampiny

2 Nefia 9:27. Fomba hafa azo anombohana

Mba hanombohana ny lesona amin’ny fomba hafa dia asao hizara zavatra sasantsasany nangatahina tamin’izy ireo mba tsy holanilaniany foana ny mpianatra. Ifanakalozy hevitra ny tombontsoa azo amin’ny tsy fandanilaniana foana. Vakio ny 2 Nefia 9:27 dia asao hamantatra ny torohevitr’i Jakôba ny mpianatra ary hifanakalo hevitra amin’ny mety ho dikan’ny hoe mandanilany foana “ny andro fisedrana [antsika].” Amporisiho hamantatra mandritra ny lesona ireo fihetsika sy fitondrantena mandanilany foana nampitandreman’i Jakôba ny mpianatra.

Ampio hahatakatra ny mpianatra fa na dia nandray anjara tamin’ireo fitondrantena voaresaka ireo aza izy ireo, dia tsy lanilany foana ny fotoana niainan’izy ireo, ary rehefa “manatona ny Tompo izy ireo” (2 Nefia 9:41) dia afaka miaina fiainana sambatra sy mahomby kokoa.

2 Nefia 9:28–29. “Tsara ny mahay”

Raha mety hahazo tombony amin’ny fifanakalozan-kevitra misimisy kokoa momba ny fianarana sy ny fomba fialana amin’ireo fandrika nofaritan’i Jakôba ny mpianatra, dia hevero ny hametraka fanontaniana toy ireto manaraka ireto rehefa avy mamaky ny 2 Nefia 9:28–29:

• Raha mametraka ny fitokianao amin’ny fahendren’izao tontolo izao ianao dia ahoana no hitarihan’izany anao hanalavitra an’i Jesoa Kristy?

• Inona no azontsika atao mba hahazoana antoka fa tsy izany no miseho?

Mety ho azonao atao ihany koa ny mandalina miaraka amin’ny mpianatra ny sasany amin’ireo hevitra naroso ao amin’ny fizarana hoe “Fianarana” ao amin’ny Ho zatovo mahery! (kiboky, 2011), 9–10.