2 Nefi 9:50–52

“Ejani tek i Shenjti i Izraelit”

A ke pritur ndonjëherë lumturi të madhe nga diçka vetëm për t’u zhgënjyer më pas? Jakobi e mbylli predikimin e tij duke i këshilluar nefitët ta shmangnin shpenzimin e kohës ose të parave për gjëra që nuk do të siguronin kënaqësi afatgjatë. Ai i ftoi ata të vijnë te Jezu Krishti dhe të ushqehen me bollëk me bekimet e ungjillit. Ky mësim ka për qëllim të të ndihmojë të ndiesh një dëshirë më të madhe për të kërkuar bekimet dhe kënaqësinë që vetëm Jezu Krishti mund ta sigurojë.

Mësimdhënia e doktrinës. Zoti na urdhëroi që t’ia “mëso[jmë] njëri‑tjetrit doktrinën e mbretërisë” (Doktrina e Besëlidhje 88:77). Kjo doktrinë përbëhet nga të vërteta të përjetshme që, kur zbatohen, çojnë drejt ekzaltimit. Qendror mes këtyre të vërtetave është roli i Jezu Krishtit në planin e shpëtimit. Mësimdhënia e doktrinës së vërtetë fton dëshminë e Frymës së Shenjtë dhe mund t’i frymëzojë nxënësit ta ndjekin Shpëtimtarin.

Përgatitja e nxënësve: Ftojini nxënësit të mendojnë për zgjedhjet që kanë bërë, vende ku kanë shkuar ose gjëra që kanë mësuar, të cilat u kanë sjellë kënaqësi afatgjatë në jetën e tyre.

Veprimtari të Mundshme të të Mësuarit

Ngopja e urisë dhe e etjes sonë

Merreni parasysh t’u tregoni nxënësve disa gota të mbushura me gjëra që nuk do ta shuanin etjen e një personi, të tilla si salcë soje, mustardë ose shurup. Më pas tregoni një gotë tjetër të mbushur me ujë të pastër. Ftojini nxënësit të imagjinojnë sikur janë tejet të etur dhe kanë mundësi të pinë vetëm nga njëra prej gotave që po u tregoni. Kërkojuni të bëjnë një zgjedhje dhe të shpjegojnë pasojat e mundshme për zgjedhjen e tyre.

Mundet edhe të bëni një demonstrim duke përdorur artikuj ushqimorë që nuk do t’ia hiqnin urinë një personi, si për shembull kripë ose një mente të vogël bashkë me një ushqim më të rëndësishëm dhe ushqyes të tillë si një copë frute.

Ti mbase do ta kesh vënë re se shpirtrat tanë, ashtu si trupat tanë, kanë nevojë për ushqyerje dhe kënaqësi.

• Cilat janë disa mënyra se si mund t’u sigurojmë ushqyerje ose kënaqësi afatgjatë shpirtrave tanë?

• Cilat janë disa gjëra ku njerëzit drejtohen për kënaqësi, që mund t’i lënë ata të ndihen shpirtërisht të zbrazët?

• Si mendon, pse njerëzit ndonjëherë u drejtohen gjërave që nuk sjellin kënaqësi afatgjatë?

Ftojini nxënësit të vlerësojnë jetën e tyre duke u dhënë një mundësi për të menduar për pyetjet vijuese.

• A ka gjëra të cilave u drejtohesh për lumturi dhe përmbushje që në të vërtetë nuk t’i kënaqin ato dëshira? Çfarë të ka ndihmuar të ndiesh paqe dhe lumturi afatgjatë në jetën tënde?

• Ndërsa studion sot, kërko të vërteta që mund të të ndihmojnë të përjetosh bekimet dhe kënaqësinë që vetëm Jezu Krishti mund ta ofrojë.

“Merrni sa të mundni nga ajo që nuk mbaron”

Sill ndërmend nga studimi yt për vargjet 2 Nefi 9:27–49 që Jakobi e paralajmëroi popullin e vet kundër praktikave mëkatare në të cilat po përfshihej. Jakobi më pas e mbylli fjalën e tij me një ftesë të rëndësishme.

Lexo te 2 Nefi 9:50–52, duke kërkuar ftesën e Jakobit për popullin e tij.

• Cilat janë disa fjalë ose fraza nga këto vargje që të duken të rëndësishme? Pse?

• Çfarë të ndihmojnë të kuptosh këto vargje rreth dëshirave që ka Jezu Krishti për ne? Çfarë të mësojnë ato ty rreth asaj që na ofron Ai?

Ftojini nxënësit të përcaktojnë të vërteta nga mësimet e Jakobit. Ata mund të përcaktojnë një të vërtetë të ngjashme me sa vijon. Merreni parasysh ta shkruani këtë të vërtetë në tabelë.

Një e vërtetë që mund të mësojmë nga këto vargje, është: Kur vijmë te Jezu Krishti, shpirtrat tanë mund të kënaqen.

Përdorimi i referencave‑kryq për ta thelluar kuptueshmërinë tënde

Gjetja e fragmenteve të shkrimeve të shenjta që lidhen me atë që po studion, mund të jetë një mënyrë e dobishme për ta thelluar kuptueshmërinë dhe vlerësimin tënd për atë që gjendet në shkrimet e shenjta.

Ushtroje këtë aftësi duke gjetur referenca‑kryq që lidhen me mësimet te 2 Nefi 9:50–52.

Merreni parasysh të kaloni si klasë përmes procesit të përshkruar në dy paragrafët vijues, duke vizatuar diagramin në tabelë dhe duke gjetur së bashku një ose dy referenca‑kryq. Një referencë‑kryq e dobishme që mund t’u vini në dukje nxënësve, është Alma 5:33–34. Nxënësit atëherë mund të ndahen në dyshe bashkëpunimi ose grupe të vogla për të punuar për gjetjen e referencave‑kryq së bashku.

Merre parasysh të krijosh një diagram të ngjashëm me atë në vijim në ditarin tënd të studimit dhe të shkruash “2 Nefi 9:50–52” në rrethin e mesit. Ndërsa gjen shkrime që lidhen me të, të cilat dëshiron t’i mbash mend, mund t’i shkruash referencat në rrathët e tjerë.

Hapi yt i parë për gjetjen e referencave‑kryq mund të jetë të kërkosh referencat e shkrimeve të shenjta dhe temat që renditen te poshtëshënimet. Pas kësaj, merre parasysh t’i përcaktosh fjalët kyç nga 2 Nefi 9:50–52 dhe t’i kërkosh ato fjalë ose terma të përafërta me funksionin e kërkimit tek Udhëzuesi për Shkrimet e Shenjta, ose te Gospel Library [Biblioteka e Ungjillit].

Këtu janë disa fjalë ose fraza që mund të marrësh parasysh t’i kërkosh: ejani; ujë i gjallë; kënaq; vërju veshin; ushqehuni me bollëk; lutje; dhënie falënderimesh; gëzohuni.

Pasi nxënësit të kenë pasur kohë të mjaftueshme për të gjetur referenca‑kryq, ftoni disa vullnetarë të tregojnë njërin nga shkrimet e shenjta që qe veçanërisht kuptimplotë për ta. Vërini nxënësit të shpjegojnë se si bërja e referencave‑kryq e zgjeroi kuptueshmërinë e tyre për mësimet te 2 Nefi 9:50–52. Merreni parasysh t’i shtoni referencat e shkrimeve të shenjta që tregojnë nxënësit, në diagramin në tabelë.

Zbatimi i asaj që mësove

Mendo për atë që mësove rreth Jezu Krishtit sot, dhe se si mund të të bekojnë këto mësime në rrethanat e tua aktuale.

Për t’i ndihmuar nxënësit ta bluajnë ndër mend atë që kanë mësuar në mësimin e sotëm, merrni parasysh t’i paraqitni pyetjet vijuese dhe t’i ftoni nxënësit t’i shënojnë përgjigjet në ditarët e tyre të studimit.

• Çfarë ke mësuar apo ndier për Jezu Krishtin sot që dëshiron ta kujtosh?

• Si mund t’i japë kënaqësi afatgjatë shpirtit tënd zgjedhja për ta ndjekur Jezu Krishtin?

• Cilat janë disa zgjedhje specifike që mund të bësh, të cilat do të sillnin kënaqësinë afatgjatë në dispozicion nëpërmjet Jezu Krishtit, në jetën tënde?

Ftojini disa vullnetarë që t’ia tregojnë klasës disa nga përgjigjet e tyre. Dëshmoni për të vërtetat që keni diskutuar sot. Inkurajojini nxënësit ta shqyrtojnë jetën e tyre dhe të mendojnë për ndryshimet që mund të bëjnë, të cilat do t’i ndihmonin të përjetojnë lumturi, paqe dhe kënaqësi që vjen nga ndjekja e Jezu Krishtit.

Komente dhe Informacion për Rrethanat

2 Nefi 9:50–51. Çfarë donte të thoshte Jakobi kur tha ejani blini “pa para dhe pa çmim”?

Të gjithë njerëzit mund t’i marrin bekimet që ofron Jezu Krishti, pavarësisht nga situata financiare ose çfarëdo kualifikim tjetër i botës. Ndërkohë që për këto bekime nuk kërkohen para fizike, ka diçka që duhet të bëjmë për t’i marrë ato. Ku tjetër mund të shkoj për të mësuar më shumë rreth mbledhjes së Izraelit?

Plaku Xhefri R. Holland, i Kuorumit të Dymbëdhjetë Apostujve, dha mësim:

“Kur prej nesh kërkohen gjëra të vështira, madje gjëra që janë në kundërshtim me përmallimet e zemrës sonë, mbani mend se besnikëria që i kushtojmë kauzës së Krishtit, duhet të jetë përkushtimi më i lartë i jetës sonë. Ndonëse Isaia na siguron që është në dispozicion ‘pa para dhe pa paguar’ [Isaia 55:1] dhe ashtu është, ne duhet të përgatitemi, siç thotë një varg nga T. S. Elioti, që të na kushtojë ‘jo më pak se gjithçka’ [‘Little Gidding’, në T. S. Eliot: Collected Poems, 1909–1962 (1963), f. 209].” (Xhefri R. Holland, “Pasuria më e Madhe”, Liahona, nëntor 2021, f. 9)

Presidenti Marion G. Romni (1897–1988), i Presidencës së Parë, dha mësim:

“Kur jeta në tokë të mbarojë dhe gjërat të shfaqen në perspektivën e tyre të vërtetë, ne do të shohim më qartë dhe do ta kuptojmë atë që na kanë thënë Zoti dhe profetët e tij në mënyrë të përsëritur, që frytet e ungjillit janë objektivat e vetëm për të cilat ia vlejnë përpjekjet e plota në jetë. Zotëruesi i tyre merr pasurinë e vërtetë – pasuri në këndvështrimin e Zotit për vlerat.” (Marion G. Romney, në Conference Report, tetor 1949, f. 39)

Ku ndryshon ajo që na ofron Jezu Krishti, nga kënaqësitë e botës?

Plaku Ulises Soares, i Kuorumit të Dymbëdhjetë Apostujve, dha mësim:

“Njerëzit kudo po kërkojnë diçka. Në mënyrën e tyre, ajo që ata po e kërkojnë vërtet, është lumturia. Megjithatë, ashtu si me vetë të vërtetën, shumë njerëz mbahen larg lumturisë ‘ngaqë nuk dinë se ku ta gjejnë atë’ (Doktrina e Besëlidhje 123:12).

Ngaqë nuk dinë se ku ta gjejnë lumturinë e vërtetë dhe të përhershme, ata e kërkojnë atë në gjëra që aktualisht sjellin vetëm kënaqësi të përkohshme – duke blerë gjëra, duke kërkuar nder dhe lëvdata nga bota nëpërmjet sjelljes së papërshtatshme apo duke u përqendruar te bukuria dhe tërheqja fizike.

Kënaqësia shpesh ngatërrohet me lumturinë. Duket sikur sa më shumë njerëzit e kërkojnë kënaqësinë fizike, aq më pak të lumtur bëhen. Zakonisht, kënaqësia zgjat vetëm për një kohë të shkurtër.” (Ulisses Soares, “Paths to True Happiness”, Ensign, prill 2018, f. 14)

Veprimtari Plotësuese të të Mësuarit

Nëse do të të pëlqente të shpenzoje ca kohë duke studiuar mësimet e Jakobit te 2 Nefi 10, idetë vijuese mund të jenë të dobishme.

2 Nefi 10:20. “Ne nuk jemi braktisur”

Nga faqja e titullit e Librit të Mormonit, ne mësojmë se njëri nga qëllimet e librit është t’i ndihmojë anëtarët e shtëpisë së Izraelit të dinë “që ata nuk janë braktisur përgjithmonë”. Merreni parasysh të lexoni me nxënësit te 2 Nefi 10:20 dhe të bëni pyetje si ato në vijim:

• Çfarë mund t’i shkaktojë dikujt të ndihet “i braktisur” nga bekimet e Zotit?

• Pse Jakobi mund ta ketë këshilluar popullin e tij që të mos ta ulë kokën?

Ftojini nxënësit të analizojnë vargjet 2 Nefi 10:1–22. Ata mund të kërkojnë prova për mëshirën e Zotit dhe mënyrën se si Ai mund t’i kthejë kur ata mund të ndihen të braktisur.

2 Nefi 10:23–25. “Pajtohuni me vullnetin e Perëndisë”

Kujtojini nxënësit se si pjesë e predikimit të tij te 2 Nefi 9, Jakobi po u fliste disa prej nefitëve që kishin rënë në mëkat (shih te 2 Nefi 9:27–49). Ftojini ata të lexojnë te 2 Nefi 10:23–25, duke kërkuar atë që Jakobi i sfidoi nefitët të bënin.

Mund të jetë udhëzuese t’i ndihmoni nxënësit ta kuptojnë më mirë se një kuptim i fjalës pajtoj është t’i sjellësh njerëzit ose gjërat në harmoni ose marrëveshje me njëri-tjetrin.

Merreni parasysh t’i ftoni nxënësit të mendojnë rreth arsyes pse kemi nevojë të pajtohemi me vullnetin e Perëndisë kur mëkatojmë dhe asaj që mund të bëjmë për t’u pajtuar me vullnetin e Perëndisë.