2 Нифай 9:50–52

“Израилын Ариун Нэгэнд ир”

Хамтдаа судраас суралцаж буй өсвөр үеийнхэн

Та ямар нэг зүйлээс маш их аз жаргал хүлээгээд, дараа нь урам хугарч байсан уу? Иаков байнгын сэтгэл ханамж авчрахгүй зүйлд цаг хугацаа, мөнгө үрэхээс зайлсхийхийг номлолынхоо төгсгөлд нифайчуудад зөвлөжээ. Тэрээр тэднийг Есүс Христэд ирж, сайн мэдээний адислалуудыг хүлээн авахыг урьсан. Энэ хичээл зөвхөн Есүс Христийн өгч чадах адислал, сэтгэл ханамжийг эрэлхийлэх илүү их хүслээ мэдрэхэд тань туслах зорилготой.

Сургаалыг заах. Их Эзэн бидэнд “хаант улсын сургаалыг бие биендээ заах” (Сургаал ба Гэрээ 88:77) зарлиг өгсөн. Энэ сургаалд хэрэгжүүлж чадсанаар өргөмжлөлд хүргэх мөнхийн үнэн агуулагддаг. Эдгээр үнэний цөм нь Есүс Христийн Авралын төлөвлөгөөнд гүйцэтгэсэн үүрэг юм. Жинхэнэ сургаалыг заахад Ариун Сүнсний гэрчийг урьж, суралцагчдад Аврагчийг дагах сэдэл төрүүлж чадна.

Суралцагчийн бэлтгэл: Суралцагчдыг хийсэн сонголт, явсан газар эсвэл амьдралд нь байнгын сэтгэл ханамж авчирсан сурч мэдсэн зүйлсийнхээ талаар бодоход урь.

Боломжит суралцах үйл ажиллагаа

Өл, цангаагаа дарах

Шар буурцгийн цуу, гич, чихрийн ханд зэрэг хүний цангааг үл тайлах хэд хэдэн аягатай шингэнийг суралцагчдадаа үзүүл. Тэгээд цэвэр усаар дүүргэсэн өөр нэг аягыг мөн харуул. Маш их цангасан байна гэж төсөөлөхийг суралцагчдаасаа хүсээд, тэдэнд үзүүлсэн аягануудын зөвхөн нэгээс нь л уух боломжтойг хэл. Сонголтынхоо боломжит үр дүнг тайлбарлан, сонголтоо хийхийг тэднээс хүс.

Энэ жишээг хүний өл дарахгүй, давс, багахан гаа зэрэг зүйлсийг тэжээллэг сайтай жимс зэрэг хүнсний хамтаар үзүүлэн хэрэгжүүлж мөн болно.

Бидний биеийн адилаар сүнсэнд ч мөн тэжээл, ханамж хэрэгтэй байдгийг та магадгүй анзаарсан байх.

• Сүнсээ байнгын тэжээл, ханамжаар хангаж чадах зарим арга зам юу вэ?

• Ямар зүйл хүмүүст сэтгэл ханамж авахын тулд хандсан ч сүнслэг байдлын хувьд хоосон мэдрэмж төрүүлэх вэ?

• Яагаад хүмүүс заримдаа мөнхийн сэтгэл ханамжийг өгдөггүй зүйлс рүү ханддаг гэж та бодож байна вэ?

Суралцагчдад дараах асуултуудын талаар бодох боломжийг олгон, өөрсдийн амьдралыг үнэлж дүгнэхийг урь.

• Хүслээ хангахгүйгээр аз жаргал, сэтгэл ханамж авахаар ханддаг зүйлс танд бий юү? Амьдралдаа байнгын амар амгалан, аз жаргал мэдрэхэд танд юу тусалсан бэ?

• Та өнөөдөр судлах явцдаа зөвхөн Есүс Христийн санал болгож чадах адислал, сэтгэл ханамжийг мэдрэхэд тань туслах үнэнийг хай.

“Үл мөхөх зүйлс дээр найрла”

Иаков өөрийн хүмүүст нүгэлт үйлдлийг нь сэрэмжлүүлснийг 2 Нифай 9:27–49-өөс судалснаа сана. Иаков сэрэмжлүүлгээ чухал уриалгаар дуусгадаг.

2 Нифай 9:50–52-оос Иаковын уриалгыг олж унш.

• Эдгээр шүлгээс ямар үг, хэллэг та бүхэнд чухал санагдсан бэ? Яагаад?

• Эдгээр шүлэг танд Есүс Христийн бидний төлөө хүсдэг зүйлийн талаар ойлгоход хэрхэн тусалж байна вэ? Эдгээр нь Түүний бидэнд санал болгосон зүйлийн тухай юу заасан бэ?

Иаковын сургаалаас үнэнийг олж тодорхойлохыг суралцагчдаас хүс. Тэд дараахтай төстэй үнэнийг олж тодорхойлж болох юм. Эдгээр үнэнийг самбар дээр бичиж болно.

Эдгээр шүлгээс бид Есүс Христэд ирэхэд бидний сүнс хангалуун болно гэсэн үнэнийг мэдэж авч чадна.

Ойлголтоо гүнзгийрүүлэхийн тулд холбогдох эшлэлийг ашигла

Судалж буй сэдэвтэйгээ холбоотой судрын хэсгүүдийг олж судлах нь судрын агуулгын талаарх ойлголт, талархлаа гүнзгийрүүлэхэд тустай арга байж болох юм.

2 Нифай 9:50–52 дахь сургаалтай холбоотой холбогдох эшлэл олох замаар тус ур чадварыг давт.

Дараах хоёр догол мөрд тайлбарласан үйл явцыг ангид хэрэгжүүлэн, нэг юм уу хоёр холбогдох эшлэлийг хамтдаа олж самбарт бүдүүвч зураг болгон зурж болно. Суралцагчдадаа зааж өгөхөд тустай нэг холбогдох эшлэл нь Алма 5:33–34 юм. Суралцагчдыг дараа нь жижиг багт эсвэл хоёр хоёроор нь хуваарилж, холбогдох эшлэл олох даалгавар өгч болно.

Судлах тэмдэглэлдээ дараахтай төстэй бүдүүвч зураг зурж болох бөгөөд 2 Нифай 9:50–52-ыг голын тойрогт бич. Хожим санахыг хүссэн судраа олбол үүнийгээ бусад тойрог дотор бич.

дугуй график

Холбогдох эшлэл олох анхны алхам тань зүүлт тайлбарт дурдсан сэдэв, судрын эшлэлийг үзэх юм. Дараа нь 2 Нифай 9:50–52-оос түлхүүр үгийг олж тогтоон, Судруудын удирдамж-аас хайлт хий.

Хайлт хийж болох зарим үг, хэллэг: ирэх; амийн ус; хангалуун байх; сонсох; найрлах; залбирал; талархал; баясах.

Холбогдох эшлэл хайх хангалттай цаг өнгөрсний дараа тэдэнд хамгийн утга учиртай байсан нэг судраас сайн дураараа хуваалцах суралцагчдыг урь. Холбогдох эшлэлүүд 2 Нифай 9:50–52 дахь сургаалын ойлголтыг хэрхэн гүнзгийрүүлснийг суралцагчдаар тайлбарлуул. Суралцагчдын хуваалцсан судрын эшлэлүүдийг самбар дахь бүдүүвч зурагт нэмж болно.

Сурч мэдсэн зүйлээ амьдралд хэрэгжүүлэх

Есүс Христийн тухай өнөөдөр олж мэдсэн зүйлсээ мөн эдгээр сургаал таны одоогийн нөхцөл байдлыг хэрхэн адислах тухай бод.

Өнөөдрийн хичээлээр сурч мэдсэн зүйлээ ойлгоход нь суралцагчдад туслахын тулд дараах асуултуудыг дэлгэцэд үзүүлж, суралцагчдыг хариултаа судлах тэмдэглэлдээ бичихийг урь.

• Өнөөдөр Есүс Христийн талаар судалж, мэдэрсэн ямар зүйлийг хойшид санахыг та хүсэж байна вэ?

• Есүс Христийг дагахыг сонгосон нь таны сүнсийг хэрхэн байнгын сэтгэл ханамжтай байлгах вэ?

• Есүс Христээр дамжуулан амьдралдаа байнгын сэтгэл ханамжийг олохын тулд та ямар тодорхой сонголт хийж болох вэ?

Хариултаа ангийнхантайгаа сайн дураараа хуваалцах цөөн хэдэн суралцагчийг урь. Өнөөдрийн ярилцсан үнэнүүдийн талаар гэрчил. Суралцагчдыг амьдралаа дүгнэн, Есүс Христийг дагаснаар ирэх аз жаргал, амар амгалан, сэтгэл ханамжийг мэдрэхэд нь туслах өөрчлөлтийн талаар бодоход уриал.

Тайлбар ба нөхцөл байдлын талаарх мэдээлэл

2 Нифай 9:50–51. Иаков ирээд “мөнгө төлөлгүйгээр үнэгүй” худалдаж ав гэж хэлсэн нь ямар утгатай вэ?

Бүх хүн санхүүгийн байдлаас эсвэл дэлхийн аливаа бусад шалгуураас үл хамааран Есүс Христийн адислалын саналыг хүлээн авч чадна. Эдгээр адислал нь биет мөнгө шаардахгүй боловч үүнийг хүлээн авахын тулд бид зарим зүйлийг хийх ёстой. Израилын цугларалтын талаар хаанаас илүү ихийг сурч мэдэж болох вэ?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Ахлагч Жэффри Р.Холланд

Биднээс хүнд хэцүү зүйлийг, бүр зүрх сэтгэлийн маань хүсэл эрмэлзэлд харшлах зүйлсийг ч гэсэн хүсэх үед Христийн үйл хэрэгт бидний амласан чин үнэнч байдал нь өөрсдийнхөө амьдралыг дээд зэргээр зориулах явдал гэдгийг санаарай. Хэдий Исаиа бидэнд үүнийг “мөнгөгүй, үнэгүйгээр” хүртээмжтэй хэмээн баталдаг ч [Исаиа 55:1], энэ үнэхээр тийм ч гэлээ, Т.С.Элиотын хэлсэн шүлгийн мөрийг ашиглан хэлбэл, бид үүнийг авахын тулд “бүхнээс багагүй” зарлага гаргахдаа бэлтгэлтэй байх ёстой [Т.С.Элиот: Шүлгийн түүвэр дэх “Бяцхан Гиддинг”, 1909–1962 (1963), 209]. (Жэффри Р.Холланд, “Хамгийн агуу хөрөнгө,” 2021 оны 10-р сарын Ерөнхий чуулган)

Тэргүүн Зөвлөлийн ерөнхийлөгч Марион Ж.Ромни (1897–1988) ийн заасан.

Eрөнхийлөгч Марион Ж.Ромни

Дэлхийн амьдрал дуусаж, бүх зүйл жинхэнэ утгаараа харагдах үед бид сайн мэдээний үр жимс нь амьдралын бүхий л хүчин чармайлтад дүйцэх цорын ганц зорилго хэмээн Их Эзэний мөн Түүний бошиглогчдын бидэнд дахин дахин хэлснийг илүү тодорхой харж, ойлгох болно. Тэднийг эзэмшигч нь жинхэнэ баялаг буюу Их Эзэний үзэлд үнэ цэн бүхий баялгийг олж авна. (Marion G. Romney, in Conference Report, Oct. 1949, 39)

Есүс Христийн бидэнд санал болгосон зүйл нь дэлхийн таашаалаас юугаараа ялгаатай вэ?

Арван хоёр төлөөлөгчийн чуулгын ахлагч Үлиссэс Соарэс ийн заасан.

Ахлагч Үлиссэс Соарэс

Газар сайгүй хүмүүс ямар нэгэн зүйлийг эрж хайж байдаг. Үнэндээ тэдний хувьд хайж буй зүйл нь аз жаргал юм. Үнэний хувьд, “тэд үүнийг хаанаас олохыг мэддэггүйн улмаас” (Сургаал ба Гэрээ 123:12) олон хүн аз жаргалгүй байдаг.

Тэд жинхэнэ бөгөөд үүрдийн аз жаргалыг хаанаас олохоо мэдэхгүй тул түр зуурын таашаал өгөх зүйлсээс буюу эд зүйлс худалдан авах, зүй бус зан байдлаар зохисгүй үйлдэл хийн, дэлхийнхнээс нэр төр, сайшаал магтаал эрэлхийлэх эсвэл бие махбодын гоо үзэсгэлэн, дур булаам байдалд анхаарах гэх мэтээс аз жаргалыг эрэлхийлдэг.

Ихэнх тохиолдолд таашаалыг аз жаргалтай андуурдаг. Хүмүүс хэр зэрэг түр зуурын таашаал эрэлхийлнэ, тэр хэрээр илүү аз жаргалгүй болдог мэт санагддаг. Зугаа цэнгэл нь ихэвчлэн богино хугацаанд үргэлжилдэг. (Ulisses Soares, “Paths to True Happiness,” Ensign, Apr. 2018, 14)

Нэмэлт суралцах үйл ажиллагаа

Хэрэв та 2 Нифай 10 дахь Иаковын сургаалыг судлахад нэмж хэсэг хугацаа зарцуулахыг хүсвэл дараах санаануудыг ашигла.

2 Нифай 10:20. “Бид зайлуулагдаагүй”

Мормоны Номын Оршил хуудас-аас номын нэг зорилго нь Израилын угсааны гишүүддээ “үүрд зайлуулагдаагүй” гэдгийг ойлгуулах явдал гэдгийг бид олж мэдсэн. Суралцагчидтай хамт 2 Нифай 10:20-ийг уншаад, дараахтай адил асуултуудыг тавьж болно.

• Хэн нэгэнд Их Эзэний адислалаас “зайлуулагдсан” мэдрэмж төрөхөд юу нөлөөлж болох вэ?

• Иаков ямар учраас ард түмэндээ тэргүүнээ гудайлгахгүй байхыг зөвлөсөн байж болох вэ?

Суралцагчдыг 2 Нифай 10:1–22-т дүн шинжилгээ хийхэд урь. Суралцагчид зайлуулагдсан мэт мэдрэмжтэй үедээ хэрхэн Их Эзэн өөрсдийг нь эргүүлэн авчирдгийг мөн Түүний өршөөл нигүүлслийн нотолгоог эрэлхийлж болно.

2 Нифай 10:23–25. “Бурханы таалалд өөрсдийгөө эвлэрүүл”

2 Нифай 9 дээрх номлолын нэг хэсэгтээ Иаков нүгэлд унасан нифайчуудын заримтай ярьж байсан тухай суралцагчдад сануул (2 Нифай 9:27–49-ийг үзнэ үү). 2 Нифай 10:23–25-ыг уншиж, Иаков нифайчуудыг ямар сорилтод уриалсныг олж мэд.

Эвлэрэх гэсэн үгийн нэг утга нь хүмүүс эсвэл юмс харилцан зохицох, тохиролцох явдал гэдгийг илүү сайн ойлгуулах нь суралцагчдад сургамжтай байж болох юм.

Бид нүгэл үйлдсэн бол ямар учраас Бурханы хүсэлтэй эвлэрэх ёстой вэ, мөн Бурханы хүсэлтэй эвлэрэхийн тулд юу хийж болох талаар бодоход суралцагчдыг урих талаар бод.