2 Nefia 16

“Masina, Masina, Masina, ny Tompo”

Efa nisy zavatra niainanao ve ka sarotra ny naneho azy tamin’ny alalan’ny teny? Mety izany no izy ho an’i Isaia tamin’ny fotoana nanoratany momba ny fahitany ny Tompo tamin’ny voninahiny feno. Mba hahafahany mampita tsara io zavatra niainana io, dia nampiasa sariohatra i Isaia mba hamariparitana ny herin’ny Tompo sy ny fahamasinany ary ny fahatsapan’i Isaia manokana ho tsy mahay firy. Nanadio azy tamin’ny fahotany ny Tompo ary niantso azy ho mpaminany. Afaka manampy anao hamantatra ny fahafahan’ny Tompo mamela sy manadio anao ity lesona ity.

Manampy ny mpianatra hahatakatra ireo andinin-tsoratra masina sarotra. Ny fampianarana ny mpianatra ny sahan-kevitra ara-tantara sy ara-kolontsaina miaraka amin’ny rakibolana, ny boky torolalana ho an’ny mpianatra, ary ireo fitaovana hoenti-manampy hafa ho an’ny fandalinana soratra masina dia afaka manokatra fahatakarana lalindalina kokoa ny fiteny sy sariohatra ao amin’ny soratra masina. Amporisiho ny mpianatra mba hanam-paharetana ary hangataka fanampiana avy amin’ny Tompo rehefa mikatsaka ny hahatakatra ny teniny.

Fanomanana ny mpianatra. Asao hisaintsaina ity fanontaniana manaraka ity ny mpianatra: Inona no zavatra tian’ny Andriamanitra be fitiavana iray ho takatsika rehefa mahatsapa isika fa tsy dia mahay?

Ireo sahanasa fianarana azo atao

Ny hery sy voninahitr’i Jesoa Kristy

Ny mpaminany sasany sy ny olona hafa dia nanana tombontsoa manokana nahita an’i Jesoa Kristy tamin’ny voninahiny mahatalanjona feno.

• Inona no antony sasantsasany nitsidihan’ny Tompo olona samy hafa nandritra ny tantaran’izao tontolo izao?

Hevero ny hanasa ny mpianatra hitanisa ohatra maro amin’ny fotoana nisehoan’ny Tompo tamin’olona. Mampisehoa sary izay afaka manampy ny mpianatra hahatadidy. Azonao atao ihany koa ny mangataka ny mpianatra hieritreritra hoe ny zavatra niainana inona no mety ho tian’izy ireo indrindra hisy azy ireo.

Ny Fiovan-tarehy, nataon’i Carl Bloch

Christ in the Land Bountiful [I Kristy tany amin’ny tanin’i Soafeno], nataon’i Simon Dewey

Ny Fahitana Voalohany, nataon’i Walter Rane

Jesus Christ Appears to the Prophet Joseph Smith and Oliver Cowdery [Niseho tamin’ny Mpaminany Joseph Smith sy i Oliver Cowdery i Jesoa Kristy], nataon’i Walter Rane

• Inona avy no eritreritra na fahatsapana mety hiainanao eo amin’ny fanatrehan’ny Tompo?

Nahita ny Tompo tamin’ny voninahiny feno i Isaia tamin’ny fotoana niantsoana azy ho mpaminany. Noraketiny an-tsoratra io zavatra niainana io ary i Nefia dia nampiditra izany tao amin’ny zavatra nosoratany. (Jereo ny Isaia 6 sy ny 2 Nefia 16.)

Na dia voasoratra amina soratra masina vakina amin’ny ampahany kely kokoa aza ny lesona, dia safidy iray hafa azo atao ny manasa ny mpianatra hamaky ny 2 Nefia 16:1–8 mba hahazoana misimisy kokoa ilay fahitana indray mandeha.

Vakio ny 2 Nefia 16:1–4, hitadiavana ny fomba namaritan’i Isaia ny zavatra hitany. Satria nampiasa sariohatra i Isaia hamaritana ny zavatra hitany, dia mety hilaina ireto fanazavana manaraka ireto:

Azo aseho na hazavaina amin’ny iray kilasy ity fampahalalana manaraka ity.

• Ebaneban’akanjo: Ny ampahany ambany kokoa amin’ny akanjon’ny Tompo, izay afaka maneho ny fahamarinany sy ny heriny ary ny fahadiovany. Zava-dehibe ny nahitan’i Isaia fa izany dia “nahafeno ny tempoly” (2 Nefia 16:1).

• Serafima: Anjely manompo ao amin’ny fitsaran’ Andriamanitra. Ireo elatry ny serafima dia tandindon’ny hery ihetsehan’izy ireo na anaovany zavatra (jereo ny Fotopampianarana sy Fanekempihavanana 77:4).

• Setroka na Rahona: Matetika dia tandindon’ny fanatrehan’ Andriamanitra (jereo ny Eksodosy 19:18; Apokalypsy 15:8).

• Teny na andian-teny inona ao amin’ireo andininy ireo no manampy anao hahatakatra ny voninahitry ny Tompo?

• Araka ny hevitrao, inona no mety ho fihetsikao raha nahita izany ianao?

Vakio ny 2 Nefia 16:5 mba hahitana ny fihetsika nasehon’i Isaia tamin’ny fahitany ny Tompo.

Asao hizara ny zavatra hitan’izy ireo ny mpianatra. Raha manampy, dia hevero ny hanontany ireto fanontaniana manaraka ireto:

• Teny na andian-teny inona no manampy anao hahatakatra fa fantatr’i Isaia ny fahotany sy ny fahalemeny?

• Inona no antony sasantsasany mety hahatsapan’ny olona ankehitriny ho tsy madio na tsy mendrika eo anoloan’ Andriamanitra?

  Ny fampianarana amin’ny alalana zavatra iray dia mety hanampy ny mpianatra hieritreritra ny fomba mety hijerentsika ny tenantsika rehefa manatona an’ Andriamanitra isika. Hevero ny hampitaha akanjo fotsy mamiratra iray amin’ny anankiray hafa izay nihamavo rehefa nandeha ny fotoana, na akanjo tena hita fa maloto mihitsy aza. Azonao atao ihany koa ny mampitaha fahazavana tsy mamiratra sy fahazavana tena mamiratra be. Ampio ny mpianatra hahatsapa fa lasa mazava ny fifanoherana rehefa ampiarahina ny zavatra roa ka ny iray dia hita mazava fa madio kokoa na mamiratra kokoa noho ilay hafa.

• Amin’ny fomba ahoana no mety hahatsara ny fahafantarantsika ny fahadisoantsika rehefa manakaiky kokoa ny Tompo isika?

Ny Tompo dia manala an-tsitrapo ireo fahotantsika

Vakio ny 2 Nefia 16:6–7, hitadiavana ny zavatra niseho manaraka tamin’i Isaia. Mety hanampy ny fahatsiarovana fa ny alitara dia nampiasaina tamin’ny fitsaohana tao amin’ny tempoly fahiny.

• Ahoana no amintinanao ny zavatra nitranga?

• Inona araka ny eritreritrao no mety ho hevitr’izany?

Eritrereto ny zavatra hitan’i Isaia teo amin’ny alitara sy ny fomba ahafahan’izany mampianatra momba ny famelan-keloka sy ny fahatongavana ho madio amin’ny alalan’ny Sorompanavotan’i Jesoa Kristy.

• Ahoana araka ny eritreritrao no niantraikan’ny fanesoran’ny Tompo ireo fahotan’i Isaia taminy?

• Fahamarinana inona mikasika ny Tompo no takatrao kokoa noho ireo andininy ireo?

Fahamarinana iray azontsika ianarana ny hoe manana hery hanadiovana antsika ny Tompo.

Misy fotoana, mety tsy mahatsiaro sy mahatsapa ny lanjan’io fahamarinana io isika. Ny Rahalahy Bradley R. Wilcox ao amin’ny Fiadidian’ny Zatovolahy maneran-tany dia nizara tenina zatovolahy iray nantsoiny hoe Damon. Ity zatovolahy ity dia nizara ireo eritreritra sy fahatsapana nananany momba ireo fahotany.

Nanoratra toy izao i Damon: … “Nahatsapa ho menatra tokoa aho ka tsy afaka nahavita zavatra tsara. … Tamiko dia rariny raha nahatsiaro ho malahelo foana aho. Nihevitra aho fa angamba mankahala ahy Andriamanitra noho izaho tsy vonona ny hiezaka mafimafy kokoa ka handresy tanteraka azy ity indray mandeha tsy miverina. Misy fotoana aho mahavita herinandro ary indraindray iray volana, kanefa aorian’izay dia miverina lavo indray ary mihevitra hoe, -tsy ho resiko mihitsy ity, ka inona no antony tokony hiezahako?-” (Bradley R. Wilcox, “Ny fahamendrehana dia tsy midika hoe tsy fisiana kilema,” Liahona, nôv. 2021, 62)

• Inona no antony mety hananan’ny zatovolahy iray tahaka an’i Damon ireo eritreritra ireo?

Alaovy sary an-tsaina hoe manana fahafahana hanampy olona iray tahaka an’i Damon ianao. Eritrereto ny zavatra niainan’i Isaia. Eritrereto ihany koa ny zavatra fantatrao manokana momba ny Mpamonjy ka azonao zaraina. Soraty izay zavatra mety hanampy. Azonao atao ihany koa ny mijery ao amin’ny soratra masina na fanambarana avy amina mpitarika ao amin’ny Fiangonana izay azonao ampiasaina amin’ny fanazavanao. Mety hanampy ireto ohatra manaraka ireto:

• Isaia 1:18

• Môzià 26:30

• Etera 12:27

Nampianatra toy izao ny Loholona Dieter F. Uchtdorf ao amin’ny Kôlejin’ny Apôstôly Roambinifolo:

Andriamanitra dia tsy mitady olona tsy manana fahalemena. Fa mitady ireo izay vonona hanolotra “fo sy saina marisika” [Fotopampianarana sy Fanekempihavanana 64:34], ary izy ireo dia hataony “tanteraka ao amin’i Kristy” [Môrônia 10:32–33]. (Dieter F. Uchtdorf, “Five Messages That All of God’s Children Need to Hear” [Fampaherezam-panahy tao amin’ny Oniversite Brigham Young, 17 aog, 2021], 3, speeches.byu.edu)

Fomba fijery vaovao

Vakio ny 2 Nefia 16:8 mba hahitana ny zavatra nataon’i Isaia taorian’ny nanadiovan’ny Tompo azy.

• Ahoana araka ny eritreritrao no mety ho fiantraikan’ny fanadiovana niainan’i Isaia tamin’ny valin-teniny ao amin’ny andininy 8?

Taorian’io fahitana io dia nanompo an-tsitrapo ny Tompo i Isaia. Am-polotaonany maro taorian’izany, dia nanampy tamin’ny fitarihana ny vahoakan’i Joda izy. Ireo fampianaran’i Isaia sy ireo zavatra nosoratany dia nanome aingam-panahy olona tsy tambo isaina, ary ny teniny dia nolazain’ny Mpamonjy mihoatra noho ny an’ny mpaminany hafa rehetra.

Niova ihany koa i Damon. Niaraka tamin’ny fanampian’ny mpitarika ao amin’ny Fiangonana, tsapan’i Damon fa ny Tompo dia tsy nandray azy tamin’ny fitsarana feno fahatezerana fa tamin’ny famindram-po kosa, naniry ny hanampy azy hihatsara. Vakio ny tenin’i Damon rehefa nanana fomba fijery vaovao momba an’ Andriamanitra izy:

Izao no nolazain’i Damon: … “Amin’izao fotoana izao aho dia mandany fotoana kely kokoa amin’ny fankahalana ny tenako noho ny zavatra vitako ary mandany fotoana betsaka lavitra kokoa amin’ny fitiavana an’i Jesoa noho ny zavatra nataony.” (Bradley R. Wilcox, “Ny fahamendrehana dia tsy midika hoe tsy fisiana kilema,” Liahona, nôv. 2021, 62)

• Inona no fiantraikan’ny Sorompanavotan’ny Mpamonjy, ny fitiavany ary ny famelany heloka teo amin’ny fiainanao?

Saintsaino ity fanontaniana manaraka ity rehefa mamarana ny fandalinana ity toko ity ianao:

• Inona araka ny hevitrao no azonao atao mba hiainana lalindalina kokoa ny fitiavan’ny Mpamonjy sy ny famelany heloka eo amin’ny fiainanao?

Fanazavana sy fampahalalana avy amin’ny zava-miseho

2 Nefia 16:1. Iza no hitan’i Isaia?

I Jaona sy i Nefia dia samy mijoro ho vavolombelona fa ilay Tompo hitan’i Isaia dia ilay Jesoa Kristy talohan’ny nahaterahany (jereo ny Jaona 12:41; 2 Nefia 11:2–3). Ankoatra izany, misy mpaminany hafa nanatri-maso ny fisehoan-javatra iray mitovitovy amin’izany (jereo ny Apokalypsy 4:1–11; Fotopampianarana sy Fanekempihavanana 110:1–5).

2 Nefia 16:5–8. Nahoana no nasian’ilay anjely vainafo mahamay ny molotr’i Isaia?

Rehefa nilaza toy izao i Isaia, “Lozako! Maty aho” (2 Nefia 16:5), dia naneho izy fa nahatsapa ho tsy mendrika ny ho eo anatrehan’ny Tompo. Ny vainafo napetraky ny serafima teo amin’ny molotr’i Isaia dia tandindon’ny fanadiovana, ny fanesorana amin’ny loto ary ny famelan-keloka amin’ny alalan’i Jesoa Kristy. I Joseph Smith ihany koa dia nilazana fa voavela ny helony rehefa nantsoin’ny Tompo izy (jereo ny Fotopampianarana sy Fanekempihavana 20:2, 5–6; jereo ihany koa ny “Circa Summer 1832 History,” The First Vision [2020], ChurchofJesusChrist.org).

2 Nefia 16:9–10. Inona no fantatsika momba ny olona izay niantsoana an’i Isaia mba hitoriany?

Niteny tamin’i Isaia ny Tompo fa ny ankabeazan’ny olona dia handà ny teniny. Nilaza fan naheno sy ahita izy ireo saingy nisafidy ny tsy hanaiky ny fanahin’ilay hafatra. Nitory ny hafatry ny Tompo i Isaia, nahatonga ny olona ho tompon’andraikitra amin’ny zavatra nampahafantarina azy ireo nefa tsy nekeny.

Ahoana no ahafahako misoroka ny fahakiviana rehefa mahita ny fahalemeko aho?

Nilaza toy izao ny Rahavavy Michelle D. Craig ao amin’ny Fiadidian’ny Zatovovavy maneran-tany:

Tokony horaisintsika an-tanan-droa ny fahatsapana tsy fahafaham-po araka an’ Andriamanitra izay miantso antsika handeha amin’ny lalana avoavo kokoa, no sady miezaka mamantatra sy misoroka ihany koa ny fahatsapana hosoka avy amin’i Satana, dia ny fahakiviana izay tsy mampandroso izany. … Afaka misafidy ny handeha amin’ilay lalana avoavo kokoa izay mitarika antsika hikatsaka an’ Andriamanitra sy ny fiadanany sy ny fahasoavany isika, na afaka mihaino an’i Satana isika, izay manafika antsika amin’ny alalan’ny hafatra milaza fa tsy ho afa-po izany mihitsy isika. … Ny tsy fahafaham-po tsapantsika dia afaka ny ho araka an’ Andriamanitra, na mety hanimba. (Michelle D. Craig, “Tsy fahafaham-po araka an’ Andriamanitra,” Liahona, nôv. 2018, 53)

Sahanasa fianarana fanampiny

2 Nefia 16:3. Heniky ny voninahitry ny Tompo ny tany manontolo

Mba hanampiana ny mpianatra hifanakalo hevitra momba ny voninahitr’i Jesoa Kristy, dia hevero ny hiresaka momba Azy amin’ny maha-Mpahary ity tany tsara tarehy ity Azy. Azon’ny mpianatra atao ny mizara ny hoe mpanao zava-kanto iza no ankafiziny ary mampiseho ny sasany amin’ny zava-kanto ataon’izy ireo. Ity fanambarana manaraka avy amin’ny Filoha M. Russell Ballard ao amin’ny Kôlejin’ny Apôstôly Roambinifolo ity dia azo ampiasaina hiresahana momba ny zavatra ankafizin’ny mpianatra momba ireo zavaboarin’ Andriamanitra.

“Isika indraindray dia mahatsapa fanajana lehibe sy lalina ho an’ny fahaiza-mamorona tena hafakely aseho amin’ny alalan’ny zava-kanto na mozika tena tsara. Ka moa ve tsy tokony ho lehibe kokoa mihoatra izany ny fanajantsika ny hery sy voninahitr’ilay Mpahary Masina antsika?” (M. Russell Ballard, “The Handiwork of God,” New Era, mar. 2006, 5; jereo ihany koa M. Russell Ballard, “God’s Love for His Children,” Ensign, mey 1988, 58)

2 Nefia 16:8. Rehefa nodiovin’ny Tompo isika dia mahatsapa faniriana hanompo Azy

Rehefa avy mamaky ny 2 Nefia 16:8 dia hevero ny hanontany hoe, “Nahoana araka ny hevitrao no mitombo ny fahavononantsika hanao izay zavatra angatahin’ Andriamanitra amintsika rehefa voavela heloka isika?” Asao ny mpianatra hanombana ny fahavononan’izy ireo hanao izay zavatra angatahin’ Andriamanitra amin’izy ireo amin’ny alalan’ny fanomezana amim-pahanginana isa ny tenan’izy ireo amina ambaratonga 1 hatramin’ny 10 (ka ny 10 dia tena vonona ary ny 1 dia tena tsy vonona mihitsy). Avy eo dia angataho izy ireo hisaintsaina ny mety mbola ihazonan’ny fahotana, tahotra, na antony hafa azy ireo tsy ho vonona kokoa hanao izay angatahin’ Andriamanitra amin’izy ireo.