2 Նեփի 25

Փրկվել Հիսուս Քրիստոսով

Երբևէ եղե՞լ է, որ որևէ մեկը թեթևություն բերի կամ փրկի ձեզ որևէ դժվարին իրավիճակից: Ինչպե՞ս եք վերաբերվել այդ մարդուն նրա օգնությունը ստանալուց հետո: Մարգարեական ուսմունքների կարևորությունն ընդգծելուց հետո Նեփին վկայեց, որ միայն Հիսուս Քրիստոսն ունի բոլոր մարդկանց փրկելու զորություն: Այս դասը կօգնի ձեզ հասկանալ, թե ինչպես եք փրկված Հիսուս Քրիստոսի շնորհով:

Սուրբ գրությունների և մարգարեների խոսքերի ուսուցում Հիսուս Քրիստոսի ավետարանի ճշմարիտ վարդապետությունը և սկզբունքները գրված են սուրբ գրություններում և մարգարեների խոսքերում: Երբ օգնեք ուսանողներին ուսումնասիրել դրանք, Սուրբ Հոգին կարող է նրանց մտքերին ու սրտերին վկայել այդ ճշմարտության մասին: Նրանք կարող են ավելի շատ նմանվել Երկնային Հորը և Հիսուս Քրիստոսին՝ հետևողականորեն կիրառելով վարդապետությունն ու սկզբունքները:

Ուսանողի նախապատրաստում. կարող եք ուսանողներին առաջարկել դասի համար պատրաստել և խոսել Հիսուս Քրիստոսի մասին մի ուղերձից, որն ազդեցություն է ունեցել նրանց վրա:

Հնարավոր ուսումնական վարժություններ

Մեր փրկվելու միակ ճանապարհը

Դասը սկսելու համար պատմեք մեկի պատմությունը, որը փրկվել է: Կարող եք ուսանողներին խնդրել պատմել նաև այն ժամանակի մասին, երբ նրանք կամ իրենց ծանոթ որևէ մեկը փրկվել է:

Կարելի է դիտել «Այնտեղ, որտեղ հանդիպում են արդարությունը, սերն ու ողորմությունը» տեսանյութը (5:36), որը հասանելի է կայքում՝ ChurchofJesusChrist.org:

2 Նեփի 25 գլխում Նեփին իր ժողովրդին հիշեցրեց մարգարեների այն վկայության մասին, որ Հիսուս Քրիստոսը Մեսիան է, ինչը նշանակում է՝ բոլոր մարդկանցից Օծյալը կամ Փրկիչը (տես Սուրբ գրքերի ուղեցույցը, «Մեսիա», scriptures.ChurchofJesusChrist.org): Նեփին հիշատակել է, որ թեև հրեաներն իրենց անհավատության պատճառով ցրվելու են, բայց եթե հավատային Հիսուս Քրիստոսին, Տերը կհավաքեր ու «կվերականգներ [նրանց] իրենց կորած և ընկած վիճակից» (2 Նեփի 25.15–17):

Կարդացեք 2 Նեփի 25.18–20 հատվածները և գտեք, թե ինչ էր ուսուցանում Նեփին հրեաների (և Աստծո բոլոր զավակների) փրկության մասին: Օգտակար կլինի իմանալ, որ սուրբ գրություններում անուն բառը կարող է օգտագործվել անձի զորությունը կամ ազդեցությունը ներկայացնելու համար: Դա հատկապես ճիշտ է, երբ խոսքը Փրկչի մասին է:

• Ինչի՞ց է փրկում մեզ Հիսուս Քրիստոսը:

• Ի՞նչ կլիներ, եթե մենք չունենայինք Փրկչին:

Փրկված շնորհով

Կարդացեք 2 Նեփի 25.23 հատվածը և գտեք, թե Հիսուս Քրիստոսն ինչպես է փրկել մեզ:

Ստորև ներկայացվող հատվածը նախատեսված է օգնելու ուսանողներին՝ ավելի լավ հասկանալ շնորհը:

Շնորհի վերաբերյալ լրացուցիչ տեղեկություն է ներկայացված «Բացատրական և պատմական տեղեկություններ» բաժնում:

• Ի՞նչ հարցեր կարող եք տալ՝ հատված 23-ում ներկայացված Նեփիի ուսմունքները խորապես հասկանալու համար:

Կարող եք ուսանողների հարցերը գրել գրատախտակին: Նրանք կարող են տալ այսպիսի հարցեր. «Ի՞նչ է շնորհը» և «Ի՞նչ է նշանակում, որ փրկված ենք այն ամենից հետո, ինչ կարող ենք անել»:

Օգտագործեք ստորև ներկայացվող նյութը, որպեսզի օգնեք ուսանողներին գտնել իրենց հարցերի պատասխանները:

Շնորհը աստվածային օգնություն կամ ուժ է, որը տրվում է մեզ Տեր Հիսուս Քրիստոսի Քավության միջոցով: …

Շնորհը պարգև է Երկնային Հոր կողմից՝ տրված Իր Որդի Հիսուս Քրիստոսի միջոցով: Շնորհ բառը, ինչպես այն օգտագործվում է սուրբ գրություններում, հիմնականում վերաբերում է արտոնող զորությանն ու հոգևոր բժշկմանը, որն առաջարկվում է Հիսուս Քրիստոսի ողորմության և սիրո միջոցով: (Ավետարանական թեմաներ, «Շնորհ», topics.ChurchofJesusChrist.org):

Այն ժամանակ Առաջին Նախագահությունից նախագահ Դիտեր Ֆ․ Ուխդորֆը բացատրել է.

Կարծում եմ, երբեմն մենք սխալ ենք մեկնաբանում «այն ամենից հետո՝ ինչ մենք կարող ենք անել» արտահայտությունը: Մենք պետք է հասկանանք, որ «հետո»-ն չի նշանակում «պատճառով»:

Մենք չենք կարող փրկվել այն ամենի «պատճառով», ինչ կարող ենք անել: Մեզնից ովքե՞ր են արել այն ամենն, ինչ կարող են: Արդյո՞ք Աստված սպասում է, մինչև սպառենք բոլոր ջանքերը, հետո միջամտի մեր կյանքին՝ Իր փրկող շնորհով:

Շատ մարդիկ իրենց հուսալքված են զգում, քանի որ անընդհատ ձախողվում են: Նրանք բուն աղբյուրից գիտեն, որ «հոգին հոժար է, բայց մարմինը տկար» [Մատթեոս 26.41]: Նրանք իրենց ձայնն են բարձրացնում Նեփիի հետ, բացականչելով. «Հոգիս մորմոքվում է իմ անօրինությունների պատճառով» [2 Նեփի 4.17]:

Ես համոզված եմ, որ Նեփին գիտեր, որ Փրկչի շնորհը թույլ է տալիս և հնարավորություն է տալիս մեզ հաղթահարել մեղքը [տես Ալմա 34.31]: Ահա, թե ինչու էր Նեփին ջանասիրաբար աշխատում համոզել իր զավակներին և եղբայրներին՝ «հավատալ Քրիստոսին և հաշտվել Աստծո հետ» [2 Նեփի 25.23]:

Ի վերջո, դա այն է, ինչ մենք կարող ենք անել: Եվ դա՛ է մեր մահկանացու կյանքի առաջադրանքը: …

Այսօր և ընդմիշտ Աստծո շնորհը հասանելի է բոլոր նրանց, ում սիրտը կոտրված է և հոգին փշրված [տես 3 Նեփի 9.19–20]: (Դիտեր Ֆ. Ուխդորֆ, «Շնորհի պարգևը», Ensign կամ Լիահոնա, մայիս, 2015թ., 110)

Կարող եք տալ ստորև ներկայացվող հարցերից մեկը կամ մի քանիսը, որպեսզի օգնեք ուսանողներին կիսվել իրենց մտքերով: Գուցե հուշում ստանաք և ուղղեք հաջորդական հարցեր կամ պատմեք այն ժամանակի մասին, երբ զգացել եք Փրկչի շնորհը: Կարող եք նաև մի օրինակ բերել, թե Փրկչի շնորհն ինչպես է օգնել ձեզ կամ ձեզ ծանոթ մեկին:

• Ինչպես կնկարագրեիք Փրկչի հանդեպ ունեցած ձեր զգացումները՝ իմանալով, որ Նրա շնորհը հասանելի է անձամբ ձեզ:

• Փրկչի շնորհից օգտվելու ի՞նչ ճանապարհներ կան:

• Ձեր կյանքի ո՞ր հատվածները կարող էին այլ լինել, եթե ավելի շատ զգայիք Տիրոջ շնորհը: Ի՞նչ ձևերով:

Մի պահ մտածեք, թե ինչ իմացաք այն մասին, որ Հիսուս Քրիստոսն է միակ ճանապարհը, որով կարող եք փրկվել: Ո՞ր ուղերձը կամ ճշմարտությունն էր ձեզ համար ամենից կարևորը կամ ձեզ մոտ Հիսուս Քրիստոսին փառաբանելու ցանկություն է առաջացրել: Ձեր սովորածն ու զգացածը ի՞նչ են ձեզ հուշում անել: Այս մտքերը կարող եք գրել ձեր օրագրում:

Ուրախացեք Քրիստոսով

Քանի որ Նեփին գիտեր Փրկչի շնորհը և փրկելու զորությունը, նա գրեց, որպեսզի օգնի ուրիշներին հավատալ Քրիստոսին: Կարդացեք 2 Նեփի 25.26 հատվածը և գտեք, թե ինչ կարող ենք անել, որպեսզի օգնենք ուրիշներին հավատալ Հիսուս Քրիստոսին: Կարող եք նշել այս հատվածում օգտագործված տարբեր գործողությունները նկարագրող բառերը:

• Այս հատվածում ո՞ր բառերն են նշանակալից ձեզ համար:

• Ձեր կյանքն ինչպե՞ս է փոխվել այն բանից, որ որևէ մեկը ձեզ պատմել է Հիսուս Քրիստոսի մասին:

• Ինչպե՞ս կարող է ամրապնդվել ձեր կապը Հիսուս Քրիստոսի հետ՝ ուրիշներին Նրա մասին անձնական զգացողությունները պատմելու միջոցով:

Որպեսզի օգնեք ուսանողներին կիրառել հատված 26-ը, կարող եք դասարանը բաժանել զույգերի կամ փոքր խմբերի և առաջարկել նրանց միմյանց հետ «զրուցել Քրիստոսի մասին»՝ կիսվելով Հիսուս Քրիստոսի մասին իրենց մտքերով ու զգացողություններով: Ուսանողները կարող են դասն ավարտել նաև՝ անհատապես կատարելով հետևյալ վարժությունը.

Մտածեք ձեր կյանքում մեկի մասին, որին օգտակար կլիներ Փրկչի սիրո և շնորհի մասին հիշեցնելը: Պատրաստեք ուղերձ (օրինակ՝ տեքստ, սոցիալական մեդիայի գրառում կամ անձնական նամակ), որով կկարողանայիք կիսվել նրա հետ:

Բացատրական և պատմական տեղեկություններ

2 Նեփի 25.23: Ես ինչո՞վ եմ արժանի՝ ստանալու Տիրոջ շնորհը:

Տասներկու Առաքյալների Քվորումից երեց Դ. Թոդ Քրիստոֆերսոնը մեզ հիշեցրել է.

Աստվածային օգնությանն արժանանալու համար մենք կարիք չունենք հասնելու կարողությունների կամ բարության ինչ-որ նվազագույն աստիճանի. աստվածային օգնությունը մերը կարող է լինել ամեն ժամ, ամեն օր, անկախ նրանից, թե հնազանդության ճանապարհի որ մասում ենք գտնվում: Սակայն ես գիտեմ, որ նրա օգնությունը փափագելուց բացի, մենք պետք է ջանք գործադրենք, ապաշխարենք և ընտրենք Աստծուն, որպեսզի Նա կարողանա գործել մեր կյանքում՝ համաձայն արդարության և կամքի բարոյական ազատության: Իմ խնդրանքն է պարզապես պատասխանատվություն ստանձնել և գործի անցնել, որ Աստծո օգնության համար հնարավորություն ստանանք (Դ. Թոդ Քրիստոֆերսոն, «Ազատ հավիտյան՝ գործելու ինքնուրույն», Ensign կամ Լիահոնա, նոյեմբեր 2014թ., 19):

Ի՞նչ օրհնություններ կարող եմ ստանալ՝ փնտրելով Տիրոջ շնորհը:

Կարող եք դիտել «Եկեք Քրիստոսի մոտ. 2014 թ. Թեմատիկ երգ» տեսանյութը (4:48): Մտածեք, թե Փրկչի շնորհն ինչ ազդեցություն է ունեցել ձեզ վրա, երբ կարիքի մեջ եք եղել:

2 Նեփի 25.24–25: Ո՞րն է Մովսեսի օրենքը, և ինչո՞ւ Նեփին ասաց, որ այն մեռել է:

Աստված Մովսեսի միջոցով օրենքներ տվեց, երբ Իսրայելի զավակները չհնազանդվեցին ի վերուստ տրված բարձրագույն օրենքին (տես Ելից 32, 34, Ջոզեֆ Սմիթի Թարգմանություն, Ելից 34.1–2 [Աստվածաշնչի հավելվածում]): Սա ճանաչվեց որպես Մովսեսի օրենք: Այն բաղկացած էր բազմաթիվ կանոններից, արարողակարգերից և զոհաբերություններից, որոնք պետք է հիշեցնեին նրանց Աստծո և Նրա նկատմամբ ունեցած իրենց պարտավորության մասին (տես Մոսիա 13.30): Արարողակարգային օրենքի մեծ մասն իրականացվում էր մահվան և Հիսուսի Քրիստոսի Հարության պահին (տես Ալմա 34.13–14): Օրենքի մեռած լինելու պատճառներից մեկն այն էր, որ այն փրկություն չէր բերում Աստծո զավակներին: Միայն Հիսուս Քրիստոսն էր կարողանում անել դա (տես Սուրբ գրքերի ուղեցույցը, «Մովսեսի օրենքը», scriptures.ChurchofJesusChrist.org):

Օժանդակ ուսումնական վարժություններ

Մորմոնի Գրքի ուսմունքներ շնորհի մասին

Կարող եք օգտագործել հետևյալ հղումներից մի քանիսը կամ բոլորը, որպեսզի օգնեք ուսանողներին իմանալ շնորհի մասին. 2 Նեփի 2.6–8, 2 Նեփի 10.24–25, Հակոբ 4.7, Հելաման 14.13, Եթեր 12.27 և Մորոնի 10.32–33: Կարող եք ուսանողներին խմբերի բաժանել, հանձնարարել այդ հատվածներից մեկը կամ մի քանիսը և խնդրել նրանց պատրաստվել ու կիսվել, թե հատվածներն ինչ են ուսուցանում Փրկչի շնորհի մասին:

«Ճիշտ ճանապարհը Քրիստոսին հավատալն է» (2 Նեփի 25.28–29)

2 Նեփի 25.18–20 հատվածը կարդալուց հետո կարող եք ուսանողներին օգնել մտածել, թե ինչպես է Հիսուս Քրիստոսը մեր փրկության միակ ճանապարհը: Ուսանողներին առաջարկեք կարդալ 2 Նեփի 25.28–29 հատվածները և քննարկեք, թե նրանք ինչ են սովորել «ճիշտ ճանապարհ» կրկնվող արտահայտությունից:

Օգնեք ուրիշներին՝ նայել Քրիստոսին

Ցուցադրեք Մովսեսի և պղնձյա օձի նկարը և վերապատմեք պատմությունը (տես Թվոց 21.4–9): Ուսանողներին առաջարկեք պատկերացնել, որ ապրում են Մովսեսի ժամանակաշրջանում՝ իսրայելցիների կողքին, երբ մարդկանց խայթում էին թունավոր օձերը: Ուսանողներին հարցրեք, թե ինչ կանեին, որպեսզի համոզեին օձի խայթոց ստացած իսրայելացիներին նայել այն օձին, որ Մովսեսը տեղադրել էր նրանց դիմաց: Թունավոր օձի խայթոցը համեմատեք մեղքի հետ և կարդացեք 2 Նեփի 25.26 հատվածը՝ փնտրելով, թե ինչ արեցին Նեփին և մյուսները, որպեսզի օգնեն ուրիշներին նայել Փրկչին՝ մեղքերի քավություն ստանալու համար: Քննարկեք, թե ուսանողներն ինչպես կարող են կիրառել հատված 26-ը իրենց կյանքում:

Մովսեսի օրենքը

Ուսանողներին առաջարկեք 2 Նեփի 25.24–30 հատվածում փնտրել և գտնել, թե ինչու Նեփին և նրա ժողովուրդը հետևեցին Մովսեսի օրենքին: Քննարկեք, թե Մովսեսի օրենքի տարբեր տարրերը ինչպես ժողովրդին ուղղորդեցին դեպի Հիսուս Քրիստոսը: (տես Սուրբ գրքերի ուղեցույցը, «Մովսեսի օրենքը», scriptures.ChurchofJesusChrist.org): Կարող եք քննարկել նաև, թե տարբեր պատվիրաններն ու արարողությունները ինչպես են մեր օրերում մեզ ցույց տալիս Հիսուս Քրիստոսին: