Sukda ang Imong Nakat-onan 2

1 Nephi 16–2 Nephi 25

Kini nga leksiyon gituyo aron sa pagtabang kanimo sa pagtimbang-timbang sa paglambo nga imong nasinati sa panahon sa imong pagtuon sa Basahon ni Mormon.

Pagpahinumdom sa mga estudyante sa ilang personal nga mga tumong: Isip kabahin sa programa sa Kabataan ug Kabatan-onan, ang mga estudyante mahimong nakahimo og espirituhanon, sosyal, pisikal, ug intelektwal nga mga tumong aron sa pagtabang kanila nga mahimong mas mahisama sa Manluluwas. Dapita kanunay ang mga estudyante sa pagpamalandong kon sa unsang paagi ang mga kamatuoran nga ilang nakat-onan sa seminary makatabang nila nga makab-ot ang ilang mga tumong.

Pagpangandam sa estudyante: Dapita ang mga estudyante sa pagrebyo sa pipila sa ilang nakat-onan diha sa 1 Nephi 16 hangtod sa 2 Nephi 25 ug motambong nga andam nga mopaambit sa paborito nga mga kasulatan o importante nga mga kamatuoran.

Mga Posibleng Kalihokan sa Pagkat-on

Paghunahuna sa nakat-onan sa ebanghelyo

Kini nga leksiyon gituyo aron sa pagtabang sa mga estudyante sa pagsukod sa (1) mga tumong nga ilang gihimo, (2) sa ilang abilidad sa pagpasabot sa mga pagtulun-an diha sa Basahon ni Mormon, o (3) sa unsa nga paagi ang ilang mga kinaiya, tinguha, ug abilidad sa pagsunod sa ebanghelyo nabag-o. Ang pagtuon sa klase sa 1 Nephi 16 hangtod sa 2 Nephi 25 mahimong mihatag og gibug-aton sa mga kamatuoran gawas niadtong anaa sa mosunod nga mga kalihokan. Kon mao, ang mga kalihokan mahimong ipahiangay sa paglakip niadtong mga kamatuoran.

Aron matabangan ang mga estudyante nga makita ang bili sa pagpamalandong sa ilang espirituhanong pag-uswag samtang nagtuon sila sa Basahon ni Mormon, pagdala og samin. Dapita ang mga estudyante sa paghisgot kon sa unsang paagi ang pagtan-aw sa ilang mga kaugalingon mahimong mapuslanon (pagtan-aw sa mga butang sa ilang luyo, pagtan-aw sa ilang repleksiyon, ug uban pa). Dayon dapita sila sa pagkonsiderar sa bili sa paghunahuna ug pagsukod sa ilang mga pagtuon sa ebanghelyo ug sa ilang mga pagpili. Ikonsiderar ang pagpangutana og sama sa mosunod:

• Unsa ang mga benepisyo sa pagbaton ug samin?

• Sa unsang paagi nga ang pagtan-aw sa atong mga kaugalingon sa samin susama sa paghunahuna ug pagsukod sa atong pagkat-on sa ebanghelyo?

Pagpamalandong sa espirituwal nga pag-uswag

Kini nga bahin sa leksiyon gituyo sa pagtabang sa mga estudyante sa pagpamalandong sa ilang kasinatian sa pagtinguha ug pagbuhat sa pagpadayag gikan sa Langitnong Amahan samtang sila nagtuon sa Basahon ni Mormon.

Pamalandong sa mga pag-aghat ug mga pagbati gikan sa Espiritu Santo nga tingali imong nadawat sa pagtuon sa Basahon ni Mormon. Adunay daghang mga paagi nga ang Espiritu Santo mahimong nakig-istorya kanimo. Sama pananglit, ang piho nga mga bersikulo tingali nakakuha sa imong atensiyon ug gibati nimo ang tinguha nga markahan kini. Tingali aduna kay mga pagbati sa kalinaw o gugma. Tingali nakabasa ka ug nadasig sa paglihok sa piho nga paagi o nakit-an ang tubag sa usa ka pangutana nga naa nimo.

Ipakita ang mosunod nga mga pangutana aron ang mga estudyante makapamalandong niini sa ilang kaugalingong gipaspason. Mahimong makatabang usab ang pagdapit sa mga estudyante sa pagrekord sa ilang mga tubag sa duha o tulo sa mga pangutana diha sa ilang mga journal sa pagtuon.

• Unsa nga mga asoy o mga tudling gikan sa Basahon ni Mormon ang nakatabang nimo nga makita kon sa unsang paagi ang Langitnong Amahan nakig-istorya sa Iyang mga anak?

• Unsa nga mga hunahuna o mga pagbati ang imong nasinati sa seminary o sa imong personal nga pagtuon karong tuiga?

• Unsa ang imong nahimo sa pagpangita og pagpadayag gikan sa Langitnong Amahan?

• Unsa ang imong mahimo sa pagpangita og pagpadayag ug pag-andam sa pag-ila sa pagpadayag kon kini moabot?

• Giunsa nimo paglihok ang mga impresiyon nga imong nadawat?

Dapita ang andam nga mga estudyante sa pagpaambit sa pipila sa ilang mga tubag, kon angay, ngadto sa klase. Ang mga estudyante mahimo usab nga magpaambit nga magpares o sa gagmay nga mga grupo.

Ipasabot ang Pagkapukan ni Adan ug ni Eva ug ang Pag-ula ni Jesukristo

Alang sa mosunod nga kalihokan, ikonsiderar ang pagdapit sa mga estudyante nga makigtinabangay uban sa usa ka klasmeyt nga ang matag kapares mopili og usa sa pinahandag nga pagkasuwat[italicize] nga mga hilisgotan sa sunod nga parapo.

Hunahunaa nga ikaw usa ka misyonaryo ug ikaw ug ang imong kompanyon nangandam sa pagtudlo sa usa ka tawo mahitungod sa Pagkapukan. Nakahukom ka nga ang usa kaninyo kinahanglang magtudlo mahitungod sa ang Pagkapukan ug ang mga epekto niini sa katawhan ug laing usa kinahanglang magtudlo mahitungod sa kon sa unsang paagi ang Manluluwas nagtabang kanato sa pagbuntog sa mga epekto sa Pagkapukan.

Gamita ang mga kasulatan sa pagtabang kanimo sa pagpasabot sa hilisgotanan nga imong napili. Mahimong makatabang ang pagrebyo sa 2 Nephi 2:17–27; 9:6–12; 10:23–25, mubo nga mga sulat sa imong journal sa pagtuon,topics.ChurchofJesusChrist.org aron matabangan ka ngamaandam sa pagpaambit.

Dapita ang mga estudyante sa pagpaambit sa unsay ilang giandam ngadto sa ilang kapares o sa tibuok klase. O ikonsiderar ang pagdapit sa mga estudyante sa pagpadala sa ilang pagpasabot ngadto sa usa ka tawo sa ilang pamilya, usa ka higala, o usa ka lider sa Simbahan.

Ang akong mga pagbati mahitungod kang Jesukristo

Kini nga bahin sa leksiyon gituyo aron sa pagtugot sa mga estudyante sa pagpamalandong sa ilang mga pagbati mahitungod ni Jesukristo.

Hatagi og panahon ang mga estudyante sa pagbasa ug pagpamalandong sama sa gisugyot sa mosunod nga parapo. Mahimo nimong ikonsidrar ang hilom nga pagpatukar og balaan nga mga himno mahitungod sa Manluluwas sama sa “Ako Nagpabilin nga Natingala” (Mga Himno, nu. 114) o “Gugma sa Atong Manluluwas” (Mga Himno, nu. 63).

Ang Basahon ni Mormon nagpamatuod ni Jesukristo. Pamalandongi ang imong nakat-onan o natun-an mahitungod sa Manluluwas. Rebyoha ang mga kapitulo nga imong gitun-an, sama sa 1 Nephi 19, 2 Nephi 9, ug 2 Nephi 25. Mahimo usab nimong pangitaon ang mga tudling nga imong gimarkahan. Tingali makatabang ang pagrebyo sa unsay imong gisulat diha sa imong journal sa pagtuon, hilabi na sa mga entry nga naglangkob sa imong mga pagbati mahitungod Kaniya.

• Pagsulat og usa ka balak o usa ka sulat ngadto sa Manluluwas nga nagpahayag sa imong mga pagbati ngadto Kaniya. Ikonsiderar ang paggamit sa mga pulong o hugpong sa mga pulong gikan sa mga kasulatan o paghisgot og mga tudling sa kasulatan.

• Paghimo og lista sa mga pulong nga naghulagway sa imong mga pagbati mahitungod sa Manluluwas. Ilakip ang pipila ka mga paghulagway gikan sa mga kasulatan. Paghimo og word cloud, o isulat ang mga pulong sa tagsa-tagsa ka mga piraso sa papel ug ikonsiderar ang pagbitay niini sa imong kwarto o sa laing dapit diin kanunay nimo kining makita.

• Pagdrowing og usa ka butang nga makatabang kanimo sa pagpahayag sa imong mga pagbati mahitungod sa Manluluwas.

Kon itugot sa panahon, tugoti ang mga estudyante sa pagpaambit sa unsay ilang nahimo aron ilang mapahayag ang ilang mga pagpamatuod mahitungod sa Manluluwas. Ikonsiderar usab ang pagdapit sa mga estudyante sa pagpaambit sa ilang binuhat ngadto sa ilang pamilya o sa uban. Mahimo usab nimong ipaambit ang imong pagpamatuod sa imong pagpasalamat sa Manluluwas.