Seminary
Doktrinal nga Kahanas: 2 Nephi 26:33: “Ang Tanan Managsama ngadto sa Dios”

“Doktrinal nga Kahanas: 2 Nephi 26:33: ‘Ang Tanan Managsama ngadto sa Dios,’” Manwal sa Magtutudlo sa Basahon ni Mormon (2024)

“Doktrinal nga Kahanas: 2 Nephi 26:33,” Manwal sa Magtutudlo sa Basahon ni Mormon

Doktrinal nga Kahanas: 2 Nephi 26:33

“Ang Tanan Managsama ngadto sa Dios”

grupo sa mga katawhan

Sa imong pagtuon sa 2 Nephi 26, imohang nakat-onan nga “ang tanan managsama ngadto sa Dios” (bersikulo 33) ug nga ang Dios nagdapit sa tanan Niyang mga anak sa pagduol ngadto Kaniya. Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan alang sa 2 Nephi 26:33, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Gahom gikan sa personal nga pagpangandam.Ang Ginoo misulti ni Hyrum Smith nga unahon ang “pagbaton” sa Iyang pulong, ug dayon ang Espiritu mohatag kaniya og gahom “ngadto sa pagkabig sa mga tawo” (Doktrina ug mga Pakigsaad 11:21). Pagtuon nga makugihon, pag-ampo, ug pagpamalandong sa dili ka pa motudlo. Makatugot kini sa Espiritu Santo sa paggiya kanimo sa pag-andam sa mga leksiyon ug pag-ila sa mga panginahanglan samtang ikaw magtudlo. Ang kapasidad sa pagtudlo pinaagi sa Espiritu nagagikan sa personal nga paningkamot ug pagpangandam sa leksiyon.

Pagpangandam sa estudyante: Dapita ang mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan: 2 Nephi 26:33, “Tanan managsama ngadto sa Dios.” Usa ka paagi sa pagbuhat niini tingali mao ang paggamit sa Doktrinal nga Kahanas nga app.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “2 Nephi 26,” nga mao ang pangkontekstong leksiyon alang sa tudling sa doktrinal nga kahanas sa 2 Nephi 26:33. Kon kinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug isag-ulo

Basaha ang 2 Nephi 26:33 ug rebyoha ang doktrina nga imong nakat-onan sa miaging leksiyon nga ang tanan managsama ngadto sa Dios.

  • Unsa ang mga sitwasyon diin ang doktrina niini nga bersikulo mahimong makatabang? Ipasabot kon unsaon.

Hatagi ang mga estudyante og oportunidad sa pagsag-ulo sa pakisayran sa tudling sa doktrinal nga kahanas sa 2 Nephi 26:33 ug ang kauban niini nga mahinungdanon nga hugpong sa mga pulong sa kasulatan. Ang mosunod mao ang usa ka ehemplo kon unsaon kini sa pagbuhat.

Isulat ang pakisayran sa kasulatan ug ang mahinungdanon nga hugpong sa mga pulong sa kasulatan alang sa 2 Nephi 26:33, “Ang tanan managsama ngadto sa Dios,” diha sa imohang journal sa pagtuon. Sublia ang pakisayran sa kasulatan ug ang mahinungdanon nga hugpong sa mga pulong sa kasulatan sa pipila ka mga higayon (pagsulti o sa pagsulat) hangtod nga imong mahinumduman kini.

Laing opsiyon mao ang katunga sa mga estudyante nga magdungan sa pagsulti sa pakisayran sa kasulatan, sundan sa laing katunga sa pagsubli sa mahinungdanon nga hugpong sa mga pulong sa kasulatan. Balika kini sa makadaghang higayon.

Pagbansay sa Paggamit

Rebyoha ang mga baroganan sa pag-angkon og espirituhanong kahibalo nga gitudlo sa mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Aron matabangan ang mga estudyante sa pagrebyo sa mga baroganan sa pag-angkon og espirituhanong kahibalo agig pagpangandam sa mosunod nga pagbansay sa paggamit, pagbasa og kapahayag [sentence] gikan sa mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022) sa matag baroganan. Dapita ang mga estudyante sa pag-ila sa baroganan nga gihatagan og gibug-aton diha sa kapahayag. Ikonsiderar ang pagsubli sa pipila ka mga higayon gamit ang lain-laing mga kapahayag [sentence].

Ang mosunod nga asoy, gipahiangay gikan sa artikulo nga “Ako Modawat Niini Uban sa Hugot nga Pagtuo” ni Elizabeth Maki (history.ChurchofJesusChrist.org), mahitungod sa usa ka tawo nga naapektohan sa pagdili sa pagkapari [priesthood restriction]. Aron makahibalo mahitungod sa pagdili sa pagkapari, tan-awa ang ulohan sa Opisyal nga Pahayag 2 diha sa kataposan sa Doktrina ug mga Pakigsaad.

icon, handoutIkonsiderar ang pagpakita o paghatag og kopya sa handout sa “Istorya ni George Rickford” sa ubos.

Samtang magbasa ka sa asoy ni Brother Rickford, pangita og piho nga ebidensiya sa matag usa sa mga baroganan sa pag-angkon og espirituhanong kahibalo sa iyang panaw.

Ang Istorya ni George Rickford

Manwal sa Magtutudlo sa Basahon ni Mormon—Doktrinal nga Kahanas: 2 Nephi 26:33: “Ang Tanan Managsama ngadto sa Dios”

Niadtong 1969, si George Rickford, usa ka hamtong nga nagpuyo sa Leicester, England, nakasugat og mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw. Sa sinugdanan si George misalikway sa ilang mensahe, apan sa kadugayan misugod siya sa pagpakigkita sa mga misyonaryo. Human sa tulo ka mga bulan sa mainitong pagsusi, nahigmata si George usa ka buntag nga may lig-ong pagtuo nga ang Simbahan tinuod.

Si George naghinam-hinam sa pagpaambit sa iyang bag-ong nakaplagan nga pagpamatuod ngadto sa mga elder. Sa wala pa niya kini mahimo, ila siyang gipahibalo nga dili siya takos nga makadawat sa pagkapari isip miyembro sa Simbahan tungod sa iyang kagikan nga naay sagol-sagol nga kaliwat, nga naglakip sa mga katigulangan sa itom nga African nga kaliwat.

Usa ka adlaw, nakig-istorya si George uban sa usa ka suod nga higala mahitungod sa iyang mga kasinatian uban sa mga misyonaryo ug misugod sa pagtudlo sa iyang higala mahitungod ni Propeta Joseph Smith. Nahinumdom siya, “Samtang ako nag-asoy niana nga istorya, nalagsik ako ug may usa ka butang nga mipuli ug mibati ako sa Espiritu.”

Ang kasinatian mipamatuod pag-usab sa pagpamatuod ni George, apan ang iyang mga kabalaka mahitungod sa pagdili sa pagkapari nagpabilin. Samtang nag-ampo siya alang sa dugang nga pagsabot, kini nga mensahe miabot kaniya: “Dili ka kinahanglan nga makasabot sa tanan mahitungod sa akong ebanghelyo sa dili ka pa mopasalig sa imong kaugalingon ngadto niini. Unsa kaha kon ipakita nimo ang imong hugot nga pagtuo pinaagi sa pagdawat sa unsay imong nadungog ug isalig ang nahibilin ngari sa akong mga kamot?”

Nahupay sa mensahe, si George mainampoong mitubag, “Oo, Ginoo, akong buhaton. Ako modawat niini uban sa hugot nga pagtuo. Ug nga diay, salamat kanimo, salamat kanimo.” Paglabay sa duha ka bulan, si George nabunyagan ug nahimong matinud-anon nga miyembro sa Simbahan.

Niadtong 1975, tulo ka tuig sa wala pa ang pagpadayag sa pagkapari, si George mipahayag sa iyang pagtuo sa usa ka makiangayon nga Dios, misulat nga iyang gidawat ang pagdili “diha sa hugot nga pagtuo, nga walay bisan unsa nga pagpanagana.” Siya midugang, “Ako mapasalamaton lamang nga ang pagkapari sa Ginoo sa makausa pa anaa sa yuta, uban sa tanan niining kauban nga mga panalangin, awtoridad, ug responsibilidad. Kini wala kaayo nako igsapayan kon kinsa ang aduna niini ug kinsa ang wala niini, apan mas importante kon giunsa kini paggamit.”

Niadtong 1978 si George nahibalo sa pagpadayag nga naghatag sa pagkapari ngadto sa tanang takos nga mga lalaki (tan-awa sa Opisyal nga Pahayag 2).

“Sa dihang nauli si George, siya ug si June [iyahang asawa] nag-istoryahanay sa tibuok gabii mahitungod kon unsay buot ipasabot sa balita alang sa ilang pamilya. Ang kausaban dako kaayo. Pagkasunod buntag, giordenahan si George Rickford isip usa ka priest sa Aaronic nga Pagkapari. Duha ka bulan ang milabay, giordenahan siya isip usa ka Seventy ug gihimo nga senior nga sakop sa korum sa Seventy sa stake. Ug duha ka bulan human niana, si George ug June Rickford nasilyo sa Templo sa London England, uban sa ilang upat ka anak” (“Ako Modawat Niini Uban sa Hugot nga Pagtuo”).

© 2023 pinaagi sa Intellectual Reserve, Inc. All rights reserved.

  • Unsa kaha ang gibati ni George sa dihang nakadungog siya nga dili siya takos nga makadawat sa pagkapari?

Ikonsiderar ang pagtugot sa mga estudyante sa pagpaambit sa ilang mga ideya pinaagi sa pagpangutana una, “Unsa nga ebidensiya ang inyong nakita nga si Brother Rickford migamit sa matag usa sa mga baroganan sa pag-angkon og espirituhanong kahibalo?” Sa laing paagi, ang mga estudyante mahimong magtinabangay nga magtinagurha o sa gagmay nga mga grupo sa pagtubag sa mosunod nga mga pangutana o hatagan og usa ka baroganan nga tutokan.

Lihokon Inubanan sa hugot nga pagtuo

  • Sa unsa nga mga paagi si Brother Rickford milihok inubanan sa hugot nga pagtuo? Sa unsang paagi kini nakatabang kaniya?

Susihon ang mga konsepto ug mga pangutana inubanan sa mahangtorong panglantaw

  • Sa unsang paagi ang tubag sa Langitnong Amahan sa pag-ampo ni Brother Rickford nakatabang niya nga makita ang iyang sitwasyon gikan sa mahangtorong panglantaw? Sa unsang paagi kini nakatabang ni Brother Rickford sa pagsunod sa Ginoo?

Tinguhaa ang dugang nga panabot pinaagi sa balaanong gitudlo nga mga tinubdan

  • Sa unsang mga paagi nga ang Espiritu Santo usa ka balaanong gitudlo nga tinubdan sa pagtabang ni Brother Rickford?

  • Unsa ang ubang balaanong gitudlo nga mga tinubdan sa atong panahon nga mahimong makatabang sa usa ka tawo nga adunay mga pangutana mahitungod sa pagdili sa pagkapari? Unsaon kaha sa Opisyal nga Pahayag 2 ug sa 2 Nephi 26:33 pagtabang kanila?

Para sa dugang nga impormasyon nga makatabang sa mga pangutana mahitungod sa pagdili sa pagkapari, tan-awa ang “Komentaryo ug Background nga Impormasyon” nga seksiyon sa kataposan niini nga leksiyon.

Mahimong mapuslanon ang pagpangutana og dugang nga mga pangutana sama sa mosunod: Ngano sa imong hunahuna ang 2 Nephi 26:33 usa ka tudling sa doktrinal nga kahanas? Unsa ang imong nakat-onan o gibati sa imong pagtuon karon? Sa unsang paagi nimo personal nga magamit ang ehemplo ni Brother Rickford ug kini nga tudling sa imong kinabuhi?

Taposa pinaagi sa paghatag og pagpamatuod sa gugma sa Dios alang sa tanan Niyang mga anak o pagdapit sa mga estudyante sa pagpaambit sa ilang mga pagbati ug mga kasinatian mahitungod sa pagkamanagsama ngadto sa Dios.

Rebyo sa doktrinal nga kahanas

Ang mosunod nga rebyo nga kalihokan kinahanglan nga gamiton sa usa ka leksiyon nga itudlo sa umaabot human niining usa.

Bahina ang mga estudyante ngadto sa gagmay nga mga grupo. Dapita ang mga estudyante sa matag grupo nga magpuli-puli sa pagsulti og usa ka pulong o numero matag higayon hangtod makompleto sa grupo ang tibuok nga pakisayran ug mahinungdanon nga hugpong sa mga pulong sa “2 Nephi 26:33: ‘Ang tanan managsama ngadto sa Dios.’” Sama pananglit, ang unang estudyante moingon og “2,” ang ikaduhang estudyante moingon og “Nephi,” ug mopadayon hangtod ang usa ka estudyante mosulti sa kataposang pulong, “Dios.” Dayon, ang sunod nga estudyante mahimong magsugod pag-usab pinaagi sa pag-ingon og “2.”

Dapita ang matag grupo sa pag-recite sa pakisayran ug sa mahinungdanon nga hugpong sa mga pulong sa hustong paagi kutob sa ilang mahimo sulod sa gitakda nga gidugayon sa oras.