2 Nephi 25

Giluwas ni Jesukristo

Naa bay tawo nga mihupay o miluwas kanimo sukad gikan sa usa ka lisod nga sitwasyon? Unsa ang imong gibati mahitungod niana nga tawo human sa iyang tabang? Human sa paghatag og gibug-aton sa kaimportante sa propetikanhong mga pagtulun-an, si Nephi mipamatuod nga si Jesukristo lamang ang adunay gahom sa pagluwas sa tanang katawhan. Kini nga leksiyon makatabang kanimo nga makasabot kon sa unsang paagi ikaw naluwas pinaagi sa grasya ni Jesukristo.

Pagtudlo sa mga kasulatan ug sa mga pulong sa mga propeta.Ang tinuod nga doktrina ug mga baroganan sa ebanghelyo ni Jesukristo anaa sa mga kasulatan ug sa mga pulong sa mga propeta. Samtang imong tabangan ang mga estudyante sa pagtuon niini, ang Espiritu Santo makapamatuod sa kamatuoran ngadto sa ilang mga hunahuna ug mga kasingkasing. Sila mahimong mas mahisama sa Langitnong Amahan ug ni Jesukristo pinaagi sa makanunayon nga paggamit sa tinuod nga doktrina ug mga baroganan.

Pagpangandam sa estudyante: Ikonsiderar ang pagdapit sa mga estudyante nga motambong sa klase nga andam sa paghisgot mahitungod sa mensahe kabahin ni Jesukristo nga nakaapekto kanila.

Mga Posibleng Kalihokan sa Pagkat-on

Ang bugtong paagi nga kita maluwas

Sa pagsugod sa leksiyon, pagpaambit og asoy sa usa ka tawo nga giluwas o naluwas. Mahimo usab nimong hangyoon ang mga estudyante sa pagpaambit mahitungod sa usa ka panahon sa dihang sila o ang usa ka tawo nga ilang nailhan giluwas o naluwas.

ChurchofJesusChrist.org

Sa 2 Nephi 25, si Nephi mipahinumdom sa iyang katawhan nga ang mga propeta mipamatuod nga si Jesukristo mao ang Mesiyas, nga nagpasabot sa Usa nga Dinihogan o Tigluwas, sa tanang katawhan (tan-awa sa Giya ngadto sa mga Kasulatan, “Mesiyas,” scriptures.ChurchofJesusChrist.org). Si Nephi mirekord nga bisan og ang mga Judeo pagakatagon tungod sa ilang pagkawalay pagtuo, kon sila motuo ni Jesukristo, ang Ginoo mopundok ug “[mo]pahiuli [kanila] gikan sa ilang pagkawala ug pagkapukan nga kahimtang” (2 Nephi 25:15–17).

Basaha ang 2 Nephi 25:18–20, nga mangita sa unsay gitudlo ni Nephi kon sa unsang paagi ang mga Judeo (ug ang tanang mga anak sa Dios) maluwas. Mahimong makatabang ang pagkahibalo nga diha sa mga kasulatan, ang pulong nga ngalan mahimong gamiton sa pagrepresentar sa gahom o awtoridad sa usa ka tawo. Tinuod kini hilabi na kabahin sa Manluluwas.

• Gikan sa unsa kita giluwas ni Jesukristo?

• Unsa kaha kon kita walay Manluluwas?

Giluwas pinaagi sa grasya

Basaha ang 2 Nephi 25:23, nga mangita kon giunsa kita pagluwas ni Jesukristo.

Ang mosunod nga seksiyon gituyo aron sa pagtabang sa mga estudyante nga mas makasabot sa grasya.

Ang dugang nga impormasyon mahitungod sa grasya anaa sa seksiyon nga “Komentaryo ug Background nga Impormasyon”.

• Unsa ang pipila ka mga pangutana nga mahimo nimong ipangutana aron makaangkon og mas lawom nga pagsabot sa mga pagtulun-an ni Nephi sa bersikulo 23?

Ikonsiderar ang pagsulat sa mga pangutana sa estudyante diha sa pisara. Mahimong mangutana sila sama sa “Unsa ang grasya?” ug “Unsa ang gipasabut nga kita maluwas human sa tanan natong mabuhat?”

Gamita ang mosunod nga materyal aron matabangan ang mga estudyante sa pagtubag sa ilang mga pangutana.

Ang grasya mao ang balaanong tabang o kalig-on nga gihatag kanato pinaagi sa Pag-ula ni Ginoong Jesukristo. …

Ang grasya mao ang gasa gikan sa Langitnong Amahan nga gihatag pinaagi sa Iyang Anak, si Jesukristo. Ang pulong nga grasya, sumala sa gigamit diha sa mga kasulatan, nagpasabot sa makaabag nga gahom ug espirituhanon nga pagpaayo nga gitanyag sa kaluoy ug gugma ni Jesukristo. (Gospel Topics, “Grace,” topics.ChurchofJesusChrist.org)

Si Presidente Dieter F. Uchtdorf, kaniadto sa Unang Kapangulohan, mipasabot:

Ako naghunahuna kon usahay sayop ba ang atong pagsabot sa hugpong sa mga pulong “human sa tanan nga atong mabuhat.” Kinahanglan nga atong sabton nga ang “human” dili makatupong sa “tungod.”

Kita wala maluwas “tungod” sa tanan nga atong mabuhat. Aduna bay usa kanato nga nakabuhat sa tanan nga atong mabuhat? Maghulat ba ang Dios hangtod atong nahatag ang tanang paningkamot sa dili pa Siya mopatunga diha sa atong mga kinabuhi uban sa Iyang makaluwas nga grasya?

Daghang tawo ang mawad-an og kadasig tungod kay sila kanunay wala makabuhat. Nasayod sila sa sinugdan nga “ang espiritu matinguhaon apan maluya ang lawas” [Mateo 26:41]. Misinggit sila uban kang Nephi sa pagpamahayag, “Ang akong kalag nagmagul-anon tungod sa akong kadautan” [2 Nephi 4:17].

Ako nakaseguro nga si Nephi nahibalo nga ang grasya sa Manluluwas nagtugot ug naghimo kanato sa pagbuntog sa sala [tan-awa sa Alma 34:31]. Maoy hinungdan nga si Nephi naghago nga makugihon sa pagdasig sa iyang mga anak ug mga kaigsoonan “sa pagtuo kang Kristo, ug aron makig-uli sa Dios” [2 Nephi 25:23].

Total, mao kana ang unsay atong mahimo! Ug kana ang atong tahas dinhi sa mortalidad! …

Karon ug sa kanunay ang grasya sa Dios anaa alang sa tanan kansang mga kasingkasing mapainubsanon ug kansang mga espiritu mahinulsolon [tan-awa sa 3 Nephi 9:19–20]. (Dieter F. Uchtdorf, “Ang Gasa sa Grasya,” Liahona, Mayo 2015, 110)

Gamita ang usa o daghan pa sa mosunod nga mga pangutana aron matabangan ang mga estudyante sa pagpaambit sa ilang mga hunahuna. Mahimong aghaton ka sa pagpangutana og follow-up nga mga pangutana o sa pagpaambit og panahon sa dihang nasinati nimo ang grasya sa Manluluwas. Mahimo usab nimong ikonsiderar ang pagpaambit og ehemplo kon sa unsang paagi ang grasya sa Manluluwas nakatabang kanimo o sa usa ka tawo nga imong nailhan.

• Unsaon nimo paghulagway ang imong mga pagbati alang sa Manluluwas, uban sa kasayuran nga ang Iyang grasya mahimo ra gayod nimong makab-ot sa personal?

• Unsa ang pipila sa mga paagi nga imong magamit ang grasya sa Manluluwas?

• Unsa nga mga aspeto sa imong kinabuhi ang mahimong lahi kon mas bation nimo ang grasya sa Manluluwas? Sa unsang mga paagi?

Pamalandongi sa makadiyot ang imong nakat-onan mahitungod ni Jesukristo nga mao lamang ang paagi nga ikaw maluwas. Unsa nga mensahe o kamatuoran ang labing importante diha kanimo o nakapahimo kanimo sa pagdayeg ni Jesukristo? Unsa ang imong gibati nga naaghat nga buhaton tungod sa imong nakat-onan ug gibati? Mahimo nimong irekord kini nga mga hunahuna diha sa imong journal sa pagtuon.

Magmaya kang Kristo

Tungod kay si Nephi nasayod sa grasya ug gahom sa Manluluwas sa pagluwas, misulat siya aron sa pagtabang sa uban nga motuo kang Kristo. Basaha ang 2 Nephi 25:26 nga mangita kon unsay atong mabuhat sa pagtabang sa uban nga motuo kang Jesukristo. Mahimo nimong markahan ang lainlaing aksiyon nga mga pulong nga gigamit niini nga bersikulo.

• Hain nga mga pulong niini nga bersikulo ang mipatigbabaw kanimo?

• Sa unsang paagi nga ang imong kinabuhi naimpluwensyahan pinaagi sa unsay gipaambit sa uban mahitungod ni Jesukristo?

• Sa unsang paagi mapalig-on ang imong relasyon ni Jesukristo pinaagi sa pagpaambit og personal nga mga pagbati mahitungod Kaniya ngadto sa uban?

Aron matabangan ang mga estudyante sa paggamit sa bersikulo 26, ikonsiderar ang pagbahin sa klase ngadto sa mga parisan o sa gagmay nga mga grupo ug dapita sila sa “[pag]hisgot kang Kristo” ngadto sa usag usa pinaagi sa pagpaambit sa ilang mga hunahuna ug mga pagbati mahitungod ni Jesukristo. Mahimo usab nga tapuson sa mga estudyante ang klase pinaagi sa pagtinagsa nga pagkompleto sa mosunod nga kalihokan:

Paghunahuna og usa ka tawo sa imong kinabuhi nga makabenepisyo gikan sa pagpahinumdom sa gugma ug grasya sa Manluluwas. Paghimo og mensahe (sama sa usa ka text, post sa social media, o personal nga sulat) nga mahimo nimong ipaambit ngadto kanila.

Komentaryo ug Background nga Impormasyon

2 Nephi 25:23. Unsaon nako nga mahimong angayan nga makadawat sa grasya sa Ginoo?

Si Elder D. Todd Christofferson sa Korum sa Napulog Duha ka Apostoles mipahinumdom kanato:

Wala kinahanglana nga mokab-ot kita og lebel sa kapasidad o kamaayo sa dili pa motabang ang Dios—ang balaang tabang atong masinati bisan kanus-a, bisan asa pa kita diha sa dalan sa pagkamasulundon. Apan nasayod ko nga lapas pa sa pagtinguha sa Iyang tabang, kinahanglan kita nga magkugi, maghinulsol, ug mopili sa Dios aron Siya makatabang gayod kanato uban sa kaangayan ug moral nga kabubut-on. Ang akong hangyo nga mahimong responsable ug molihok aron may butang nga magamit ang Dios sa pagtabang kanato. (D. Todd Christofferson, “Gawasnon sa Kahangtoran, nga Molihok alang sa Ilang Kaugalingon,” Liahona, Nob. 2014, 19)

2 Nephi 25:24–25. Unsa ang balaod ni Moises ug nganong si Nephi miingon nga kini patay?

Ang Dios naghatag og mga balaod pinaagi kang Moises sa dihang ang mga anak sa Israel napakyas sa pagsunod sa mas taas nga balaod nga gihatag kanila (tan-awa sa Exodo 32; 34; Hubad ni Joseph Smith, Exodo 34:1–2 [diha sa Hubad ni Joseph Smith appendix]). Nailhan kini isip ang balaod ni Moises. Kini naglangkob sa daghang mga lagda, mga tulumanon [ceremonies], ug mga sakripisyo nga gituyo sa pagpahinumdom kanila sa Dios ug sa ilang katungdanan ngadto Kaniya (tan-awa sa Mosiah 13:30). Daghan sa mga balaod sa tulumanon natuman sa kamatayon ug Pagkabanhaw ni Jesukristo (tan-awa sa Alma 34:13–14). Usa ka rason nga ang balaod giisip nga patay tungod kay kini dili makahatag og kaluwasan sa mga anak sa Dios. Si Jesukristo lamang ang makahimo niana. (Tan-awa sa Giya ngadto sa mga Kasulatan, “Balaod ni Moises,” scriptures.ChurchofJesusChrist.org.)

Dugang nga mga Kalihokan sa Pagkat-on

Mga Pagtulun-an sa Basahon ni Mormon mahitungod sa Grasya

Ikonsiderar ang paggamit sa pipila o sa tanan nga mosunod nga mga pakisayran aron matabangan ang mga estudyante nga makat-on mahitungod sa grasya: 2 Nephi 2:6–8; 2 Nephi 10:24–25; Jacob 4:7; Helaman 14:13; Ether 12:27; ug Moroni 10:32–33. Mahimo nimong bahinon ang mga estudyante ngadto sa mga grupo ug i-assign ang usa o daghan pa niini nga mga tudling ug hangyoa ang mga estudyante sa pag-andam sa pagpaambit kon unsay gitudlo sa mga tudling mahitungod sa grasya sa Manluluwas.

“Ang matarong nga paagi mao ang pagtuo diha kang Kristo” (2 Nephi 25:28–29)

Human mabasa ang 2 Nephi 25:18–20, ikonsiderar ang pagtabang sa mga estudyante sa pagpamalandong kon sa unsang paagi si Jesukristo mao lamang ang paagi nga kita maluwas. Dapita ang mga estudyante sa pagbasa sa 2 Nephi 25:28–29 ug hisgoti unsay ilang nakat-onan gikan sa gibalikbalik nga hugpong sa mga pulong nga “ang matarong nga paagi.”

Tabangi ang uban nga motan-aw kang Kristo

Ipakita ang hulagway ni Moises ug sa bitin nga tumbaga ug isaysay pag-usab ang istorya (tan-awa sa Numeros 21:4–9). Dapita ang mga estudyante sa paghunahuna nga nagpuyo sila uban sa mga Israelita sa panahon ni Moises sa dihang ang mga tawo gipamaak sa makahilo nga mga bitin. Pangutan-a ang mga estudyante kon unsa kaha unta ang ilang buhaton aron makombinsir ang nangapaakan og bitin nga mga Israelita sa pagtan-aw sa bitin nga gibutang ni Moises diha sa ilang atubangan. Itandi ang makahilo nga pinaakan sa bitin ngadto sa sala ug basaha ang 2 Nephi 25:26, nga mangita sa unsay gibuhat ni Nephi ug sa uban aron sa pagtabang sa uban nga modangop sa Manluluwas alang sa kapasayloan sa mga sala. Hisgoti ang mga paagi nga magamit sa mga estudyante ang bersikulo 26 sa ilang mga kinabuhi.

Ang balaod ni Moises

Dapita ang mga estudyante sa pagpangita sa 2 Nephi 25:24–30, nga mangita kon ngano nga si Nephi ug ang iyang mga katawhan misunod sa balaod ni Moises. Hisgoti kon sa unsang paagi ang nagkalain-laing mga elemento sa balaod ni Moises mipunting sa mga tawo ngadto ni Jesukristo. (Tan-awa sa Giya ngadto sa mga Kasulatan, “Balaod ni Moises,” scriptures.ChurchofJesusChrist.org.) Mahimo usab nimong hisgotan kon sa unsang paagi ang nagkalain-laing mga sugo ug mga ordinansa sa atong panahon nagpunting kanato ngadto kang Jesukristo.